WEL

1 Man Yehova uweco i bang’ Musa i langa mi Sinai, i hema mi rombo, i nindo ma kwong’a mi dwi mir arionde, i oro mir arionde, i ng’ey ma giwok kud i ng’om mi Misiri. Ewacu kumae: 2 “Kwan cokiri ceke mi Juisrael,* ng’atuman acel acel, calku juruot pare, calku thepacu pagi; kwan jumaco ceke, ng’atuman ku nyinge. 3 In, wukud Arun, wukiew nying’gi nimakere kud ungu migi,* ju ceke ma oro migi caku niai pier ario niidho malu ma giromo kiedo lwiny i Israel.

4 Wugam nico acel acel kud i kind suru ceke; ng’atuman ucikere nibedo wic mi thepacu pagi. 5 Maeni tie nying’ jumaco ma gibicungo karacelo kudwu: i suru pa Ruben, Elizur ma wod Cedheur; 6 i suru pa Simeon, Celumiel ma wod Zuricadai; 7 i suru pa Yuda, Nacon ma wod Aminadab; 8 i suru pa Isakar, Nethanel ma wod Zuar; 9 i suru pa Zebulon, Eliab ma wod Helon; 10 i kind wot Yozefu, kud i suru pa Efraim, Elicama ma wod Amihud; kud i suru pa Manase, Gamaliel ma wod Pedazur; 11 i suru pa Benjamin, Abidan ma wod Gideoni; 12 i suru pa Dan, Ahiezer ma wod Amicadai; 13 i suru pa Acer, Pagiel ma wod Okran; 14 i suru pa Gad, Eliasaf ma wod Deuel; 15 i suru pa Nafthali, Ahira ma wod Enan. 16 Maeno gi ju ma julwong’ogi kud i kind cokiri. Gitie judongo ma wijo mi suru pa weggi, gi jutelwic mir elufu mir Israel.

17 E Musa gikud Arun gigamu jumaco maeno ma junyuthogi ku nying’gi. 18 Gicoko dhu cokiri ceke i nindo ma kwong’a mi dwi mir arionde, kara jukiewgi, ng’atuman calku nyinge, calku juruot pare man calku thepacu pagi, ju ma niai oro pier ario niidho malu. 19 E Musa ukiewo nying’gi i langa mi Sinai, tap calu ma Yehova ung’olo ire.

20 Wot Ruben ma gitie nyikway wod Israel ma kayu, jurieyogi calku nying’gi, calku juruot migi man calku thepacu migi. Jukwanu wend jumaco ceke acel acel ma oro migi caku niai pier ario niidho malu ma gicopo kiedo lwiny, 21 man wend ju ma jukiewo nying’gi i suru pa Ruben ubino elufu pier ang’wen wi abusiel ku dak abic (46 500).

22 Jurieyo nyikway Simeon calku nying’gi, calku juruot migi, man calku thepacu migi. Jukwanu wend jumaco ceke acel acel ma oro migi caku niai pier ario niidho malu ma gicopo kiedo lwiny, 23 man wend ju ma jukiewo nying’gi i suru pa Simeon ubino elufu pier abic wi abung’wen ku dak adek (59 300).

24 Jurieyo nyikway Gad calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 25 man wend ju ma jukiewo nying’gi i suru pa Gad ubino elufu pier ang’wen wi abic ku dak abusiel pier abic (45 650).

26 Jurieyo nyikway Yuda calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 27 man wend ju ma jukiewo nying’gi i suru pa Yuda ubino elufu pier abiro wi ang’wen ku dak abusiel (74 600).

28 Jurieyo nyikway Isakar calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 29 man wend ju ma jukiewo nying’gi i suru pa Isakar ubino elufu pier abic wi ang’wen ku dak ang’wen (54 400).

30 Jurieyo nyikway Zebulon calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 31 man wend ju ma jukiewo nying’gi i suru pa Zebulon ubino elufu pier abic wi abiro ku dak ang’wen (57 400).

32 Jurieyo nyikway Yozefu nikadhu kud i bang’ Efraim calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 33 man wend ju ma jukiewo nying’gi i suru pa Efraim ubino elufu pier ang’wen ku dak abic (40 500).

34 Jurieyo nyikway Manase calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 35 man wend ju ma jukiewo nying’gi i suru pa Manase ubino elufu pier adek wi ario ku dak ario (32 200).

36 Jurieyo nyikway Benjamin calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 37 man wend ju ma jukiewo nying’gi i suru pa Benjamin ubino elufu pier adek wi abic ku dak ang’wen (35 400).

38 Jurieyo nyikway Dan calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 39 man wend ju ma jukiewo nying’gi i suru pa Dan ubino elufu pier abusiel wi ario ku dak abiro (62 700).

40 Jurieyo nyikway Acer calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 41 man wend ju ma jukiewo nying’gi i suru pa Acer ubino elufu pier ang’wen wi acel ku dak abic (41 500).

42 Jurieyo nyikway Nafthali calku nying’gi, calku juruot migi, man calku thepacu migi. Jukwanu wend jumaco ceke ma oro migi caku niai pier ario niidho malu ma gicopo kiedo lwiny, 43 man wend ju ma jukiewo nying’gi i suru pa Nafthali ubino elufu pier abic wi adek ku dak ang’wen (53 400).

44 Maeno ubino dhanu ma Musa gikud Arun karacelo ku judongo ma wijo apar ario mir Israel gikiewo nying’gi, ng’atuman m’i kindgi ucungo kaka thepacu pagi. 45 Juisrael ceke ma oro migi caku niai pier ario niidho malu, ma giromo kiedo lwiny i Israel, jukiewo nying’gi calku thepacu migi, 46 man wend dhanu ceke ma jukiewo nying’gi ubino elufu dak abusiel kud adek ku dak abic pier abic (603 550).

