Kekleekle Womi Kɛ Ya Ha Korintobi Ɔmɛ
3 Lɔ ɔ he ɔ, nyɛmimɛ, i nyɛ we nɛ i kɛ nyɛ nɛ tu munyu kaa mumi mi nimli,+ se mohu kaa he lo mi nimli, kaa bimwɔwi+ ngɛ Kristo mi. 2 I ha nyɛ nyɔ nyu, se pi niye ní nɛ mi jiɔ, ejakaa nyɛ he wɛ bɔ nɛ sa lolo. Ngɛ anɔkuale mi ɔ, amlɔ nɛ ɔ po ɔ, nyɛ he wɛ bɔ nɛ sa,+ 3 ejakaa loloolo ɔ, he lo mi nimli ji nyɛ.+ Akɛnɛ hunga jemi kɛ pɛ ngɛ nyɛ kpɛti he je ɔ, anɛ pi he lo mi nimli ji nyɛ,+ nɛ pi nɛ nyɛ ngɛ nyɛɛe kaa bɔ nɛ adesahi nyɛɛɔ ɔ lo? 4 Ejakaa ke nɔ kake deɔ ke, “Paulo nɔ́ ji mi,” se nɔ kpa hu deɔ ke, “Imi lɛɛ Apolo nɔ́ ji mi” ɔ,+ anɛ pi nɛ nyɛ ngɛ nyɛ ní pee kaa bɔ nɛ nimli adesahi peeɔ a ní ɔ lo?
5 Ke jã a, lɛɛ mɛnɔ ji Apolo mɔ? Ee, mɛnɔ ji Paulo? Wa ji sɔmɔli+ nɛ nyɛ gu a nɔ kɛ ba he ye, kaa bɔ nɛ Nyɔmtsɛ ɔ ha nɔ fɛɛ nɔ ɔ. 6 I du,+ Apolo pue nɔ nyu,+ se Mawu ya nɔ nɛ e ha nɛ e ngɛ wae, 7 enɛ ɔ he ɔ, pi nɔ nɛ e duɔ ɔ nɛ́ e pee nɔ́ ko, nɛ jã kɛ̃ lɛ pi nɔ nɛ e pueɔ nɔ nyu ɔ, mohu ɔ, Mawu, nɔ nɛ e haa nɛ e waa a.+ 8 Amlɔ nɛ ɔ, nɔ nɛ e duɔ ɔ kɛ nɔ nɛ e pueɔ nɔ nyu ɔ tsuo a sɔ,* se a ti nɔ fɛɛ nɔ nine maa su lɛ nitsɛ e hiɔwo nɔ ngɛ lɛ nitsɛ e ní tsumi ɔ he.+ 9 Ejakaa wa ji nihi nɛ a piɛɛ Mawu he kɛ ngɛ ní tsue. Nyɛ ji Mawu ngmɔ nɛ́ a ngɛ mi ní tsue, Mawu tsu nɛ e ngɛ mae.+
10 Ngɛ Mawu dloomi ɔ nɛ a kɛ dloo mi ɔ nya a, i fia sisi tomi ko+ kaa tsu malɔ nɔkɔtɔma nɛ e he be,* se nɔ kpa ngɛ fiae kɛ ngɛ nɔ mae. Se ha nɔ fɛɛ nɔ nɛ e ya nɔ nɛ e hyɛ bɔ nɛ e plɛ kɛ ngɛ fiae kɛ ngɛ nɔ mae ha a. 11 Ejakaa nɔ ko be nyɛe maa to sisi tomi kpa ko sisi ngɛ nɔ́ nɛ a to momo ɔ se, lɔ ɔ ji Yesu Kristo.+ 12 Jehanɛ ɔ, ke nɔ ko ngɔ sika tsu, sika hiɔ, tɛhi nɛ a he jua wa, tso, nga gbigbli, aloo go kɛ fia kɛ ma sisi tomi ɔ nɔ ɔ, 13 a maa na bɔ nɛ nɔ fɛɛ nɔ ní tsumi ɔ ngɛ ha ngɛ ligbi nɛ a maa ka ní tsumi ɔmɛ nɛ́ a hyɛ ɔ nɔ, nɛ jamɛ a ligbi ɔ, la a+ maa tsɔɔ bɔ nɛ nɔ fɛɛ nɔ ní tsumi ngɛ ha. 14 Ke nɔ ko ní tsumi nɛ e fia ngɔ ma sisi tomi ɔ nɔ ɔ da si ɔ, e nine maa su hiɔwo nɔ; 15 ke nɔ ko ní tsumi ɔ sã butuu ɔ, nɔ́ maa laa lɛ; se lɛ nitsɛ lɛɛ a ma he e yi wami; se kɛ̃ ɔ, ke e ba jã a, e maa pee kaa nɔ́ nɛ a gbla lɛ kɛ je la mi.
16 Anɛ nyɛ li kaa nyɛ nitsɛmɛ ɔ, nyɛ ji Mawu sɔlemi we+ nɛ Mawu mumi ɔ hiɔ nyɛ mi lo?+ 17 Ke nɔ ko puɛ Mawu sɔlemi we ɔ, Mawu ma kpata jamɛatsɛ ɔ hɛ mi; ejakaa Mawu sɔlemi we ɔ ngɛ klɔuklɔu, nɛ nyɛ ji jamɛ a sɔlemi we ɔ nɛ.+
18 Nyɛ ko ha nɛ nɔ ko nɛ e sisi e he: Ke nyɛ kpɛti nɔ ko susu kaa juɛmitsɛ ji lɛ ngɛ je* nɛ ɔ mi ɔ, nyɛ ha nɛ e pee kuasia, konɛ e ba pee juɛmitsɛ. 19 Ejakaa je nɛ ɔ mi juɛmi ɔ ji kuasiahi a sane ngɛ Mawu hɛ mi, ejakaa a ngma ke: “E haa nɛ nihi nɛ a ngɛ juɛmi ɔ nɔɔ klama nɛ mɛ nitsɛmɛ a tsɔ̃ ɔ mi.”+ 20 Jehanɛ hu ɔ: “Yehowa* le kaa juɛmitsɛmɛ ɔmɛ a susumi ɔmɛ peeɔ yaka.”+ 21 Enɛ ɔ he ɔ, nyɛ ko ha nɛ nɔ ko nɛ e fĩa ngɛ adesahi a mi; ejakaa nyɛ níhi ji níhi tsuo, 22 Paulo jio, Apolo jio, Kefa*+ jio, je ɔ jio, wami jio, gbenɔ jio, níhi nɛ a ngɛ amlɔ nɛ ɔ jio, níhi nɛ maa ba jio, nyɛ níhi ji níhi tsuo; 23 jã kɛ̃ lɛ Kristo hu níhi ji nyɛ;+ nɛ jã kɛ̃ lɛ Mawu hu nɔ́ ji Kristo.