Tɛnigbe 5 octobre
Yehowa yí nyi mɛ ci yí kpɔnɔ jiwo mɛ.—Elo. 17:3, nwt.
Gomɛ so gbeɖe enyɔnuɖɛtɔ Oze ɖɛ yí vayi ci ŋsu buwo gbɔ. Jimɛtrɔtrɔ gluia? Yehowa ci yí kpɔnɔ jiwo mɛ nu nɔ Oze mɔ: “[Gbetrɔ alɔn nyɔnu ci yí ŋsu bu lɔn yí ele hashi wakɔ.] Tɔhonɔ kpɔtɔ lɔn Izraɛlitɔwo. Vɔ wo kpɔtɔ sɛnnɔ vojuwo.” (Oze. 3:1; Elo. 16:2) Do jeshi mɔ Oze ashiɛ kpɔtɔ le nuvɔn gangan wakɔ. Éle ahan gan, Yehowa nu nɔ Oze mɔ yɛ le yi kplɔɛ gbɛ, asɔ ki keŋ nɔ woawa fafa. Ahanke Jukɔn tonumasetɔ lɔ nu decikɔ nɔ Yehowa nɛ. Ci wokpɔtɔ le nuvɔn ganganwo wakɔ can ɔ, ékpɔtɔ lɔn wo yí kpɔtɔ yí yɔkɔ wo mɔ wo le va ye gbɔ nɔ yeakpedo wo nu nɔ woatrɔ ji mɛ yí atrɔ wowo dɛnwo. Kpɔwɛ cɛ dadasɛ mɔ, Yehowa, “mɛ ci yí kpɔnɔ jiwo mɛ” ayɔ mɛɖekamɛɖeka ci yí kpɔtɔ le nuvɔn gangan wakɔ yí aje agbla mɔ mɛ lɔ le trɔ ji mɛ. w24.08 10 ¶7
Tanatagbe 6 octobre
Ese lɔwo nyi [kpɔli] nɔ enu nywi ciwo yí gbɔgbɔ.—Ebre. 10:1.
Ʒuifu ciwo yí vatrɔ Kristotɔwo dogo cukaɖa gangan ɖeka. Le hweɖekanuɔ, Ʒuifuwo nyi jukɔn ci yí Yehowa sɔ. Ʒerusalɛmu nyi texwe vevi ɖeka ci yí le dumɛ nɔ Yehowa Fyɔɖuxu le nyigban ji yí gbedoxɔ lɔ nyi fini amɛwo vawanɔ sɛnsɛn adodwi lɔ le. Ʒuifu egbejinɔtɔwo pleŋ kplɔnɔ Moizi Se lɔ do shigbe lé wowo sɛnsɛn ŋkɔnɔtɔwo kplanɔ wo do nɛ. Enukplamu ŋtɔ́wo do ese ɖewo nɔ wo kuso ŋɖuɖu nu, evososo koɖo lé woawa enu ɖaɖa mɛ ciwo yí denyi Ʒuifuwo gbɔ do. Vɔ le Yesu ku goduɔ, Yehowa degbelɔn yí xɔkɔ vɔnsa ciwo yí wowakɔ o. Ecɛ nyi cukaɖa ɖeka nɔ Ʒuifu ciwo yí Moizi Se lɔ dokplɔkplɔ ma do. (Ebre. 10:1, 4, 10) Egbɔnnu nɔ Kristotɔ ciwo yí shin le gbɔngbɔn mɛ ŋtɔkpu can mɔ woawa trɔtrɔ ŋtɔ́wo, shigbe apotru Piɛ hanci nɛ. (Edɔ. 10:9-14; Gal. 2:11-14) Enu yoyu ciwo ji Kristotɔ lɔwo vaxɔse dɔ yí Ʒuifu sɛnsɛn ŋkɔnɔtɔ lɔwo vatɔ yumɛcici nɔ wo sɛnŋsɛnŋɖe. w24.09 9 ¶4
Zangagbe 7 octobre
Mí ɖo eŋui amɛ ciwo yí kplɔkɔ mí yí nú Mawu nyɔ nɔ mí.—Ebre. 13:7, Ezoɖuɖu Yoyu Wema.
Hweɖekpokpuinu ci Yehowa ɖo dɔ ɖe nɔ yi mɛwoɔ, éjinɔ mɔ wo le wɛ le totonu. (1 Kor. 14:33) Le kpɔwɛ mɛ, Mawu dro enyi mɔ woadra eŋɛnywi lɔ le nyigban lɔ keŋkeŋ ji. (Mat. 24:14) Yehowa sɔ edɔ ŋtɔ́ do alɔ mɛ nɔ Yesu. Eyi Yesu wɛ keke edɔ lɔ anyi wawa le totonu. Ci woɖo hamɛwo do texwe sugbɔ le exwe sanŋdi ŋkɔtɔ mɛɔ, woɖo hamɛmɛshinshinwo nɔ woadasɛ emɔ nɔ wo yí akplɔkplɔ wo. (Edɔ. 14:23) Le Ʒerusalɛmuɔ, hamɛmɛshinshinwo-ha ɖeka ci yí kpɔkɔ dɔ lɔ ji ci mɛ yí apotruwo koɖo amɛshinshinwo le, sɔnɔ gbeta ciwo ji hamɛ lɔwo pleŋ ɖo awa do. (Edɔ. 15:2; 16:4) Ci wowakɔ do mɔdasɛnamɛ ciwo woxɔkɔ jiɔ, hamɛ lɔwo “likɔ eke le xɔse mɛ yí gbe sukɔ egbɔ do jí ŋkeŋke.”—Edɔ. 16:5, Ezoɖuɖu Yoyu Wema. w24.04 8 ¶1