47 Ento jukiewo ngo nying’ Julawi i kindgi calku suru pa weggi. 48 E Yehova uyero ni Musa kumae: 49 “Suru pa Lawi kende re ma kud ikiew nying’gi, man kud imed wendgi i kum Juisrael mange. 50 Icikiri niketho Julawi iwi tic ceke mi hema mi Lembatuca, iwi jamtic ceke m’i iye, man iwi piny ceke m’uneno hema. Gibiyeyo hema mi thier ku jambe ceke, man gibitimo tic keca, e gibigonjo i ng’et hema mi thier tingili. 51 Saa moko ci m’ubekwayu juting’ hema mi thier, Julawi re ma gicikiri niyake; man tek ukwayu jugur hema mi thierne, Julawi re ma gicikiri nigure; man ka ng’atu moko ci m’umbe ku rusa* ucoro ceng’ini, jucikiri ninege cen.

52 “Jaisraelman ucikere niguro hema pare i kagonjo ma jumiyo ire, ng’atuman calku suru adek ma jupoke i iye nimakere kud ungu migi.* 53 Man Julawi gicikiri nigonjo i ng’et hema mi Lembatuca tingili, kara ng’eicwiny kud uwok iwi cokiri mi Juisrael; man Julawi gicikiri nigwoko* hema mi Lembatucane.”

54 E dhanu mir Israel gitimo lembe ceke ma Yehova ung’olo ni Musa. Gitimo tap kumeca.

2 Man Yehova uweco i bang’ Musa gikud Arun, eyero kumae: 2 “Juisrael gicikiri nigonjo kaka ma jumiyo ni suru migi adek ma jupoko, ng’atuman ceng’ini kud ayi m’unyutho* thepacu pagi. Wubigonjo i ng’et hema mi rombo tingili, man wubiloko wang’ kagonjone yor i bang’e.

3 “Ju ma bigonjo yo nyangu, yor i ka ma ceng’ wok i iye bibedo suru adek ma jupoko mi kagonjo pa Yuda calkud ungu migi;* jadit ma wijo mi wot Yuda utie Nacon ma wod Aminadab. 4 Jurumony pare ma jukiewo nying’gi utie elufu pier abiro wi ang’wen ku dak abusiel (74 600). 5 Ju ma bigonjo i ng’ete bibedo suru pa Isakar; jadit ma wijo mi wot Isakar utie Nethanel ma wod Zuar. 6 Jurumony pare ma jukiewo nying’gi utie elufu pier abic wi ang’wen ku dak ang’wen (54 400). 7 I ng’eye, utie suru pa Zebulon; jadit ma wijo mi wot Zebulon utie Eliab ma wod Helon. 8 Jurumony pare ma jukiewo nying’gi utie elufu pier abic wi abiro ku dak ang’wen (57 400).

9 “Dhanu ceke ma jukiewo nying’gi ni jurumony i kagonjo pa Yuda utie elufu dak acel pier abora wi abusiel ku dak ang’wen (186 400). Gibibedo ma kwong’a pi niting’o kagonjo.

10 “Suru adek ma jupoko mi kagonjo pa Ruben calkud ungu migi* bibedo yo piny; jadit ma wijo mi wot Ruben utie Elizur ma wod Cedheur. 11 Jurumony pare ma jukiewo nying’gi utie elufu pier ang’wen wi abusiel ku dak abic (46 500). 12 Ju ma bigonjo i ng’ete bibedo suru pa Simeon; jadit ma wijo mi wot Simeon utie Celumiel ma wod Zuricadai. 13 Jurumony pare ma jukiewo nying’gi utie elufu pier abic wi abung’wen ku dak adek (59 300). 14 I ng’eye utie suru pa Gad; jadit ma wijo mi wot Gad utie Eliasaf ma wod Reuel. 15 Jurumony pare ma jukiewo nying’gi utie elufu pier ang’wen wi abic ku dak abusiel pier abic (45 650).

16 “Dhanu ceke ma jukiewo nying’gi ni jurumony i kagonjo pa Ruben utie elufu dak acel pier abic wi acel ku dak ang’wen pier abic (151 450), man gibibedo mir arionde pi niting’o kagonjo.

17 “Kinde ma jubeting’o hema mi rombo, kagonjo mi Julawi ucikere nibedo i diere mi kagonjo mange.

“Gicikiri niwotho i ayi ma rom ma gigonjo ko, ma ng’atuman ni kakare calku suru migi adek ma jupoko.

18 “Suru adek ma jupoko mi kagonjo pa Efraim calkud ungu migi* bibedo yo reto; jadit ma wijo mi wot Efraim utie Elicama ma wod Amihud. 19 Jurumony pare ma jukiewo nying’gi utie elufu pier ang’wen ku dak abic (40 500). 20 I ng’eye bibedo suru pa Manase; jadit ma wijo mi wot Manase utie Gamaliel ma wod Pedazur. 21 Jurumony pare ma jukiewo nying’gi utie elufu pier adek wi ario ku dak ario (32 200). 22 I ng’eye utie suru pa Benjamin; jadit ma wijo mi wot Benjamin utie Abidan ma wod Gideoni. 23 Jurumony pare ma jukiewo nying’gi utie elufu pier adek wi abic ku dak ang’wen (35 400).

24 “Dhanu ceke ma jukiewo nying’gi ni jurumony i kagonjo pa Efraim utie elufu dak acel kud abora ku dak acel (108 100), man gibibedo mir adege pi niting’o kagonjo.

25 “Suru adek ma jupoko mi kagonjo pa Dan calkud ungu migi* bibedo yo malu; jadit ma wijo mi wot Dan utie Ahiezer ma wod Amicadai. 26 Jurumony pare ma jukiewo nying’gi utie elufu pier abusiel wi ario ku dak abiro (62 700). 27 Ju ma bigonjo i ng’ete bibedo suru pa Acer; jadit ma wijo mi wot Acer utie Pagiel ma wod Okran. 28 Jurumony pare ma jukiewo nying’gi utie elufu pier ang’wen wi acel ku dak abic (41 500). 29 I ng’eye utie suru pa Nafthali; jadit ma wijo mi wot Nafthali utie Ahira ma wod Enan. 30 Jurumony pare ma jukiewo nying’gi utie elufu pier abic wi adek ku dak ang’wen (53 400).

