Jilawo, mídra míwo viwo do nɔ woahwlɛn ta nɔ xɔse ci woɖo mɔ Enuwowatɔ ɖeka li. Míatɛnŋ ato nyɔta eɖekplɔɖedo ci yí nyi “Sɔhɛwo Biana Be—Ðe Xexea Dzɔ Le Eɖokui Sia?” le jw.org ji yí akpedo mí nu. Eyi míakpedo míwo viwo nu nɔ woasɔ enu ci yí awa dɔ do amɛwo ji sɔwu le nyɔ lɔwo mɛ keŋ nɔ akpedo wo nu nɔ woamɔŋje mɛ mɔ Enuwowatɔ ɖeka li. Do ŋsɛn yi mɔ nɔ mɛɖe ji mɔ yeaxo nuxu so nyɔta ŋtɔ́ han nuɔ, le ɖe nyɔ lɔwo mɛ kleŋkleŋ yí susu anɔ mɛ. Le kpɔwɛ mɛ, yi suklu kpena ɖe tɛnŋ nu mɔ: “Ŋci ŋkpɔ ɖekɛ ji nakando, yí ŋdekpɔ Mawu kpɔ o.” Kristotɔ jajɛ lɔ atɛnŋ aɖo ŋci mɔ: “Sɔɛ mɔ èzɔnzɔn avesu ɖeka mɛ yí mɛɖekɛ dele enɔ o, eyi èyikɔ keke yí vakpɔ yí woku dotɔ ɖeka. À mɔ dotɔ lɔ vaje nɔ yiŋtɔ yɔa? Amɛ nyaŋɖɛ ɖe yí aku dotɔ lɔ kokoko, mìatɛnŋ anu mɔ xexegbɛ lɔ va le yiŋtɔ shia? Amɛ ɖe yí awɛ dandandan!” w24.12 18 ¶16

Mì pleŋ yí ʒan emɔdasɛnamɛ gbɔxwe atɛnŋ asɔ gbeta veviwo le agbe mɛ. Mìatɛnŋ axɔ emɔdasɛnamɛ sugbɔ so hamɛmɛshinshinwo koɖo Kristotɔ bu ciwo yí shin le gbɔngbɔn mɛ gbɔ. Nɔ woshin wu mì sugbɔɔ, mìdeɖo akpɔɛ mɔ emɔdasɛnamɛ ciwo wona mì desɔ koɖo mìwo hwenu o. Yehowa ji mɔ mìwo le kpla enu so amɛshinshinwo gbɔ. Woto enu sugbɔ mɛ le agbe mɛ sɔwu mì, mɔŋje enu sugbɔ mɛ yí gbenyaŋɖɛ sugbɔ. Le Bibla hwenuɔ, Yehowa zan amɛshinshin egbejinɔtɔwo sɔ do ŋsɛn yi jukɔn yí gbedasɛ emɔ ni. Mìasɔ, Moizi, Davidi, koɖo apotru Ʒan kpɔwɛ. Wonɔ agbe le hwenu ciwo yí to akpo mɛ yí wowo nɔnɔmɛwo to akpo sugbɔ. Ci wovaɖokɔ vɔvɔnu nɔ wowo gbeɔ, wona nukplamu nywiwo jajɛwo. Amɛshinshin egbejinɔtɔ cɛwo ɖeka ɖeka tɛgbe do ŋci yí taɖo ele veviɖe mɔ woaseto nu nɔ Mawu ji. Nɔ mìtrɔ yí to enukplamu ciwo wona lɔwo mɛɔ, mìatɛnŋ akpɔ nyɔna nɔ mì nyi jajɛ alo shin can.—Rɔm. 15:4; 2 Tim. 3:16. w24.11 8 ¶1-2

So keke Nowe hwenu yí Mawu gbe mɔ agbetɔwo ŋgbeɖu ehun o. (Gɔnm. 9:​3, 4) Yehowa gbetrɔ yí gbe nyɔ cɛ le Ese ci edo nɔ Izraɛliviwo mɛ. “Woawu” mɛɖekpokpui ci yí aɖu ehun. (1 Ese. 7:27) Yesu can tɛ gbe do Ese cɛ ji. (Mt. 5:​17-19) Eyi taɖo enumabukpɔ enyi mɔ Yesu ado ŋsɛn Ʒuifu jukɔn lɔ mɔ yi le ɖu ŋcilan yetɔ alo anu ehun ciwo yí le ekanmɛ nɔ ye. Yesu xokɔ nuxu le kpɔwɛnyɔnunu mɛ shigbe lé exo nuxu nɔ nyɔnu Samaritɔ lɔ vayi nɛ mɔ: “eshi ci yí Na ni ɔ, shikɔ da gbe cii o. Eshi ci yí Na ni a trɔsun etɔjiji ci yí a jijiɛ keke [ani agbe] mavɔ.” (Ʒan 4:​7, 14) Yesu denukɔ nɔ nyɔnu Samaritɔ lɔ mɔ nɔ yɛnu eshi gbali kpoŋ ɔ, yɛakpɔ agbe mavɔ o. Ahanke denukɔ nɔ amɛahwa ci exo nuxu nɔ le Kafanawumu mɔ nɔ woɖu ye gbaza ŋtɔŋtɔ yí nu ehun ŋtɔŋtɔ yetɔɔ, woakpɔ agbe mavɔ o. w24.12 9 ¶4-6