Ti ki Cwec me Pwonyo Lutinoni Lok i kom Jehovah

 1. Gin ango ma lunyodo gimito pi lutinogi?

WUN lunyodo, wangeyo ni wutye ki miti me konyo lutinowu wek gunge dok gumar Jehovah. Ento pe watwero neno Lubanga. Dong i yo ma nining ma wutwero konyo kwede lutinowu me neno En calo Ngat ma tye ada wek gunyikke cok kwede?—Yak. 4:8.

 2. Lunyodo gitwero pwonyo lutinogi lok i kom kit pa Jehovah nining?

² Yo acel ma pire tek me konyo lutino wek gunyikke cok ki Jehovah aye obedo ki kwano Baibul kwedgi. (2 Tem. 3:14-17) Ento, Baibul bene nyuto yo mukene ma jo matino gitwero pwonyo kwede lok i kom Jehovah. I buk me Carolok, wego mo opoyo wi wode ni wiye pe myero owil i kom kit pa Jehovah, ma nen i cwecce. (Car. 3:19-21) Wabinyamo yo mogo ma lunyodo gitwero tic kwede ki cwec me konyo lutinogi pwonyo lok i kom kit pa Jehovah.

 3. Kony ango ma myero lunywal gumi bot lutinogi?

³ Baibul waco ni “cakke i kare ma giketo lobo, kit pa Lubanga ma onongo pe nen dong onen, kun gingeye i jami ducu ma en otiyo.” (Rom. 1:20) Lunyodo, twero bedo ni wumaro bedo woko ka yweyo wiwu kacel ki lutinowu. Wuti ki kare meno me konyo lutinowu me neno kubbe ma tye i kin kit pa Jehovah mamwonya kacel ki “jami ducu ma en otiyo.” Kong dong wanenu gin ma lunyodo gitwero pwonyo ki i labol pa Yecu.

 4. Yecu otiyo ki cwec nining me pwonyo lulub kore? (Luka 12:24, 27-30)

⁴ Nen kong kit ma Yecu otiyo kwede ki cwec me miyo pwony. I nino mo acel, en olego lulub kore ni gunen agak ki lenga. (Kwan Luka 12:24, 27-30.) Yecu onongo twero lok i kom lee nyo ginapita mo keken, ento en oyero winyo ki ature ma lulub kore gingeyo maber. Lulub kore onongo nen calo gitwero neno agak ma tye ka tuk malo ka wigi ki ature ma oturo i tim. Itwero goyo kit ma Yecu ocimo kwede jami magi i kare ma en onongo tye ka lok? Dok gin ango ma en otimo i nge tic ki labol magi? En omiyo ki lupwonnyene pwony ma pire tek madok i kom yot cing kacel ki kica pa Wonne me polo: Jehovah bipito kacel ki ruko luticce ma lugen kit ma en gwoko kwede agak ki dong ature ma i tim.

 5. Lunyodo gitwero tic ki cwec me pwonyo lutinogi lok i kom Jehovah nining?

⁵ Wun lunyodo, tika wubilubo labol pa Yecu ka wutye ka pwonyo lutinowu? Itwero tito ki latinni gin mo madok i kom cwec ma in kikomi imaro, calo lee nyo ginapita ma imaro loyo. Ka itye ka lok ki latinni, myero ititte gin ma cwec meno pwonyowa i kom Jehovah. I nge meno, itwero penyo latinni wek otitti lee nyo ginapita ma en maro loyo. Ka iloko i kom cwec mo ma latinni maro, en biketo cwinye ka winyo gin ma cwec meno pwonyowa i kom Jehovah.

