Napa binni esperanza

«Lu ca últimu dxi ca jma nagana zaca tiempu ne nadipaʼ zaca para binni guni huantar ni» (2 TIMOTEO 3:1).

¿ÑEE MAʼ gudíʼdiluʼ lu ca guendanagana riʼ, o maʼ huayunadiágaluʼ de laacani la?

● Ti guendahuará ni ruuti stale binni.

● Guendarindaana ni ruuti stale binni.

● Stale binni rati ne xcaadxi riaanacaʼ sin lídxicaʼ ora raca ti xu roʼ.

Lu revista riʼ zadúʼyanu pabiáʼ cayuni sufrir binni pur ca desgracia riʼ. Ora gúʼndaluʼ revista riʼ, zudiiluʼ cuenta maca bizeeteʼ Biblia zazaaca guiráʼ ca desgracia riʼ «lu ca últimu dxi».a

Ora gúʼndaluʼ revista riʼ zudiiluʼ cuenta nuu esperanza galán para lii ne ora gúʼndaluʼ ximodo chiguni cumplir Dios xhoopaʼ profecía riʼ, zudiiluʼ cuenta mayaca guiluxe «ca últimu dxi» riʼ. Laaca zadúʼyanu xi riníʼ binni ne xi razón nuu para guni crenu zabáninu jma galán despué.

[Nota]

1. Xu roʼ

«Zaca xu roʼ» (LUCAS 21:11).

● Dxi guca ti xu roʼ ndaaniʼ guidxi Haití, binadiaga caadxi binni ni rutiidiʼ noticia casi ora cayuunaʼ tuuxa lade ca escombro que, gúcasini Winnie, ti dxaapahuiiniʼ de ti iza arondaʼ, gunda guleecabe dxaapahuiiniʼ riʼ lade ca escombro que, peru gutiʼ bixhózebe ne jñaabe.

¿CAADXI DE CA DATU NI NÁPANU? Dxi guca ti xu roʼ guidxi Haití lu beeu enero de 2010, ni guca de gadxe gradu, gutiʼ jma 300,000 binni ne 1,300,000 biaana sin lidxi. Neca nabé feu ni bizaaca riʼ, guca ruʼ xu roʼ. Dede lu abril de 2009 hasta abril de 2010 guca biaʼ dieciocho xu roʼ lu guidubi Guidxilayú.

NI RINÍʼ BINNI. Qué raca jma xu roʼ que dxiqué, purtiʼ tiempu riʼ jma racané ca tecnología ca laanu gánnanu ora chiguizaaca ti desastre.

¿ÑEE BIAʼSI NI RINÍʼ BINNI LA? Cadi guiaandaʼ laanu qué ruzeeteʼ pe’ Biblia panda xu roʼ chigaca lu ca últimu dxi riʼ, sínuque riniʼni «zaca xu roʼ ti lugar ne sti lugar» ne guizáʼ zadxagayaa binni ora guizaaca ca ni (Marcos 13:8; Lucas 21:11).

¿XI RÁBILUʼ? ¿Ñee cazaaca ca xu roʼ casi maca cá lu Biblia la?

Zándaca guiníʼ binni qué rusihuinni ca xu roʼ ca nabáninu lu ca últimu dxi, peru ni dxandíʼ la? laani nga ti profecía ni cayaca cumplir. Guidúʼyanu sti profecía zeeda lu Biblia.

[Ni caníʼ/Epígrafe]

«[Laadu ca geofísico] runibiaʼdu ca ni casi xu roʼ, peru stale binni ruuyaʼ ca ni casi ti cosa nabé feu». (KEN HUDNUT, SERVICIO GEOLÓGICO DE ESTADOS UNIDOS)

[Ra zeeda lá cani bidii o bisigaʼdeʼ imagen]

© William Daniels/Panos Pictures

2. Hambre

«Ziuu hambre» (MARCOS 13:8).

