Kulo, June 4
Wɔ ndɛnɩwuwalɛ eɣile nɩ nu, Nɩnɩvɛmaa bokodwodwu.—Mt. 12:41.
Nyamɩnlɩ hakɛlɩ Dwona kɛɛ Nɩnɩvɛmaa nɩ, “bézi baaba nɩɩ tanɩ.” (Dwn. 1:1, 2; 3:10; 4:9-11) Aɣinzi yi, Gyisɛsɩ valɩ ɔzɔ ndianwʋ yɩ hilehileli Gyehova yɩ nwɔkɛnwʋnlɛ nɩɩ yɩ pɛlɩpɛlɩlilɛ nu. Sɛ bɛkã kɛɛ bɛbadunwo Nɩnɩvɛmaa nɩ na bɛawuwa bɛ ndɛnɩ a, ikile mɩnla a? Gyisɛsɩ hanlɩ kɛɛ eɣile be, bokodunwo mmenii be na bɛawuwa bɛ ndɛnɩ. (Dwɔ. 5:29, NWT) Nɩ Gyisɛsɩ ɩkãã yɩ Ɔlʋbɔ Abʋmɩ Tumililɛ nwʋ odwokɔ. Ɔzɔ mmɩlɩ nɩ yɛ ‘bokodunwo baabayɛlɛmaa nɩɩ tanɩyɛlɛmaa munwatĩĩ’ a. (Egy. 24:15) Ɔzɔ tanɩyɛlɛmaa nɩ, bokodunwo bɛ na bɛawuwa bɛ ndɛnɩ. Eyi kile kɛɛ, sɛ botunwo ɔzɔ mmenii nɩ a, Gyehova nɩɩ Gyisɛsɩ kehila kɛɛ sɛ bɛkɛyɛ sutiye na bɛava mɔɔ bosumaa nɩ bɛawɔ bɛ ɛbɩla a. Sɛ botunwo Nɩnɩvɛnii be na ɩpʋ Gyehova zʋ̃mɩnlɛ a, Gyehova lɛ́ma ɔhʋanɩ ma ɩkɔhɔ zʋ kɔwʋwa azɩ. (Ayɩ. 65:20) Naasʋ̃ bɛzabɛ mɔɔ besi pɔkɔ kɛɛ bɔkɔzʋ̃mɩ Gyehova munwatĩĩ nɩ, ndɛnɩwuwalɛ yɩ kɔhɔ bʋwɔ kɛma bɛ. Bekenyia ɔnwʋmɔ ɔhʋanɩ bɔkɔwʋwa azɩ daabaa!—Da. 12:2. w24.05 5 ¶13-14
Yalɛ, June 5
Enii Ɣalɛ nɩ ɣalɩ kɛɛ ɩbabɛ bɛzabɛ mɔɔ beminli nɩ, na ialé bɛ nnwʋanlɩ.—Lk. 19:10.
Gyisɛsɩ manlɩ mmenii nwʋnlɩ kɛɛ yɩ Zɩ Gyehova dɩ nwɔkɛnwʋnlɛvʋlɔ baaba. (Dwɔ. 14:9) Iluwalɩ yi ndwokɔ nɩɩ yɩ nyɛlɩyɛ zʋ ihileli kɛɛ yɩ Zɩ mɔɔ ɩwɔ kunlumiyɩbalɛ nɩɩ nwɔkɛnwʋnlɛ nɩ dɔ mmenii, na ɩpɛ kɛɛ ɩbʋwa bo nu bela ma ɩkʋ̃ itiyia tanɩ. Gyisɛsɩ wʋwalɩ mmenii mɔɔ tanɩ wɔ bɔ nwʋ ma bɛzɩnzanlɩ bo subanɩ na bɛɣa belili yɩ mɛda. (Lk. 5:27, 28) Nɩ Gyisɛsɩ zi kɛɛ ɩlɛ yɩ nnwʋanlɩ ɩbawɔ afɔlɩ. Mbɔmɩ sʋ̃maa yɛ ɩhã ihileli yɩ adʋwavʋlɔ yɩ kɛɛ bɛkɛyɩ yɩ bɛkɛma na bɛahũ yi wɔ owudo zʋ a. (Mt. 17:22; 20:18, 19) Nɩ izi kɛɛ yɩ afɔlɩ nɩ kɛyɩ oyuwadɩ yɩ tanɩ yɩ wɔ kɛ. Gyisɛsɩ hilehileli sʋ̃ kɛɛ sɛ ɩfa yɩ nnwʋanlɩ ɩbɔ afɔlɩ iwie yi a, ‘ɩkɔhwɩ̃ mmenii munwatĩĩ’ ɩkɛma yɩ nwʋ. (Dwɔ. 12:32) Bɛzabɛ mɔɔ benyia Gyisɛsɩ nu dedi na bɛfa yɩ ahyɛdɩ bɛyɛ egyima nɩ kɔhʋla kɔzɔ Gyehova anyɩ. Sɛ bɛyɛ zɔ a, bɛlɛ́yɛ ‘alɔngɔ bɛkɛma tanɩ ebiyekʋ̃.’ (Wul. 6:14, 18, 22; Dwɔ. 8:32) Gyisɛsɩ nyianlɩ akɛnɣazɩzɩbɛ na ɩzʋ̃ yɩ pɛ nu iwuli owulo ɛyɛkɛ ɛyɛkɛ na ɩava iale yɛ.—Dwɔ. 10:17, 18. w24.08 5 ¶11-12
Fʋlɔ, June 6
Ansaana awielɩyɛ nɩ ɩkɛɣa nɩ, ɩsɛ kɛɛ Odwokɔba nɩ bɛkã bekile amanlɩ munwala.—Mk. 13:10.
Kakɛ kezimɔ ɛdɩlɩ nɣanlɩ mmɩlɩ mɔ ili bɔmʋnlɩ mɔɔ ozumanlɩ nɔhʋanlɛ yɩ wɔ Nyamɩnlɩ Odwokɔ yɩ nu nɩ. Ɛɣa nwʋnlɩ kɛɛ, wʋ sʋlɔ Ɛzɩlɛ nɩ dɔ wʋ, ɩpɛ kɛɛ ɛba kɩnla yɩ abusunwa mɔɔ bɔsʋ̃mɩ yɩ nɩ nwʋ, ɩwɔ anʋhʋba kɛɛ ɩkɛyɩ ɛyɛkɛ nɩɩ amanɩyɛnwʋnlɛ wɔ kɛ, na sa ɔkʋla kila ɔhʋanɩ kɛɛ ɔkɔnwʋ wʋ alɔvʋlɔ mɔɔ bowuwu nɩ dɔkʋ̃ wɔ oyuwadɩ fʋlɔ yi nu, nɩɩ sʋ̃maa mɔɔ ɩkɩnlahɩnla nwʋmɔ. (Mk. 10:29, 30; Dwɔ. 5:28, 29; Wul. 8:38, 39; Yik. 21:3, 4) Mɔɔ ozumanlɩ nɩ hanlɩ wʋ ahʋnlɩnɩ na ɩmanlɩ wʋ anyɩ leli. (Lk. 24:32) Ɛɣa nyianlɩ nɔhʋanlɛ mɔɔ osumaa nɩ nwʋ ɔlɔlɛ, na nɩ ɛpɛ paa kɛɛ ɛkã nwʋmɔ odwokɔ kile mmenii mvʋlɔ! (Fa tindiã Gyɛlɩmaya 20:9 nwʋ.) Sɛ ɔlɔlɛ mɔɔ yɛwɔ yɛma nɔhʋanlɛ yɩ de ndɩnɩ wɔ yɛ ahʋnlɩnɩ nu a, yɛlɔ́kʋla kɛhã ye munwa kediã nu. (Lk. 6:45) Yɛtɩ nɣanlɩ kɛɛ Gyisɛsɩ yɩ adʋwavʋlɔ yɩ mɔɔ bɛhanlɩ kɛɛ: “Amɩyɛ mɛyɩ mɔɔ yɛdɩ nɩɩ mɔɔ yɛnwʋ yɩ nɩ yɛlɔ́kʋla yekeyiaki yɩ ɛhanlɛ” nɩ. (Egy. 4:20) Yɛdɔ nɔhʋanlɛ yɩ paa, meti yɛpɛ kɛɛ yɛkã nwʋmɔ odwokɔ yekile mmenii dʋdʋ bela mɔɔ yɛkɔhʋla. w24.05 15 ¶5; 16 ¶7