Maʼ gadxé tiempu bibani Moisés, David ne Juan ne gadxé gadxé modo biniisicaʼ qué laanu. Peru nuu ra zanda guchaaganu xquendanabánicabe ne xquendanabáninu. Bíʼnicabe ni ná Dios ni dxandíʼ ne laanu laaca ngaca rúninu. Cásica laacabe, laanu laaca runi adorarnu Jehová, rápanu confianza laa ne ruyúbinu gacané ca conseju stiʼ laanu. Ne cásica laacabe nanna dxíchinu guizáʼ riguu Jehová ndaayaʼ ca ni ruzuubaʼ stiidxaʼ. Nga runi gucaadiáganu ca últimu diidxaʼ ni guníʼ ca hombre riʼ ne chinándanu ca mandamientu stiʼ Jehová. Zacá zaree guiráʼ ca ni gúninu jneza, zabáninu «xadxí», ya, sin qué chuʼ dxi gátinu. Ne ziéchenu purtiʼ zusiéchenu Bixhózenu ni nuu guibáʼ ni nabé nadxii laanu ni runi cumplir ca promesa stiʼ. ¡Dede qué zanda guiníʼ íquenu guiráʼ ca ndaayaʼ ni chigudiibe laanu! (Efes. 3:20). w24.11 13 párr. 20, 21

Lu primé siglu que guyuu caadxi hermanu ni guca nombrar siervu ministerial (1 Tim. 3:8). Zándaca laacabe nga «ca ni racané stobi» ni bizeeteʼ apóstol Pablo. Ne ca hermanu riʼ nga bíʼnicaʼ caadxi dxiiñaʼ ni naquiiñeʼ gaca para ganda gusiidiʼ ca ancianu ne gápacaʼ ca dendxuhuiiniʼ stiʼ Dios. Zándaca ca siervu ministerial que nga racanecaʼ para gaca ca copia stiʼ Stiidxaʼ Dios o risicaʼ ca cosa ni caquiiñeʼ para gaca ca copia que. ¿Gunáʼ nga caadxi dxiiñaʼ ni runi ca siervu ministerial ca dxi stinu riʼ? (1 Ped. 4:10). Zándaca rinécabe cuenta de donación stiʼ congregación, ruuyacabe ca territorio ni raca predicar, rinábacabe publicación ne riguiizicabe ni lu ca publicador, racanécabe lu sonidu, rácacabe acomodador o racanécabe lu mantenimientu stiʼ Yoo stiʼ Reinu. Risaca guiráʼ dxiiñaʼ riʼ para gapa congregación ca reunión stiʼ ne gaca predicar jma jneza (1 Cor. 14:40). w24.10 19 párr. 4, 5

Zanda guni huantarnu intiica guendanagana neca gácani naroʼbaʼ pa guietenaláʼdxinu dxandíʼ nabani Jehová ne nuu listu para gacané laanu. Zanda gacanebe laanu purtiʼ laabe nga Dios ni jma napa poder ne zanda gudiibe laanu stipa para guni huantarnu intiica si ni guidxaagalunu. Nga runi, racané ca ni bizéʼtenu ca laanu gudxíʼlunu ca guendanagana stinu sin guidxíbinu. Ora guidúʼyanu racané Jehová laanu gudxíʼlunu ca guendanagana nahuiiniʼ ni cadxaagalunu, racaneni laanu chuʼnu seguru zacanebe laanu ora guidxaagalunu guendanagana jma naroʼbaʼ. Guidúʼyanu chupa cosa ni bizaaca rey David ne xi gucané laabe gápabe jma confianza Jehová. Dxi joven David ne rapa dendxuʼ, ziné ti lión tobi de ca dendxuʼ stiʼ bixhózebe, ne sti biaje la? ti oso ziné tobi de laacame. Guiropaʼ biaje riʼ, guca David nadxibalú ne guzanándabe ca maniʼ que ne gúxhabe laacame ca dendxuʼ que. Nánnabe Jehová ngue bidii laabe stipa para gulabe ca manihuiiniʼ que, ngue runi qué niniʼbe stúbisibe bíʼnibe ni (1 Sam. 17:34-37). Guníʼ ique David ca cosa ni bizaaca que ne gucaneni laabe guni crebe zacané Dios laabe despué. w24.06 21 párr. 5, 6