31 “Dhanu ceke ma jukiewo nying’gi i kagonjo pa Dan utie elufu dak acel pier abic wi abiro ku dak abusiel (157 600). Gibibedo ma tokcen niting’o kagonjo nimakere ku suru migi adek ma jupoko.”

32 Eno ubino Juisrael ma jukiewo nying’gi calku thepacu migi; wend dhanu ceke ma jukiewo nying’gi i kagonjo pi nibedo jurumony ubino elufu dak abusiel kud adek ku dak abic pier abic (603 550). 33 Ento jukiewo ngo nying’ Julawi karacelo ku Juisrael mange, tap calu ma Yehova ung’olo ni Musa. 34 Juisrael gitimo lembe ceke ma Yehova ung’olo ni Musa. Eno tie kite ma gigonjo ko calku suru migi adek ma jupoko, man kite ma gibed giting’o ko kagonjo ng’atuman calku juruot pare, man calku thepacu pagi.

3 Maeni ubino thekwaru* p’Arun giku Musa i nindo ma Yehova uweco i iye ku Musa iwi got Sinai. 2 Nying’ wot Arunne ni e: ma kayu Nadab, i ng’eye Abihu, Eleazar, man Ithamar. 3 Eno ubino nying’ wot Arun ma juwirogi ni julam, man juketho* gibed julam. 4 Ento Nadab gikud Abihu githo i wang’ Yehova kinde ma githiero mac m’uyiyere ngo i wang’ Yehova i langa mi Sinai, man githo nwang’u fodi wotgi acel de mbe. Ento Eleazar gikud Ithamar gimediri nibedo julam karacelo ku weggi m’Arun.

5 I ng’eye, Yehova uyero ni Musa kumae: 6 “Keth suru mi Julawi ucor ceng’ini, man gicung i wang’ Arun ma jalam, e gibitimo ire. 7 Gibipong’o rwom migi ire man ni cokiri ceke i wang’ hema mi rombo, man gibitimo tic migi m’ugwaku kum hema mi thier. 8 Gicikiri nigwoko jamtic ceke mi hema mi rombo man nitimo tic migi ni Juisrael ma nwang’u gibetimo tic mi hema mi thier. 9 Ibimiyo Julawi ni Arun man ni wote. Gitie ju ma jumiyo ni giramiya ire kud i kind Juisrael. 10 Ibiketho Arun ku wote i tic man gicikiri nitimo tic migi mi lamulam, man ka ng’atu moko ci m’umbe ku rusa* ucoro ceng’ini, jucikiri ninege cen.”

11 Yehova umedere niweco i bang’ Musa, ewacu kumae: 12 “Pira an, nen! agamu Julawi kud i kind Juisrael kaka kayu ceke* mi Juisrael, man Julawi bidoko para. 13 Kum kayu ceke utie para. I nindo m’agoyo kayu ceke m’i ng’om mi Misiri, adwoko kayu ceke mir Israel leng’ ira niai i kum dhanu nitundo i kum lim. Gibidoko para. An a Yehova.”

14 Yehova uweco kendo i bang’ Musa i langa mi Sinai, ewacu kumae: 15 “Kiew nying’ wot Lawi calku thepacu migi man calku juruot migi. Icikiri nikiewo nying’ jumaco ceke ma niai dwi acel niidho malu.” 16 E Musa ukiewo nying’gi calku lembe ma Yehova ung’olo, tap calu ma jung’olo ire. 17 Nying’ wot Lawine ni e: Gercon, Kohath, man Merari.

18 Nying’ wot Gercon calku juruot migi ni e: Libni man Cimei.

19 Wot Kohath calku juruot migi ubino Amram, Izhar, Hebron, man Uziel.

20 Wot Merari calku juruot migi ubino Mahli man Muci.

Eno ubino ju pa Lawi calku thepacu migi.

21 Nyikway Libni ku nyikway Cimei uai i bang’ Gercon. Eno gi ju pa Gercon. 22 Wend jumaco migi ceke ma jukiewo nying’gi ma niai dwi acel niidho malu ubino elufu abiro ku dak abic (7 500). 23 Ju pa Gercon ubed ugonjo i ng’ey hema mi thier yo reto. 24 Jadit ma wijo mi thepacu mi Jugercon ubino Eliasaf ma wod Lael. 25 Tic mi wot Jugercon i hema mi rombo ubino nigwoko hema mi thier man hema, jam umne, ridho mi kamondo mi hema mi rombo, 26 ridho ma jutwiyo ni gang’, ridho mi kamondo mi dhugang’ m’utieko hema mi thier, man pemlam, thol mi hemane, man tic ceke m’ugwaku kum piny maeno.

27 Nyikway Amram, nyikway Izhar, nyikway Hebron, man nyikway Uziel uai i bang’ Kohath. Eno ubino ju pa Kohath. 28 Wend jumaco ceke ma jukiewo nying’gi ma niai dwi acel niidho malu ubino elufu abora ku dak abusiel (8 600); tic migi ubino nigwoko kabedo ma leng’. 29 Juruot mi wot Kohath ubed ugonjo i ng’et hema mi thier yo piny. 30 Jadit ma wijo mi thepacu mi ju pa Kohath ubino Elizafan ma wod Uziel. 31 Tic migi ubino nigwoko Sanduku, meza, tiend thala, pemlam, ajeni ma tung’ tung’ ma jutiyo ko i kabedo ma leng’, ridho, man tic ceke m’ugwaku kum piny maeno.

32 Jadit mi judongo ma wijo mi Julawi ubino Eleazar ma wod Arun ma jalam; ebed eneno wi ju m’ubetimo tic i kabedo ma leng’.

33 Nyikway Mahli man nyikway Muci uai i bang’ Merari. Maeno gi nyikway Merari. 34 Wend jumaco ceke ma jukiewo nying’gi ma niai dwi acel niidho malu ubino elufu abusiel ku dak ario (6 200). 35 Jadit ma wijo mi thepacu mi wat pa Merari ubino Zuriel ma wod Abihail. Gibed gigonjo i ng’et hema mi thier yo malu. 36 Wot Merari gibed gitimo tic mi neno wi kadhruma mi hema mi thier, riune, mbegine, kathere ma igi roko, ajeninegi ceke, man tic ceke m’ugwaku kum piny maeno, 37 karacelo ku mbegi ma tung’ tung’ m’utwodo lela ku kathegi ma igi roko, gutenegi, man thondhgi.

