Tamɛ ci Mawu ɖo do agbetɔwo nuɔ?

 1. Tamɛ ci yí Mawu ɖo do agbetɔwo nuɔ?

TAMƐÐOÐO nywi ɖeka yí le Mawu shi kudo agbetɔwo nu. Éwa ŋsu koɖo nyɔnu ŋkɔtɔ, ciwo yí nyi Adamu koɖo Ɛva, nɔ woanɔ agbe le jikpa nyakpɔkpɔ ɖeka mɛ. Yi tamɛɖoɖo yí nyi mɔ woaji viwo, ana yí nyigban lɔ pleŋ atrɔ paradiso, yí ale bu nɔ elanwo.​—Gɔnmɛjeje 1:28; 2:​8, 9, 15; kpɔ enumɛɖeɖe bu 6 tɔ.

 2. (a) Lé mìwɛ yí nya mɔ Mawu ana yí tamɛ ci eɖo avamɛɔ? (b) Lé Bibla nu so agbe tɛgbɛɛ nɔnɔ nuɔ?

² Èbu mɔ mìava nɔ paradiso mɛ gbeɖekaa? Yehowa nu nɔ mì mɔ: “Ŋ nunuɔ nɔ mí mɔ Na wa ahan, yí Na wɛ.” (Ezai 46:​9-11; 55:11) Nyao yɔ, áwa enushianu ci eɖo mɔ yeawa, yí ŋɖekpokpui daxe mɔ ni o. Yehowa nu mɔ susu ɖe ŋci yí yewa nyigban lɔ do. “Dewɛ do gbali mɛ o.” (Ezai 45:​18, nwt) Éji mɔ agbetɔwo aɖɔ nyigban lɔ pleŋ ji. Amɛ alɔkpa ciwo yí Mawu ji mɔ woanɔ nyigban lɔ jiɔ? Yí exwe nɛni yí eji mɔ woanɔ jiɔ? Bibla ɖo ŋci mɔ: “Amɛ nywiwo a xɔ Mawu gbeɖu nyigban. Wo a nɔ̀ ji keke a sɔyì mavɔmavɔ.”​—Ehajiji Wema 37:29; Enyɔdasɛ 21:​3, 4.

 3. Ci yí agbetɔwo lekɔ dɔ̀ yí kukɔ ɖe, enyɔ ci àtɛnŋ abiɔ seɔ?

³ Vɔ amɛwo lekɔ dɔ̀ yí kukɔ le egbɛmɛ. Le texwe sugbɔɔ, amɛwo wakɔ ahwa yí wukɔ wowonɔnɔwo. Eze petii mɔ denyi ahan yí Mawu ji mɔ enuwo anɔ nɛ o. Vɔ nyi yí vajɔɔ, yí nyi yí taɖo enuwo vale ahan ɔ? Bibla ɖekɛ yí atɛnŋ aɖo enyɔbise cɛwo ŋci.

4, 5. (a) Mi yí xo nuxu nɔ Ɛva le Edɛn kpa lɔ mɛ to edan ɖeka jiɔ? (b) Lé nyɔnɔnwitotɔ ɖe atɛnŋ avatrɔ flafinɔ doɔ?

⁴ Bibla nu nɔ mì mɔ Mawu ɖo ketɔnɔ ɖeka ‘ci yí tɔ mɔ Legba koɖo Satana.’ Satana xo nuxu nɔ Ɛva to edan ɖeka ji le Edɛn kpa lɔ mɛ. (Enyɔdasɛ 12:9; Gɔnmɛjeje 3:1) Éna wobu mɔ edan lɔ yí xokɔ nuxu.​—Kpɔ enumɛɖeɖe bu 7 tɔ.

⁵ Vɔ Mawu yí wa Satana Legbaa? Oo! Mawudɔla ɖeka ci yí nɔ jeŋkwimɛ hwecinu yí Mawu drakɔ nyigban ji do nɔ Adamu koɖo Ɛva yí vatrɔ yiɖeki yí nyi Legba. (Job 38:​4, 7) Lé ecɛ atɛnŋ ajɔ doɔ? Enyɔ, lé nyɔnɔnwitotɔ ɖe atɛnŋ avatrɔ flafinɔ doɔ? Wodejii koɖo flafi o. Vɔ éna enu ci yí denyi yi tɔ o, vatɔ druidrui koɖo ŋsɛn. Yí ekpɔtɔ bukɔ enu lɔ kpɔ keke droamu lɔ va sɛnŋ doji. Eyi ci emɔ hun ni kpoŋ ɔ, éfi nu lɔ. Ésɔ yiɖeki trɔ flafinɔ.​—Hlɛn Ʒaki 1:​13-15; kpɔ enumɛɖeɖe bu 8 tɔ.