● Yendá ti hombre ndaaniʼ ti guidxihuiiniʼ láʼ Quaratadji (Níger), purtiʼ gastiʼ guendaró xquídxibe, laaca yendá ca xprímube, ca bíʼchibe ne ca bizáʼnabe raqué, peru ora bíʼyabe laacaʼ biábabe layú, ¿xiñee yaʼ? Sidi, jefe stiʼ guidxihuiiniʼ ca ná: «Purtiʼ qué ganda diʼ gudiibe ni gó familia stibe, ne pur nga qué gápabe valor para guyadxibe laacaʼ».

¿CAADXI DE CA DATU NI NÁPANU? Tobi de cada gadxe binni nuu lu Guidxilayú qué gapa ni gó, ne jma nagana rácani ndaaniʼ África subsahariana, racá tobi de cada chonna binni qué rizaa ni gó. Guzéʼtenu ti ejemplu, ndaaniʼ ti familia ra nuu hombre, gunaa ne ti xiiñicaʼ, nuu guendaró para chupa de laacabe, ¿tu tobi de laacabe riaana sin gó, ¿hombre ca la? o xheelaʼ? Pue nga nga ni rizaaca stale familia guiráʼ dxi.

¿NI RINÍʼ BINNI? Rudii Guidxilayú riʼ stale guendaró para guiráʼ binni, ni caquiiñeʼ si gúninu nga gánnanu ximodo iquiiñenu ni, ti gapa guiráʼ binni ni gó.

¿ÑEE BIAʼSI NI RINÍʼ BINNI LA? Stale gobiernu huayuni stipa gapa binni ni gó ti cadi gáticaʼ de hambre, peru qué huayanda diʼ gúnicaʼ ni.

¿XI RÁBILUʼ? ¿Ñee biaʼsi ca diidxaʼ ni zeeda lu Marcos 13:8 la? Neca nuu stale tecnología tiempu riʼ, ¿ñee nuuruʼ lugar qué gapa binni ni gó la?

Ca xu roʼ ne hambre ni nuu ndaaniʼ stale guidxi rusihuínnicani maʼ nabáninu lu ca últimu dxi.

[Ni caníʼ/Epígrafe]

«Stale de ca xcuidi ni rati pur neumonia, yuubaʼ ndaaniʼ ne xcaadxi guendahuará, ñanda nilacaʼ pa ñaca nizaa ni rocaʼ». (ANN M. VENEMAN, EX DIRECTORA EJECUTIVA DE UNICEF)

[Ra zeeda lá cani bidii o bisigaʼdeʼ imagen]

© Paul Lowe/Panos Pictures

3. Guendahuará

«Guiráʼ clase guendahuará ti lugar ne sti lugar» (LUCAS 21:11).

● Bonzali, ti funcionariu ni runi dxiiñaʼ ndaaniʼ ti guidxi nuu África, biʼniʼ guiráʼ ni nuu lu náʼ para gusianda caadxi mineru ni cayati pur ti virus ni láʼ Marburgo.a Gúdxibe ca binni ni ruuyaʼ de ca guendahuará riʼ ni cazaaca que, peru biindacaʼ tapa beeu para bilábicaʼ laabe, ne ora yendacaʼ raqué, maʼ gutiʼ Bonzali, purtiʼ gucuá virus que laabe ra gucaláʼdxibe ñacanebe ca mineru que.

¿CAADXI DE CA DATU NI NÁPANU? Ca guendahuará ni ricá casi neumonia, yuubaʼ ndaaniʼ, sida, tuberculosis ne paludismo nga caadxi de ca guendahuará jma malu ni huayuuti stale binni. Ca guendahuará riʼ biiticani once millón de binni lu iza 2004, o zanda guininu cada chonna segundu biitini ti binni.

¿NI RINÍʼ BINNI? Zidale binni lu Guidxilayú, nga runi qué zanda diʼ gucueezanu gaca huará stale binni.

¿ÑEE BIAʼSI NI RINÍʼ BINNI? Neca zidale binni lu Guidxilayú, laaca nuu aparatu ra zanda guʼyaʼ binni xi guendahuará napa, ra guni controlar ca doctor guendahuará stícabe ne aparatu ni zanda gacané laacabe guiándacabe. Peru lugar de nixiéʼcani la? laga zeʼ dxi jmaruʼ stale nuu.

