Yehowa ji mɔ ye mɛwo le nɔ mɛmiɖe

1-3. (a) Nyi yí taɖo vinɔ nanɔ yí eviɛ nɔnɔ mɛmiɖeɔ? (b) Nyi yí taɖo Yehowa ji mɔ ye mɛwo le nɔnɔ mɛmiɖeɔ?

SƆƐ mɔ, nyɔnu ɖeka ci yí lɔn viɛ drɛdrɛdo nɔ ayi suklu. Éna ɖeviɛ le shi yí do enu mɛ́mɛ ciwo yí nyakpɔkpɔ. Ecɛ ana ɖeviɛ akpɔtɔ anɔ lanmɛsɛn mɛ yí agbedasɛ nɔ amɛwo mɔ yi jilawo leleɛ bu ni.

² Yehowa mìwo Da ji mɔ mìwo le nɔ mɛmiɖe yí agbenɔ kɔkɔɛɖe. (Ehajiji Wema 18:26) Énya mɔ nɔ mìnɔ mɛmiɖeɔ, yɛanyɔ nɔ mì. Nɔ mìnɔ mɛmiɖeɔ, edonɔ bubu yi nu.—Ezekiɛli 36:22; hlɛn 1 Piɛ 2:12.

³ Woanɔ mɛmiɖe gɔnmɛ ɖe? Nyi yí taɖo enyɔ mɔ mìanɔ mɛmiɖeɔ? Nɔ mìgbejekɔ enyɔbiɔse cɛwo mɛɔ, mìatɛnŋ akpɔ ashitrɔtrɔ ɖewo ciwo ele mɔ mìawa mìwoŋtɔwo.

4, 5. (a) Nyi yí taɖo ele mɔ mìanɔ mɛmiɖeɔ? (b) Nyi enuwawawo kpla mì kudo lé Yehowa kpɔnɔ kɔkɔɛnyinyi do nuɔ?

⁴ Mìkplanɔ lé mìawɛ anɔ mɛmiɖe yí anɔ kɔkɔɛɖe so Yehowa ŋtɔ gbɔ. (1 Ese Wema 11:44, 45) Eyi taɖo susu vevi ci yí dɔ mìɖo anɔ mɛmiɖe yí nyi mɔ, mìji mɔ mìawanɔ nu “shigbe Mawu ɛnɛ.”—Efezitɔwo 5:1.

⁵ Enuwawawo kpla nu sugbɔ mì so lé Yehowa kpɔnɔ kɔkɔɛnyinyi do nu. Yehowa wa toto ɖewo le jɔjɔmɛnu ciwo yí na aya ci mìgbɔnnɔ koɖo eshi ci yí janɔ nɔnɔ mɛmiɖe. (Ʒeremi 10:12) Bu emɔ vovovo ciwo ji nyigban to yí dranɔ yiɖeki do nɔ agbetɔwo xo ɖyii can kpɔ. Le kpɔwɛ mɛ, Yehowa wa enuvileagbu nyɛkuin ciwo mìdatɛnŋ kpɔ koɖo ŋkuvi o, yí enyi mashinni ci wosɔ kpɔnɔ enu nyɛkuinwo yí wosɔ kpɔnɔ wo. Enuvileagbu cɛwo trɔnɔ ashi le enu ciwo mɛ aɖyiwuamɛ le nu yí wodegbewanɔ ŋɖe nɔ amɛ o. Ecɛ jiŋ sugbɔ. Jɔjɔmɛnununyatɔwo zannɔ enuvileagbu cɛ ɖewo yí sɔ dranɔ finiwo yí eɖyixoxo dahɛn nɔ nyigban lɔ do.—Rɔmatɔwo 1:20.

6, 7. Lé Moizi Se lɔ dasɛ do mɔ Yehowa sɛntɔwo ɖo anɔnɔ mɛmiɖeɔ?

