‘Kiọm Ni Ghisigh Arelhe Siẹn Igey Phọ’

 1. Ika kụ idị yira romooghọm ghan suọ esi oghaạph ghan ipẹ yira onhaghạn bọ “igey phọ”?

“NẠ UNHAGHẠN ika igey phọ?” Iikia i/lo, nạ maphagharanhaạn ni ḍipuru phọ aḍiphẹ phọ ibadị amem. Ḍiẹn phọ eḍighom aani ni ḍiḅẹl aḍipuru phọ yira ropuru ghan bọ onyọ umor obobọ umaranhi dị yira rowạ okuamhị olhegheri ilọ odị. Riḅeraạn ghan iyira olhegheri ipẹ abumor r’abumaranhi ayira oru bọ olhegheri oḅilhẹ ophomhoghiạn aZihova, kụ redụgh ghan ni oḅenhị abidị idị igey phọ redụgh esi ayira. (Rom. 1:11) Ipẹ phọ riitughianhạm ghan iyira idị igey phọ emhạn maạr esi ayira. Kụ reḍighi ghan kẹn idị yira kokparamhị osopha phọ ayira “oghiọm aghisigh orelhe siẹn igey phọ”—iduọn phọ pọ, oghiọm aghisigh orọl eten dị kekọm ḍisẹph r’akuuḅi aghisigh aZihova ingọ iyira.—3 Jọn 4.

 2. Yira kooḅeghiọn eeghe siẹn emhuoghaạph phọ ephẹn phọ?

² Siẹn emhuoghaạph phọ ephẹn phọ, yira kooḅeghiọn iniin ariphigh phọ yira otụ bọ ophomhoghiạn igey phọ. Kụ yira oḅilhẹ ooḅeghiọn idị yira kokiọm ghisigh oḍeenhaan mọ yira opomhoghiạn ni imạ phọ inmo phọ iphẹn phọ. Iikia i/lo, iphẹn phọ keḍighi idị yira kokuamhị osereghiạn iduọn aZihova uḍur bọ iyira alhọgh siẹn igey phọ. (Jọn 6:44) Kebughẹ kẹn ḍiḅeraạn phọ yira omhoọgh bọ oghaạph igey phọ oḅenhị aani abunhọn.

 3. Eeghe kụ egbogh ephigh pho yira otụ bọ ophomhoghiạn igey phọ?

³ Ibadị ariphigh kụ iḍighi bọ iyaạr phọ yira otụ bọ ophomhoghiạn igey phọ. Egbogh ephigh phọ pọ, yira opomhoghiạn aZihova, azin igey phọ. Dị eego esi Ekpo Onhụ phọ odị, aBaibul phọ, yira morue olegheri mọ odị olemhiạ akẹ r’ade dị amhoọgh iikpọ ḅilhẹ r’odẹ ephomhoghiạn dị ruphogh ghan iyira. (1 Pit. 5:7) Yira olegheri mọ Enhaạn phọ ayira amoọgh “onmạ ighirigiir r’aghusạn, ra/nuụn ghan kaghạgh olhoghi ḅilhẹ amoọgh ephomhoghiạn oḅạr dị ephughạn r’igey.” (Ex. 34:6) AZihova apomhoghiạn elhiom ooruẹn. (Isa. 61:8) Repin ghan ni esi odị omhiịn dị yira romiinhọm, kụ odị aakolhobian ni aḅilhẹ akạr anyaaghiạn osiemhi eekunha oomo imhinhimhiịn mem mọ opọ odị amaanhaạn bọ. (Jer. 29:11) P’eeghe imạ! Iikia i/lo, pọ kụ iyaạr phọ yira ophomhoghiạn bọ aZihova iboom!

4-5. Uḍighi ika kụ otelhedom mọ Pọl atomaạm bọ oḍuomolhoghi phọ ayira ilumạ?