¿XI RÁBILUʼ? ¿Ñe nabaninenu ca guendahuará ni maca riete lu Biblia la?

Runiná xu roʼ, hambre ne ca guendahuará stale millón de binni, xcaadxi binni racaná pur xcaadxi cosa casi laacani, ne nuu de laacabe ruquiichináʼ binni laacabe. Guidúʼyanu xi ná ca profecía zeeda lu Biblia de laacani.

[Nota]

[Ni caníʼ/Epígrafe]

«Nabé feu guxuuxe ti lión lii, peru jma feu guniná ti guendahuará lii ne qué ganda gúniluʼ gastiʼ». (MICHAEL OSTERHOLM, EPIDEMIÓLOGO)

[Ra zeeda lá cani bidii o bisigaʼdeʼ imagen]

© William Daniels/Panos Pictures

4. Zará guendarannaxhii ndaaniʼ familia

«Zuyubi binni puru si para laa [...]. Qué zannaxhiicaʼ binni ne qué zanacaʼ chuʼcaʼ de acuerdu» (2 TIMOTEO 3:1-3).

● Chris, ti gunaa ni runi dxiiñaʼ ra ti asociación ni racané ca gunaa ni riguiiñeʼ xheelaʼ laa, ni riaana ladu guiaʼ de guidxi Gales, guníʼ: «Ti dxi beeda ti gunaa dede qué ñanda ñunebiaʼyaʼ laa tantu gudiiñeʼ xheelabe laabe ne xcaadxi gunaa runi maltratárcabe laacaʼ dede qué ganda rindisaʼ lucaʼ».

¿CAADXI DE CA DATU NI NÁPANU? Ndaaniʼ ti guidxi nuu África jma de 30 por ciento de ca gunaa huayuni sufrir abuso sexual dxi nahuiiniʼ, ne laaca ndaaniʼ guidxi ca stale hombre riníʼ cadi malu quíñecaʼ xheelacaʼ. Peru cadi ca gunaa si runi maltratárcabe laacaʼ. Ndaaniʼ guidxi Canadá, jma de treinta por ciento de ca hombre riguiiñeʼ xheelacaʼ laacaʼ.

NI RINÍʼ BINNI. Maʼ xadxí nga riguiiñeʼ binni xheelaʼ, peru yanna jma rulábicabe ni.

¿ÑEE BIAʼSI NI RINÍʼ BINNI LA? Lu ca últimu iza riʼ, maʼ guníʼ binni cadi jneza guniná tuuxa xheelaʼ, peru ¿ñee huayacané nga cadi guniná tuuxa xheelaʼ la? Coʼ. Purtiʼ ra zidiʼdiʼ dxi, jma zirá guendarannaxhii ndaaniʼ familia.

¿XI RÁBILUʼ? ¿Ñee cayaca cumplir ni ná 2 Timoteo 3:1-3 la? ¿Ñee dxandíʼ nga qué zanda gannaxhii binni familia stiʼ la?

Sti profecía ni cayaca cumplir caniʼni de Guidxilayú ra nabézanu riʼ. Guidúʼyanu xi rusiene Biblia de laani.

[Ni caníʼ/Epígrafe]

«Stale binni qué riná guni denunciar ora riguiiñeʼ xheelaʼ laa. Ti encuesta ná biaʼ treinta y cinco biaje runi huantar ti gunaa quiñe xheelaʼ laa ante guni denunciarbe laa». (NI GUNÍʼ TI HOMBRE DE GUIDXI GALES NI RACANÉ BINNI NI RUNINÁCABE LAA NDAANIʼ FAMILIA STIʼ).

5. Canitilú guidxilayú

Zunítiluʼ Dios «ca ni cunitilú guidxilayú» (APOCALIPSIS 11:18)

● Rutoo Pirri vinu de palma ndaaniʼ guidxi Kpor (Nigeria), peru maʼ qué rutoobe purtiʼ bixii petróleo lu delta de Níger ne maʼ bininani ca palmera ni nuu ndaaniʼ guidxi ca. Sicaríʼ guniʼbe: «Ruutini ca benda, runinani piel stinu ne laaca runi biidini ca guiiguʼ nuu raríʼ. Qué gannaʼ diaʼ xi sti dxiiñaʼ guneʼ para guibaneniaʼ».

