Tika laremi mo nyo ngat mo me gangwu oteri marac? Ka tye kit meno, ci itwero nongo adwogi maber ki i kwano gin mutimme i kwo pa Abcalom wod pa Kabaka Daudi. (2 Cam. 15:5-14, 31; 18:6-14) Tit ki Jehovah kit ma cwinyi tye ka cwer kwede pi kit ma kiteri kwede marac. (Jab. 6:6-8) I nge meno, go i wi kit ma nen calo Daudi owinyo kwede i kare ma jami magi ducu tye ka timme i kome. En onongo maro Abcalom matek dok onongo geno Akitopel. Kadi bed kit meno, jo aryo magi pud gutere marac. Gucwero cwinye adada dok gutute me neke woko. Daudi onongo twero rwenyo gen woko i kom lureme ducu kun tamo ni gin bene guribbe ki Abcalom i jemo. En onongo twero tamo me laro kwone kun ringo woko kene ki i Jerucalem. Nyo cwinye onongo twero tur adada ma weko en ilo cinge woko. Me ka meno, en olego Jehovah pi kony. En bene openyo kony ki bot lureme. Dok en oketo i tic oyotoyot tam ma en omoko-ni. En omedde ki geno Jehovah kacel ki lureme. w21.03 15 ¶7-8; 17 ¶10-11

Omyero wabed ki wat macok ki Yecu wek Lubanga ogam legawa. Man tyen lokke ni omyero watim gin mo makato mere waco ni “i nying Yecu” i nge legawa. Myero waniang yo ma Jehovah tiyo kwede ki Yecu me gamo legawa. Yecu owaco ki lupwonnyene ni: “Gin ducu ma wubilego i nyinga, abitiyone.” (Jon 14:13) Kadi bed ni Jehovah aye winyo dok gamo legawa, en omiyo ki Yecu twero me cobo Tamme. Pi meno, ma peya Lubanga ogamo legawa, en kong neno ka ce walubo tira ma Yecu omiyo. Me labolle, Yecu owaco ni: “Ka wutimo kica bot dano pi balgi, ci Wonwu ma tye i polo bene bitimowu kica; ento ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu.” (Mat. 6:14, 15) Pud dong pire tek ya, ni water jo mukene kit ma Jehovah kacel ki Yecu giterowa kwede! w20.04 22 ¶6

Lakwena Paulo oniang miti pa jo ma gubedo ka winyo lokke, dok oloko pwonye wek obed ma rwatte ki mitigi. Me labolle, lwak ma en oloko botgi i Licitra onongo pe gitye ki ngec mo i kom Ginacoya. Pi meno, Paulo onyamo lok kwedgi kun tiyo ki jami ma gitwero niang iye maber. En oloko i kom cam mapatpat ma cek ka karegi oromo ki nongo mit pa kwo. En otiyo ki nyig lok kacel ki labol ma luwiny lokke gitwero niang iye oyotoyot. Ti ki diro me niang miti pa jo me wang ticwu dok ilok yo me pwonyi. Itwero ngeyo miti pa ngat moni nining ka irwatte kwede nyo itye ka donyo i gange? Bed ma wangi bit. Twero bedo ni en tye ka tic i poto, nyo kwano buk, yubo mutoka, nyo timo gin mo mukene. Ka opore, pingo pe iti ki gin ma en tye ka timo me cako lok kwede? (Jon 4:7) Kadi wa bongo ma ngat moni oruko twero titi lok i kome—twero nyuto lobo ma en oa ki iye, ticce, nyo latuk odilo ma en maro. w20.04 11 ¶11-12