 6. Lé mawudɔla ɖeka vatrɔ Mawu ketɔnɔ doɔ?

⁶ Ahan pɛɛ yí ejɔ do mawudɔla lɔ ji nɛ. Hwecinu yí Yehowa wa Adamu koɖo Ɛvaɔ, énu nɔ wo mɔ wo le ji viwo yí “a ɖɔ nyigban ji.” (Gɔnmɛjeje 1:​27, 28) Mawudɔla lɔ atɛnŋ anu le yiɖeki mɛ mɔ, ‘Enyɛ yí agbetɔ ŋtɔ́wo pleŋ asɛn, yí atashi Yehowa!’ Zenɛni ci yí ekpɔtɔ bukɔ susu lɔ kpɔɔ, ahanke yí enu ci yí nyi Yehowa tɔ vatɔ druidrui koɖo ŋsɛn nɛ. Mawudɔla ŋtɔ́ vaji mɔ agbetɔwo le sɛn ye. Eyi taɖo ekan ŋsu nɔ Ɛva yí flui. (Hlɛn Gɔnmɛjeje 3:​1-5.) To wana ŋtɔ́ ji yí evatrɔ Satana Legba, Mawu ketɔnɔ le nɛ.

 7. (a) Nyi yí taɖo Adamu koɖo Ɛva kuɔ? (b) Nyi yí taɖo mìkunɔ nyɔxo yí vakunɔɔ?

⁷ Adamu koɖo Ɛva gbe to nɔ Mawu yí ɖu acikusɛnsɛn lɔ. (Gɔnmɛjeje 2:17; 3:6) Wowa nuvɔn do Yehowa yí le vɔvɔnuɔ, wovaku shigbe lé Yehowa nui do pɛpɛpɛ nɛ. (Gɔnmɛjeje 3:​17-19) Adamu koɖo Ɛva jijimɛviwo can nyi nuvɔnmɛwo, eyi taɖo wowo can kunɔ. (Hlɛn Rɔmatɔwo 5:12.) Nɔ mìamɔŋje enu ci yí taɖo Adamu koɖo Ɛva viwo can nyi nuvɔnmɛwo mɛɔ, mína mìasɔ kpɔwɛ ɖeka. Sɔɛ mɔ woɖa kunmɛ yí kiin do shinugban ci yí cubɔ ɖeka mɛ. Kunmɛ lɔ acubɔ do mɛ shigbe shinugban lɔ hannɛ. Ci yí Adamu dese tonu nɔ Mawuɔ, étrɔ nuvɔnmɛ. Ci enyi Adamu jijimɛviwo mìnyiɔ, eyi taɖo mì pleŋ nyi nuvɔnmɛwo alo “cubɔ” shigbe Adamu hannɛ. Yí ci mì pleŋ nyi nuvɔnmɛwo taɖo yí mìkunɔ nyɔxo yí vakunɔ.​—Rɔmatɔwo 3:23; kpɔ enumɛɖeɖe bu 9 tɔ.

8, 9. (a) Nyi yí Satana ji mɔ Adamu koɖo Ɛva le xɔ seɔ? (b) Nyi yí taɖo Yehowa dewu egufɔntɔ lɔwo zeɖeka le afɔdumɛɔ?

⁸ Satana fɔn gu do Yehowa nu hwecinu yí ena Adamu koɖo Ɛva gbe tonu sese nɔ Mawu. Éji mɔ Adamu koɖo Ɛva axɔɛ se mɔ, Yehowa nyi ŋsukantɔ koɖo acɛkpatɔ vwin ci yí dejijiɛ enywi nɔ wo o. Satana nyɔ lɔ gɔnmɛ yí nyi mɔ agbetɔwo deʒan emɔdasɛnamɛ Mawu tɔwo o, yí Adamu koɖo Ɛva ɖo asɔ gbeta kudo enuvwin koɖo enunywi nu nɔ wowoɖekiwo. Ci ele ahan ɖe, lé Yehowa akpɔ enyɔ ŋtɔ́ gbɔ doɔ? Átɛnŋ awu egufɔntɔ lɔwo yí aɖo te egufɔnfɔn lɔ. Vɔ ecɛ wawa aɖo kpe yi ji mɔ Satana nyi ŋsukantɔa? Oo.

