Kpojemi Nɛ A Kɛ Ha Yohane
12 Lɔ ɔ se ɔ, okadi ngua ko je kpo ngɛ hiɔwe: I na yo ko+ nɛ e ngɔ pu ɔ kɛ ha e he, nɛ nyɔhiɔ ɔ ngɛ e nane si, nɛ dodoe 12 jlasi ngɛ e yi, 2 nɛ hɔ ngɛ e he. Akɛnɛ e nu kɔɔmi nɛ e ngɛ nɔ́ nae he je ɔ, e ngɛ ngmlaa kpae.
3 Okadi kpa ko hu je kpo ngɛ hiɔwe. Hyɛ! I na drako ngua ko nɛ e tsuɔ tsutsuutsu kaa la.+ E ngɛ yi kpaago kɛ koli nyɔngma, nɛ matsɛ jlasihi ngɛ e yi ɔmɛ a he; 4 nɛ e hlemi ɔ gbla hiɔwe dodoe ɔmɛ+ a mi dlami etɛ mi kake, nɛ e sake mɛ ngɔ pue zugba a nɔ.+ Nɛ drako ɔ daa si ngɛ yo ɔ+ nɛ e be kɛe nɛ e ma fɔ ɔ hɛ mi konɛ ke yo ɔ ná nɛ e fɔ ɔ, e maa mi e bi ɔ.
5 Nɛ yo ɔ fɔ binyumu ko,+ nɔ nɛ e maa ngɔ dade tso kɛ ye* je ma amɛ tsuo a nɔ ɔ.+ Nɛ a sa e bi ɔ kɛ ho he nɛ Mawu kɛ e matsɛ sɛ ɔ ngɛ ɔ ya. 6 Nɛ yo ɔ tu fo kɛ ho nga a nɔ ya ngɛ he ko nɛ Mawu dla ngɔ to lɛ ɔ, kɛ he nɛ a ma ha lɛ niye ní ngɛ ligbi 1,260.+
7 Nɛ ta ba ngɛ hiɔwe: Mikael*+ kɛ e bɔfo ɔmɛ kɛ drako ɔ hwu ta, nɛ drako ɔ kɛ e bɔfo ɔmɛ hu kɛ mɛ hwu, 8 se a yi kunimi,* nɛ jã nɔuu kɛ̃ lɛ a nɛ he ko kɛ ha we mɛ hu ngɛ hiɔwe. 9 Lɔ ɔ he ɔ, a sake drako ngua a,+ blema sinɔ ɔ+ nɛ a tsɛɔ lɛ ke Abosiami+ kɛ Satan ɔ,+ nɔ nɛ e ngɛ nihi nɛ a ngɛ zugba a nɔ tsuo sisie ɔ kɛ fɔ he;+ a sake lɛ ngɔ fɔ zugba a nɔ,+ nɛ a sake e bɔfo ɔmɛ hu kɛ piɛɛ e he. 10 I nu gbi nɛ nya wa ko ngɛ hiɔwe ke:
“Jehanɛ ɔ lɛɛ yi wami hemi ɔ,+ kɛ he wami ɔ, kɛ wa Mawu ɔ Matsɛ Yemi ɔ,+ kɛ e Kristo ɔ he wami ɔ ba, ejakaa a sake wa nyɛmimɛ ɔmɛ a nya polɔ ɔ kɛ fɔ he, nɔ nɛ e poɔ a nya nyɔ kɛ pia ngɛ wa Mawu ɔ hɛ mi ɔ!+ 11 Nɛ a gu Jijɔ Bi ɔ muɔ ɔ+ kɛ a we odase yemi munyu ɔ nɔ+ kɛ ye e nɔ kunimi,+ nɛ a sume kaa a maa baa a klaa* yi+ ke e ba lɛ kaa a ma gbo po. 12 Enɛ ɔ he ɔ, nyɛ hiɔwehi kɛ nyɛ nihi nɛ nyɛ ngɛ a mi ɔ, nyɛ nya! Musu tloo je ɔ kɛ wo ɔ,+ ejakaa Abosiami kple si kɛ ba nyɛ ngɔ, e mi mi fu wawɛɛ nitsɛ, ejakaa e le kaa be bɔɔ pɛ lɛ piɛ ha lɛ.”+
13 Jehanɛ ɔ, benɛ drako ɔ na kaa a sake lɛ kɛ fɔ zugba a nɔ ɔ,+ e wa yo ɔ nɛ e fɔ binyumu ɔ yi mi.+ 14 Se a ha yo ɔ kɔle ngua a pɛli enyɔ ɔmɛ,+ konɛ e te kɛ je sinɔ ɔ hɛ mi+ kɛ ya nga a nɔ ngɛ e sihi he ɔ, he nɛ a ma ha lɛ niye ní ngɛ be, kɛ behi, kɛ be fã* a.+
15 Nɛ sinɔ ɔ su nyu nɛ ngɛ kaa pa kɛ je e nya mi kɛ nyɛɛ yo ɔ se konɛ pa a nɛ ngɔ yo ɔ kɛ ho.* 16 Se zugba a ba ye bua yo ɔ, nɛ zugba a bli e nya mi nɛ e mii pa a nɛ drako ɔ su kɛ je e nya mi ɔ. 17 Lɔ ɔ he ɔ, drako ɔ mi mi fu yo ɔ nɛ e je kɛ ho konɛ e kɛ yo ɔ nina*+ nɛ piɛ ɔ, nɛ ji ni nɛmɛ nɛ a yeɔ Mawu mlaa amɛ a nɔ, nɛ a hɛɛ Yesu he odase yemi ní tsumi ɔ mi ɔ nɛ ya hwu ta.+