Kɛ Ya Ha Efesobi Ɔmɛ
3 Enɛ ɔ he ɔ, a wo imi Paulo tsu+ ngɛ Kristo Yesu he ngɛ nyɛ nihi nɛ nyɛ je je ma amɛ a mi ɔ nyɛ he je. 2 Niinɛ, nyɛ nu kaa a ngɔ blɔ nya ní tsumi+ kɛ wo ye dɛ kaa ma ye kɛ bua nyɛ nɛ nyɛ ná Mawu dloomi ɔ he se. 3 A je laami sane nɛ e ngɛ klɔuu ɔ kpo kɛ tsɔɔ mi kaa bɔ nɛ i ngma nyɛ he nɔ́ ko bɔɔ be ko nɛ e be ɔ. 4 Enɛ ɔ he ɔ, ke nyɛ kane enɛ ɔ, nyɛ maa na bɔ nɛ i nu Kristo he laami sane nɛ e ngɛ klɔuu ɔ+ sisi ha. 5 Ngɛ yi nɔhi nɛ be ɔ mi ɔ, a ha we nɛ adesahi a bimɛ nɛ a le laami sane nɛ ɔ kaa bɔ nɛ a gu mumi ɔ nɔ kɛ je kpo amlɔ nɛ ɔ kɛ ha e bɔfo klɔuklɔu ɔmɛ kɛ gbali ɔmɛ ɔ.+ 6 Laami sane ɔ ji kaa, nihi nɛ a je je ma amɛ a mi ɔ maa gu sane kpakpa a kɛ Kristo Yesu nɛ a kɛ lɛ maa pee kake ɔ nɔ kɛ ná weto ní, nɛ a kɛ wɔ maa pee nɔmlɔ tso ɔ he níhi,+ kɛ nihi nɛ a kɛ wɔ ma ná si womi ɔ mi blɔ fa mi nɔ́. 7 I ba plɛ enɛ ɔ he sɔmɔlɔ kɛ gu e he wami ɔ ní tsumi ɔ nɔ ngɛ Mawu dloomi nike ní nɛ e kɛ haa faa nɛ a ngɔ kɛ ha mi ɔ nya.+
8 Imi nɛ i ji nɔmlɔ nyafii pe kulaa ngɛ ni klɔuklɔu ɔmɛ+ a kpɛti ɔ, ye nine su dloomi nɛ ɔ nɔ,+ konɛ ma jaje Kristo ɔ jɔɔmi nɛ se be ɔ he sane kpakpa a kɛ tsɔɔ je ma amɛ, 9 nɛ́ ma ha nɛ nɔ fɛɛ nɔ nɛ e na laami sane nɛ e ngɛ klɔuu ɔ+ he blɔ nya tomi ɔ nɛ a ngɔ kɛ laa yi nɔhi nɛ be ɔ, ngɛ Mawu, nɔ nɛ e bɔ níhi tsuo ɔ mi ɔ. 10 Enɛ ɔ ba mi jã konɛ amlɔ nɛ ɔ, kɛ gu asafo ɔ nɔ ɔ,+ a ha nɛ nɔ yemihi kɛ blɔ nyahi nɛ a ngɛ hiɔwe ní ɔmɛ a mi ɔ nɛ a le Mawu juɛmi nɛ jeɔ kpo ngɛ blɔ slɔɔtohi babauu a nɔ ɔ.+ 11 Enɛ ɔ kɛ neneene yi mi nɛ e to ngɛ Kristo ɔ,+ nɛ ji wa Nyɔmtsɛ Yesu ɔ he ɔ kɔɔ. 12 Kɛ gu e nɔ ɔ, wa tuɔ munyu faa nɛ waa kɛ kã yaa Mawu hɛ mi faa+ kɛ gu hemi kɛ yemi nɛ wa ngɛ ngɛ e mi ɔ nɔ. 13 Enɛ ɔ he ɔ, i ngɛ nyɛ pɛɛ kpae kaa nyɛ kɔni mi nɛ ko jɔ̃ ngɛ amanehluhi nɛ i ngɛ nae ngɛ nyɛ he ɔ he je, ejakaa enɛ ɔmɛ ji hɛ mi nyami kɛ ha nyɛ.+
14 Yi mi tomi nɛ ɔ he ɔ, i kplãã si kɛ haa Tsɛ ɔ, 15 nɔ nɛ e ngɔ lɛ weku fɛɛ weku nɛ e ngɛ hiɔwe kɛ zugba a nɔ ɔ náa e biɛ kɛ jeɔ ɔ. 16 I sɔleɔ kaa kɛ gu e hɛ mi nyami nɛ hiɛ babauu ɔ nɔ ɔ, e ha nɛ nɔmlɔ nɛ nyɛ ji ngɛ mi mi blɔ ɔ he nɛ wa+ kɛ gu e mumi ɔ he wami ɔ nɔ, 17 konɛ kɛ gu nyɛ hemi kɛ yemi ɔ nɔ ɔ, nyɛ ha nɛ Kristo nɛ e hi nyɛ tsui mi nɛ suɔmi hu nɛ hi nyɛ kpɛti.+ Nyɛ sipoku nɛ ya zu mi+ nɛ nyɛɛ ma si kpɛii ngɛ sisi tomi ɔ nɔ,+ 18 bɔ nɛ pee nɛ nyɛɛ kɛ ni klɔuklɔu ɔmɛ tsuo nyɛ nyɛ nɛ nyɛɛ nu anɔkuale ɔ blimi kɛ e kami kɛ e hiɔwe yami kɛ e mi kuɔmi ɔ tsuo sisi saminya, 19 nɛ nyɛɛ le Kristo ɔ suɔmi ɔ+ nɛ e pã nile ɔ, konɛ suhi nɛ Mawu haa nɔ ɔ nɛ e hyi nyɛ tɔtɔɔtɔ.
20 Jehanɛ ɔ, ngɛ Mawu he wami ɔ nɛ e ngɛ ní tsue ngɛ wa mi ɔ nya a,+ e ma nyɛ maa pee babauu kɛ be níhi tsuo nɛ wa biɔ aloo wa susuɔ ɔ nɔ.+ 21 Lɛ nɛ e sa kaa a gu asafo ɔ kɛ Kristo Yesu nɔ nɛ a ngɔ hɛ mi nyami kɛ ha lɛ ngɛ yi nɔhi tsuo a mi kɛ ya neneene. Amen.