Nyi Mawu Fyɔɖuxu nyiɔ?

Ŋɛdu vevitɔ ci yí le Bibla mɛ kuso Mawu Fyɔɖuxu nu. Mawu azan Fyɔɖuxu cɛ yí asɔ trɔ nyigban lɔ anyi Paradiso shigbe lé eɖui le tɔtɔmɛ nɛ. Nyi yí Mawu Fyɔɖuxu nyiɔ? Lé mìwɛ yí nya mɔ yɛle acɛ kpakɔ yɛɔ? Nyi Mawu Fyɔɖuxu lɔ wa vɔɔ? Yí nyi yí avawa le esɔ mɛɔ? Enukplakpla cɛ koɖo enukplakpla amɛve ciwo yí akplɔɛdo aɖo biɔse cɛwo ŋci.

1. Nyi Mawu Fyɔɖuxu nyiɔ, yí mi yí nyi Fyɔ niɔ?

Fyɔɖuxu lɔ nyi acɛkpakpa ɖe ci Yehowa Mawu ŋtɔ ɖo. Yesu Kristo ci yí nyi Fyɔ ni kpakpa cɛ ni so jeŋkwi mɛ. (Matie 4:17; Ʒan 18:36) Bibla nu so Yesu nu mɔ: “Á ɖu efyɔ . . . tɛgbɛɛ.” (Luiki 1:32, 33) Yesu ci yí nyi Fyɔ nɔ Mawu Fyɔɖuxu lɔ akpa cɛ nɔ mɛshiamɛ le nyigban lɔ ji.

2. Miwo yí le acɛ kpakɔ koɖo Yesuɔ?

De Yesu ɖekɛ yí le acɛ kpakɔ o. Mɛ ciwo yí ‘so akɔta ɖekaɖeka mɛ, egbe ɖekaɖeka mɛ, agbetɔ ɖekaɖeka mɛ, koɖo jukɔn ɖekaɖeka mɛ . . . le fyɔ ɖukɔ do nyigban ji’ hɛnnɛ. (Enyɔdasɛ 5:9, 10) Amɛ nɛni yí aɖu fyɔ koɖo Yesuɔ? So hwenu Yesu va nyigban jiɔ, Kristotɔ miliɔn nɛniɖe vatrɔ yi dokplɔtɔwo. Vɔ wo pleŋ yí aɖu fyɔ koɖia? Oo. Agbetɔ 144 000 le wo mɛ yí ayi jeŋkwi mɛ ayi ɖu fyɔ koɖo Yesu. (Hlɛn Enyɔdasɛ 14:1-4.) Kristotɔ kpɛtɛ ciwo pleŋ yí kpɔtɔ le nyigban ji anyi mɛ ciwo ji yí Fyɔɖuxu lɔ akpa cɛ do.—Ehajiji Wema 37:29.

3. Lé Mawu Fyɔɖuxu lɔ le ŋkɔ sesese nɔ agbetɔviwo cɛkpakpawo doɔ?

Ci agbetɔ cɛkpakpawo je agbla yí wakɔ nunywi ɖewo can ɔ, wodeɖo ŋsɛn awa ŋɖekpokpui ci yí dro wo o. Mɛbuwo vaɖɔnɔli wo yí ɖowotɔɔ, fini acɛkpatɔ yoyu ciwo yí vaɖɔli wo lɔwo ato keke aji wowoɖekɛwotɔ yí xanɔ wo; wodegbebunɔ ejuviwo tɔ kpɔ kpeti o. Vɔ mɛɖe deli avaɖɔli Yesu ci yí nyi Mawu Fyɔɖuxu lɔ cɛkpatɔ yɛ swi gbeɖe o. Mawu yí ‘ɖo Fyɔɖuxu lɔ yí wodatrwin gbeɖe o!’ (Daniɛli 2:44) Yesu akpa nɔ nyigban lɔ keŋkeŋ, eyi datafu mɛɖe do gan yí akpɔɛ awɛ nɔ mɛbu o. Amɛlɔntɔ enyi, yí fa xomɛ. Akpla amɛwo mɔ wo le lɔn wowonɔnɔwo afa xomɛ yí agbewanɔ nujɔjɔɛ shigbe lé yiŋtɔ wɛni nɛ.—Hlɛn Ezai 11:9.

4. Acɛkpakpa sɛnŋ ɖeka akpa nɔ nyigban lɔ keŋkeŋ

Yesu Kristo ɖo ŋsɛn sugbɔ yí awa ɖaŋ akpa cɛ sɔwu efyɔ ɖekpokpui ci yí kpa cɛ vayi. Hlɛn Matie 28:18 keŋ agbeje biɔse cɛ mɛ:

• Lé Yesu cɛkpakpa le ŋkɔ sesese nɔ agbetɔvi cɛkpakpa ɖekpokpui doɔ?

Blaŋblaŋ ɔ, woɖɔnɔli agbetɔ cɛkpakpawo, eyi efyɔ ɖekaɖeka kpakɔ acɛ nɔ nyigban lɔ kpaxwe ɖe. Vɔ Mawu Fyɔɖuxu yɛ ɖe? Hlɛn Daniɛli 7:14 keŋ agbeje biɔse cɛwo mɛ:

• Nyi yí taɖo enyɔ mɔ ‘wodatrɔn Mawu Fyɔɖuxu lɔ gbeɖeɔ’?

• Nyi yí taɖo enyɔ mɔ Mawu Fyɔɖuxu lɔ akpa cɛ do nyigban lɔ keŋkeŋ jiɔ?

