LECCIÓN 03
¿Ñee zanda guni crenu ni ná Biblia la?
Lu Biblia zeeda stale promesa ne conseju. Zándaca maʼ nuuluʼ gánnaluʼ xi rusiidini. Peru laaca zándaca guinabadiidxaluʼ. ¿Ñee zanda guni crenu ca promesa ne conseju stiʼ ti libru ni gucuá maʼ xadxí la? ¿Dxandíʼ nga zanda guibáninu nayecheʼ casi rusiidiʼ Biblia la? Stale binni runi cré zacá nga laani. Ra maʼ ziziidiluʼ, stúbiluʼ zudiiluʼ cuenta xiñee riníʼ íquecabe zacá ne pa zuni convencer ni lii.
1. ¿Ñee dxandíʼ nga bizaaca guiráʼ ni zeeda lu Biblia la?
Lu Biblia zeeda «diidxaʼ ni dxandíʼ» ne biaʼsi peʼ nga modo gucuá ni (Eclesiastés 12:10). Dxandíʼ nga bizaaca guiráʼ relatu cá luni ne dxandíʼ bibani ca binni ruzeeteni (biindaʼ Lucas 1:3 ne 3:1, 2). Stale historiador ne arqueólogo maʼ guniʼcaʼ biaʼsi ca fecha zeeda lu Biblia, dxandíʼ bibani ca binni ruzeeteni, dxandíʼ nuu ca lugar ca ne dxandíʼ bizaaca guiráʼ ni riete luni.
2. ¿Xiñee zanda guni crenu ni ná Biblia neca maʼ xadxí de gucuá ni?
Maca bizeeteʼ Biblia caadxi cosa ni qué ganna guirutiʼ dxi gucuá. Tobi de ca tema ni riniʼni nga de ciencia, neca dxi gucuá ni huaxiéʼ tu biʼniʼ cré pa dxandíʼ ni ruzeeteʼ Biblia de ciencia. Peru ca dxi riʼ, maʼ bihuinni biaʼsi nga ni cá lu Biblia ne ni rusiidiʼ ciencia. Ne zanda guni crenu ni «yanna ne para siempre» (Salmo 111:8).
3. ¿Xiñee zanda guni crenu dxandíʼ ni caníʼ Biblia de ni chiguizaaca despué?
Lu Biblia zeeda profecíaa ni caníʼ de «ca cosa ni caʼruʼ gaca» (Isaías 46:10). Stale cosa risaca ni bizaaca dxiqué, maca dede ante bizeeteʼ Biblia zazaaca ni. Peru laaca ruzeeteni ximodo zabani binni ca dxi riʼ, lu lección riʼ zadúʼyanu caadxi profecía, ne zadxagayaaluʼ ora gúʼyaluʼ pabiáʼ biaʼsi modo guca cumplir cada tobi de laani.
GUIZÍʼDIRUNU JMA
Guidúʼyanu ximodo biaʼsi nga ni ná Biblia ne ni rusiidiʼ ciencia ne guidúʼyanu ximodo guca cumplir caadxi profecía zeeda luni.
4. Rusihuinni ciencia dxandíʼ nga ni zeeda lu Biblia
Maʼ raca stale iza, stale binni biʼniʼ cré nuu xiixa ni nuaʼ Guidxilayú. Laguuyaʼ VIDEU riʼ.
Biiyaʼ xi gucuá lu libru stiʼ Job raca biaʼ 3,500 iza. Laguundaʼ Job 26:7 ne laiquiiñeʼ pregunta riʼ para güitu diidxaʼ:
¿Xiñee ridxagayaanu ora gánnanu maca cá lu Biblia gastiʼ nuaʼ Guidxilayú?
Raca biaʼ 200 iza nga biene chaahuiʼ hombre xii nga ciclo del agua, peru biiyaʼ xi guníʼ Biblia de laani raca mil de iza. Laguundaʼ Job 36:27, 28 ne laiquiiñeʼ ca pregunta riʼ para güitu diidxaʼ:
¿Xi jma guyuuláʼdxiluʼ de modo rusiene Biblia xii nga ciclo del agua?