⁶ Ese ci Yehowa do nɔ Izraɛliviwo to Moizi ji na mìgbekpɔ enu ci yí taɖo ele veviɖe mɔ mìanɔ mɛmiɖe. Le kpɔwɛ mɛ, woɖo anɔ mɛmiɖe le ŋcilanmɛ gbɔxwe sɛnsɛn wowo tɔ ajeŋ nɔ Yehowa. Eyi taɖo le Evuɖaɖaŋkeke jiɔ, avɔnsatɔ gangantɔ ɖo ale shi zeve. (1 Ese Wema 16:4, 23, 24) Gbesɔ kpe niɔ, gbɔxwe avɔnsatɔ buwo asa vɔn ɔ, woɖo aklɔ alɔ koɖo afɔwo. (Hunhun 30:17-21; 2 Kronika 4:6) Le nɔnɔmɛ ɖewo mɛɔ, wowunɔ mɛ ci yí da le kɔkɔɛnyinyi se ji.—1 Ese Wema 15:31; Amɛ Hlɛnhlɛn 19:17-20.

⁷ Egbɛ yɛ ɖe? Mìatɛnŋ akpla nu sugbɔ so Yehowa gɔnmɛɖosewo nu le Moizi Se lɔ mɛ. (Malashi 3:6) Ese lɔ dasɛ petii mɔ, Yehowa sɛntɔwo ɖo anɔ mɛmiɖe. Yehowa sewo detrɔ o. Ékpɔnɔ emɔ gbɛ hɛnnɛ mɔ ye sɛntɔwo ɖo anɔ mɛmiɖe alo kɔkɔɛɖe.—Ʒaki 1:27.

 8. Mìwo gbe kpaxwe ciwo mɛ ele mɔ mìanɔnɔ mɛmiɖe leɔ?

⁸ Le Yehowa gbɔɔ, woanɔ mɛmiɖe desɛn eshilele, enudodowo nyanya koɖo axomɛ dradrado ɖekɛ ji o. Kɔkɔɛnyinyi kan mìwo gbe pleŋ. Ekan sɛnsɛn, agbenɔnɔ koɖo susu mìwo tɔwo can. Ɛɛ, gbɔxwe Yehowa akpɔ mì mɔ mìle mɛmiɖeɔ, mìɖo akɔ yí anɔ mɛmiɖe le mìwo gbe kpaxwe ɖeshiaɖe mɛ.

9, 10. Lé mìwo sɛnsɛn anɔ mɛmiɖe doɔ?

⁹ Sɛnsɛn kɔkɔɛ. Mìdado alɔ ŋsusɛnsɛn nuwana ɖekpokpui mɛ o. Hwenu Izraɛliviwo nyi hwashiwo le Babiloniɔ, vojusɛntɔ ciwo yí wanɔ gbɔdɔndɔn masɔkoɖosenuwo le wowo sɛnsɛn mɛ yí trɔdo wo. Ezai nui daɖɛ mɔ, Izraɛliviwo avatrɔyi Izraɛli yí agbetrɔ atɔ sɛnsɛn kɔkɔɛ lɔ ji. Yehowa nu nɔ wo mɔ: “Mí so le afi hunnɔ! . . . Mí klɔ míwoɖekiwo. Mí ŋgbe tɔ alɔ̀ enu ci yí de kɔ o.” Wodeɖo acaka Mawu sɛnsɛn wowo tɔ koɖo enukplamu, enuwana alo kɔnu ciwo yí so Babiloni ŋsusɛnsɛn lɔ mɛ o.—Ezai 52:11.

¹⁰ Kristotɔ adodwi ciwo yí li gbɛ gbe ŋsusɛnsɛnhawo hɛnnɛ. (Hlɛn 1 Korɛntitɔwo 10:21.) Le xexeɛ pleŋ mɛɔ, kɔnu, kɔsuxwi koɖo jixɔse ciwo ji amɛ sugbɔ lɔn do so ŋsusɛnsɛnhawo nukplakplawo mɛ. Le kpɔwɛ mɛ le akɔta sugbɔ mɛɔ, woxɔɛ se mɔ ŋɖeka le agbetɔ mɛ ci yí kpɔtɔ nɔnɔ agbe le amɛ lɔ ku godu. Jixɔse ŋtɔ́ na wowanɔ kɔnu sugbɔ nɔ mɛɖe ku. (Ŋununyatɔ 9:5, 6, 10) Kristotɔwo ɖo agbe kɔnu ŋtɔ́wo. Mìwo xomumɛtɔwo tɛnŋ ʒin mì ji mɔ mìwo le wa kɔnu ŋtɔ́wo koɖo yewo. Vɔ ci mìji mɔ Yehowa le kpɔnɔ mì mɔ mìle kɔkɔɛɖeɔ, mìdeɖenɔ emɔ nɔ amɛjiʒinʒin nɛnɛ tɔwo o.—Edɔwawawo 5:29.

