Eŋɛnywiwema Matie Tɔ

27 Ci eŋ ke nyidin ɔ, avɔnsatɔwo gawo pleŋ koɖo jumɛgawo pleŋ do go keŋ yí nu lé woawu Yesu do. 2 Ci woblɛ ɖegbɔɔ, wokplɔɛ yi nɔ ejujikpɔtɔ Pilati.

3 Hwenu Ʒudasi ci yí sa Yesu kpɔ mɔ woso ekukojo niɔ, éve nu sugbɔ yí etrɔ gajunho 30 lɔwo yi nɔ avɔnsatɔwo gawo koɖo jumɛgawo. 4 Énu mɔ: “Ŋwa nuvɔn ci ŋsa amɛmanyaɖe hun.” Wonu ni mɔ: “Fini enyɔ ŋtɔ́ kan nɔ mìɔ? Eoŋtɔ nyɔ yɛnyi!” 5 Eyi esɔ gajunho lɔwo kɔŋgbe do gbedoxɔ lɔ mɛ yí so yí vayi do ka ve. 6 Vɔ avɔnsatɔ lɔwo sɔ gajunho lɔwo yí mɔ: “Ese deɖe emɔ mɔ woasɔ wo kɔ do finiwo wosɔ eho kɔnɔ do le gbedoxɔ lɔ mɛ o, ɖo ehun ho yɔ.” 7 Ci wolé nyɔ lɔ kpɔ ɖegbɔɔ, wosɔ ho lɔ yi xwle ezemɛtɔ nyigban keŋ aɖyinɔ mɛdruwo do nɔ. 8 Eyi taɖo woyɔnɔ nyigban lɔ mɔ Ehun Nyigban keke vaɖo egbɛ. 9 Eyi enyɔ ci wonu ɖɛ to Ʒeremi ji vamɛ. Énu mɔ: “Woxɔ gajunho 30; ényi eho ci womɔ woɖo asa ŋsu lɔ. Eho ci yí Izraɛlivi ɖewo mɔ wo le sa mɛ lɔ nɛ. 10 Eyi wosɔ ho lɔ xwle ezemɛtɔ nyigban shigbe lé Yehowa* dɔŋ do nɛ.”

11 Ecɛyɛ Yesu le te le ŋkɔ nɔ ejujikpɔtɔ lɔ yí ejujikpɔtɔ lɔ biɔɛ se mɔ: “Eo yí nyi Ʒuifuwo Fyɔ lɔa?” Yesu ɖo ŋci mɔ: “Yinɛ eoŋtɔ ènu nɛ.” 12 Vɔ ci avɔnsatɔwo gawo koɖo jumɛgawo dokɔ hwɛ yiɔ, denu nyɔ ɖe do nu o. 13 Eyi Pilati biɔɛ se mɔ: “Dèse ehwɛ ciwo pleŋ wododoɔ eo ba?” 14 Vɔ deɖo ŋci ni o, oo, denu enyɔ kuɖeka kpetii o, keke ekpaca ejujikpɔtɔ lɔ sugbɔ.

15 Le Paki xwe ɖeshiaɖe jiɔ, ejujikpɔtɔ lɔ jonɔ gakpamɛnɔtɔ ɖeka ci amɛahwa lɔ ji mɔ wo le jo. 16 Hwenɔnuɔ, ŋsu ɖeka ci yí tɔ mɔ Barabasi le gakpa mɛ. Amɛwo jeshi ɖɛ nywiɖe mɔ yɛnyi nuvwinwatɔ. 17 Eyi taɖo ci wobɔ dojuɔ, Pilati biɔ wo se mɔ: “Mi yí míji mɔ majoɔ, Barabasi a alo Yesu ci woyɔnɔ mɔ Kristo?” 18 Ðo Pilati nya nywiɖe mɔ ŋhwan yí dɔ woli vɛ. 19 Gbesɔ kpe niɔ, hwenu ele nyinɔnɔ le fini aɖo kojo leɔ, ashiɛ do ŋɛ ɖɛɖɛ mɔ: “Ŋgbewa ŋɖe koɖo amɛjɔjɔɛ ŋtɔ́ o, ɖo ŋkpe fun sugbɔ le edrɔ ci ŋku gbɛ mɛ do yɛ ŋci.” 20 Vɔ avɔnsatɔwo gawo koɖo jumɛgawo wɛ keke amɛahwa lɔ mɔ wo le jo Barabasi yí awu Yesu. 21 Ejujikpɔtɔ lɔ biɔ wo se mɔ: “Le wo koɖo ve lɔ mɛ ɖe, mi míji mɔ majoɔ?” Woɖo ŋci mɔ: “Barabasi.” 22 Pilati biɔ wo se mɔ: “Ci enyi ahan ɖe, nyi nawa nɔ Yesu ci woyɔnɔ mɔ Kristo lɔɔ?” Wo pleŋ nu mɔ: “Kin do aci nu!” 23 Ébiɔ wo se mɔ: “Nyi yí taɖoɔ? Agɔ ci ejeɔ?” Wo pleŋ kpɔtɔ dodoɔ axwa doji mɔ: “Kin do aci nu!”

