Eŋɛnywiwema Matie Tɔ

26 Ci Yesu nu nyɔ cɛwo pleŋ ɖegbɔɔ, énu nɔ yi nukplaviwo mɔ: 2 “Mínya mɔ ekpɔtɔ ŋkeke amɛve yí woaɖu Paki lɔ. Woasa Agbetɔvi lɔ yí akin do aci nu.”

3 Eyi avɔnsatɔwo gawo koɖo jumɛgawo bɔ do avɔnsatɔ gangantɔ ci yí tɔ mɔ Kayifu xomɛ. 4 Wobla gbeju mɔ, yewoato ayemɔ ɖe ji alé Yesu yí awui. 5 Vɔ wonunuɔ mɔ: “Danyi exweɖuɖu lɔ hwenu o, ɖo ana eʒin avatɔn le amɛwo mɛ.”

6 Hwenu Yesu le Simɔ ci yí lé kpodɔ̀ sa xwe mɛ le Betani ɔ, 7 nyɔnu ɖeka hɛn amihwɛnte ci yí ve ho do egu* mɛ va Yesu gbɔ yí sɔ tɔ kɔkɔ do ta ni hwenu ele nu ɖukɔ.* 8 Ci enukplavi lɔwo kpɔɛ ahan ɔ, wodo dɔmɛzi yí mɔ: “Nyi yí taɖo wodadahɛn nu ahan ɔ? 9 Ðo wohɛn woasɛ eho gangan yí asɔ eho lɔ na wamɛnɔwo.” 10 Ci Yesu nya nyɔ ci wonukɔɔ, énu nɔ wo mɔ: “Nyi yí taɖo mídokɔ aya nɔ nyɔnu lɔɔ? Enunywi enyi ewa nɔŋ. 11 Ðo wamɛnɔwo le mí gbɔ tɛgbɛɛ. Vɔ enyɛ yɛɔ, ŋdanɔ mí gbɔ tɛgbɛɛ o. 12 Nyɔnu lɔ kɔ amihwɛnte cɛ do gotu nɔŋ yí sɔ dra anyi lankpu do ɖɛ nɔ ɖyiɖyi. 13 Ŋnukɔ nɔ mí le nyɔnɔnwi mɛ mɔ, fishiafi ci woadra eŋɛnywi lɔ le le xexeɛ pleŋ mɛɔ, woanu ŋci nyɔnu cɛ wa hɛnnɛ yí asɔ ɖonɔ ŋwi yi.”

14 Mɛɖeka le Amɛ Wive lɔwo mɛ ci woyɔnɔ mɔ Ʒudasi Iskariɔti. Éyi avɔnsatɔwo gawo gbɔ 15 yí mɔ: “Nyi míanaŋ nɔ masɛ nɔ míɔ?” Wolɔn do ji mɔ yewoacu gajunho 30 ni. 16 Eyi taɖo so hwenɔnuɔ, étɔ emɔ jiji keŋ asa Yesu.

17 Le ŋkeke ŋkɔtɔ ji nɔ Kpɔnnɔ Majimaji xwe lɔɔ, enukplavi lɔwo va Yesu gbɔ yí biɔɛ se mɔ: “Fini èji mɔ mìadra do nɔ eo nɔ Paki xweɖuɖu lɔɔ?” 18 Énu mɔ: “Míyi mɛleli gbɔ le eju lɔ mɛ yí anu ni mɔ, ‘Enukplamɛtɔ mɔ: “Anyi gamɛ tɔ ɖoɖo; ao xomɛ yí nyɛ koɖo anyi nukplaviwo aɖu Paki lɔ le.”’” 19 Eyi taɖo nukplavi lɔwo wɛ shigbe lé Yesu nui do nɔ wo nɛ yí dra nushianu do ɖɛ nɔ Paki lɔ ɖuɖu.