5. Ele mɔ woaɖɔli agbetɔviwo cɛkpakpawo

Nyi yí taɖo ele mɔ Mawu cɛkpakpa aɖɔli agbetɔviwo tɔɔ? Xo VIDEO lɔ, keŋ agbeje biɔse ci yí gbɔgbɔ mɛ.

VIDEO: Nyi yí Mawu Fyɔɖuxu nyiɔ?—Akpaxwe kleŋ (1:41)

• Ci agbetɔviwo le acɛ kpakɔ ɖe, lé enuwo yikɔ doɔ?

Hlɛn Ŋununyatɔ 8:9, keŋ agbeje biɔse cɛwo mɛ:

• Ci èyi susu mɛ kpɔ ɖe, èkpɔ mɔ yɛle mɔ Mawu Fyɔɖuxu aɖɔli agbetɔviwo cɛkpakpawoa? Nyi yí taɖo ènu ahan ɔ?

6. Mɛ ciwo yí le acɛ kpakɔ le Mawu Fyɔɖuxu lɔ mɛ mɔnɔŋje nu mɛ nɔ mì

Ci Yesu ci yí nyi mìwo Fyɔ, nɔ nyigban lɔ ji kpɔ shigbe agbetɔvi nɛɔ, “a mɔŋje mìwo gbɔjɔgbɔjɔwo mɛ” dru. (Ebretɔwo 4:15) Ŋsu koɖo nyɔnu egbejinɔtɔ 144 000 ciwo yí aɖu fyɔ koɖi can, Yehowa sɔ wo le “akɔta ɖeka ɖeka mɛ, egbe ɖeka ɖeka mɛ, agbetɔ ɖeka ɖeka mɛ, koɖo jukɔn ɖeka ɖeka mɛ.”—Enyɔdasɛ 5:9.

• Ci Yesu koɖo yi bɔdonutɔ ciwo pleŋ akpa cɛ koɖi nya ŋci yí kpenɔ agbetɔvi ɖe, èkpɔ mɔ woakando wowo cɛkpakpa lɔ jia? Nyi yí taɖo ènu ahan ɔ?

7. Mawu Fyɔɖuxu lɔ ɖo ese sugbɔ ciwo yí nyɔ wu agbetɔvi cɛkpakpa tɔwo sesese

Egawo donɔ esewo yí wokpɔnɔ mɔ ese lɔwo awa nywi nɔ jumɛviwo yí agbeglɔn ta nɔ wo. Mawu Fyɔɖuxu lɔ can wa sewo ɖɛ yí ele mɔ mɛ ciwo yí le gɔnmɛ nɔ Fyɔɖuxu lɔ, azɔn do ese lɔwo ji. Hlɛn 1 Korɛntitɔwo 6:9-11, keŋ agbeje biɔse cɛwo mɛ:

• Nɔ mɛshiamɛ wawa do Mawu sewo ji sa ɖe, lé èkpɔ mɔ xexe lɔ ale doɔ?a

• Ci Yehowa kpɔnɔ emɔ mɔ, Fyɔɖuxu lɔ gɔnmɛnɔtɔwo le zɔnnɔ do ese cɛwo ji ɖe, èkpɔ mɔ susu le mɛa? Nyi yí taɖo ènu ahan ɔ?

• Nyi yí dasɛ mɔ mɛ ciwo yí dezɔnzɔn do ese cɛwo ji atrɔ wowoɖekiwo aji druɔ?—Kpɔ kpukpui 11.

ENU CI ÈKPLA

Mawu Fyɔɖuxu lɔ nyi acɛkpakpa ŋtɔŋtɔ ci yí le jeŋkwi mɛ yí avakpa cɛ nɔ nyigban lɔ keŋkeŋ.

Enumɛtoto

• Miwo yí akpa cɛ le Mawu Fyɔɖuxu lɔ mɛɔ?

• Lé Mawu Fyɔɖuxu lɔ le ŋkɔ sesese nɔ agbetɔ cɛkpakpa ɖekpokpui doɔ?

• Ŋciwo yí Yehowa kpɔkɔ emɔ mɔ, Fyɔɖuxu lɔ gɔnmɛnɔtɔwo awa ɖewo ɖe?

KPƆ ŊCƐWO KPƆ

Kpɔ enu ci Yesu kpla mì so fini Fyɔɖuxu lɔ le nu.

“Ao ji mɛ yí Mawu Fyɔɖuxu lɔ lea?” (Àkpɔɛ le siti lɔ ji)

Nyi yí na taɖo Yehowa Kunuɖetɔwo ɖui keŋ yí nɔnɔ gbeji nɔ Mawu Fyɔɖuxu lɔ sɔwu agbetɔ cɛkpakpawoɔ?

Wonɔ gbeji nɔ Mawu Fyɔɖuxu lɔ (1:43)

Kpɔ nyɔ ci Bibla nu so amɛ 144 000 ciwo Yehowa can yí woayi ɖu fyɔ koɖo Yesu nu ɖa.

“Miwo yí ayi jeŋkwi mɛɔ?” (Àkpɔɛ le siti lɔ ji)

Nyi yí dɔ nyɔnu ɖeka ci yí le gakpa mɛ vakando ji mɔ, Mawu ɖekɛ kpaŋ yí atɛnŋ awɛ yí enujɔjɔɛwawa ava xexe lɔ mɛɔ?

“Lé ŋkpɔ ɖoŋci nɔ enumajɔmajɔwawa do” (Nyɔ! novembre 2011)