¿CAADXI DE CA DATU NI NÁPANU? Ca binni ni ruuyaʼ ni raca ndaaniʼ Guidxilayú nacaʼ guiráʼ iza rusaʼbiʼ binni jma de xhoopaʼ millón tonelada guixi lu nisadóʼ. Ne 50% de guixi ni rusáʼbicabe nácani plásticu ne rindaa stale iza para guiayani. Runi contaminar binni Guidxilayú ne laaca rucueezacaʼ gudiini ni gó binni. Ca especialista nacaʼ caquiiñeʼ tidiʼ diecisiete beeu para cuee Guidxilayú guiráʼ cosa ni rusaʼbiʼ binni lu ti iza. Ti periódicu de Australia ni láʼ Sydney Morning Herald bizeeteʼ: «Pa chuʼruʼ jma binni ndaaniʼ Guidxilayú ne guni biidicani la? para lu iza 2035 zaquiiñenu chupa Guidxilayú».

¿NI RINÍʼ BINNI? Nuu xpiaaniʼ binni, zanda guni chaahuicaʼ Guidxilayú ne zacá cadi guinitiluni.

¿ÑEE BIAʼSI NI RINÍʼ BINNI LA? Huayuni ca grupu ecologista stipa cadi guni contaminar binni Guidxilayú, peru ganda diʼ gucueezacabe ni.

¿XI RÁBILUʼ? ¿Ñee caquiiñeʼ peʼ guni chaahuiʼ Dios Guidxilayú riʼ casi modo maca guníʼ la?

Maʼ bidúʼyanu gaayuʼ profecía cayaca cumplir tiempu riʼ, peru laaca ruzeeteʼ Biblia caadxi cosa galán zazaaca lu ca últimu dxi riʼ. Guidúʼyanu tobi de laacani.

[Ni caníʼ/Epígrafe]

«Dxiqué bibaneʼ lu ti paraísu, peru yanna ruluíʼ nabaneʼ lu ti basureru». (NI GUNÍʼ ERIN TAMBER, TI BINNI NI NABEZA COSTA SUR DE ESTADOS UNIDOS, DESPUÉ DE BIXII PETRÓLEO LU GOLFO DE MÉXICO LU IZA 2010).

[Cuadru]

¿Ñee napa Dios donda la?

Maʼ bidúʼyanu ruzeeteʼ Biblia zazaaca cosa feu lu ca últimu dxi riʼ, peru ¿ñee riníʼ ndiʼ napa Dios donda pur cayuni sufrirnu la? Zadxélaluʼ respuesta stiʼ pregunta riʼ pa gúʼndaluʼ capítulo 11 stiʼ libru ni láʼ ¿Xi rusiidiʼ Biblia laanu?, ni biʼniʼ ca testigu stiʼ Jehová.

[Ra zeeda lá cani bidii o bisigaʼdeʼ imagen]

U.S. Coast Guard photo

6. Cayaca predicar lu guidubi guidxilayú

«Zaca predicar ca noticia galán stiʼ Reinu lu guidubi guidxilayú» (MATEO 24:14)

● Nabeza Vaiatea lu ti isla riaana lu Pacífico, nuuni lu archipiélago de Tuamotú. Naroʼbaʼ isla riʼ biaʼ 803,000 kilómetru cuadradu ne nabeza 16,000 binni raqué. Neca nabé zitu ni, riganna ca testigu stiʼ Jehová Vaiatea ne ca vecinu stiʼ. ¿Xiñee yaʼ? Purtiʼ racaláʼdxicaʼ gusiidicaʼ binni de Reinu stiʼ Dios, gastiʼ naca paraa nabézacaʼ.