20 Ci fiɛfi vaɖoɔ, yɛ koɖo nukplavi 12 lɔwo nɔ kplɔn nu. 21 Ci wole nu ɖukɔɔ, émɔ: “Ŋnukɔ nɔ mí le nyɔnɔnwi mɛ mɔ, mɛɖeka le mí mɛ asaŋ.” 22 Enyɔ lɔ wa ŋshishi nɔ wo sugbɔ yí wotɔ biɔɛbiɔɛ se ɖekaɖeka mɔ: “Axwetɔ, enyɛ yɔa?” 23 Éɖo ŋci mɔ: “Mɛ ci yí sɔ alɔ̀ dodoɔ agban mɛ koɖoŋ yí asaŋ. 24 Nyɔnɔnwi yɔ, Agbetɔvi lɔ aku shigbe lé woŋwli ɖɛ so nu nɛ. Vɔ babɛ nɔ mɛ ci yí asa Agbetɔvi lɔ! Anyɔ ni sɔwu nɔ wodeji sa o.” 25 Ʒudasi, mɛ ci yí jikɔ asɛ lɔ biɔɛ se mɔ: “Rabi, enyɛ yɔa?” Yesu ɖo ŋci ni mɔ: “Yinɛ eoŋtɔ ènu nɛ.”

26 Hwenu wole nu lɔ ɖukɔɔ, Yesu sɔ kpɔnnɔ ɖeka yí do gbe ɖaɖa.* Éŋɛ kpɔnnɔ lɔ keŋ yí sɔ na nukplavi lɔwo yí mɔ: “Míxɔ aɖu. Ecɛ le dumɛ nɔ anyi lankpu.” 27 Ésɔ kɔnkpu ɖeka ci mɛ vɛn le hɛnnɛ yí do akpe do ji yí sɔ na wo yí mɔ: “Mí pleŋ mínui, 28 ɖo ecɛ le dumɛ nɔ anyi hun. Ényi ‘enublabla hun’ ci woakɔ ɖɛ do ta nɔ amɛ sugbɔ nɔ woasɔ wowo nuvɔnwo ke wo. 29 Vɔ ŋnukɔ nɔ mí mɔ: Ŋdagbenu vɛn cɛ kpɔ keke ana nɔ ŋkeke ŋtɔ́ ci ji yí nanu vɛn yoyu koɖo mí le Danyɛ Fyɔɖuxu lɔ mɛ o.” 30 Le vɔvɔnu ci woji kanfukanfuhawo ɖegbɔɔ, woto yi Eto Olivuciwo tɔ ji.

31 Yi godu Yesu nu nɔ wo mɔ: “Ŋci yí ajɔ do ŋji zan cɛ mɛ adɔ yí mí pleŋ míagbeŋ ɖɛ. Ðo woŋwlɛ ɖɛ mɔ: ‘Naxo lɛngbɔkplɔtɔ lɔ yí lɛngbɔ lɔwo agban hlɛn.’ 32 Gan nɔ wofɔnŋ so kuɔ, nayi nɔ te kpɔ mí le Galile.” 33 Vɔ Piɛ ɖo ŋci ni mɔ: “Nɔ mɛkpɛtɛwo gbe eo ɖɛ can ɔ, nyɛŋdagbe eo ɖɛ kpɔ gbeɖe o!” 34 Yesu nu do nu ni mɔ: “Ŋnukɔ nɔ eo le nyɔnɔnwi mɛ mɔ, le ezan cɛ mɛ gbɔxwe kloklo aɖe atɔɔ, àgbeŋ zetɔn.” 35 Piɛ nu ni mɔ: “Nɔ ŋɖo aku koɖo eo can ɔ, ŋdagbe eo gbeɖe o.” Nukplavi kpɛtɛwo pleŋ can nu nyɔ ɖekɛ lɔ.

36 Yesu koɖo nukplavi lɔwo yi texwe ɖeka ci woyɔnɔ mɔ Gɛtisemani yí enu nɔ wo mɔ: “Mínɔ nyinɔnɔ do lɛ nɔ mayi hunɖa yí ado gbe ɖaɖa.” 37 Eyi ekplɔ Piɛ koɖo Zebede vi amɛve lɔwo. Étɔ vevi sese yí xa sugbɔ le yiɖeki mɛ. 38 Énu nɔ wo mɔ: “Ŋsekɔ* vevi sugbɔ keke aku. Mínɔ lɛ yí anɔ zanŋte koɖoŋ.” 39 Ci ete yi ŋkɔ hwɛɖekaɔ, éje klo ji yí cɔn ŋmɛ anyi yí do gbe ɖaɖa mɔ: “Danyɛ, nɔ anya wawaɔ, nà nɔ kɔnkpu cɛ ato akpa nɔŋ. Ŋgbenyi ci nyɛŋji yí ajɔ o, vɔ ci eɔji le jɔ.”