38 Ju m’ubed ugonjo i wang’ hema mi thier yo nyangu, i wang’ hema mi rombo yo ka ma ceng’ wok i iye, ubino Musa man Arun ku wote. Gibino ku tic mi gwoko kabedo ma leng’, man ebino gin m’ukwayu gitim ni Juisrael. Man ka ng’atu moko ci m’umbe ku rusa* ucoro ceng’ini, jucikiri ninege cen.

39 Julawi ceke ma co ma niai dwi acel niidho malu, ma Musa gikud Arun gikiewo nying’gi calku juruot migi nimakere ku lembe ma Yehova ung’olo, ubino elufu pier ario wi ario (22 000).

40 I ng’eye, Yehova uwacu ni Musa kumae: “Kiew nying’ kayu ceke ma co mi Juisrael ma niai dwi acel niidho malu, kwan wendgi, man riey nying’gi. 41 Icikiri nigamu Julawi ira kaka kayu ceke mi Juisrael, man gam lim mi Julawi kaka lim ceke ma kayu mi Juisrael. An a Yehova.” 42 E Musa ugam ukiewo nying’ kayu ceke m’i kind Juisrael, tap calu ma Yehova ung’olo ire. 43 Wend kayu ceke ma co ma jukiewogi ku nying’gi ma niai dwi acel niidho malu ubino elufu pier ario wi ario ku dak ario pier abiro wi adek (22 273).

44 Yehova umedere niweco i bang’ Musa, eyero kumae: 45 “Gam Julawi kaka kayu ceke m’i kind Juisrael, man gam lim mi Julawi kaka lim migi, man Julawi bidoko para. An a Yehova. 46 Man pi bei mi waru kayu dak ario pier abiro wi adek mi Juisrael m’ukadhu wend Julawi, 47 gam cekel* abic pi ng’atuman acel acel, nimakere ku cekel mi kabedo ma leng’.* Cekel acel utie gera* pier ario. 48 Ibimiyo sentene ni Arun ku wote ni bei mi jamgony mi ju m’ukadhu wendgi.” 49 E Musa ugamu sente mi bei mi jamgony pi niwaru ju ma wendgi ukadhu wend Julawi. 50 Egamu sente kud i bang’ kayu mi Juisrael, cekel elufu acel ku dak adek pier abusiel wi abic (1 365), nimakere ku cekel mi kabedo ma leng’. 51 I ng’eye, Musa umiyo sente mi bei mi jamgony ni Arun ku wote calku dhu Yehova, tap calu ma Yehova ung’olo ni Musa.

4 Man Yehova uweco i bang’ Musa gikud Arun, eyero kumae: 2 “Jubikwanu wot Kohath kud i kind wot Lawi, calku juruot migi man calku thepacu migi, 3 ju ceke ma oro migi ucaku niai pier adek nicidho i pier abic ma gin’i ungu ma jung’iyo pi nitimo tic i hema mi rombo.

4 “Maeni tic mi wot Kohath i hema mi rombo. Etie piny ma leng’ m’usagu: 5 Arun ku wote gibimondo kinde ma jubeting’o kagonjo man gibigonyo ridho ma jupoko ko kusika gibiumo ko sanduku mi Lembatuca. 6 Gibiumo wiye kud adila lei mi nam,* gibipedho bongu ma nwang’* mi ble* i wiye, man gibiroyo ramakne ma boco boco kakagi.

7 “Gibipedho bende bongu ma nwang’ mi ble* iwi meza mi mukathi m’anyutha, man gibiketho sani i wiye, kikombe,* tabu, man agulu mi girathiera mi pigulok; girathiera ma nja mi mukathi bibebedo i wiye. 8 Gibipedho bongu ma kwar ngbo iwi piny maeno, gibiumo wi mezane kud adila lei mi nam, man gibiroyo ramak ma boco boco kakagi. 9 I ng’eye, gibigamu bongu mi ble* man gibiumo ko tiend thala mi mac karacelo ku thalanegi, rang’wenynegi,* tabu mi macnegi, man ajeni ceke mi moje ma jubed jutiyo ko pi niketho thala uliel. 10 Gibiboye kud ajenine ceke kud adila lei mi nam, man gibikethe iwi ramak ma bor mi yeye. 11 Man gibipedho bongu mi ble* iwi pemlam mi mola ma kwar, gibiume kud adila lei mi nam, man gibiroyo ramakne ma boco boco kakagi. 12 I ng’eye, gibicoko ajeni zoo ma gibed gitimo ko tic saa ceke i kabedo ma leng’ man gibikethogi i bongu mi ble,* gibiumogi kud adila lei mi nam, man gibikethogi iwi ramak ma bor mi yeye.

13 “Gibijobo vuru* kud i pemlam man gibipedho bongu mi rangi m’uluga i wiye. 14 Gibiketho ajeni ceke ma gibed gitiyo ko kinde ma gibetimo tic i bang’ pemlam i wiye: tabu mi mac, kanya, lupau, tabu, ajeni ceke mi pemlam; gibipedho adila lei mi nam i wiye man gibiroyo ramakne ma boco boco kakagi.

15 “Saa ma jubeting’o kagonjo, kwayu unwang’ dong’ Arun ku wote gidaru umo kabedo ma leng’ kud jamtic ceke mi kabedo ma leng’. I ng’eye, wot Kohath gibimondo pi niyeyogi, ento kud gimul kum kabedo ma leng’, gimaru tho. Piny maeno tie tic* mi wot Kohath i lembe m’uneno hema mi rombo.

16 “Eleazar ma wod Arun ma jalam utie ku tic mi neno wi mo ma pi der, udok ma ng’wice ng’ar, girathiera mi nying cam ma thiri thiri, man mo mi wirowir. Ebed eneno wi hema mi thier ceke man piny ceke ma n’i iye, uketho i iye kabedo ma leng’ man jambe.”

