人死后会点样？

1-3．关于人死后嘅情况，人会有乜嘢疑问？唔同嘅宗教有乜嘢唔同嘅讲法？

圣经预言终有一日“唔再有死亡”。（启示录21:4）我哋喺第5章学到因为赎价人有机会得到永生。但系，今日人仲系会死。（传道书9:5）所以我哋可能会问：人死后会点样？

² 如果我哋所爱嘅人死去，就会更加关心呢个问题。你可能会谂：“佢去咗边呢？佢而家系咪受紧苦？佢睇唔睇到我呢？佢能唔能够保佑我？我可唔可以再见翻佢呢？”

³ 对于呢啲问题唔同嘅宗教有唔同嘅讲法：有啲话好人会上天堂，坏人就会落地狱；有啲话人死后会去到灵界同死去嘅家人喺埋一齐；有啲就话人死后会受审判，然后投胎转世做翻人或者成为动物等等。

 4．对于人死后嘅情况，几乎所有嘅宗教都有乜嘢共通点？

⁴ 对于人死后嘅情况，睇嚟唔同嘅宗教有唔同嘅讲法。不过，几乎所有宗教所讲嘅都有一个共通点，就系人死后仲会以某种形式继续生存。呢种讲法啱唔啱？

5,6．人死后会点样？

⁵ 耶和华清楚知道人死后嘅情况，佢话俾我哋知人死嗰一刻生命就结束。死亡系生存嘅反面。当一个人死咗之后，佢冇感觉同记忆，亦都唔会喺任何地方继续生存。a死去嘅人乜嘢都睇唔到，听唔到，亦都唔可以再思考。

⁶ 圣经话死去嘅人“毫无知觉”。死咗嘅人唔能够爱同恨，喺坟墓“冇工作，冇计划，冇知识，冇智慧”。（请读传道书9:5,6,10）诗篇146:4亦都话人一死，“佢嘅思想”就消逝。

 7．关于死亡耶稣点讲？

⁷ 耶稣嘅好朋友拉撒路死咗之后，耶稣同门徒讲：“我哋嘅朋友拉撒路瞓咗”。门徒以为耶稣话拉撒路真系瞓紧觉，所以耶稣跟住话：“拉撒路死咗”。（约翰福音11:11-14）耶稣将死亡比作瞓觉。佢冇话拉撒路上咗天堂，或者同死去嘅亲人喺一齐。佢亦都冇话拉撒路喺地狱受苦，或者投胎转世成为另一个人或者动物。拉撒路死咗就好似一个人瞓得好淰。圣经嘅其他经文都有将死亡比作瞓觉。例如，圣经话司提反被杀之后“就长眠嘞”。（使徒行传7:60）使徒保罗亦都话有啲基督徒“已经长眠嘞”。（哥林多前书15:6）

 8．我哋点知道上帝冇将人造成最终会死呢？

⁸ 上帝系咪将亚当同夏娃创造成最终会死呢？唔系！耶和华创造佢哋，使佢哋享有完美嘅健康，可以永远生活落去。耶和华创造人嘅时候，使人有永远生活落去嘅愿望。（传道书3:11）做父母嘅唔想见到自己儿女衰老死亡，耶和华都有同样嘅感觉。既然上帝创造人永远生活落去，点解我哋会死呢？

 9．点解亚当同夏娃服从耶和华嘅吩咐一啲都唔难？

⁹ 喺伊甸园，耶和华同亚当讲：“园子入面各样树上嘅果，你都可以食，食到满足。只系‘辨识善恶树’嘅果，你唔可以食，因为你食咗，当日你就一定死”。（创世记2:9,16,17）呢个清晰嘅诫命对亚当同夏娃嚟讲一啲都唔难遵守，况且耶和华本来就有权决定是非对错。亚当夏娃服从耶和华就表明佢哋尊重耶和华嘅权威，亦都表明佢哋感激耶和华所赐嘅一切。

10,11．（甲）撒但点样使亚当同夏娃违反上帝嘅诫命？（乙）点解亚当夏娃唔可以为自己所做嘅错事揾借口？

¹⁰ 可悲嘅系，亚当同夏娃选择反叛耶和华。撒但同夏娃讲：“上帝系咪真系话你哋唔可以食园子入面各种树上嘅果呢？”夏娃回答话：“园子入面树上嘅果，我哋都可以食。只系园子中间嗰棵树嘅果，上帝曾经话：‘你哋唔可以食，亦唔可以摸，免得死亡。’”（创世记3:1-3）