⁴ Eeghe kụ enhọn ephigh phọ yira otụ bọ ophomhoghiạn igey phọ? Igey phọ ringọ ghan iyira oboom asuọ. Ooḅeghiọn eḍeenhaan. Igey aBaibul phọ epamanhạm oḍuomolhoghi phọ ayira ilọ aghisigh phọ. Oghaạph otomaạm idị oḍuomolhoghi phọ opọ phọ amhạn maạr, otelhedom mọ aPọl aḅẹm mọ: “Oḍuom oIoghi phọ ophọn phọ akịgh idiphọ [ilumạ dị okpoọm ghuḍum mọ ayira]; oogho ni oseere ḅilẹ kẹn ra/piigha ghan.” (Hib. 6:19) Idiphọ rokpoọm ghan bọ oghuugh ilumạ bịn kamhiigh, oḍuomolhoghi aBaibul phọ ayira katue ni umhiighemhi iyira mem lọ yira osoman odẹgh ophogh.

⁵ Ii, aPọl aghaạph ghan siẹn phọ ilọ oḍuomolhoghi k’akẹ phọ aKristẹn phọ abuphẹ osagharạn bọ uwaloor phọ omhaghamhị bọ maạr. Kuolọ, egbolhomaam aani ni Kristẹn phọ abuphẹ rogon bọ orọl adọl aparadaịs siẹn ade phọ k’agee-pọ. (Jọn 3:16) Okạr oghaạph, otuughạ ilọ oḍuomolhoghi aghuḍum k’agee-pọ phọ meḍighi idị aghuḍum mọ ayira amhoọgh emhụ.

6-7. Ika kụ idị aYvonne mamhooghọm suọ esi otuughạ igey phọ ilọ aghisigh phọ?

⁶ Ooḅeghiọn idị emitenhaan umaranhi dị oghol mọ Yvonne. U/mạr nyodị siẹn igey phọ, kụ idiphọ obumoọny odị aghiilhaan agey ḍuugh. Odị aạl li iyaạr dị eḅẹm mọ: “Aḍio ketọl li dị oye phọ kamugh,” kụ eeḅaghamhị ghan nyodị. Odị aḅẹm mọ: “Ikpo onhụ phọ iphẹn phọ iḍighi ghan iyaạr dị mị arọl ghan e/naanhị ootughiạn ghan ilọ aghisigh phọ. Mị uutughiạn mọ, ‘iphẹn bịn ku k/oomo ilọ aghuḍum.’ ‘Mị utụ eeghe kụ amite bọ aḅirinhi phọ?’ Mị u/wạ omhugh!”

⁷ Mem dị aYvonne r’oḍighi oḍoọgh dị mamhuunha ukpe, odị aazuanhaan ni Bugbaanhaạn AZihova. Odị aḅẹm: “Mị umhiigh ni omheeraam mọ mị katue ni amoọgh oḍuomolhoghi orọl adọl aParadaịs siẹn ade phọ k’gee-pọ.” Ika kụ idị otuughạ igey phọ mengọ suọ onyọ umaranhi phọ ayira? Odị aḅẹm mọ: “Mị u/tọl ghan mun e/naanhị ooḅaghamhiạn aloor ilọ aghisigh phọ obobọ ḍuugh.” Eegholhaan ni mọ igey phọ ikạr kụ emhạn maạr esi aYvonne, kụ odị rakelhọm ni oghaạph ghan ilọ oḍuomolhoghi aghisigh phọ oḅenhị aani abunhọn.—1 Tim. 4:16.

8-9. (a) Siphẹ aḍidogh phọ aZizọs, oye phọ amhaghamhị ika maạr ephua phọ odị amhiịn bọ? (b) Igey phọ emạn aani ika maạr esi anạ?

