Eŋɛnywiwema Matie Tɔ

22 Yesu gbedo labalu buwo nɔ wo mɔ: 2 “Jeŋkwi mɛ Fyɔɖuxu lɔ le shigbe efyɔ ɖeka ci yí ɖu azan gangan nɔ amɛwo hwenu eviɛ ɖe nyɔnu nɛ. 3 Eyi edɔ yi dɔwaviwo ɖaɖa mɛ ciwo woyɔ nɔ alɔlelezan lɔ mɔ wo le va, vɔ wogbe mɔ yewodava o. 4 Égbedɔ dɔwavi buwo ɖaɖa yí mɔ, ‘Mínu nɔ mɛ ciwo woyɔ lɔwo mɔ: “Ŋɖa ŋɖuɖu lɔ vɔ, ŋwu nyibusu koɖo elan doami anyitɔwo yí enushianu sɔgbe. Míva alɔlelezan lɔ tɔxu.”’ 5 Vɔ wodesɔ ɖe le ji ni o, mɛɖekawo yi wowo bojiwo yí mɛbuwo yi wowo jɔwo dogbe. 6 Vɔ mɛkpɛtɛwo lé yi dɔwavi lɔwo, tre fun nɔ wo yí wu wo.

7 “Efyɔ lɔ do dɔmɛzi yí dɔ yi hwawaviwo ɖaɖa yí woyi wu amɛwutɔ lɔwo yí tɔ zo wowo ju lɔ. 8 Eyi enu nɔ yi dɔwavi lɔwo mɔ: ‘Nushianu sɔgbe nɔ alɔlelezanɖuɖu lɔ, vɔ mɛ ciwo woyɔ lɔwo deje o. 9 Eyi taɖo míyi eju lɔ mɔganwo ji yí ayɔ amɛshiamɛ ci míakpɔ nɔ woava alɔlelezanɖuxu lɔ.’ 10 Edɔwavi lɔwo yi emɔ lɔwo ji shigbe lé enui nɛ yí yɔ mɛshiamɛ ci wokpɔ, amɛvwinwo koɖo amɛnywiwo; eyi mɛ ciwo yí va* ɖɔ exɔ ci mɛ woɖukɔ alɔlelezan lɔ le kpiŋ.

11 “Ci efyɔ lɔ va mɔ yeaglo mɛ ciwo woyɔ lɔwo kpɔɔ, ékpɔ ŋsu ɖeka ci yí dedo alɔlelewu o. 12 Eyi taɖo ebiɔɛ se mɔ: ‘Ðayɛ, lé èwɛ yí va lɛ yí dèdo alɔlelewuɔ?’ Vɔ dekpɔ nyɔ ɖe anu o. 13 Eyi efyɔ lɔ nu nɔ yi dɔwaviwo mɔ: ‘Míbla alɔ̀ koɖo afɔwo ni yí asɔ dɔŋkpe ɖaɖa vinvin mɛ le xexenu. Enɔ yí afan vin yí aɖu aɖukli le nɛ.’

14 “Ðo amɛ sugbɔ woyɔ, vɔ kankin wocan le wo mɛ.”

15 Yi goduɔ, Farizitɔwo so vayi bla gbeju keŋ alé Yesu le yi nuxuwo mɛ. 16 Eyi taɖo wodɔ wowo nukplaviwo koɖo Erodi gbɛbɔbɔ mɛ tɔwo yí wovayi nu ni mɔ: “Enukplamɛtɔ, mìnya mɔ ètonɔ nyɔnɔnwi yí nunɔ nyɔnɔnwi so Mawu nu yí denɔnɔ mɛɖe ji o, ɖo denyi lé amɛwo le do le agogbe nu èkpɔnɔ do yí sɔ wanɔ nu do wo nu o. 17 Eyi taɖo nu nɔ mì, lé èkpɔɛ doɔ? Ésɔgbe le eseɛ mɛ* mɔ woacu taga nɔ Seza a, alo desɔgbe o?” 18 Vɔ ci Yesu nya susu vɔn ci yí le tamɛ nɔ woɔ, énu mɔ: “Ayemɛnuwatɔwo, nyi yí taɖo mídodoɔŋ kpɔɔ? 19 Mídasɛ eho ci wosɔ cunɔ taga lɔ nɔŋ.” Wosɔ denari* ɖeka ni. 20 Ébiɔ wo se mɔ: “Mi takpu koɖo mi ŋkɔ yí le gajun lɔ jiɔ?” 21 Woɖo ŋci ni mɔ: “Seza tɔ yɔ.” Eyi enu nɔ wo mɔ: “Taɖo mísɔ ŋciwo yí nyi Seza tɔwo nɔ Seza; vɔ ŋciwo yí nyi Mawu tɔwoɔ, mísɔ wo nɔ Mawu.” 22 Ci wose ahan ɔ, ékpaca wo yí woso le gbɔ yí ɖedo.