11. Lé mìwo gbenɔnɔ anɔ mɛmiɖe doɔ?

¹¹ Agbe kɔkɔɛ nɔnɔ. Nɔ Yehowa akpɔ mì mɔ mìle kɔkɔɛɖeɔ, mìɖo agbe gbɔdɔndɔn masɔkoɖose nuwana ɖekpokpui. (Hlɛn Efezitɔwo 5:5.) Le Bibla mɛɔ, Yehowa nu nɔ mì mɔ míwo le “shi le mateliwawa gbɔ.” Éna nyɔ lɔ mɛ kɔ gbajɛɛ mɔ, mɛ ciwo yí wanɔ gbɔdɔndɔn masɔkoɖosenuwo keŋ yí gbe jimɛ trɔtrɔ “da ɖu Mawu fyɔju cìnɔ” o.—1 Korɛntitɔwo 6:9, 10, 18; kpɔ enumɛɖeɖe buwo 22.

12, 13. Nyi yí taɖo ele mɔ mìwo susuwo anɔ kɔkɔɛɖeɔ?

¹² Susu kɔkɔɛwo. Gbɔxwe mìawa ŋɖeɔ, susumɛ esonɔ. (Matie 5:28; 15:18, 19) Nɔ susumɛ kɔ nɔ mìɔ, mìawa enu kɔkɔɛwo. Vɔ ci mìnyi nuvɔnmɛwoɔ, mìɖonɔ susu dɔndɔnwo hweɖewonu. Nɔ ejɔ ahan ɔ, mìɖo agbe susu dɔndɔn lɔwo zeɖeka. Nɔ mìdewɛɔ, mìatɛnŋ avakpɔɛ mɔ mìwo ji degbele kɔkɔɛɖe o. Mìatɛnŋ avatɔ jiji mɔ mìawa enu ciwo mìkpɔtɔ bubuɔ kpɔ. Vɔ enu ci mìɖo awa yí nyi mɔ mìasɔ enu kɔkɔɛwo xɔ mìwo susuwo mɛ. (Hlɛn Filipitɔwo 4:8.) Eyi taɖo mìgbenɔ ayeɖedaɖɛ ciwo mɛ gbɔdɔndɔn masɔkoɖose, adanuwawa koɖo enu cɛ hanciwo le. Mìwa ɖaŋ cannɔ enu ciwo mìahlɛn, ciwo mìakpɔ koɖo ciwo nu mìaxo nuxu so nywiɖe.—Ehajiji Wema 19:8, 9.

¹³ Gbɔxwe mìakpɔtɔ anɔ Mawu lɔnlɔn lɔ mɛɔ, ele mɔ mìwo sɛnsɛn, mìwo gbenɔnɔ koɖo mìwo susuwo anɔ kɔkɔɛɖe. Vɔ egbele veviɖe nɔ Yehowa mɔ mìanɔ mɛmiɖe le ŋcilanmɛ.

14. Nyi yí taɖo ele veviɖe mɔ mìanɔ mɛmiɖe le ŋcilanmɛɔ?

¹⁴ Nɔ mìna mìwo gbaza koɖo fini mìle nɔnɔ mɛmiɖeɔ, mìwo koɖo mɛ ciwo yí le axa nɔ mì kpɔnɔ nyɔna so mɛ. Mìnɔnɔ nywiɖe yí mɛkpɛtɛwo aji mɔ yewoanɔ koɖo mì. Vɔ susu vevi bu li ci yí taɖo mìɖo anɔ mɛmiɖe le ŋcilanmɛ. Nɔ mìle mɛmiɖeɔ, ehɛnnɔ kanfukanfu vɛ nɔ Yehowa. Bu tamɛ kpɔ so enyɔ cɛ nu: Nɔ èjeshi ɖevi ɖe yí exonɔ ɖyi gashiagamɛɔ, dasɔ ŋkuvi nywi kpɔnɔ yi jilawo o. Ahanke nɔ mìdelenɔ bu nɔ mìwoɖekiwo yí nɔnɔ mɛmiɖeɔ, amɛwo dasɔ ŋkuvi nywi kpɔnɔ Yehowa nɛ. Pɔlu nu mɔ: “Mì de ji mɔ amɛwo akpɔ afɛn ɖe [le] mìwo dɔ nu o. Eyi, mì de wanɔ enu ɖe ci yí a nyi cukaɖa nɔ amɛ buwo o. Mì sɔnɔ mìwoɖekiwo dasɛ shigbe Mawu dɔwaviwo ɛnɛ le enuwo pleŋ mɛ.”—2 Korɛntitɔwo 6:3, 4.