40 Étrɔva enukplavi lɔwo gbɔ yí kpɔ wole alɔn dɔnkɔ yí enu nɔ Piɛ mɔ: “Mídatɛnŋ anɔ zanŋte koɖoŋ gaxoxo ɖeka kpeti ba? 41 Mínɔ zanŋte yí akpɔtɔ adokɔ gbe ɖaɖa, nɔ míŋgbeje tetekpɔ mɛ o. Le nyɔnɔnwi mɛɔ, édrokɔ gbɔngbɔn lɔ veviɖe,* vɔ lankpu lɔ gbɔjɔ.” 42 Yesu gbeyi zevetɔ lɔ yí do gbe ɖaɖa mɔ: “Edanyɛ, nɔ danya wawa mɔ kɔnkpu cɛ ato akpa nɔŋ o yí enyi nanui duu yɔɔ, ao dro le nyi wawa.” 43 Égbetrɔva wo gbɔ yí kpɔ wole alɔn dɔnkɔ, ɖo alɔn wugan wo. 44 Eyi egbeso le wo gbɔ yí yi do gbe ɖaɖa zetɔntɔ yí nu nyɔ ɖekɛ lɔwo. 45 Yi godu étrɔva nukplavi lɔwo gbɔ yí nu nɔ wo mɔ: “Hweyɛnu yí míale alɔn dɔnkɔ yí agbɔnkɔ domɛa? Míkpɔ ɖa! Gamɛ ci woasa Agbetɔvi lɔ yí asɔ do alɔ̀ mɛ nɔ nuvɔnwatɔwo gogo. 46 Míso nɔ mìayi. Míkpɔ ɖa! Mɛ ci yí saŋ lɔ gogo.” 47 Ci ele nuxu lɔ xokɔɔ, Ʒudasi ci yí le Amɛ Wive lɔwo mɛ vaɖo. Amɛahwa gangan ɖeka ci yí so avɔnsatɔwo gawo koɖo jumɛgawo gbɔ kplɔɛ do yí hɛn ewi koɖo kpowo.

48 Mɛ ci yí sɛ lɔ nu jeshi lɔ ɖɛ nɔ wo mɔ: “Mɛ ci nakishi nɔɔ, eyi yɔ; míli.” 49 Eyi ezɔn tiin yí yi Yesu gbɔ yí nu mɔ: “Rabi, ŋdo gbe nɔ eo!” yí kishi ni. 50 Vɔ Yesu biɔɛ se mɔ: “Ðayɛ, nyi wagbe èvaɔ?” Eyi wogbosɔ Yesu yí je ji yí li. 51 Zeɖeka tɔntɔn ɔ, mɛ ciwo yí le Yesu gbɔ ɖeka ɖe ewi ti yí kpa to nɔ avɔnsatɔ gangantɔ dɔwavi ɖeka. 52 Eyi Yesu nu ni mɔ: “Sɔ ao wi da do yi tɔxu, ɖo mɛ ciwo pleŋ yí sɔ ewi do amɛ ji aku ewi ku. 53 Alo dènya mɔ ŋhɛn naɖe kuku nɔ Danyɛ yí adɔ mawudɔlawo hwakɔn ciwo yí awu 12 ɖaɖaŋ kakayɛ ba? 54 Vɔ nɔ enyi ahan ɖe, lé Enuŋwlɛŋwlɛ ciwo yí nu ɖɛ mɔ yɛɖo ajɔ ahan awɛ avamɛɔ?” 55 Le gaxoxo ŋtɔ́ mɛɔ, Yesu nu nɔ amɛahwa lɔ mɔ: “Ewi koɖo ekpowo mísɔ va mɔ yewoaléŋ shigbe flafinɔ gangan ɖe ŋnyi nɛa? Ŋnɔnɔ gbedoxɔ lɔ mɛ yí kplanɔ nu amɛwo ŋkeŋke gan yí mídeléŋ kpɔ o. 56 Vɔ ŋcɛwo pleŋ jɔ keŋ nɔ enyɔ ciwo enyɔnuɖɛtɔwo ŋwlɛ* ɖɛ avamɛ.” Eyi yi nukplaviwo pleŋ shi gbeɖi ɖɛ.

57 Mɛ ciwo yí lé Yesu kplɔɛ yi avɔnsatɔ gangantɔ Kayifu gbɔ. Esekplamɛtɔwo koɖo jumɛgawo bɔ do nɔ. 58 Vɔ Piɛ le azɔge-azɔge nɔ Yesu yí kplɔɛ do keke vayi ɖo avɔnsatɔ gangantɔ lɔ gbadenu. Ci eɖo axwe lɔ mɛɔ, énɔ nyinɔnɔ do axa nɔ axweɛ mɛ dɔwaviwo keŋ akpɔ ŋci yí ajɔ.