17 Yehova uweco kendo i bang’ Musa gikud Arun, ewacu kumae: 18 “Kud wuwek jukab cen the suru mi ju pa Kohath kud i kind Julawi. 19 Ento wutim igi kumeni kara gibed kwo man kud githo nikum coro i kum piny ma leng’ m’usagu. Arun ku wote gibimondo man gibipoko tic ni ng’atuman m’i kindgi ku gin m’ebiyeyo. 20 Kud gimondi pi nineno piny ma leng’ kadok nyanok de, gibimaru tho.”

21 I ng’eye, Yehova uweco i bang’ Musa, ewacu kumae: 22 “Jubikwanu wot Gercon calku thepacu migi man calku juruot migi. 23 Ukwayu ikiew nying’ dhanu ceke ma oro migi caku niai pier adek nicidho i pier abic ma gin’i ungu ma jung’iyo pi nitimo tic i hema mi rombo. 24 Maeni tie piny ma juketho wat mi Jugercon gigwoki man giyey: 25 Gibiyeyo bongu mi hema mi thier, hema mi rombo, jam umne, man jam um mir adila lei mi nam ma ni malu i die wiye, ridho mi dhu kamondo mi hema mi rombo, 26 ridho ma jutwiyo i lela ni gang’, ridho mi dhu kamondo mi gang’ m’udhoko hema mi thier man pemlam, thondhgi, jambe ceke, man piny ceke ma jutiyo ko i iye. Eno tie tic migi. 27 Arun ku wote gibineno wi tic ceke man ter mi Jugercon; wubimiyo ter maeno ceke ni tic migi. 28 Eno tie tic ma juruot pa Gercon bibetimo i hema mi rombo, man tic migine Ithamar ma wod Arun ma jalam re ma bibeneno wiye.

29 “Pi wot Merari, ibikiewo nying’gi calku juruot migi man calku thepacu migi. 30 Ibikiewo nying’ ju ceke ma oro migi caku niai pier adek nicidho i pier abic, ju ceke ma n’i ungu ma jupoko pi tic mi hema mi rombo. 31 Maeni tie piny ma gin re ma gibibeyeyo i tic migi m’ugwaku kum hema mi rombo: kadhruma mi hema mi rombo, riunegi, mbeginegi, kathegi ma igi roko; 32 mbegi mi gang’ m’utieko lela, kathegi ma igi roko, gutenegi,* thondhgi karacelo ku jambe ceke man tic ceke m’ugwaku kum piny maeno. Ibipoko igi jambe ma gin re ma gibiyeyo calku nying’gi. 33 Eno tie gin ma juruot mi wot Merari gibibetimo i hema mi rombo i the telowic pa Ithamar ma wod Arun ma jalam.”

34 I ng’eye, Musa gikud Arun man judongo ma wijo mi cokiri gikiewo nying’ wot Kohath calku wat migi man calku thepacu migi, 35 ju ceke ma oro migi caku niai pier adek nicidho i pier abic ma gibino i ungu ma jupoko i tic mi hema mi rombo. 36 Wend ju ma jukiewo nying’gi calku juruot migi ubino elufu ario ku dak abiro pier abic (2 750). 37 Eno ubino nying’ ju ma jukiewo kud i kind wat mi Jukohath, ju ceke ma gibed gitimo i hema mi rombo. Musa gikud Arun gikiewo nying’gi calku lembe ma Yehova ung’olo nikadhu kud i bang’ Musa.

38 Jukiewo nying’ wot Gercon calku juruot migi man calku thepacu migi, 39 ju ceke ma oro migi caku niai pier adek nicidho i pier abic ma gibino i ungu ma jupoko i tic mi hema mi rombo. 40 Wend ju ma jukiewo nying’gi calku juruot migi man calku thepacu migi ubino elufu ario ku dak abusiel pier adek (2 630). 41 Eno ubino wat mi wot Gercon ma jukiewo nying’gi, ju ceke ma gibed gitimo tic i hema mi rombo. Musa gikud Arun gikiewo nying’gi calku lembe ma Yehova ung’olo.

42 Jukiewo nying’ wot Merari calku juruot migi man calku thepacu migi, 43 ju ceke ma oro migi caku niai pier adek nicidho i pier abic ma gibino i ungu ma jupoko i tic mi hema mi rombo. 44 Ju ceke ma jukiewo nying’gi calku juruot migi ubino elufu adek ku dak ario (3 200). 45 Eno ubino wat mi wot Merari ma jukiewo nying’gi, ma Musa gikud Arun gikiewo nying’gi calku lembe ma Yehova ung’olo nikadhu kud i bang’ Musa.

46 Musa gikud Arun man judongo ma wijo mir Israel gikiewo nying’ Julawi maeno ceke, calku juruot migi man calku thepacu migi; 47 oro migi ucaku niai pier adek nicidho i pier abic, man gin ceke jupokogi nitimo tic man niyeyo ter m’ugwaku kum hema mi rombo. 48 Ju ceke ma jukiewo nying’gi ubino elufu abora ku dak abic pier abora (8 580). 49 Jukiewo nying’gi calku lembe ma Yehova ung’olo nikadhu kud i bang’ Musa, ng’atuman nimakere ku tic ma jumiyo ire man ter pare; jukiewo nying’gi tap calu ma Yehova ung’olo ni Musa.

5 Yehova uweco kendo i bang’ Musa, ewacu kumae: 2 “Ng’ol ni Juisrael nia giwodh cen kud i kagonjo ng’atu moko ci ma won dhobu, ng’atu moko ci ma piny ubecwir kud i kume, man ng’atu moko ci m’ucido nikum avuj dhanu.* 3 Dok ebed ng’atu ma nico kunoke ma dhaku, wubiwodhogi cen. Wucikuru niwodhogi woko i ng’ey kagonjo, kara kud gidag tho i kagonjo mi dhanu m’abedo* i kindgi.” 4 E Juisrael gitimo kumeno man giwodhogi woko i ng’ey kagonjo. Tap calu ma Yehova ung’olo ni Musa, Juisrael gitimo de kumeca.

