Mmɩlɩ mɔ Gyehova valɩ yɩ mmɛla manlɩ Yizilayamaa yɩ nɩ, bɛhanlɩ ndamɩ kɛɛ bekediye yi. Sɛ nɩ bedidi yɩ mmɛla zʋ a, nɩ ɩkɔwɔ bɔ nwʋ banɩ na iayila bɛ. Naasʋ̃ nɩ sɛ bɛáfa bɛyɛ egyima anzɛnyɩɩ sɛ betiã yɩ kɛnɩ bɔkɔ bɔsʋ̃mɩ awʋzʋmɩ a, ɩkɛyɩ yi nyilalɛ wɔ bɔ zʋ, na bɔkɔnwʋ amanɩyɛ. Naasʋ̃ nɩ eyi iáhile kɛɛ Gyehova ɩbʋ bɛ kʋlakʋla. Nɩ bɔkɔhʋla ‘bekezia bɛkɛɣa Gyehova bɛ Nyamɩnlɩ yɩ pɛ na bɛadiye yɩ nnɩ.’ (Dit. 30:​1-3, 17-20) Mɔɔ nɩ eyi kile yɛ lɛ kɛɛ, sa bɔkʋla bonu bɔ nwʋ wɔ bɛ tanɩ nwʋ. Nɩ sɛ bɛyɛ zɔ a, Gyehova kɔhwɩ̃ keɣike bɛ na iayila bɛ dɔkʋ̃. Yizilayamaa yɩ dɩlɩ Gyehova zʋ atunwa mbɔmɩ sʋ̃maa. Iluwa eyi ti, bɔnwʋnlɩ amanɩyɛ. Naasʋ̃ Gyehova ɩáma yi padi kolɔ wɔ yi mmenii mɔɔ bɛdɩlɩ yɩ zʋ atunwa nɩ nwʋ. Ɩzʋ̃manlɩ nkɔmɩhyɛmaa mbɔmɩ sʋ̃maa kɛɛ bɔhɔ́ yi mmenii bɛ pɛ na bɔwʋwá bɛ ma bonlu bɔ nwʋ na bezia bɛɣɩla yɩ pɛ.—2 Aw. 17:​13, 14. w24.08 9 ¶4-5

Wɔ Gyisɛsɩ yi owulo mɛda nɩ, Hibulu Kilisinyiamaa mɔɔ nɩ bɛda Gyelusalamɩ nɩɩ Dwudiyia nɩ yiyialɩ ndwokɔzɩzɩbɛ sʋ̃maa. Mmɩlɩ mɔ bɛdɩlɩ Kilisinyianɩ asafʋ yɩ nɩ, ɩákyɛ bela yɛ beyiyialɩ odwodwudiyialɛ mɔɔ numɔ yɛ sɩ a. Wɔ kɛyɛ alʋbɔ 20 mɛda nɩ, Kɩlayɩsɩ yɩ mɛdalilɛmaa nɩ yiyialɩ ozukuasɛmɩ nu anwʋkyɩlɩ, mɔɔ ɩkɛyɛ kɛɛ kɔmɩ kezile be mɔɔ izili wɔ ɔzɔ mmɩlɩ nɩ yɛ ɩva ɩɣalɩ a. (Egy. 11:​27-30) Naasʋ̃ wɔ kɛyɛ ɔlʋbɔ 61 Y.M. nu nɩ, odwodwudiyialɛ yɩ hanlɩ azɩ ɛgyɩkɩ̃ɩ̃. Naasʋ̃ nɩ bekeyiyia mɔɔ numɔ yɛ sɩ wɔ eɣile be. Ɔzɔ mmɩlɩ nɩ, Gyehova manlɩ Pɔɔlʋ hɛlɛlɩ kɛlɛta be. Nɩ fʋlɔdulɛ mɔɔ ɩwɔ numɔ nɩ dɩ yɩ mmɩlɩ nu dɩyɛ mɔɔ nɩ ikeziyeziye bɛ adwɩnɩ kɛma mɔɔ nɩ ɩlɛ́kyɛ ibazi nɩ. Kɛlɛta mɔɔ bɛhɛlɛlɩ bɛmanlɩ Hibulumaa nɩ, nɩ ɩdɩ yɩ mmɩlɩ nu dɩyɛ, iluwakɛɛ nɩ ɩlɛ́kyɛ na bɛazia bɛayiyia odwohilalɛ. Pɔɔlʋ valɩ fʋlɔdulɛ manlɩ ɔzɔ Kilisinyiamaa yɩ, mɔɔ nɩ ɩkɔwʋwa bɛ ma bekegyina odwohilalɛ mɔɔ nɩ bɛbayiyia nɩ yi munwa. w24.09 8 ¶1-2

Sɛ yɛnwʋʋ amanɩyɛ a, ye mmeliyema mmenyia nɩɩ mmaalɛ mɔɔ Gyehova va bɛ ma yɛ nɩ dɩ ɔhʋanɩ ɔkʋ̃ mɔɔ iduwa zʋlɔ ɩda yɩ ali kɛɛ ɩdɔ yɛ. Ye mmeliyema eyimmɔ kyɩkyɩ yɛ ɛɣɛɛlɛ iluwa mmɩlɩ mɔ benyia bɛma yɛ, nɩɩ azʋnlɩ mɔɔ bɛyɛ betiye yɛ mmɩlɩ mɔ yɛkãã kezimɔ yɛtɩ nɣanlɩ nwʋ odwokɔ nɩ. Ebiye a, bɛkɛhã Bayɩbʋlʋ nu odwokɔ be kɛva kɛhyɛ yɛ ɛzɩzɩbɛ anzɛnyɩɩ bɛ nɩɩ yɛ kɔwɔ mpayɩ. (Wul. 15:4) Itwu mmɩlɩ be sʋ̃ a, ebiye a eliyema be kɛhakɛ yɛ Gyehova yɩ adwɩnɩ wɔ nninyeni be nwʋ, na mɛyɩ kɔhʋla kɔwʋwa yɛ ma yɛkɔhɔ zʋ yekegyina ndwokɔzɩzɩbɛ yi munwa. Ye mmeliyema kɔhʋla kɛyɛ nninyeni mvʋlɔ kɔwʋwa yɛ, dɩkɛɛ alɩyɛ mɔɔ bɛkɛva kɛma yɛ. Itwu mmɩlɩ be a, ikehyinyia kɛɛ yekeziã ye mmeliyema kɛɛ bɔwʋwá yɛ. (Ɛɣɛ. 17:17) Ebiye a bɔlɔ́nwʋ kezimɔ yɛtɩ nɣanlɩ anzɛnyɩɩ mɔɔ yehyinyia nɩ ankasa. (Ɛɣɛ. 14:10) Meti sɛ debe ididee wʋ a, nyia ɛpɛ kɛɛ ɛkɛhã kezimɔ ɛtɩ nɣanlɩ nɩ nwʋ odwokɔ kehile wʋ ɔhɔnwʋ be mɔɔ yɩ nwʋ wʋkwa. Ma bɔnwʋ mɔɔ bɛyɛ bɛma wʋ a ɩkɔwʋwa wʋ. Ɛpɛ a, sa ɔkʋla kã nwʋmɔ odwokɔ kile asafʋ nu mbanimbani be mɔɔ ɩyɛ mɛlɛkɛ ɩma wʋ kɛɛ ɛ nɩɩ bɛ kɔwɔ nkɔmmɔ nɩ. Mmeliyema mmaalɛ be sʋ̃ bɔnwʋ yɩ kɛɛ sɛ bɛ nɩɩ eliyema baalɛ mɔɔ yɩ nwʋ wʋkwa bɔ nkɔmmɔ a, benyia ɛɣɛɛlɛyɩkyɩlɛ paa. w24.10 10 ¶15-16