⁸ Igey aBaibul phọ eḅaramaạm kẹn iiḅi iinhaghạn ilọ Omhạr phọ k’Enhaạn. AZizọs asighẹ igey ilọ Omhạr phọ amaaniọm eelạ dị oḍi ude aaghị. Idiphọ ogẹ bọ siphẹ Matiu 13:44, aZizọs aḅẹm mọ: “Kosighẹ ni Omạr phọ k’Enaạn omaaniọm idiphọ [ephua] dị oḍi ude. Kụ oye aghị amiịn kụ aḅiIẹ aaghị, kụ agheel r’oḅaạI ologhi kụ aalaghi oomo araraạr dị odị amoọgh, kụ aghị aghoom de phọ aḍiphẹ phọ.” Lọgh elhegh mọ oye phọ ophọn phọ o/ghị owạ ephua. Kuolọ mem mọ odị amhiịn bọ, odị aphinyọn ni iboom arikiạ oru omhoọgh. Okạr oghaạph, odị aalhaghi ni oomo araraạr odị. Eeghe kụ iḍighi? Odị alhegheri idị ephua phọ epẹ phọ emhạn maạr. Imhạn maạr epu oomo araraạr phọ odị aalhaghi bọ aghoom.

⁹ Ipẹ kụ idị nạ asighẹ aani igey phọ ḍughụm? Okạr idiphọ! Yira olegheri ni mọ iyaạr i/lo siẹn aḅirinhi phọ dị kotue otomaạm ibo phọ yira omhoọgh bọ okumu aZihova nyiidiphọ ḅilhẹ r’oḍuomolhoghi aghuḍum k’agee-pọ phọ yira komoọgh bọ siphẹ eeḍiạn itooghị Omhạr phọ. Ko/tue osighẹ eepoogh omhoọgh asiya dị akpulhạn r’aZihova otomaạm torobọ ekiạ dị yira ophighirọn omhoọgh. Ibo ayira pọ oḍighi ghan ‘ipẹ eḅeraạn bọ nyodị omadạn.’—Kọl. 1:10.

10-11. Eeghe kụ inyu bọ Michael onme adọl aghuḍum mọ odị?

¹⁰ Ibadị ayira mophinyọn ni iboom arikiạ orue orọl idị eḅeraạn aZihova. Abuniin ayira mowilhẹ ophorogh igbogh asiigbu. Abunhọn mowilhẹ ophorogh eelạ. Abunhọn monme eten adọl aghuḍum mọ abidị mem mọ bidị otuughạ bọ ilọ aZihova. Pọ kụ idị aMichael aḍighi. U/mạr nyodị siẹn igey phọ. Mem dị odị aḍighi oḍoọgh oye, utughemhị nyodị ilọ ee ghan elhebiri. Odị aḅẹm mọ: “Mị umhiịn ghan mọ oomo amem mị anyạ ni elhebiri. Eeni amem, mị ulhoghoma ghan mọ oye o/lho dị katu umherenyạn imhị.” Kuolọ mem mọ aMichael amhiigh bọ otuughạ aBaibul phọ, odị alhegheri ni ipẹ aZihova rapogh ghan bọ iigamanhiạn. (Ps. 11:5) Idị egbolhomaam olom r’anhịr phọ otughemhị ghan bọ nyodị, aMichael aḅẹm mọ: “Bidị kụ u/sighẹ onhụ abidị uḅenhiọm imhị owilhẹ elhebiri; bidị ghụn ughiọm ghisigh bịn utughemhị ghan imhị igey aBaibul phọ.”

¹¹ Idiphọ aMichael ratuughạ bọ ilọ aZihova, idiphọ kụ idị ephomhoghiạn phọ odị esi aZihova ebụgh ghan bịn. Igbiririph phọ aZihova raḍeenhaan ghan bọ buseenyom mọ Odị ikạr kụ etir nyodị. Esighẹ rekị bịn aMichael amhiịn mọ ewạ dị odị kasopha onme adọl aghuḍum mọ odị. Odị aḅẹm mọ, “mị ulhegheri ni mọ owilhẹ ee ghan elhebiri kụ iyaạr dị kikparanhaạn imhị. Kuolọ mị ulhegheri ni kẹn mọ keḅeraạn ni aZihova, kụ mị aḅilhẹ alhọgh elhegh mọ emoghi ni ophighirọn ekiạ orue okumu aZihova.” AMichael asereghiạn ni igey phọ odị atuughạ bọ, kụ enyu nyodị onmeeghi araraạr siphẹ adọl aghuḍum mọ odị.—Jems. 1:25.