⁹ Eyi taɖo Yehowa dewu egufɔntɔ lɔwo zeɖeka le afɔdumɛ o. Vɔ éna emɔ agbetɔwo nɔ woakpa cɛ do wowoɖekiwo ji na nɔ hwenu ɖe. Ecɛ ana yí avaze petii mɔ ŋsukantɔ teŋ yí Satana nyi, yí agbedasɛ mɔ Yehowa yí nya enu ci yí nyɔ nɔ agbetɔwo. Mìakpla enu sugbɔ so nu le Eta 11 tɔ lɔ mɛ. Vɔ lé èkpɔ Adamu koɖo Ɛva gbetasɔsɔ lɔ doɔ? Wowo nyɔ jɔ mɔ woaxɔ Satana ji se yí agbe tonu sese nɔ Mawua? Yehowa yí na enushianu Adamu koɖo Ɛva. Éna wo agbe blebu maɖonuvɔn, nɔxu nywi ɖeka koɖo edɔ ci mɛ woakpɔ jijɔ le. Vɔ Satana yɛ dena enunywi ɖe wo kpɔ gbeɖe o. Nɔ enyi eo yɔ ɖe, lé àwa nu doɔ?

10. Gbeta vevi ci yí mìwo domɛtɔ ɖekaɖeka ɖo asɔɔ?

¹⁰ Gbetasɔsɔ ŋtɔ́ hanci yí le ŋkɔ nɔ mìwo domɛtɔ ɖekaɖeka le egbɛmɛ nɛ, yí mìwo gbe nɔ te do gbetasɔsɔ ŋtɔ́ ji. Mìatɛnŋ asɔ Yehowa nɔ anyi mìwo cɛkpatɔ yí ase tonu ni keŋ adasɛ mɔ ŋsukantɔ yí Satana nyi. Alo mìatɛnŋ asɔ Satana nɔ anyi mìwo cɛkpatɔ. (Ehajiji Wema 73:28; hlɛn Elododo Wema 27:11.) Amɛ hwɛɖeka kpoŋ yí ɖoɖoɔ to Mawu le xexeɛ mɛ. Le nyɔnɔnywi mɛɔ, denyi Mawu yí kpakɔ acɛ do xexe cɛ ji o. Vɔ mi yɔɔ?

11, 12. (a) Nyi yí egbe ci Satana ɖo nɔ Yesu dasɛɔ? (b) Mawunyɔkpukpui ciwo yí dasɛ mɔ Satana yí kpakpa acɛ do xexe lɔ jiɔ?

¹¹ Yesu jeshi mɛ ci cucucu yí kpakpa cɛ do xexe lɔ ji. Gbeɖekaɔ, Satana ‘dasɛ xexe cɛ mɛ fyɔɖuxuwo pleŋ koɖo ŋcikɔkɔɛ wowo tɔ ni.’ Le yi goduɔ, Satana ɖo gbe nɔ Yesu mɔ: ‘Nasɔ enu cɛwo pleŋ jo nɔ eo nɔ èje kloji yí sɛnŋ.’ (Matie 4:​8, 9; Luiki 4:​5, 6) Biɔ eoɖeki se mɔ, ‘Nɔ fyɔɖuxu cɛwo denyi Satana tɔ ɖe, átɛnŋ anu nɔ Yesu mɔ yeasɔ wo jo nia?’ Oo. Eyi taɖo Satana tɔ yí acɛkpakpa lɔwo pleŋ nyi.

¹² Taŋfuin àbiɔ se mɔ: ‘Lé Satana atɛnŋ anyi xexe lɔ cɛkpatɔ doɔ? Denyi Yehowa Mawu Ŋsɛnwopleŋtɔ yí wa xexegbɛ lɔ ba?’ (Enyɔdasɛ 4:11) Nyɔnɔnwi yɔ, Yehowa yí wa xexe lɔ, gan Yesu yɔ Satana tiin mɔ ‘xexe lɔ fyɔ.’ (Ʒan 12:31; 14:30; 16:11) Apostolo Pɔlu can yɔ Satana Legba mɔ ‘xexe cɛ mɛ cɛkpatɔ.’ (2 Korɛntitɔwo 4:​3, 4) Apostolo Ʒan can ŋwlɛn mɔ “xexe keŋkeŋ lɔ le gɔnmɛ nɔ Enuvwinwatɔ lɔ ŋsɛn.”​—1 Ʒan 5:19.