5 Yehova umedere niweco i bang’ Musa, ewacu kumae: 6 “Yer ni Juisrael kumae: ‘Tek ng’atu moko ma nico kunoke ma dhaku utimo dubo moko ci ma dhanu betimo man ekoso bedoleng’ ni Yehova, ng’atu* maeno kier n’i wiye. 7 Ecikere* nituco dubo m’etimo* man niculo welpiny ma zoo kawang’ kier pare man nimedo bende thenge acel wi abic mi valerne; ebimiye ni ng’atu m’edubo ire. 8 Ento tek ng’atu ma judubo ire umbe ku wat ma ceng’ini ma juromo miyo ire kawang’ piny ma juculo, jubimiye ni Yehova man ebibedo pa jalam; maeno uweko nyog urombo mir adunya ma jalam bitimo ko adunya pi ng’atu m’udubone.

9 “‘Ajok ceke ma leng’ m’uai i bang’ Juisrael ma jukelo i bang’ jalam bibedo pare. 10 Piny ma leng’ pa ng’atu moko ci bibedo pare gire. Gin ma ng’atu moko ci umiyo ni jalam, ginde bibedo pa jalam.’”

11 Yehova umedere niweco i bang’ Musa, eyero kumae: 12 “Wec ku Juisrael man iyer igi kumae: ‘Maeni tie gin ma jucikiri nitimo tek dhaku pa ng’atu moko ukier man etimo abor,* 13 man nico mange utimo ribiri kude, ento cware ung’eyo ngo lembene man lembene ubedo amung’a, uketho ecidere gire, ento jamulembe moko mbe m’utuco wiye man jurube de ngo: 14 Tek cware udoko nyek man ebenwang’u nia ve dhaku pare utimo abor man ecidere gire, kunoke tek etie ku nyeko man ebenwang’u nia ve dhaku pare utimo abor ma ke ecidere ngo, 15 nicone ucikere nitero dhaku pare i bang’ jalam karacelo ku girathiera ma pi dhakune, apaje mir efa* mi mogo nganu ma juyuke. Ecikere ngo nikonjo mo i wiye kadi niketho udok sengi i wiye, kum etie girathiera mi nying cam mi nyeko, girathiera mi nying cam ma poyo wijo i kum kier.

16 “‘Jalam bikelo dhakune ceng’ini man ebiketho ebicungo i wang’ Yehova. 17 Jalam bitwomo pii ma leng’ i agulu mir ulobo man ebigamu utur moko kud i die hema mi thier man ebikonje i pige. 18 E jalam biketho dhakune bicungo i wang’ Yehova, ebigonyo yuk wi dhakune man ebiketho girathiera mi nying cam mi poyowic i cinge, niwacu girathiera mi nying cam mi nyeko, man jalam bibedo ku pii ma kec ma kelo alam i cinge.

19 “‘I ng’eye, jalam biketho ebikwong’o kwong’, m’ebeyero ni dhakune kumae: “Tek nico mange mbe m’utimo kudi ribiri kinde m’in i the loc pa cweri, tek ikier ungo man idoko ngo ni gin m’ucido, dong’ pii ma kec maeni ma kelo alam kud utim gin moko i kumi. 20 Ento tek ikier kinde m’in i the loc pa cweri m’icidiri ko, man itimo ribiri ku nico mange m’uweko cweri,... ” 21 I ng’eye, jalam biketho dhakune bikwong’o kwong’ ma kud alam i iye bende, man ebiyero ni dhakune kumae: “Wek Yehova uketh bembi* tal* man eketh ii pong’, bende wek Yehova uketh idok ni jamb alam man ni jam kwong’ i kind juthu. 22 Pii maeni ma kelo alam bimondo i cindi ii pi nipong’o ii man pi nitalu* bembi.”* E dhakune ucikere nidwoko kumae: “Amen! Amen!”*

23 “Jalam bilund kiewo alam maeno i buku man ebiweyogi cen i pii ma kec. 24 I ng’eye, ebiketho dhakune bimadhu pii ma kec ma kelo alam, e pii ma kelo alamne bimondo i iye man bidwoko iye kec. 25 Jalam bigamu girathiera mi nying cam mi nyeko kud i cing’ dhakune, man ebileko girathiera mi nying camne kun ku kun i wang’ Yehova, man ebitere ceng’ini i kum pemlam. 26 Jalam bijobo girathiera mi nying cam pong’ cinge ni jampoy, man ebiwang’e kara eduny iwi pemlam, i ng’eye ebiketho dhakune bimadhu pii. 27 Tek dhakune ucidere man etimo abor ni cware, kinde ma jalam biketho emadh pige, pii ma kelo alamne bimondo i iye man bidoko ni piny ma kec; e iye bipong’ man bambe* bital,* man dhakune bidoko ni jamb alam i kind juthugi. 28 Ento tek dhakune ucidere ngo man e leng’, ebinwang’u ngo matira maeno, man ebicopere ire nigamu iye man ninyolo nyodo.

29 “Eno tie cik mi nyeko, kinde ma dhaku moko ukier man ucidere gire saa m’en i the loc pa cware, 30 kunoke tek nico moko nyeko umaku man ebenwang’u nia ve dhaku pare utimo abor; ecikere niketho dhaku pare ucung i wang’ Yehova, man jalam ucikere nitiyo ku cik maeno ceke i kum dhakune. 31 Nico bibedo mbe ku lembe, ento dhaku pare bicungo i dhu kier pare.’”

6 Yehova uweco kendo i bang’ Musa, eyero kumae: 2 “Wec ku Juisrael man iyer igi kumae: ‘Tek nico kunoke dhaku moko utimo lembang’ola ma segi nia ebibedo Janaziri* ni Yehova, 3 ecikere nikoyere cen ku pigulok man kong’o mange ma lake tek. Ebimadhu ngo giramadha ma wac mi pigulok kadi giramadha ma wac mi kong’o moko ci ma lake tek. Ebimadhu ngo giramadha moko ci ma juyiko ku nying ulok kadi nicamu nying ulok, nik’ebed ma numu kunoke m’uthwo. 4 I nindo ceke m’etie i iye Janaziri, ebicamu ngo gin moko m’uai kud i kum yend ulok, niai i kum nyinge m’aluthuru nitundo i kum apokane.