 6. Gin ango ma watwero pwonyo ki i lanen pa min Christopher?

⁶ Tika mitte ni lunyodo guter cawa malac me timo kwed i kom lee nyo ginapita moni ma peya gunywako gin ma cwec meno pwonyowa i kom Jehovah? Pe tye kit meno. Yecu pe omiyo pwony mabor i kom kit ma agak camo kwede nyo kit ma lenga dongo kwede. Kadi bed latinni maro pwonyo jami matut i kom cwec pa Jehovah, i cawa mukene lok nyo lapeny mo mayot romo me konye niang. Nen kong gin ma omego mo ma nyinge Christopher wiye po iye madok i kom kare me tinone: “Mamana onongo tiyo ki lok mogo mayot me konyo wan lutino me bedo ki pwoc pi cwec ma orumowa. Me labolle, ka onongo watye cok ki godi, en twero waco ni: ‘Nen kong kit ma got man dit dok leng kwede! Jehovah pud dong pore me apaka ya!’ Nyo ka watye i nget nam madit, en romo waco ni: ‘Nen kong kit ma pii man twagge kwede ki teko! Lubanga pud dong tek ya!’” Christopher owaco ni: “Lok magi mayot dok ma tugo tam-mi ogudo cwinywa adada.”

 7. Iromo pwonyo lutinoni me tam matut i kom cwec nining?

⁷ Ka lutinoni woto ki dongo, itwero pwonyogi me cako tamo matut i kom cwec kacel ki pwonyo lok i kom Jehovah. Itwero yero me lok i kom gin acel ma Jehovah ocweyo ci ipenyo lutinoni ni, “Gin man pwonyi lok ango i kom Jehovah?” Itwero bedo ki ur me winyo tam pa lutinoni i kom cwec.—Mat. 21:16.

 8. Kare maber ango ma onongo lunywal me Icrael gitye kwede ka gitye ka wot “i yo”?

⁸ Kicuko cwiny lunyodo ma i lobo Icrael macon me pwonyo lutinogi ki cik pa Jehovah ka gitye ka wot “i yo.” (Nwo. 11:19) Yo onongo tye mapol i kin caro me lobo Icrael. Onongo gitwero neno kwai lee, winyi, ki ature mapatpat. Ka jo me odi me Icrael gitye ka wot i yo, onongo lunyodo gitwero lok ki lutinogi i kom jami ma Jehovah ocweyo. Oromo bedo ni wun lunyodo ma i kare-ni bene wutye ki kare ma kit meno me tic ki cwec me pwonyo lutinowu. Nen kong kit ma lunyodo mukene gutimo kwede meno.

 9. Gin ango ma itwero pwonyo ki bot Punitha ki Katya?

⁹ Mego mo ma nyinge Punitha, ma bedo i citi mo madit i lobo India, owaco ni: “Ka walimo wadiwa i caro, waneno meno calo kare maber adada me konyo lutinowa me pwonyo lok i kom cwec pa Jehovah. Awinyo calo lutinona giniang lok i kom cwec maber ka gua woko ki i citi madit ma gudine opong ki mutoka kacel ki dano.” Wun lunyodo, lutinowu wigi pe biwil i kom kare ma wucwalo kacel kwedgi i kabedo mo mamwonya. Laminwa mo ma a ki i lobo Moldova ma nyinge Katya owaco ni: “Jami mutimme i kare me tinona ma wiya po iye loyo aye obedo kare ma atero kacel ki lunywalla i caro. Atye ki pwoc madwong adada botgi pi pwonya cakke ma atidi me cung kong manok me neno jami ma Jehovah ocweyo ki me neno kite i cwecce.”