15, 16. Nyi mìatɛnŋ awa nɔ mìwoŋtɔwo akpɔtɔ anɔnɔ mɛmiɖeɔ?

¹⁵ Mìwo gbaza koɖo enudodowo. Ebulele nɔ mìwoɖekiwo keŋ anɔnɔ mɛmiɖe ɖo anyi enumamɛ nɔ mì gbeshiagbe. Le kpɔwɛ mɛ, mìlenɔ shi kabakaba abi ŋkeŋke. Mìsɔ eshi koɖo aɖyi klɔnɔ alɔ, vevitɔ gbɔxwe aɖa nu alo aɖu nu. Gbesɔwuɔ, mìɖo awɛni nɔ mìgbɔ so adadu ji alo tɔ alɔ enu xoɖyixoɖyi ɖe. Ewanɔ shigbe mɔ ashiklɔklɔ denyi ŋɖe hannɛ, vɔ yi wawa nyi enuvevi ci yí na edɔ̀lekuiwo koɖo edɔ̀lelewo dekakanɔ o. Atɛnŋ ahwlɛn agbe ŋtɔkpu gan. Nɔ mìdeɖo adadu koɖo fini eshi manyɔmanyɔwo ato to can ɔ, mìatɛnŋ aji emɔ bu ciwo ji mìato aɖe enu xoɖyixoɖyiwo swi. Blema Izraɛliviwo deɖo enu ŋtɔ́wo sa o, eyi taɖo woyi ɖyinɔ enu xoɖyixoɖyiwo do dumɛ le texwe ciwo yí jinjin le axwe gbɔ alo eshiduwo gbɔ.—2 Ese Wema 23:12, 13.

¹⁶ Deʒan mɔ mìwo nudodowo anyi cigannuwo, ehogannuwo alo ciwo yí le afiɛ ji o. Vɔ woɖo anya kpɔkpɔ yí agbemɛ́. (Hlɛn 1 Timɔte 2:9, 10.) Mìjinɔ gashiagamɛ mɔ dradrado mìwo tɔ le hɛnnɔ kanfukanfu vɛ nɔ Yehowa.—Titu 2:10.

17. Nyi yí taɖo mìji mɔ mìwo xwe koɖo finiwo yí trɔdo mì le nɔnɔ mɛmiɖeɔ?

¹⁷ Mìwo xwemɛ koɖo finiwo yí trɔdo mì. Mìna mìwo xwewo mɛ nɔnɔ mɛmiɖe nɔ fini mìle gbele do ɖe can. Mìgbena mìwo hun, zokeke, keke alo emɔzɔnnu ɖekpokpui ci yí le mì shi nɔnɔ mɛmiɖe, vevitɔ nɔ mìsɔɛ yinɔ bɔbɔwo alo kunuɖegbe. Le kunuɖegbeɔ, mìxonɔ nuxu so agbenɔnɔ le paradiso mɛmi ci yí anɔ nyigban lɔ ji mɛ nu nɔ amɛwo. (Luiki 23:43; Enyɔdasɛ 11:18) Lé mìwo xwe koɖo finiwo yí trɔdo mì nɔnɔ do, atɛnŋ adasɛ mɔ mìdrakɔdo kakacɛ nɔ agbenɔnɔ le xexe yoyu mɛmi ŋtɔ́ mɛ.

18. Nyi yí taɖo mìji mɔ mìwo sɛnsɛntɔxuwo le nɔnɔ mɛmiɖeɔ?

¹⁸ Mìwo sɛnsɛntɔxuwo. Mìdanasɛ mɔ kɔkɔɛnyinyi le veviɖe nɔ mì, nɔ mìna mìwo bɔbɔwaxu nɔnɔ mɛmiɖe. Etɛnŋ nyi Fyɔɖuxuxɔ alo takpekpewaxu ɖe. Enu ci amɛwo kpɔnɔ blaŋblaŋ nɔ wova mìwo Fyɔɖuxuxɔ mɛ ŋkɔtɔ yí nyi lé emɛ̀ do. Ena wokannɔfu Yehowa. Ci mìnyi hamɛ lɔ mɛ tɔwoɔ, mɔnukpɔkpɔ enyi mɔ mìana kpekpedonu nɔ woadra Fyɔɖuxuxɔ lɔ do nɔ akpɔtɔ anɔnɔ mɛmiɖe.—2 Kronika 34:10.