24 Ci Pilati kpɔ mɔ egbla ciwo yedodoɔ dena ŋɖe o, vɔ hunnyahunnya lɔ sɛnkɔŋ dojiɔ, ésɔ shi klɔ alɔ̀ le ŋmɛ nɔ amɛahwa lɔ yí nu mɔ: “Ŋdenya ɖe le ŋsu cɛ wuwu* mɛ o. Míwo nyɔ yɛnyi.” 25 Mɛ lɔwo pleŋ nu do nu mɔ: “Yi ku* le nɔ kɔ nɔ mìwo koɖo mìwo viwo.” 26 Eyi taɖo Pilati jo Barabasi nɔ wo yí na woxo Yesu koɖo lanŋba yí sɔ jo keŋ nɔ woakin do aci nu.

27 Eyi ejujikpɔtɔ lɔ sɔjawo kplɔ Yesu yi ejujikpɔtɔ lɔ xwe mɛ yí wona sɔjawo gbɛbɔbɔ lɔ pleŋ trɔdi. 28 Woɖe awu ni yí do awu lɛgbɛ jin ɖeka ni. 29 Wosɔ ŋja lɔn efyɔkuku yí sɔ cɔn ta ni keŋ yí sɔ klogbuci ɖeka do ɖushi lɔ̀ mɛ ni. Woje klo ji do ŋmɛ ni yí kuikuiɛ yí nunuɔ mɔ: “Mìdo gbe nɔ eo, Ʒuifuwo Fyɔ!” 30 Wocu tan do nu yí sɔ klogbuci lɔ tɔ eta xoxo ni. 31 Ci wokui ɖegbɔɔ, woɖe awu lɛgbɛ lɔ le nu yí sɔ yi wuwo do ni yí kplɔɛ ɖedo keŋ ayi kin do aci nu.

32 Ci woyikɔɔ, wokpɔ ŋsu ɖeka ci yí so Sirɛnu yí tɔ mɔ Simɔ. Woʒin ji mɔ yi le sɔ efuntrenamɛci* Yesu tɔ lɔ. 33 Hwenu wovaɖo fini woyɔnɔ mɔ Gɔlgota ci yí nyi Amɛtaxutɔxu ɔ, 34 wosɔ vɛn caka koɖo egbe ci yí ve keŋ sɔ na Yesu mɔ yi le nu. Vɔ ci etɔ aɖe yi kpɔɔ, égbe mɔ yedanui o. 35 Ci wokin do aci nu ɖegbɔɔ, wosɔ nu kpɔ do yi wuwo ji yí ma wo. 36 Eyi wonɔ nyinɔnɔ do nɔ yí cɔcɔɛ. 37 Wogbeŋwlɛ enyɔ ci wosɔ do hwɛ yi do kpako ji yí kin do aci lɔ nu do tamɛ ni. Ŋci woŋwlɛ ke: “Yesu ci yí nyi Ʒuifuwo Fyɔ ke.”

38 Wokan flafinɔ gangan amɛve do axa ni, ɖeka le ɖushi mɛ ni yí xlɔtɔ le emiɔ mɛ. 39 Mɛ ciwo yí to nɔ vayikɔ zuizuiɛ. Wohunhunkɔ ta 40 yí nukɔ mɔ: “Eo ci yí mɔ yeagban gbedoxɔ lɔ yí atrɔ acui le ŋkeke amɛtɔn mɛ, hwlɛn eoɖeki gan! Nɔ Mawu vi ènyi nyaoɔ, ɖyi so efuntrenamɛci* lɔ nu!” 41 Ahanke avɔnsatɔwo gawo koɖo esekplamɛtɔwo sɔ kpe nɔ jumɛgawo can kuikui nɛ. Wonunuɔ mɔ: 42 “Éhwlɛn mɛbuwo gan; vɔ detɛnŋ hwlɛn yiɖeki gan o! Nɔ Izraɛli Fyɔ enyi nyaoɔ, le ɖyi so efuntrenamɛci* lɔ nu nɔ mìakando ji. 43 Ékando Mawu ji. Nɔ yi nu jɔnɔ ji nɔ Mawu ɔ, le hwlin gan kakayɛ, ɖo émɔ: ‘Ŋnyi Mawu Vi.’” 44 Ahanke flafinɔ gangan amɛve ciwo wokan do aci nu le axa ni ŋtɔkpu can zuikɔ nɛ.