5 “‘I nindo ceke mi lembang’ola pare mi bedo Janaziri, riedi bikadhu ngo i wiye. Ebibedo leng’ ma nwang’u ebeweko yuk wiye udongi nitundo ma nindo m’ekoyere ko cen ni Yehova bithum ko. 6 Ebicoro ngo i vut avuj dhanu* i nindo ceke m’ekoyere i iye ang’et ni Yehova. 7 Kadok nwang’u won kunoke min kunoke umin kadi nyamin utho en de, ebicidere ngo, pilembe giranyutha pare m’etie ko Janaziri ni Mungu pare n’i wiye.

8 “‘Ebibedo leng’ ni Yehova i nindo ceke m’etie i iye Janaziri. 9 Ento, tek ng’atu moko utho rek i ng’ete man ecido yuk wiye m’unyutho koyiri pare ni Mungu,* ecikere nilielo wiye i nindo ma dwokirileng’ pare uyiyere i iye. Ebiketho juliel wiye i nindo mir abiro. 10 Man i nindo mir aborane, ebikelo akuru ario mi lum kunoke nyithindh akuru ario mi pacu i bang’ jalam i dhu kamondo mi hema mi rombo. 11 Jalam bithiero akurune acel ni lam mi dubo, ma kucelo ke ni lam m’awang’a man ebitimo adunya pire pi dubo m’etimo nikum avuj dhanu.* E ebidwoko wiye leng’ i nindo maeno. 12 Ecikere nikoyere kendo ni Yehova pi nindo m’ebibedo i iye Janaziri, man ebikelo nyathi nyog urombo ma oro pare ukadhu ngo acel ni girathiera mi kier. Ento jubikwanu ngo nindo m’udaru kadhu, pilembe ecido Naziri pare.

13 “‘Maeni tie cik pa Janaziri: Kinde m’edaru nindo mi Naziri pare, jubitere i dhu kamondo mi hema mi rombo. 14 Ebikelo girathiera pare ni Yehova keca: nyathi nyog urombo acel ma mulima mbe i kume man ma oro pare ukadhu ngo acel ni lam m’awang’a, vong urombo acel ma mulima mbe i kume man ma oro pare ukadhu ngo acel ni lam mi dubo, nyog urombo acel ma mulima mbe i kume ni lam mi kwiyocwiny, 15 katoko acel mi mukathi ma ngulu ngulu ma thobi mbe i iye ma jutedo ku mogo ma yom ma jujebo ku mo, mukathi m’apada ma thobi mbe i iye ma juwiro mo i kume, man girathiera migi mi nying cam ku girathiera migi mi pigulok. 16 Jalam bikelogi i wang’ Yehova man ebithiero lam mi dubo parene ku lam m’awang’a pare. 17 Ebithiero nyog urombone ni lam mi kwiyocwiny ni Yehova karacelo ku katoko mi mukathi ma thobi mbe i iye, man jalam bithiero bende girathiera mi nying camne ku girathiera mi pigulokne.

18 “‘I ng’eye, Janazirine ucikere nilielo yuk wiye ma nwang’u junyaru ngo* i dhu kamondo mi hema mi rombo, man ebicoko yuk wiye m’udongo kinde m’e Janaziri man ebikethe iwi mac ma n’i the lam mi kwiyocwiny. 19 Jalam ucikere nigamu bot nyog urombo acel ma jutedo, lungu mukathi acel ma ngulu ngulu ma thobi mbe i iye kud i katoko, man mukathi m’apada acel ma thobi mbe i iye, man ebikethogi i die cing’ Janazirine i ng’ey m’eketho junyaru giranyutha mi Naziri pare cen. 20 Man jalam ucikere nilekogi kun ku kun ni girathiera m’aleka i wang’ Yehova. Etie piny ma leng’ ma pa jalam, karacelo ku dhu kor mi girathiera m’aleka man bamb mir ajok. I ng’ey maeno, Janazirine copo madhu pigulok.

21 “‘Maeni tie cik pi Janaziri m’utimo lembang’ola ma ku kwong’: Tek eng’olo ku kwong’ man ecopo nwang’u piny m’eromo thiero ni Yehova m’usagu ma cik mi Naziri pare ukwayu, e ecikere nitimo lembe m’eng’olo ku kwong’ pi niworo cik mi Naziri pare.’”

22 I ng’eye, Yehova uwacu ni Musa kumae: 23 “Yer ni Arun ku wote kumae: ‘Maeni tie ayi ma wubibepoko ko mugisa iwi dhanu mir Israel. Wuyer igi kumae:

24 “Yehova umii iri mugisa man egwoki.

25 Yehova uketh wang’e rieny i wii, man etim iri bero.

26 Yehova uting’ wang’e yor i beng’i man emii iri kwiyocwiny.”’

27 Man gicikiri niketho nyinga iwi dhanu mir Israel, kara amii igi mugisa.”

7 I nindo ma Musa udaru guro iye hema mi thier, ewire man edwoke leng’, karacelo ku jambe ceke, pemlamne, man ajenine ceke. Kinde m’edaru wiro man edwoko piny maeno leng’, 2 judongo ma wijo mir Israel, ma gi jutelwic mi thepacu migi, gikelo girathiera. Judongo ma wijo maeno mi suru m’utelo wi tic mi kiewo nying’ 3 gikelo girathiera migi i wang’ Yehova, magali m’auma abusiel man thwoni dhieng’ apar ario, magali acel pi judongo ma wijo ario man thwon dhiang’ acel pi ng’atuman; gikelogi i wang’ hema mi thier. 4 Yehova ugam uyero ni Musa kumae: 5 “Jol piny maeno kud i bang’gi, kum jubitiyo kugi i tic mi hema mi rombo, man ibimiyogi i bang’ Julawi, ni ng’atuman calku gin m’ukwayere pi tic pare.”