19. Nyiwo ele veviɖe mɔ mìagbeɔ?

¹⁹ Ci Bibla deyɔ adɛn baɖa ɖeshiaɖe ciwo mìɖo atashi can ɔ, ena gɔnmɛɖose ciwo yí kpenɔdo mì nu mìmɔnɔŋje lé Yehowa kpɔnɔ nɛnɛnuwo do mɛ. Deji mɔ mìwo le yɔ shiga, anu aha mu alo ayɔ gee o. Nɔ mìnyi Mawu xlɔwoɔ, mìɖo agbe enu cɛwo. Nyi yí taɖoɔ? Ðo mìdonɔ bubu gangan enunana ci yí nyi agbe nu. Enumamɛ cɛwo atɛnŋ awu mì kaba, woatɛnŋ ado dɔ̀ mì alo adahɛn nu le mɛ ciwo yí le axa nɔ mì nu. Ci enumamɛ xoɖyi cɛwo dodoɔ dɔ̀ amɛ sugbɔ yí dɔ woteteɛkpɔ mɔ yewoatashi wo. Ele ahan gan, ci mìwo nyi Yehowa xlɔwoɔ, susu nywitɔ yí dɔ mìwo tanɔshi wo: eyi nyi lɔnlɔn ci mìɖo nɔ Mawu. Cugbejɛ ɖeka nu mɔ: “Anyi gbe trɔ yoyu ci ŋtashi enumamɛwo zanzan to Yehowa kpekpedonu mɛ. . . . Ŋkpɔ mɔ ŋdasɛnŋ atashi wo nɔ enyi nyɛŋtɔ ŋsɛn mɛ yɔ o.” Na mìaxo nuxu so Bibla gɔnmɛɖose amatɔn ciwo yí atɛnŋ akpedo mɛɖe nu atashi enumamɛ ciwo yí danahɛn nu le amɛ nu.

20, 21. Enuwana ci hanciwo Yehowa ji mɔ mìwo le gbe keŋ avoɔ?

²⁰ “Ci yí gbeɖu Mawutɔ cɛwo le mì shi ɔ, exlɔnyɛwo, mì ɖo a klɔ mìwoɖekiwo le ŋcilan koɖo gbɔngbɔn ɖyixoxo mɛ. Mì ɖo a [tekpɔ] a nɔ̀ kɔkwɛnyinyi mɛ le emɔ ci ji mì le, ɖo mì nanɔ bubu Mawu.” (2 Korɛntitɔwo 7:1) Yehowa ji mɔ mìwo le tashi enumamɛ xoɖyixoɖyi ciwo yí atɛnŋ adahɛn nu le mìwo susu koɖo mìwo gbaza nu keŋ avo.

²¹ Wonu susu vevi ɖeka ci yí taɖo mìɖo “a klɔ mìwoɖekiwo le ŋcilan koɖo gbɔngbɔn ɖyixoxo mɛ” le 2 Korɛntitɔwo 6:17, 18 mɛ. Yehowa nu nɔ mì mɔ: “Mí ŋgbe tɔ alɔ̀ enu makɔmakɔ ɖe o.” Le yi goduɔ, éɖo gbe mɔ: “Enyɛ ɔ, na xɔ mí. Hwehunnɔ nu yí Ma nyi Eda nɔ mí, eyi míwo can mí a nyi evinyɛ ŋsuviwo koɖo evinyɛ nyɔlunviwo hɛnnɛ.” Ɛɛ, Yehowa alɔn mì shigbe lé vida lɔnnɔ eviɛwo nɛ nɔ mìgbe ŋɖekpokpui ci yí ana mìaxo ɖyi le ŋmɛ ni.

22-25. Bibla gɔnmɛɖose ciwo yí atɛnŋ akpedo mì nu mìagbe enumamɛ xoɖyixoɖyiwoɔ?