23 Gbenɔgbe lɔ keɔ, Sadusitɔ ciwo yí nunɔ mɔ fɔnfɔnsoku deli o, va gbɔ yí biɔɛ se mɔ: 24 “Enukplamɛtɔ, Moizi nu mɔ: ‘Nɔ ŋsu ɖe deji vi gbɔxwe yí kuɔ, nɔviɛ ɖo asɔ kpo ashiɛ yí aji viwo nɔ fofoɔ ci yí ku lɔ.’ 25 Ecɛyɛɔ, nɔjinɔ amadrɛ ɖekawo li. Amɛ ŋkɔtɔ ɖe nyɔnu, deji vi gbɔxwe yí ku o; eyi taɖo nɔviɛ sɔ kpo ashiɛ. 26 Ahan eyi do nɔ amɛ amɛvetɔ, amɛtɔntɔ keke je nɔvi amadrɛ lɔwo pleŋ ji nɛ. 27 Nyɔnu lɔ yí vanyi amɛ kpɛtɛkpɛtɛtɔ ci yí ku. 28 Taɖo nɔ wovafɔn so ku ɖe, mi shi avanyi le wo amadrɛ lɔwo mɛɔ? Ðo wo pleŋ ɖi ɖɛ kpɔ.”

29 Yesu ɖo ŋci nɔ wo mɔ: “Míwa fɛn kpɔɛ, ɖo mídenya Enuŋwlɛŋwlɛ lɔwo alo lé Mawu ŋsɛn gangan do o. 30 Ðo le fɔnfɔnsoku lɔ hwenuɔ, ŋsuwo daɖe nyɔnu o yí wodasɔ nyɔnuwo na asu hɛnnɛ o. Vɔ woale shigbe mawudɔla ciwo yí le jeŋkwi mɛ nɛ. 31 Mídehlɛn enyɔ ci Mawu nu nɔ mí so amɛkukuwo fɔnfɔnsoku nu ba? Énu mɔ: 32 ‘Ŋnyi Abrahamu Mawu, Izaki Mawu koɖo Ʒakɔbu Mawu.’ Denyi amɛkukuwo Mawu enyi o, vɔ amɛleagbuwo Mawu yɔ.” 33 Ci amɛahwa lɔ se nyɔ cɛwoɔ, lé Yesu kplakpla nu amɛ do kpaca wo.

34 Ci Farizitɔwo se mɔ Sadusitɔwo dekpɔ nyɔ ɖe yí sɔ ɖo ŋci nɔ Yesu ɔ, wobɔ doju yí va gbɔ. 35 Mɛɖeka le wo mɛ yí jeshi Ese lɔ ɖɛ nywiɖe. Ci eji mɔ yeado Yesu kpɔɔ, ébiɔɛ se mɔ: 36 “Enukplamɛtɔ, ese ci yí nyi ese gangantɔ le Moizi Se lɔ mɛɔ?” 37 Éɖo ŋci ni mɔ: “‘Èɖo alɔn Yehowa* ao Mawu koɖo ao ji pleŋ, ao se* pleŋ koɖo ao susu pleŋ.’ 38 Eyi nyi ese gangantɔ lɔ koɖo ese ŋkɔtɔ. 39 Amɛvetɔ ci yí ɖyi yí nyi mɔ: ‘Èɖo alɔn ao kpena shigbe eoŋtɔ nɛ.’ 40 Ese amɛve cɛwo ji yí Ese lɔ pleŋ koɖo enyɔ ciwo yí Enyɔnuɖɛtɔwo nu nɔ nyinɔnɔ do.”

41 Ecɛyɛ ci Farizitɔwo pleŋ bɔ dojuɔ, Yesu biɔ wo se mɔ: 42 “Lé míkpɔnɔ Kristo doɔ? Mi vi enyiɔ?” Woɖo ŋci ni mɔ: “Davidi vi.” 43 Ébiɔ wo se mɔ: “Vɔ nɔ enyi ahan ɖe, nyi yí taɖo gbɔngbɔn na yí Davidi yɔɛ mɔ anyi Xwetɔ, ci enu mɔ, 44 ‘Yehowa* nu nɔ anyi Xwetɔ mɔ: “Nɔ nyinɔnɔ do anyi ɖushi mɛ keke je hwenu yí nasɔ ao ketɔnɔwo do afɔwo gɔnmɛ nɔ eoɔ”’? 45 Taɖo nɔ Davidi yɔɛ mɔ Axwetɔ ɖe, lé ewɛ yí gbenyi eviɛɔ?” 46 Mɛɖe desun ji yí kpɔ nyɔ ɖe yí sɔ ɖo ŋci ni o; eyi so gbenɔgbeɔ, mɛɖe degbegbe dɔn yí biɔ nyɔ ɖe yi se o.