Ceng Adek, Agucito 5
Myero wucung ma wutweyo pyerwu woko ki ada.—Ep. 6:14.
Jo pa Jehovah gimaro lok ada ma tye i Lok pa Lubanga. Niyewa jenge i kom lok meno. (Rom. 10:17) Watyeko mokone ni Jehovah oketo kacokke pa Lukricitayo me bedo “wir ki guti me te ot matek, me ada.” (1 Tem. 3:15) Catan tye ki miti madwong adada me gengowa ki geno ada ma tye i Baibul kacel ki tira ma wanongo ki i dul pa Jehovah. (Ep. 4:14) Macok cok-ki, Larac-ci bitic ki lok goba me bwolo rok ducu wek gukwer Jehovah. (Yabo 16:13, 14) Wangeyo bene ni, Catan bimedde ki tic matek me bwolo jo pa Jehovah. (Yabo 12:9) Meno aye oweko pire tek adada ni wapwonnye me poko kin lok ada ki lok goba dok walub ada. (Rom. 6:17; 1 Pet. 1:22) Timo meno pire tek pien bikonyowa me bwot ki i twon can madit atika-ni! w24.07 8 ¶1-3
Ceng Angwen, Agucito 6
Pien cik ma acikowu kwede tin-ni pe tek twatwal ma cobone loyowu, dok pe tye ka mabor kwedwu.—Nwo. 30:11.
I kare ma Jehovah omiyo ki rok me Icrael Cikke, gin gukwonge ni gibilubone. Dok Jehovah otito ni ka gibilubo cikke, ci en bigwokogi dok bigoyo laane i komgi. Ento ka gukwero lubo cikke nyo guyero me woro lubange mukene, ci Jehovah onongo dong pe bimedde ki gwokogi, dok gibideno can. Man onongo pe tyen lokke ni Jehovah dong owekogi niyak. Onongo pud gitwero ‘dwogo cen bot Jehovah Lubangagi dok gicako woro doge.’ (Nwo. 30:1-3, 17-20) Onongo gitwero ngut i kom balgi. Ka gutimo meno, ci Jehovah onongo binyikke cok kwedgi dok goyo laane i komgi odoco. Jo pa Jehovah gubedo ka jemo i Kome teretere. Macalo adwogine, gudeno can malit. Ento Jehovah pe oilo cinge woko i kom jone ma ngutgi tek-ki. En obedo ka cwalo lunebi teretere me cuko cwiny jone wek gunguti dok guti pire ki cwinygi ducu.—2 Luker 17:13, 14. w24.08 9 ¶4-5
Ceng Abic, Agucito 7
Ayelayela madwong opoto i kom jo muye Yecu ma i Jerucalem.—Tic 8:1.
I nge to pa Yecu i mwaka 33 K.M., Lukricitayo ma Luibru ma gibedo i Jerucalem ki i Judaya gukato ki i pekki mapol. I kare meno, aye kicako kwede ki kacokke pa Lukricitayo dok gukato ki i aunauna matek adada. Dok lacen i nge mwaki 20, Lukricitayo ma Luibru gukato ki i peko me kec ma opoto kacel ki can lim. (Tic 11:27-30) Kadi bed kit meno, i kine ka mwaka 61 K.M., Lukricitayo magi onongo olo gitye ki kuc mo manok ka kiporo ki aunauna ma onongo bibino i anyim. I kare meno, gunongo waraga ma oa ki bot lakwena Paulo. Tira ma onongo tye i waraga meno onongo bikonyogi me yubbe pi pekki ma onongo gicok kemme kwede. Waraga ma kicoyo bot Luibru obino i karene kikome pien kuc manok ma onongo gitye kwede-ni onongo pe birii. Lakwena Paulo omiyo tira ma onongo bikonyo Lukricitayo magi me ciro pekki ma onongo gicok kemme kwede. w24.09 8 ¶1-2