²² “Lɔn [Yehowa] ao Mawu koɖo eji aotɔ pleŋ, koɖo ao kla koɖo susu aotɔ keŋkeŋ.” (Matie 22:37) Ecɛ yí nyi ese vevitɔ nɔ ese lɔwo pleŋ. (Matie 22:38) Yehowa yí je nɔ mìwo lɔnlɔn pleŋpleŋ. Lé mìatɛnŋ alɔn Yehowa do pleŋ, nɔ mìsɔ gbeta mɔ mìawa ŋɖe ci yí atɛnŋ ana mìaku kaba alo adahɛn nu le ahlɔn mìwo tɔ nuɔ? Mìdewanɔ ahan o, vɔ mìwanɔ enushianu ci ji mìkpe yí sɔ danasɛ mɔ mìdokɔ bubu agbe ci ena mì nu.

²³ “[Yehowa] yí nanɔ agbe agbetɔvi ɖekpokpwiɖe, yi nanɔ gbɔngbɔn enuɖeshaɖe.” (Edɔwawawo 17:24, 25) Nɔ ao xlɔ ɖe na enuvevi ɖe eo ɖe, àsɔ dɔŋkpe alo adahɛn yia? Agbe nyi enunana jiŋ ɖeka ci yí so Yehowa gbɔ. Enunana cɛ jeŋ nɔ mì sugbɔ. Eyi taɖo mìji mɔ mìazan mìwo gbe asɔ kanfui.—Ehajiji Wema 36:9.

²⁴ “[Àɖo] lɔnlɔn nɔ ao kpena shigbe [lé èlɔn] eoŋtɔ ɛnɛ.” (Matie 22:39) Denyi mìwoŋtɔwo ɖekɛ nu yí adɛn xoɖyixoɖyiwo danahɛn nu le o. Woagbetɛnŋ adahɛn nu le mɛ ciwo yí trɔdo mì nu; yí sugbɔtɔ nyinɔ mɛ ciwo mìlɔn wu. Le kpɔwɛ mɛ, lanmɛsɛn cukaɖa sɛnŋsɛnŋwo atɛnŋ adonɔ aya nɔ mɛ ci yí le axwe ɖekɛ mɛ koɖo shigayɔtɔ ɖe, ɖo égbɔnnɔ shiga zɔ. Vɔ nɔ mìtashi enumamɛ baɖawoɔ, mìdadasɛ nɔ mɛ ciwo yí trɔdo mì mɔ mìlɔn wo.—1 Ʒan 4:20, 21.

²⁵ “Ðonɔŋwi enyɔ cɛwo nɔ amɛwo: wo ɖo a bubɔta do gɔnmɛ nɔ ejiɖuɖuwo hlɔnhlɔn koɖo ejukplɔtɔwo hlɔnhlɔn.” (Titu 3:1) Le eju sugbɔ mɛɔ, wodo se mɔ wodakpɔ gee ɖewo le amɛ shi alo woazan wo o. Ci Yehowa nu nɔ mì mɔ mìwo le bunɔ ejukplɔtɔwoɔ, mìnyinɔ ese cɛwo.—Rɔmatɔwo 13:1.

26. (a) Nyi ele mɔ mìawa nɔ mìwo sɛnsɛn ajeŋ nɔ Yehowaɔ? (b) Nyi yí taɖo woanɔ mɛmiɖe le ŋmɛ nɔ Mawu, nyi agbenɔnɔ nywitɔɔ?

²⁶ Nɔ mìji mɔ mìanyi Yehowa xlɔɔ, mìatɛnŋ akpɔ enu ci ele mɔ mìawa keŋ awa ashitrɔtrɔ ɖewo. Nɔ enyi ahan ɔ, mìɖo atɔɛ ji kaba. Denɔnɔ fafɛɖe mɔ woaɖo te enumamɛ baɖawo o, vɔ mìatɛnŋ awɛ! Yehowa ɖo gbe ɖɛ mɔ yeakpedo mì nu. Énu mɔ: “Enyɛ Yehowa yí nyi ao Mawu, enyɛ yí nyi mɛ ci yí kplakɔ nu eo nɔ anyɔ nɔ eo, mɛ ci yí kplɔkɔ eo to emɔ ci ji èɖo ato.” (Ezai 48:17, NWT) Nɔ mìwa enu ci ji mìkpe yí kpɔtɔ le mɛmiɖe yí gbele kɔkɔɛɖeɔ, mìatɛnŋ akando ji mɔ mìhɛnhɛn kanfukanfu vɛ nɔ mìwo Mawu.