10. Gin ango ma lunyodo gitwero timo ka ginongo ni tek me a woko ki i citi? (Nen bok ma wiye tye ni “Kony pi Lunyodo.”)

¹⁰ Ka pe twere me wot wa i caro kono? Laco mo ma nyinge Amol, ma bene bedo i India, owaco ni: “Ka ma abedo iye, mitte ni lunyodo guti pi cawa malac, dok wot me cito wa i caro welle tek adada. Ento itwero neno cwec pa Jehovah dok iloko i kom kite ka itye i bar mo matidi nyo ibedo i te baraja me ot mo.” Ka wangi bit, ci ibineno bene cwec mapol i nget paconi ma itwero nyuto ki lutinoni. (Jab. 104:24) Itwero bedo ki kare me neno winyi, jami ma lak alaka, ginapita, ki jami mukene mapol. Laminwa Karina, ma a ki i Germany, owaco ni: “Mamana maro ature, pi meno i kare ma pud atidi, en onongo cimma ature ma ginen mwonya teke watye ka wot kacel kwede.” Wun lunyodo, wutwero bene tic ki vidio kacel ki jami akwana ma loko i kom cwec ma dulwa oyubo me pwonyo lutinowu. Ada, labongo paro pi ka ma ikwo iye, itwero konyo lutinoni me neno gin ma Lubanga ocweyo. Kong dong wanenu kit pa Jehovah mogo ma itwero lok iye bot lutinoni.

11. Lunyodo gitwero konyo lutinogi me neno mar pa Jehovah nining?

¹¹ Me konyo lutinoni me neno mar pa Jehovah, iromo nyutigi kit ma lee mapol gigwoko kwede lutinogi ki mar. (Mat. 23:37) Itwero bene lok i kom cwec mapol mapatpat ma wanongo mitte. Karina, ma kiloko i kome con-ni owaco ni: “Ka onongo watye ka wot ki mamana, en onongo cuko cwinya me cung manok me neno kit ma ature acel acel pat ki luwote dok kit ma lengo komgi nyuto kwede mar pa Jehovah. Kadi bed mwaki mapol dong okato, ento pud angiyo ature ki diro dok aneno kalagi ki kit ma gipat kwede. Pud gimedde ki poyo wiya i kom kit ma Jehovah marowa kwede.”

12. Lunyodo gitwero konyo lutinogi me neno ryeko pa Lubanga nining? (Jabuli 139:13, 14) (Nen bene cal.)

¹² Kony lutinoni me neno ryeko pa Lubanga. Tye lok ada ni Jehovah ryek makatowa tyen mapol ata. (Rom. 11:33) Me labolle, itwero tito ki latinni kit ma pii duny cito malo ci doko pol ki kit ma pol meno lwore i kabedo mapatpat labongo ayela mo. (Yubu 38:36, 37) Itwero bene lok i kom kit ma kicweyo kwede kom dano i yo me aura. (Kwan Jabuli 139:14.) Nen kong kit ma wego mo ma nyinge Vladimir otimo kwede meno. En owaco ni: “I nino mo acel, wodwa opoto ki lela ci owano conge. I nge nino mogo manok, wang bur meno ocang woko. Wan ki dakona watite ni Jehovah ocweyo komwa ki kero me yubbe kene ka wanongo awano mo. Watite ni pe waneno gin ma kit meno i kom jami ma dano aye oyubo. Me labolle, mutoka pe yubbe kekene ka onongo akciden. Gin mutimme-ni okonyo wodwa me neno ryeko pa Jehovah.”

13. I yo ma nining ma lunyodo gitwero konyo kwede lutinogi me neno teko pa Lubanga? (Icaya 40:26)

¹³ Jehovah lwongowa ni wating wangwa wanen polo dok watam i kom kit ma tekone gwoko kwede lakalatwe ducu i kabedogi. (Kwan Icaya 40:26.) Itwero cuko cwiny lutinoni me neno dan polo kacel ki tam matut i kom gin ma gineno. Laminwa mo ma a ki i lobo Taiwan wiye po i kom gin mo mutimme i kare ma en pud latin. En owaco ni: “I kare mo, mamana otera ka limo piny kun wabedo ka buto woko i kema, dok onongo watwero neno lakalatwe mapol i dyewor pien wacito i kabedo mabor ki citi. I kare meno, onongo atye ki lworo ni pe abitwero gwoko gennena bot Jehovah pi lyeto ma lutino kwan luwota gubedo ka keto i koma. Mamana ocuko cwinya me tam i kom teko ma Jehovah otiyo kwede me cweyo lakalatwe ducu dok opoyo wiya ni en twero tic ki teko meno me konya me loyo atematema mo keken. I nge neno cwec i kare me lim meno, amoko tamma me ngeyo Jehovah maber, dok ajingo mitina me tic pire.”

