AZihova aḅenhị ni Ebraham osighẹ oginha oọny phọ odị ophighironhọm ekiạ. Ephẹn phọ iyaạr dị ekpạr ri iboom oḍighi. Ghalhamọ r’iduọn phọ ni, Ebraham asighẹ ni oọny phọ odị aghị ophighironhọm ekiạ phọ. Kuolọ mem mọ Ebraham rawạ bọ oghiigh oọny phọ odị, Enhaạn asophoghom ni nyodị. Ipẹ emitenhaan bọ Ebraham itughemhị iyira mọ aZihova anyaaghiạn ni osighẹ oọny phọ odị aphomhoghiạn bọ ophighironhọm ekiạ, loor esi ephomhoghiạn. (Gen. 22:1-18) Mem mọ aZihova angọ bọ we phọ Izrạl Olhogh phọ, odị aḅenhị ni bidị rikiạ dị bidị kopinyọn pidị odị asạr ikarạph abidị abilhenhaạn. (Lev. 4:27-29; 17:11) Arikiạ phọ ipẹ phọ iḍeenhaan ghan mọ aZihova kamiteom ni ekiạ dị ketagharạn omhạr awe esighẹ esi ikarạph. Ariil phọ Enhaạn ughaạph ni mọ komiinẹ ni oọny phọ opọ phọ aḍighi bọ Oọny dị Enhaạn aphomhoghiạn iboom kụ oḅilhẹ okiigh pidị awe omoọgh etagharạn esi ikarạph r’aḍuugh!—Isa. 53:1-12. w24.08 4 ¶7-8

Mem dị nạ aạl Baibul phọ ka/bilhẹ osighẹ ipẹ nạ aạl bọ oḍighinhom. Mem dị nạ rabạl esi aBaibul, puruan loor anạ mọ, ‘Ika kụ idị mị kasighẹ iphẹn mị aạl bọ aḍighinhom nyiidiphọ obobọ epẹ ghisigh?’ Esi omaạm, oḅẹm mọ ibạl aBaibul phọ anạ emeelhom ḍinyạ 1 Tesalonikạ 5:17, 18. Mem dị nạ aạl iyạl phọ asiikpịgh phọ iphẹn phọ, nạ atue ni asophe pạ kụ aatughiạn onhụ amem dị nạ raaḅereghị ghan r’araraạr phọ ipẹ nạ rakaạph ghan bọ siphẹ iiḅereghị phọ anạ. Ekpẹ kẹn ni ootughiạn ghan araraạr dị nạ kakol ghan asẹph aZihova. Kụ eeni nạ usopha mọ nạ kakol iraạr araraạr asẹph aZihova. Eḍighi maạr dị nạ asighẹ iyạl ikpo ikalhạ agbirima ghan raraạr phọ nạ atuughạ bọ siphẹ aBaibul phọ, kelhoghonhaạn nyinhạ ḍighaạgh onhaghanhạn Ekpo-onhụ phọ Enhaạn kụ otuụgh oḍighi ipẹ rekaạph bọ. Kụ nạ aḅilhẹ apoph akị ghisigh idiphọ oye dị asighẹ Ekpo-onhụ phọ Enhaạn raḍighinhom. w24.09 4-5 ¶9-10

AZihova ulhẹm iyira eten dị egbatanhaạn. Ii olhoghi ayira raḅaạl ghan ni mem dị oye ungọ aani iyira iyaạr, kuolọ raḅaạl ghan ghụn kapu mem dị yira kụ ongọ bunhọn. Redụgh ghan agey mem dị yira olhoghonhaạn ḍighaạgh bumor r’abumaranhi phọ ayira. Kụ olhoghi ayira raḅaạl ghan kẹn mem dị bidị oḍeenhaan osereghiạn. Toroboiperolbọ, mughumọ opọ yira oḍighi bọ iiḅi phọ asereghiạn obobọ o/sereghiạn, olhoghi ayira aḅaạl li mọ yira moḍighi iyaạr dị enhighẹ. Ka/bulha mọ torobọ iyaạr dị nạ angọ aani oye, “aZihova katue ni angọ nyinhạ idị epu ipẹ phọ.” (2 Chron. 25:9) Nạ ka/tue anmo inmo dị ebụgh iboom dị aZihova ka/tue aḅulhemhian nyinhạ! Kụ oḅaạl olhoghi o/lho dị apu mem dị aZihova r’aloor kụ akpẹ nyinhạ ruunmo phọ. Esi iduọn phọ, osopha oghiọm aghisigh otuughaạny Odẹ inmo phọ ayira odi bọ k’akẹ. w24.09 31 ¶20-21