¿CAADXI DE CA DATU NI NÁPANU? Runi predicar ca testigu stiʼ Jehová Reinu stiʼ Dios lu guidubi Guidxilayú. Lu iza 2010 biʼniʼ predicarcaʼ jma de ti mil xhoopaʼ gayuaa millón hora ndaaniʼ 236 guidxi ne territorio, ndiʼ riníʼ bíʼnicaʼ ti promediu 30 minutu pur cada testigu stiʼ Jehová. Ne chii iza ante bisaananécabe binni jma de gande millón publicación ni caníʼ de Biblia.

¿NI RINÍʼ BINNI? Maʼ stale iza de runi predicar ca testigu stiʼ Jehová.

¿ÑEE BIAʼSI NI RINÍʼ BINNI LA? Dxandíʼ nga huayuni binni stipa guni predicar mensaje stiʼ Biblia. Peru stale de laacaʼ huayúnicaʼ ni pur ti tiempu ne cadi lu guidubi Guidxilayú. Peru ca testigu stiʼ Jehová, runi predicarcaʼ millón de binni lu guidubi Guidxilayú. Ne cayúnicaʼ dxiiñaʼ riʼ neca nuu tu racalaʼdxiʼ gucueeza laacaʼ (Marcos 13:13).a Laaca ribee ca Testigu tiempu para guni predicarcaʼ, gusaananecaʼ binni publicación ne qué rutoocaʼ ni. Randa raca dxiiñaʼ riʼ pur ca donación rudii binni de guidubi ladxidóʼ.

¿XI RÁBILUʼ? ¿Ñee cayaca predicar «ca noticia galán stiʼ Reinu lu guidubi Guidxilayú» la? Ra cayaca cumplir profecía riʼ, ¿ñee riniʼni zabáninu jma galán despué la?

[Nota]

[Ni caníʼ/Epígrafe]

«Dede ra gudii Jehová lugar, zuni predicarnu ca noticia galán stiʼ Reinu né stale gana ne zuyúbinu modo guinínenu guiráʼ binni nuu lu guidubi Guidxilayú». (ANUARIO DE LOS TESTIGOS DE JEHOVÁ 2010)

Mayaca guibáninu jma galán

«Maʼ xcaadxi si tiempu cayaadxaʼ, ne maʼ qué ziuu binni malu [...]. Peru ca ni nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale paz» (SALMO 37:10, 11).

Guiranu nga ñuuláʼdxinu nidúʼyanu dxi ñaca cumplir profecía riʼ. Ne nuu razón para guni crenu maʼ cadi candaa zaca cumplir ni.

Lu revista riʼ bidúʼndanu caadxi profecía ni rusihuinni maʼ nabáninu «lu ca últimu dxi» (2 Timoteo 3:1-5). Gudxi Dios ca hombre ni bicaa Biblia gucaacaʼ guiráʼ ca profecía riʼ ti zacá gápanu esperanza (Romanos 15:4). Ra gaca cumplir ca profecía riʼ, zusihuínnicani maʼ cadi candaa zaree guiráʼ ca guendanagana ni nápanu.

¿Xi chiguizaaca despué de ca últimu dxi yaʼ? Zuni mandar Reinu sti Dios binni Guidxilayú (Mateo 6:9, 10). Biiyaʼ xi ná Biblia chiguni Reinu riʼ:

● Qué ziuu hambre. «Ziuu stale biidxiʼ lu guidxilayú; lu ca dani ca jma stale ziuu» (Salmo 72:16).

● Qué ziuu guendahuará. «Guirutiʼ tu cueza racá zaníʼ: “Huaraʼyaʼ”» (Isaías 33:24).

● Ziuu ni gó binni «Desiertu ne ra gastiʼ nisa ziéchecaʼ, ne ra napampa casi desiertu ziuu nayecheʼ, ne zudii guieʼ casi asafrán» (Isaías 35:1).

Ca ni bizéʼtenu riʼ nga caadxi de ca profecía nabé galán ni maʼ cadi candaa chigaca cumplir. Pa racaláʼdxiluʼ gánnaluʼ jma, gunabaʼ ti testigu stiʼ Jehová gusiene lii xiñee nuu seguru maʼ cadi candaa zaca cumplir guiráʼ ca profecía riʼ.