14. Lunyodo gitwero tic ki cwec nining me konyo lutinogi wek gunen ni Jehovah obedo Lubanga ma layomcwiny?

¹⁴ Cwec pa Jehovah bene nyuto ni en obedo layomcwiny dok mito ni wan bene wabed ma cwinywa yom. Lucayan dong guneno ni pol pa lee gimaro tuko, kadiwa winyi ki rec. (Yubu 40:20) Tika dong lutinoni gunyero i kare ma guneno tuko pa lee? Gwok nyo guneno latin bwura ka ryemo uci nyo lutino gwogi ma gitye ka tuko. I nino mukene ka lutinoni gunyero ma gitye ka neno tuko pa lee, pingo pe ipo wigi ni watiyo pi Lubanga ma layomcwiny?—1 Tem. 1:11.

15. Gin ango ma lunywal gitwero timone me golo tam pa lutinogi? (Carolok 20:5) (Nen bene cal.)

¹⁵ I kare mukene, lunyodo ginongo ni tek me lok ki lutinogi i kom pekki ma gitye ka kato ki iye. Ka meno aye peko ma itye kwede, twero mitte ni igol tam pa lutinoni motmot. (Kwan Carolok 20:5.) Lunywal mukene ginongo ni timo meno yot ka gitye woko ka nongo mit pa cwec pa Jehovah kacel ki lutinogi. Pingo? Tyen lok acel aye ni jami ma wiro tam pa lutino ki lunyodo bedo nok. Wego mo ma bedo i lobo Taiwan ma nyinge Masahiko otito dok tyen lok mukene: “Ka watye ka rwene ki lutinowa—calo ka watye ka ito got nyo ka wot i dog nam—gibedo agonya adada. Meno weko wanongo yot me golo tamgi.” Katya, ma kiloko i kome con-ni owaco ni: “Mamana onongo pol kare tera ka rwene i bar mo maleng i nge a ki i cukul. I kabedo maleng meno, onongo bedo yot bota me tite gin ma otimme i cukul nyo par ma atye kwede.”

16. I yo ma nining ma jo me odi gitwero yweyo wigi kacel ki nongo mit pa kwo ka giwoto ki neno cwec pa Jehovah?

¹⁶ Ka jo me odi ginongo mit pa cwec pa Jehovah kacel, gitwero yweyo wigi dok gibedo agonya. Man konyogi me jingo mar ma i kingi. Baibul waco ni watye ki “kare me nyero” ki “kare me myel,” nyo tuko. (Latit. 3:1, 4) Jehovah ocweyo kabedo maleng adada i lobo-ni ka ma watwero nongo iye mit pa jami ma wamaro. Jo me odi mapol gimaro namo kacel i kabedo mogo calo pak ma oling mot, i caro, i kin godi, nyo i dog nam. Lutino mukene gimaro ngwec kacel ki tuko i bar namo, neno lee, nyo kwang i kulu nyo nam. Pud dong watye ki kare mapol ya me yweyo wiwa ka watye woko, ma cwec pa Jehovah orumowa!

17. Pingo omyero lunyodo gukony lutinogi me nongo mit pa cwec pa Lubanga?

¹⁷ I lobo manyen, lunyodo kacel ki lutino gibibedo ki kare me nongo mit pa cwec pa Jehovah i yo ma pe twere i kare-ni. I kare meno, pe wabibedo ki tyen lok mo me lworo lee; dok gin bene pe gibilworowa. (Ic. 11:6-9) Wabibedo ki cawa muromo me nongo mit pa jami ma Jehovah ocweyo. (Jab. 22:26) Ento wun lunyodo, pe wukur nio wa i kare meno me konyo lutinowu me cako nongo mit pa cwec. Ka wuwoto ki tic ki cwec me pwonyo lutinowu lok i kom Jehovah, nen calo wubiye gin ma Kabaka Daudi owaco ni: “Ai Rwot [Jehovah], in dong itiyo lwak jami mapol.”—Jab. 104:24.