12-13. Ika kụ idị igey aBaibul phọ elhoghonhaạn ḍighaạgh Mayli?

¹² Oḍeenhaan idị igey phọ emhạn maạr, aBaibul phọ atomaạm igey phọ otozị dị osụ esi ufiri. (Ps. 119:105; Efẹ. 5:8) Umaranhi phọ Mayli, olọ Azerbaijan, asereghiạn ni olhoghonhaạn aḍighaạgh Ekpo Onhụ phọ Enhaạn. Odẹ r’onhiin odị u/ḅọph ekụ iiḅereghị. Odẹ odị onyọ aMuslim, kụ onhiin odị olọ ekụ iiḅereghị aJew. Odị aḅẹm mọ: “Obọ mị uu/kia m’Enhaạn edi ghan ni, kuolọ mị umhoọgh ni ibadị asipuru. Mị upuru ghan mọ, ‘Uḍighi ika kụ Enhaạn alhẹm bọ we, ḅilhẹ keḍighi ika kụ oye amiinhọm oomo adọl aghuḍum odị kụ oḅilhẹ omiinẹ ooni aniạn k’agee-pọ?’ Eḍighi bọ edị awe roḅẹm ghan mọ torobọ iyaạr dị emite pọ ogbi Enhaạn, mị uukia ghan ni mọ, ‘Awe okịgh raraạr ephegh dị Enhaạn rapeghom ghan ephegh kụ kaghelhọm dị bidị romiinhọm ḍughụm?’”

¹³ AMayli aghị ni ghisigh awạ ghan ophanyanhaạn asipuru phọ odị. Esighẹ rekị bịn odị amhiigh otuughạ aBaibul phọ, bịn odị aḍigh aani siẹn igey phọ. Odị aḅẹm mọ “Itughemhị aBaibul phọ eegholhaan bọ inme ni ephoghom mọ amhị ilọ aghuḍum. Igey phọ mị amhiịn bọ siphẹ Ekpo Onhụ phọ Enhaạn ingọ ni imhị eephọ olhoghi.” Yira roboom ni aZihova phọ umhạgh bọ iyira ekụ ufiri phọ “alọgh ekụ aḍiikiạ aḍiḅaạl phọ odị.” —1 Pit. 2:9.

14. Ika kụ idị yira kobughẹ ephomhoghiạn phọ ayira esi igey phọ? (Miịn igbe phọ “Inhọn Araraạr Dị Otomaạm Igey ABaibul Phọ.”)

¹⁴ Iphẹn phọ iphurukpu areḍeenhaan dị emạ emiteom idị igey aBaibul phọ emhạn maạr. Iikia i/lo, nạ kaatughiạn ni inhọn areḍeenhaan. Ke/nighẹ ḍughụm, osighẹ ituughạ aBaibul ogina anạ owaạm inhọn ariphigh otuạn ophomhoghiạn igey phọ? Idiphọ ephomhoghiạn igey phọ ayira rebụgh bọ, idiphọ kụ idị yira komiịn reten oḍeenhaan mọ yira opomhoghiạn ni igey phọ.