45 So gawive* mɛ yi gatɔ̀n* mɛ han ɔ, vinvin do le eju lɔ pleŋ mɛ. 46 Gatɔ̀n mɛ han ɔ, Yesu do axwa sɛnsinɖe mɔ: “Eli, Eli, lama sabaktani?” ci gɔnmɛ yí nyi mɔ, “Anyi Mawu, anyi Mawu, nyi yí taɖo ègbeŋ ɖɛɔ?” 47 Ci mɛ ciwo yí le te le nɔ ɖewo siɔ, wotɔ nunu mɔ: “Ŋsu cɛ yɔkɔ Eli.” 48 Zeɖeka tɔntɔn ɔ, mɛɖeka shi ju le wo mɛ yí sɔ kocan do vɛn hwanhwan mɛ; ésɔ do klogbuci nu keŋ yí dui ɖɛɖɛ nɔ anu. 49 Vɔ mɛkpɛtɛwo nu mɔ: “Tashi! Mìakpɔ mɔ Eli ava xɔ ni nyao ma.” 50 Yesu gbedo axwa gangan ɖeka yí ku.*

51 Eyi xɔmɛsovɔn ci yí le kɔkɔɛtɔxu lɔ zɛn do ve so eji va gɔnmɛ. Nyigban hunhun yí etowo fɛn. 52 Yɔduwo* hun, yí amɛkɔkɔɛ sugbɔ ciwo yí ku cɔwo to ɖaɖa agogbe 53 yí amɛ sugbɔ kpɔ wo. (Ci efɔn so ku goduɔ, mɛ ciwo yí so le mɛnigla ɖo eju kɔkɔɛ lɔ mɛ). 54 Vɔ ci sɔjawo ga lɔ koɖo mɛ ciwo yí cɔcɔ Yesu koɖi kpɔ lé nyigban hunhun do koɖo ŋciwo yí jɔɔ, vɔnvɔn lé wo sugbɔ yí wonu mɔ: “Mawu Vi yí mɛ cɛ nyi nyao.”

55 Nyɔnu sugbɔ ciwo yí kplɔ Yesu do so Galile yí kpenɔdo nu can le azɔge yí kpɔkpɔ nu. 56 Mari Magdalɛnu, Mari ci yí nyi Ʒaki koɖo Ʒoze nɔlɔ sɔ kpe nɔ Zebede viwo nɔlɔ le wo mɛ.

57 Le zankpenuɔ, ŋsu hotɔnɔ ɖeka ci yí tɔ mɔ Ʒozɛfu yí so Arimate va. Yɛ can trɔ Yesu nukplavi. 58 Ŋsu cɛ yi Pilati gbɔ yí biɔ Yesu cɔ. Eyi Pilati ɖe gbe mɔ wo le sɔɛ ni. 59 Ʒozɛfu sɔ cɔ lɔ yí sɔ lɛnvɔn cigan tɔ ci yí mɛ́ sɔ trodi. 60 Ésɔ mlɔ yiŋtɔ yɔdu* mɛ, yɔdu yoyu enyi woɖe do ekpe mɛ. Ébli ekpe gangan ɖeka yí sɔ cu nu nɔ yɔdu* lɔ yí so ɖedo. 61 Vɔ Mari Magdalɛnu koɖo Mari ɖetɔ lɔ ci nɔ yí nɔ nyinɔnɔ do yɔdu lɔ ŋkɔ.

62 Le yi ŋkegbu, ŋkeke ci yí kplɔ Dradrado ŋkeke lɔ doɔ, avɔnsatɔwo gawo koɖo Farizitɔwo va bɔ do ŋkɔ nɔ Pilati 63 yí nu mɔ: “Mɛgan, mìɖo ŋwi mɔ hwenu ŋsukantɔ ŋtɔ́ le agbeɔ, énu mɔ: ‘Ŋkeke amɛtɔn godu nafɔn so ku.’ 64 Taɖo, ɖe gbe nɔ woacɔ yɔdu lɔ nywiɖe keke aje ŋkeke amɛtɔntɔ lɔ gbe, nɔ yi nukplaviwo ŋgbevafi keŋ ayi nu nɔ amɛwo mɔ, ‘Yɛfɔn so ku’ o. Nɔ denyi ahan ɔ, ŋsukankan cɛ avanyina sɔwu ŋkɔtɔ.” 65 Pilati nu nɔ wo mɔ: “Sɔjawo le yi koɖo mí, nɔ míacɔ yɔdu lɔ lé edro mí do.” 66 Eyi taɖo woso yi yí sɔ ekpe cu nu nɔ yɔdu lɔ yí elo kpiŋkpiŋ yí gbesɔ sɔjawo ɖo nɔ.