¿Ximodo rábiluʼ zacané ca textu riʼ lii guni creluʼ ni ná Biblia?
5. Maca ruzeeteʼ Biblia zazaaca caadxi cosa
Laguundaʼ Isaías 44:27-45:2 ne laiquiiñeʼ pregunta riʼ para güitu diidxaʼ:
¿Xi maca cá lu Biblia zazaaca 200 iza ante guinitilú Babilonia?
Maʼ bihuinni dxandíʼ bizaaca ni guca lu iza 539 ante de ca dxi stiʼ Jesús. Ti rey de Persia láʼ Ciro ne ejércitu stiʼ binitilucaʼ guidxi Babilonia. Primeru guleechúcabe guiiguʼ stini. Ne cumu biaanaxeleʼ ca puertaʼ stiʼ guidxi Babilonia la? gunda guyuucabe para gunitilúcabe ni. Neca maʼ gudiʼdiʼ jma de 2,500 iza de bizaaca ndiʼ la? dede yanna rihuinni ximodo biaana guidxi Babilonia despué de binitilú. Guidúʼyanu xi maca guníʼ Biblia chiguizaaca.
Laguundaʼ Isaías 13:19, 20 ne laiquiiñeʼ pregunta riʼ para güitu diidxaʼ:
¿Ximodo guca cumplir profecía riʼ?
Ni biaana de guidxi Babilonia, ni runibiáʼcabe casi Irak yanna
6. Maca guníʼ Biblia xi zazaaca ca dxi stinu riʼ
Biblia ná nabáninu lu «ca últimu dxi» (2 Timoteo 3:1). Biiyaʼ xi ruzeeteni zazaaca ca dxi stinu riʼ.
Laguundaʼ Mateo 24:6, 7 ne laiquiiñeʼ pregunta riʼ para güitu diidxaʼ:
¿Xi ruzeeteʼ Biblia zazaaca ca últimu dxi riʼ?
Laguundaʼ 2 Timoteo 3:1-5 ne laiquiiñeʼ ca pregunta riʼ para güitu diidxaʼ:
Casi ruzeeteʼ Biblia, ¿ximodo zaca ca binni ni guibani ca últimu dxi riʼ?
¿Huayuuyaluʼ clase binni ruzeeteʼ textu riʼ la? ¿Gunáʼ nga ni huayuuyaluʼ?
NUU TU NÁ: «Puru cuentu si nga ruzeeteʼ Biblia».
¿Xii nga ni jma rucaa lii guni creluʼ dxandíʼ ni zeeda lu Biblia?
XI BIZÍʼDINU
Ni rusiidiʼ ciencia, guiráʼ ni bizaaca dxiqué ne ni cazaaca yanna rusihuínnini zanda guni crenu ni ná Biblia.
Xi biziidiluʼ
¿Ñee dxandíʼ bizaaca guiráʼ ni zeeda lu Biblia la? o puru cuentu si ni?
¿Ximodo rusihuinni ciencia biaʼsi nga ni ná Biblia?
¿Ñee rábiluʼ zanda gabi Biblia laanu xi chiguizaaca despué la? ¿Xiñee riníʼ íqueluʼ zacá yaʼ?
BIIYAʼ XIRUʼ ZANDA GUIZIIDILUʼ
Pur ni riníʼ ca científicu, ¿ñee dxandíʼ nga ni ná Biblia la?
«¿Ñee biaʼsi nga ni ná Biblia ne ni rusiidiʼ ciencia la?» (Tema ni zeeda lu jw.org)
¿Xi cusihuinni maʼ nabáninu lu «ca últimu dxi»?
«Xhoopaʼ profecía zeeda lu Biblia ni maʼ cayaca cumplir» (Torre stiʼ ni rapa, 1 de mayo de 2011)
Biiyaʼ ximodo guca cumplir ca profecía ni caníʼ de ca rey stiʼ Grecia.
Biiyaʼ ximodo gucané ca profecía zeeda lu Biblia ti hombre guchaa ni riníʼ ique de Biblia.
«Qué ñuneʼ cré pa nuu Dios» (Torre stiʼ ni rapa, núm. 5 2017)
a Ca profecía ca rabi laanu xi ná Dios chiguizaaca despué.