13. Nyi yí taɖo mìʒan xexe yoyuɔ?

¹³ Xexe lɔ fɔn yí gblekɔ doji. Xexe lɔ ɖɔ koɖo ahwawawa, enuficificiwawa, amɛbleble, koɖo tamɛsɛnnuwawa. Nɔ agbetɔwo do gbla ɖekpokpui can ɔ, wodatɛnŋ aɖe cukaɖa cɛwo pleŋ si gbeɖe o. Vɔ dagbejinjin o Mawu agu xexe vwin cɛ le yi hwa Harmagedɔn lɔ mɛ, yí aɖɔlii koɖo xexe yoyu ci mɛ enujɔjɔɛwawa anɔ.​—Enyɔdasɛ 16:​14-16; kpɔ enumɛɖeɖe bu 10 tɔ.

14. Mi yí Mawu sɔ nɔ anyi Fyɔ nɔ yi Fyɔɖuxu lɔɔ? Enyɔ ci yí Bibla nu ɖɛ kudo Yesu nuɔ?

¹⁴ Yehowa sɔ Yesu nɔ anyi Fyɔ nɔ jeŋkwimɛ cɛkpakpa alo Fyɔɖuxu yi tɔ. Exwe kotokun nɛniɖe doŋkɔɔ, Bibla nu ɖɛ mɔ Yesu anyi “Efyɔvi Ŋcifafanatɔ,” yí vɔxu dani nɔ yi cɛkpakpa lɔ gbeɖe o. (Ezai 9:​6, 7) Yesu nu nɔ yi dokplɔtɔwo mɔ wo le do gbe ɖaɖa kudo acɛkpakpa lɔ vava nu. Énu mɔ: ‘Ao Fyɔɖuxu le va. Ao dro le nyi wawa le nyigban ji shigbe lé hanci yí enyi wawa le jeŋkwimɛ ɛnɛ.’ (Matie 6:10) Mìakpɔ lé Mawu Fyɔɖuxu lɔ avaɖɔli acɛkpakpa cɛwo do le Eta 8 tɔ lɔ mɛ. (Hlɛn Daniɛli 2:44.) Le yi goduɔ, Mawu Fyɔɖuxu lɔ ana yí nyigban lɔ atrɔ paradiso nyakpɔkpɔ ɖeka.​—Kpɔ enumɛɖeɖe bu 11 tɔ.

15. Nyi yí “nyigban yoyu” lɔ nyiɔ?

¹⁵ Bibla ɖo gbe ɖɛ mɔ: ‘Mìle te kpɔ jeŋkwi yoyu koɖo nyigban yoyu, fini jɔjwɛnyinyi anɔ.’ (2 Piɛ 3:13; Ezai 65:17) Nɔ Bibla xokɔ nuxu so “nyigban” nu hweɖewonuɔ, agbetɔ ciwo yí le ji nu yí exokɔ nuxu so. (Gɔnmɛjeje 11:​1, nwt) Eyi taɖo “nyigban yoyu” ci yí le jɔjɔɛɖe le dumɛ nɔ agbetɔ tonusetɔ ciwo yí Mawu yra.

16. Enunana vevi ci yí Mawu ana mɛ ciwo yí anɔ agbe le yi xexe yoyu lɔ mɛɔ, yí nyi mìawa yí axɔ enunana ŋtɔ́ɔ?

¹⁶ Yesu ɖo gbe ɖɛ mɔ yeana “agbe mavɔ” mɛ ciwo yí anɔ Mawu xexe yoyu lɔ mɛ. (Maki 10:30) Nyi mìɖo awa yí axɔ enunana ŋtɔ́ɔ? Mìɖe kuku hlɛn Ʒan 3:16 koɖo 17:3 yí akpɔ ɖoŋci lɔ. Na mìakpɔ enyɔ ci yí Bibla nu so lé agbe lɔ anɔ le Paradiso mɛ le nyigban ji nu ɖa.

17, 18. Lé mìwɛ yí nya mɔ fafa anɔ nyigban lɔ pleŋ ji yí mìanɔ vofamɛɔ?

¹⁷ Enuvwinwawa, ahwawawa, enubaɖawawa koɖo tamɛsɛnnuwawawo pleŋ agu. Wodatashi amɛ vwin ɖekɛ do nyigban lɔ ji o. (Ehajiji Wema 37:​10, 11) Mawu “a ɖote ahwawo le afi ɖekpopwi le nyigban ji.” (Ehajiji Wema 46:9; Ezai 2:4) Mɛ ciwo yí lɔn Mawu yí gbesenɔ tonu ni ɖekɛwo yí anɔ nyigban lɔ ji. Woanɔ fafa mɛ tɛgbɛɛ.​—Ehajiji Wema 72:7.

