Lofu l’ape, Ngɔndɔ k’atano 14
Yehova . . . nkɔpaka onto wokilika akambo wa sii.—Woo. 15:9.
Ntsha tonangha la wolo djɛ nkotshɛ okoma ɔmɔtshi l’olemo wɔ Yehova, tokindjɛ ndjila welo djɛ nkotshɛ okoma wɔkɔ. Nghɔsɔ ndeke oyɛwɔ kaanga winá w’okilikaso kɛnɛ kelekɔ́ wɔlɔ. Lonkina Yehova angotokotshɛ la balentshitshi nkfumɔ djɛ nangha etshikitano, djɛ ndalɔngɔsɔlaka ndambo ndambo. (Yee. 84:5, 7) Yehova ntovungolaka la ngandji kenkfumɔ ante apalekɔ odjito nangha kɛnɛ kelekɔ́ sii. (1 Dj. 5:3) Koko akambo wakɔ wa wɔlɔ ntolamaka, edjinge mfu inkfumɔ tolekɔ la djonyi dj’elamelo kɛsɔ. Kovungɔ ɔlɔtɔ welá nyuma w’ɔpɔstɔlɔ Poolo ndatepela. (Ɛfɛ. 6:14-18) Ekete kɛkɔnge kewombaka oloko w’ongala? Oyɛwɔnde ‘odjipɔ wɔ sii’ wolekɔ́ djingingi dj’ɛlɛmbɛ wɛ sii wɛ Yehova. Ngo ngete odjipɔ olamakawɔ oloko wɔ nsɔsɔlɔ, ɛlɛmbɛ wɛ sii wɛ Yehova nkoka nama oloko wɔko wɔ djingingi, ntepela ente lonto lɔɔko lɔ l’eteyi. Djɛkondeke alekɔ djonyi wɛ ndashikikɛ djɛ ɔlɔtɔ wɔko w’ongala wolekɔ edjinge l’odjipɔ wɔ sii!—Woo. 4:23. w22.08 29 ite. 13-14
Lofu l’asato, Ngɔndɔ k’atano 15
Otepela wɔ Ndjambe kɛso ntshikalaka lotshinda.—Iza. 40:8.
Otepela wɔ Ndjambe wɔmbɔ́pɛyɛ́ ampame la amato wa nkɔmano ɛlɔndjɛlɔ kɛ wɔlɔ efula l’ilá kɛ nunu dj’ɛnɔnyi. Wopo wɔkɔnge nkambo djɛsɔ okokawɔ nanghema? Yehova ananghaka djɛ anto nsangola akɔpi y’efunelo w’ekina wɛsɔ. Kaanga ansangodji yayalaka anto wa ntshamba djɛ djɔ, iwɔ wayalaki la nkɔmɛ efula. Ndjɔmbɔmba, lá kɛnɛ kelendana la Afunelo wa Hebero, ondjewi wɔ wayi ɔmɔtshi afunaka ante: “Tolekɔ l’eshikikelo ente, lako onkanda wɔ l’etsho wɛ ntondo wɔ yasangola la nkɔmɛ efula ndeka Afunelo w’ekina.” Djɛkondeke tokoka ndjala l’eshikikelo ente, etepela w’owalaso lá Bible djɛso lɔɔko kɛnɛ oyɛwɔnde tokanyi tɔ Ikɔkɔ yɛnde, Yehova. Yehova ndeke Ikɔkɔ ‘y’opapɛyɛ onkfumɔ wɔ wɔlɔ la wɔ djɔ.’ (Dja. 1:17) Bible dekɔ opapɛyɛ ɔmɔtshi l’anteyi k’epapɛyɛ wɛ wɔlɔ efula wɛ Yehova ndatɔpɛyɛ. Opapɛyɛ ntɛnyɛka ente onto wɔmbɔtɔpɛyɛ opapɛyɛ wɔkɔ ntolembetelaka la ndjewaka ehomba wɛso. Oyɛwɔ ngo nghɔsɔ lá nkambo djɛ Kanga lɔtɔpɛyisá Bible. Winá w’oshishimaso opapɛyɛ wɔsɔ, iso ndjekaka akambo efula lá nkambo djɛ Yehova. Iso ndjekaka ente nde ntolembetelaka wɔlɔ efula la ndjewaka ehomba wɛso. w23.02 2-3 ite. 3-4
Lofu l’anɛyi, Ngɔndɔ k’atano 16
Looko longolola nsɔsɔlɔ la balo djɛ Yehova.—Iza. 11:9.
Ɔsɔngo osasa wongoyala lanɛ lá looko winá wɔ ekfundwelo yongowanga lá winá w’Ɛlɔndjɛlɔ k’Ɛnɔnyi Kinunu wɛ Kristo! Onto onkfumɔ wovusisá onto wɔnde wɔ ngandji angoyala l’oloko lukuluku djɛ ndɔɔwɛna lonkina. Ngo nghɔsɔ ndeke Yehova okande. (Djɔ. 14:15) Kokanela osasa wongoyala l’anto ankfumɔ welá looko winá wɔ anto wawɔ wa ngandji yongokfundɔ. ‘Anto wa wɔlɔ’ wa wiina wawɔ wafunamaka lá onkanda wɔ lowiko, wangokfundɔ ‘ekfundwelo kɛ lowiko.’ (Ele. 24:15; Dj. 5:29) Mbala imɔtshi efula k’anto waso w’ɔkɔpaso wangoyala l’anteyi kɛ anto wa ntondo wangokfundɔ́ m’ɔkɔngɔ wɔ Armagɛdɔ. Lonkina, ‘anto wapɔlɔ,’ waatawá mbamba kɛ wɔlɔ kɛ ndjewa Yehova kana kɛ ndookambela la nkɔmano nkfumɔ lá ntondo kɛ nyɔyi kɛwɔ, wangokfundɔ lá ‘ekfundwelo kɛ dombo.’ Anto ankfumɔ wangokfundɔ́ wasɔ wangoyala la djonyi djɛ ndakanyema. (Iza. 26:9; 61:11) Djɛkondeke nonghanyi keleka ekekete k’olakanyelo ketananghemaká ntondo l’ɔkɔndɔ wɔ wana w’anto kengonanghema.—Iza. 11:9, 10. w22.09 20 ite. 1-2