PWONY ME 15

Lok ki Tekcwiny

1 Jo Tecalonika 1:5

GIN ME ATIMA: Nyut ni ipe ki akalakala mo keken ni gin ma itye ka wacone-ni obedo lok ada dok pire tek.

Yubbe maber adada. Yelle matek me niang lok ma pigi tego ki kit ma Baibul moko kwede ni tye ada. Temme me tito lok ma pigi tego i yo macek dok mayot. Ket cwinyi i kom kit ma bikonyo kwede jo ma tye ka winyo lokki. Leg pi cwiny maleng.

Bed ka poro miyo pwony-nyi ki dwan malongo wek imak lok ma pigi tek i wii dok imi i yo maber.
Ti ki nyig lok ma nyuto tekcwiny. Ma ka nwoyo lok moni-ni kikome kit ma kicoyo kwede i bukkewa, ti ki lok ma megi. Ti ki lok ma nyuto ni ipe ki akalakala mo keken i kom gin ma itye ka wacone.
Tit lokki i yo ma nyuto ni iye ni obedo lok ada. Lok ki dwan mupore. Ka dano pe gineno marac, ci nen wanggi ka itye ka lok.

Loko lok ki tekcwiny pe tere ni omyero idid lok, nyo ilok ata labongo paro pi kit ma lokki bigudo kwede jo mukene. Kadi bed itye ka lok i yo ma nyuto ni ipe ki akalakala i lokki, ento omyero ilok i yo me mar dok ki kica.