¹¹ 然后撒但就话：“你哋一定唔会死。只不过上帝知道你哋食咗嘅话，嗰一日你哋嘅心眼就会打开，你哋会好似上帝一样，能够辨识善恶”。（创世记3:4-6）撒但想夏娃以为可以自行决定善恶标准。同时，撒但歪曲食禁果所带嚟嘅后果。撒但话夏娃唔会死，所以夏娃就食咗，仲俾埋佢丈夫食。亚当同夏娃明知耶和华吩咐过佢哋唔可以食，佢哋食咗就表明自己决定违反一个既清晰又合理嘅诫命，亦都显示佢哋唔尊重仁爱嘅天父。亚当夏娃唔可以为自己所做嘅错事揾任何借口！

12．点解亚当同夏娃反叛耶和华实在令人失望？

¹² 我哋嘅始祖唔尊重创造主，的确令人非常失望！试谂吓，如果你辛辛苦苦养大一对仔女，之后佢哋好忤逆，故意做咗啲你叫佢哋唔好做嘅事，你会有咩感觉呢？系咪好痛心呢？

13．耶和华话亚当“归回尘土”系咩意思？

¹³ 亚当同夏娃反叛耶和华之后，就失去咗永远生活落去嘅机会。耶和华同亚当讲：“你既然系尘土之身，就要归回尘土”。（请读创世记3:19）意思系亚当会再次成为尘土，就好似佢从来冇被创造过一样。（创世记2:7）所以亚当死后，就唔再存在。

14．点解我哋会死？

¹⁴ 如果亚当同夏娃冇反叛上帝，佢哋就可以生存到而家。但系佢哋犯咗罪反叛上帝，最终死去。罪就好似我哋从始祖遗传咗一种可怕嘅疾病。人人生来都有罪，所以我哋都会死。（罗马书5:12）不过，呢个唔系耶和华对人类原本嘅旨意。上帝根本就唔想人死。事实上，圣经话死亡系人类嘅“仇敌”。（哥林多前书15:26）

15．知道死亡嘅真相点样使我哋得到自由？

¹⁵ 知道死亡嘅真相使我哋得到自由，免受好多错误思想嘅影响。我哋从圣经学到死去嘅人唔会有痛苦同悲伤。我哋同死去嘅人唔能够互相沟通或者互相帮助。死去嘅人唔可以伤害我哋，所以我哋唔使惊。不过，好多宗教声称死咗嘅人喺某个地方继续生存，仲话如果我哋俾钱佢哋嗰啲有能力嘅人，就可以帮到死去嘅人。但系我哋知道死亡嘅真相，就唔会俾人欺骗。

16．关于死去嘅人，好多宗教使人相信乜嘢错误嘅道理？

¹⁶ 撒但利用错误嘅宗教欺骗人，使人相信死者会继续生存。例如，有啲宗教话人死后会有灵魂继续存在。你信嘅宗教系咪都系噉讲？抑或按照圣经所讲嘅教人？撒但利用谎言使人同耶和华疏远。

17．点解话人会喺地狱受苦呢种讲法羞辱耶和华？

¹⁷ 好多宗教所讲嘅道理令人恐惧。例如，有啲宗教话坏人会喺地狱永远受苦。噉样嘅大话羞辱咗耶和华。佢从来都唔会使人受噉嘅苦！（请读约翰一书4:8）如果一个小朋友唔听话，有人就捉住佢只手用火烧嚟惩罚佢，你会点睇呢个人？你会认为佢好残忍，唔想同佢做朋友。撒但想我哋以为耶和华就系一个噉样嘅上帝！

18．点解我哋唔使惊死去嘅人？

¹⁸ 有啲宗教话人死后会化为神灵。如果我哋敬奉呢啲神灵就会得到保护；如果唔敬奉嘅话，我哋就会得罪佢哋而受害。好多人都相信噉样嘅大话，就好惊死去嘅人，所以佢哋敬奉死人而唔系耶和华。我哋学过死去嘅人毫无知觉，所以我哋唔使惊佢哋。耶和华系我哋嘅创造主，佢先至系真神，我哋应该唯独崇拜佢。（启示录4:11）

19．知道死亡嘅真相对我哋有乜嘢益处？

¹⁹ 知道死亡嘅真相，我哋就唔使再受虚假嘅宗教道理所蒙蔽。圣经嘅真理帮助我哋明白，耶和华嘅美好应许同我哋息息相关，为我哋嘅未来带嚟光明嘅前途。

20．下一章我哋会学到乜嘢？

²⁰ 好耐之前，一位上帝嘅忠仆约伯问：“人死咗能唔能够再活？”（约伯记14:14）究竟死咗嘅人有冇机会重获生命呢？圣经嘅答案令人充满希望。下一章会详细解释。