¹⁸ Yehowa sɛntɔwo anɔ vofamɛ. Le Bibla ŋwlɛnŋwlɛn hwenuwoɔ, nɔ Izraɛliviwo se tonu nɔ Mawuɔ, wonɔnɔ vofamɛ, ɖo églɔnnɔ ta nɔ wo. (1 Ese Wema 25:​18, 19) Le Paradiso mɛɔ, mìdavɔn nɔ ŋɖekɛ alo mɛɖekpokpui o. Mìanɔ vofamɛ gashiagamɛ!​—Hlɛn Ezai 32:18; Mishe 4:4.

19. Nyi yí taɖo mìkando ji mɔ ŋɖuɖu abɔ zan le Mawu xexe yoyu lɔ mɛɔ?

¹⁹ Ŋɖuɖu abɔ zan. “Jinukuwo asugbɔ le nyigban lɔ ji; woaɖɔ etowo ji zan.” (Ehajiji Wema 72:​16, nwt) Yehowa, ‘mìwo Mawu, acu shi nɔ mì’ yí ‘nyigban ana jinuku.’​—Ehajiji Wema 67:6.

20. Le mìwɛ yí nya mɔ nyigban lɔ pleŋ atrɔ paradisoɔ?

²⁰ Nyigban lɔ pleŋ atrɔ paradiso. Amɛwo acu axwe koɖo jikpa nywiwo. (Hlɛn Ezai 65:​21-24; Enyɔdasɛ 11:18.) Nyigban lɔ pleŋ ji anya kpɔkpɔ shigbe Edɛn kpa hannɛ. Yehowa ananɔ enushianu ci yí ʒan mì gashiagamɛ. Bibla nu so Mawu nu mɔ: ‘Èhun ao lɔ̀wo mɛ, yí na enu ci yí ʒan enulagbu ɖeka ɖeka.’​—Ehajiji Wema 145:16.

21. Lé mìwɛ yí nya mɔ fafa anɔ agbetɔwo koɖo elanwo gblamɛɔ?

²¹ Fafa anɔ agbetɔwo koɖo elanwo gblamɛ. Elanwo dagbewa enuvevi koɖo agbetɔwo o. Vihwɛ kɛnniwo anɔ fafa mɛ koɖo elan ciwo yí wanɔ adan gbɛ.​—Hlɛn Ezai 11:​6-9; 65:25.

22. Nyi yí Yesu avawa nɔ dɔ̀nɔwoɔ?

²² Mɛɖekɛ dagbeble o. Hwecinu yí Yesu le nyigban jiɔ, éda dɔ̀ nɔ amɛ sugbɔ. (Matie 9:35; Maki 1:​40-42; Ʒan 5:​5-9) Shigbe mɔ Mawu Fyɔɖuxu lɔ Fyɔ hannɛɔ, Yesu avada dɔ̀ nɔ amɛshiamɛ. Mɛɖekpokpui dagbenu mɔ “ŋble” o.​—Ezai 33:24; 35:​5, 6.

23. Nyi yí Mawu awa nɔ amɛ kukuwoɔ?

²³ Amɛ kukuwo afɔn. Mawu ɖo gbe ɖɛ mɔ yeafɔn amɛ miliɔn nɛniɖe ciwo yí ku do agbe. “Amɛnywi koɖo amɛvɔn can wo a fɔn wo so ekumɛ.”​—Hlɛn Ʒan 5:​28, 29; Edɔwawawo 24:15.

24. Lé èse le eoɖeki mɛ so agbenɔnɔ le Paradiso mɛ nuɔ?

²⁴ Mì pleŋ ɖo asɔ gbeta ɖeka. Mìatɛnŋ asɔ gbeta keŋ akpla nu so Yehowa nu keŋ asiin, alo mìatɛnŋ asɔ gbeta awa enu ci yí dro mì. Nɔ mìsɔ gbeta yí sɛn Yehowaɔ, esɔmɛ nywi ɖeka le te kpɔ mì. Ci yí ŋsu ɖeka nu nɔ Yesu mɔ yi le ɖo ŋwi ye le ye ku goduɔ, Yesu ɖo gbe ni mɔ: “Ànɔ koɖoŋ le Paradiso mɛ.” (Luiki 23:​43, nwt) Na nɔ mìakpla enu sugbɔ so Yesu Kristo koɖo lé awɛ yí Mawu gbeɖuwo avamɛ do nu.