59 Hwenɔnuɔ, avɔnsatɔwo gawo koɖo mɛ ciwo pleŋ yí le Sanhedrɛn lɔ mɛ jijiɛ mɛ ciwo yí akan ŋsu do nu nɔ Yesu keŋ nɔ woawui. 60 Ci amɛ sugbɔ va yí kan ŋsu do nu ni can ɔ, wodekpɔ nyɔ agbu ɖe o. Le vɔvɔnuɔ, amɛ amɛve ɖekawo va 61 yí nu mɔ: “Ŋsu cɛ nu mɔ, ‘Natɛnŋ agban Mawu gbedoxɔ lɔ yí atrɔ acui le ŋkeke amɛtɔn mɛ.’” 62 Eyi avɔnsatɔ gangantɔ lɔ so yí biɔɛ se mɔ: “Dèɖo nyɔ ɖe anu do nu ba? Enyɔ ci yí nyi cɛ ŋsu cɛwo nunuɔ do eo nuɔ?” 63 Vɔ Yesu bɔ nu kplikplikpli. Eyi taɖo avɔnsatɔ gangantɔ lɔ nu ni mɔ: “Ta Mawu agbuagbu lɔ mɔ, eo yí nyi Kristo Mawu Vi lɔ!” 64 Yesu ɖo ŋci ni mɔ: “Yinɛ eoŋtɔ ènu nɛ. Vɔ ŋnukɔ nɔ mí mɔ: So kakacɛ sɔ ɖedoɔ, míakpɔ Agbetɔvi lɔ ale nyinɔnɔ le ɖushi mɛ nɔ Ŋsɛntɔnɔ lɔ yí agbɔgbɔ le azɔwo mɛ le jeŋkwi mɛ.” 65 Eyi avɔnsatɔ gangantɔ lɔ drɛn awu le kɔ nɔ yiɖeki yí mɔ: “Énu nyɔkpotu! Mìgbeʒan kunuɖetɔ bua? Míkpɔa? Yiŋtɔ nu nyɔkpotu yí míse vɔ. 66 Ecɛyɛ lé míkpɔɛ doɔ?” Woɖo ŋci mɔ: “Éje nɔ ku.” 67 Eyi wocu tan do ŋmɛ ni yí xu kɔn yi. Mɛbuwo xo tomɛ ni, 68 yí mɔ: “Eo Kristo, nɔ nyɔnuɖɛtɔ ènyiɔɔ, nu mɛ ci yí xo eo.”

69 Ci Piɛ le nyinɔnɔ le gbadenuɔ, nyɔnuvi ɖeka ci yí wanɔ dɔ le axweɛ mɛ va gbɔ yí mɔ: “Eɔ can ènɔnɔ koɖo Yesu Galiletɔ lɔ!” 70 Vɔ émɔ le ŋmɛ nɔ amɛ lɔwo pleŋ yí mɔ: “Ŋdenya nyɔ ci nukɔ èle o.” 71 Hwenu eto yí yikɔ agbo lɔ gbɔɔ, nyɔnuvi bu kpɔɛ yí nu nɔ mɛ ciwo yí le nɔ mɔ: “Ŋsu cɛ can nɔnɔ koɖo Yesu Nazarɛtitɔ lɔ.” 72 Égbemɔ ke yí ta nu mɔ: “Ŋdejeshi ŋsu ŋtɔ́ ɖɛ o!” 73 Sabaɖeɔ, mɛ ciwo yí le te le nɔ gbosɔ Piɛ yí nu mɔ: “Nyɔnɔnwi yɔ, eɔ can èle mɛ lɔwo mɛ, ɖo lé èdokɔ gbe lɔ do can dasɛ yi.” 74 Eyi Piɛ tɔ enu dodo yiɖeki yí ta nu mɔ: “Ŋdejeshi ŋsu ŋtɔ́ o!” Eyi zeɖeka vɔɔ, kloklo ɖe atɔ. 75 Eyi Piɛ ɖo ŋwi enyɔ ci Yesu nu ni mɔ: “Gbɔxwe kloklo aɖe atɔɔ, àgbeŋ zetɔn.” Éto yi xexenu yí fan avin veviɖe.