15. Eghẹn kụ eniin eten dị yira koḍeenhaan ephomhoghiạn igey phọ?

¹⁵ Yira koḍeenhaan mọ yira opomhoghiạn ni igey phọ esi ogbor ghan otuughạ aBaibul phọ r’arinyạ phọ regbạ ghan bọ Baibul phọ. Etigheri onhụ asiạ phọ yira morọl bọ siẹn igey phọ, araraạr otuughạ emuza ni. Oḅẹl aWatchtower phọ omiteom bọ aḅẹm mọ: “Igey phọ, ekịgh idiphọ obạm afalawạy dị asi edala, dị atukarạph arooghọ okpẹ eeghironhom eḅilhẹ regimhi. Kụ eḍighi maạr dị nạ rawạ, pọ nạ kagona ni loor. . . . Kụ nạ rawạ okụ pọ nạ kazuman ni amiigha loor kụ akụ. Ka/moọgh ogbaanyạn esi oniin afalawạy igey phọ. . . . Kụ abughẹ, amhoọgh iboom.” Otuughạ iyaạr ekpạr ri, kuolọ emạn ni maạr oḍighi iduọn phọ.

16. Eghẹn eten ituughạ kụ edị nạ ramooghọm ghan suọ? (Proverbs 2:4-6)

¹⁶ K/oomo ayira kụ edị aạl iyaạr r’otuughạ repụ ghan. Kuolọ aZihova rawạ mọ yira ‘oghiọm ghisigh owạ ghan’ kụ oḅilhẹ ‘oghiọm ghisigh owaaghị’ ogey onhaghạn aḍughụm igey phọ. (Bạl Proverbs 2:4-6.) Mem lọ yira olhọgh ikuph phọ iphẹn, yira romooghọm ghan suọ. Idị egbolhomaam aạl ghan aBaibul, aCorey aḅẹm mọ onọ ragbon ghan eniin ekpịgh mem. Odị aghaạph mọ: “Mị rabạl ghan torobọ igẹ dị edi ude, r’inhọn ariisi aBaibul dị egbolhomaam esi ekpịgh phọ, kaḅilhẹ awaaghị raraạr. . . . Eten phọ ephẹn phọ reḍighi ghan idị mị ralegheri ghan ibadị araraạr!” Mughumọ yira osighẹ eten phọ ephẹn phọ obobọ enhọn kụ robalhạm, yira koḍeenhaan mọ yira osereghiạn ni igey phọ mem dị yira olhọgh mem r’ikuph otuughạ.—Ps. 1:1-3.

17. Remạ ghan eeghe orolhọm r’igey phọ? (Jems 1:25)

¹⁷ Ii, yira olegheri ni mọ i/mineen esi aạl ghan igey aBaibul phọ bịn. Okạr orue omhooghọm asuọ, yira omoọgh orolhọm igey phọ, iduọn phọ pọ, yira kosighẹ oḍighinhom siphẹ adọl aghuḍum mọ ayira. Opọ kụ amem dị igey phọ kingọ iyira ogey oḅaạl olhoghi. (Bạl Jems 1:25.) Ika kụ idị yira kotue olegheri mọ yira oḍimom ni r’igey phọ? Oniin onyọ umor aḅẹm mọ oye phọ aaḅeghiọn ghan loor phọ oye phọ aphogh riisi dị oye phọ raḍighi agey r’ariisi dị ewạ mọ oye phọ aḍighi akuamhị. Otelhedom mọ Pọl aḅẹm mọ: “Ophạm ni okananaạm itooghị phọ ipẹ yira odạph bọ kụ oteẹny nyiidiphọ!”—Fil. 3:16.

18. Uḍighi ika kụ yira koḍighi bọ oomo ipẹ yira kotue bọ ‘oghiọm aghisigh orelhe siẹn igey phọ’?

¹⁸ Tuutughiạn suọ phọ raḍuạ ghan bọ karu esi oḍighi oomo ipẹ yira kotue bọ ‘oghiọm aghisigh orelhe siẹn igey phọ’! Yira ro/nighemhị ghan ghuḍum mọ ayira bịn, kuolọ yira rongọ ghan aZihova ḅilhẹ r’abumor r’abumaranhi phọ ibo kẹn. (Prov. 27:11; 3 Jọn 4) Okạr oghaạph, iphẹn phọ imạ ariphigh otuạn ophomhoghiạn igey phọ kụ oḅilhẹ orolhọm r’igey phọ.