Né ca diidxaʼ ni guníʼ apóstol Juan riʼ cayabi laanu guiníʼ íquenu pabiáʼ nadxii Jiobá laanu ne ximodo rusihuinni Jiobá ni. Pa guiníʼ íquenu ndiʼ jma zaca xhamígunu Dios ne jma zannaxhiinu laa. Triste guininu ni, peru nuu binni qué runi cré pa nadxii Jiobá laa. Riníʼ íquecaʼ qué rizaalaʼdxiʼ Dios laacaʼ. Runi crecaʼ riguixhe si Dios ley ne runi castigar cani qué rinanda ca ley stiʼ. Nuu religión rusiidiʼ nabé malu Dios. Nga runi stale binni riníʼ ique qué zanda gannaxhiinu laabe. Peru xcaadxi riníʼ ique nadxii Dios guiráʼ binni neca gúnicaʼ intiica cosa. Peru cumu laanu ridúʼndanu Biblia la? nánnanu ni dxandíʼ de Jiobá. Biblia ná laabe nga guendarannaxhii ne pur nga biseendabe Xiiñibe beeda gati pur laanu (Juan 3:16; 1 Juan 4:8). w15 15/9 4:1, 2

Peru naquiiñeʼ gudiʼnu lugar gulidxe Jiobá laanu. Zacá zazíʼdinu gúninu ni jneza ne zatadxí ladxidoʼno. Para gusihuínninu nadxiinu Jiobá la? naquiiñeʼ guicaanu ca conseju stibe sin guidxiichinu. Stale binni nabé rudxiibaʼ laca laa ne ruyubi puru si para laa lu Guidxilayú riʼ. Stale binni qué riuulaʼdxiʼ gulídxecabe laa o qué riuulaʼdxiʼ gábicabe laa xi naquiiñeʼ guni. Ne ora tuuxa ricaa xiixa conseju, qué runi ni de guidubi ladxidóʼ. Peru Biblia cayabi laanu cadi gúninu zacá. Naquiiñeʼ guizíʼdinu xi racalaʼdxiʼ Jiobá gúninu ne guzúʼbanu stiidxaʼ (Rom. 12:2). Laabe riquiiñebe xquídxibe para gudiibe conseju laanu ora caquiiñenu ni. Rábibe ca hombre ximodo naquiiñeʼ guni tratar ti gunaa ne ximodo guni tratar ti gunaa ti hombre, ximodo cuinu tu gaca xhamígunu ne gánnanu cuinu xi deporte quítenu, xi guidúʼyanu ne xi gucaʼdiáganu. Ora rudiʼnu lugar gulidxe Jiobá laanu ne guchaʼnu modo laanu para gusiéchenu laabe la? rusihuínninu cudiʼnu xquíxepeʼ laabe pur ca conseju rudiibe laanu ne nadxiinu laabe (Juan 14:31; Rom. 6:17). w15 15/9 5:13, 15

Pa racaláʼdxinu gaca fe stinu naguidxi la? naquiiñeʼ guinábanu Dios gudii laanu espíritu santu. Xiñee yaʼ. Purtiʼ fe riʼ nga tobi de ca guenda ni rudii espíritu (Gál. 5:22). Ne bisietenalaʼdxiʼ Jesús laanu guinábanu Jiobá gudiiruʼ laanu espíritu stiʼ ne laaca guniʼbe rudii Dios ni guiráʼ binni guinabaʼ ni laa (Luc. 11:13). Yanna, pa maʼ naguidxi fe stinu yaʼ. Pa zacá ni la? naquiiñeʼ gúninu stipa para cadi guirá ni. Xiñee yaʼ. Purtiʼ zeeda gaca fe riʼ casi ti bele. Primé la? zándaca naroʼbaʼ bele riʼ. Peru, pa qué ugúʼrunu yaga luni la? zazuíʼ ni. Ngaca nga ni rizaaca né fe stinu. Pa qué racaláʼdxinu guirá ni la? naquiiñeʼ guidúʼndanu ne guni estudiarnu Biblia guiráʼ dxi. Zacatiʼ nga zannaxhiinu Jiobá jma ne zannaxhiinu Biblia, ne zaca fe stinu jma naguidxi. w15 15/10 2:6, 7