6 E Musa ujolo magali maeno ku dhieng’ man emiyogi i bang’ Julawi. 7 Emiyo magali ario man thwoni dhieng’ ang’wen ni wot Gercon, calku gin m’ukwayere pi tic migi; 8 man emiyo magali ang’wen ku thwoni dhieng’ abora ni wot Merari, calku gin m’ukwayere pi tic migi, i the telowic pa Ithamar ma wod Arun ma jalam. 9 Ento emiyo ngo gin moko ni wot Kohath, pilembe tic migi ugwaku kum tic mi kabedo ma leng’, man gibed giyeyo piny ma leng’ iwi gokgi.

10 Man judongo ma wijo gikelo girathiera migi i saa mi thiero pemlam i nindo ma juwire i iye. Kinde ma judongo ma wijo gikelo girathiera migi i wang’ pemlam, 11 Yehova uyero ni Musa kumae: “Kubang’ ceng’, jadit ma wijo acel bikelo girathiera pare pi nithiero pemlam, man gibibelubiri aluba.”

12 E ng’atu m’ukelo girathiera pare i nindo ma kwong’a ubino Nacon ma wod Aminadab mi suru pa Yuda. 13 Girathiera pare ubino sani acel mi mola ma tar ma pekne cekel* dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’;* gin ario zoo gibino pong’ ku mogo ma yom ma jujebo ku mo pi girathiera mi nying cam; 14 kikombe* acel mi mola ma kwar ma pekne cekel apar kud udok ma ng’wice ng’ar bik i iye; 15 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 16 nyathi diel acel pi lam mi dubo; 17 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Nacon ma wod Aminadab.

18 I nindo mir arionde, Nethanel ma wod Zuar, ma jadit ma wijo mi suru pa Isakar, ukelo girathiera pare. 19 Girathiera pare m’ekelo ubino sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 20 kikombe acel mi mola ma kwar ma pekne cekel apar kud udok ma ng’wice ng’ar bik i iye; 21 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 22 nyathi diel acel pi lam mi dubo; 23 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Nethanel ma wod Zuar.

24 I nindo mir adege, Eliab ma wod Helon, ma jadit ma wijo mi wot Zebulon, 25 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 26 kikombe acel mi mola ma kwar ma pekne cekel apar kud udok ma ng’wice ng’ar bik i iye; 27 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 28 nyathi diel acel pi lam mi dubo; 29 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Eliab ma wod Helon.

30 I nindo mir ang’wende, Elizur ma wod Cedheur, ma jadit ma wijo mi wot Ruben, 31 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 32 kikombe acel mi mola ma kwar ma pekne cekel apar kud udok ma ng’wice ng’ar bik i iye; 33 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 34 nyathi diel acel pi lam mi dubo; 35 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Elizur ma wod Cedheur.

36 I nindo mir abije, Celumiel ma wod Zuricadai, ma jadit ma wijo mi wot Simeon, 37 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 38 kikombe acel mi mola ma kwar ma pekne cekel apar kud udok ma ng’wice ng’ar bik i iye; 39 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 40 nyathi diel acel pi lam mi dubo; 41 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Celumiel ma wod Zuricadai.

42 I nindo mir abusiende, Eliasaf ma wod Deuel, ma jadit ma wijo mi wot Gad, 43 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 44 kikombe acel mi mola ma kwar ma pekne cekel apar kud udok ma ng’wice ng’ar bik i iye; 45 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 46 nyathi diel acel pi lam mi dubo; 47 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Eliasaf ma wod Deuel.

48 I nindo mir abirone, Elicama ma wod Amihud, ma jadit ma wijo mi wot Efraim, 49 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 50 kikombe acel mi mola ma kwar ma pekne cekel apar kud udok ma ng’wice ng’ar bik i iye; 51 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 52 nyathi diel acel pi lam mi dubo; 53 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Elicama ma wod Amihud.

54 I nindo mir aborane, Gamaliel ma wod Pedazur, ma jadit ma wijo mi wot Manase, 55 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 56 kikombe acel mi mola ma kwar ma pekne cekel apar kud udok ma ng’wice ng’ar bik i iye; 57 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 58 nyathi diel acel pi lam mi dubo; 59 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Gamaliel ma wod Pedazur.

60 I nindo mir abung’wende, Abidan ma wod Gideoni, ma jadit ma wijo mi wot Benjamin, 61 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 62 kikombe acel mi mola ma kwar ma pekne cekel apar kud udok ma ng’wice ng’ar bik i iye; 63 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 64 nyathi diel acel pi lam mi dubo; 65 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera p’Abidan ma wod Gideoni.

66 I nindo mir apaje, Ahiezer ma wod Amicadai, ma jadit ma wijo mi wot Dan, 67 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 68 kikombe acel mi mola ma kwar ma pekne cekel apar kud udok ma ng’wice ng’ar bik i iye; 69 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 70 nyathi diel acel pi lam mi dubo; 71 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera p’Ahiezer ma wod Amicadai.

72 I nindo mir apar acende, Pagiel ma wod Okran, ma jadit ma wijo mi wot Acer, 73 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 74 kikombe acel mi mola ma kwar ma pekne cekel apar kud udok ma ng’wice ng’ar bik i iye; 75 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 76 nyathi diel acel pi lam mi dubo; 77 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera pa Pagiel ma wod Okran.

78 I nindo mir apar arionde, Ahira ma wod Enan, ma jadit ma wijo mi wot Nafthali, 79 ukelo girathiera pare: sani acel mi mola ma tar ma pekne cekel dak acel ku pier adek, man tabu acel mi mola ma tar ma pekne cekel pier abiro nimakere ku cekel mi kabedo ma leng’; gin ario zoo gibino pong’ ku mogo ma yom ma jujebo ku mo pi girathiera mi nying cam; 80 kikombe acel mi mola ma kwar ma pekne cekel apar kud udok ma ng’wice ng’ar bik i iye; 81 nyathi thwon dhiang’ acel, nyog urombo acel, man nyathi nyog urombo acel ma oro pare ukadhu ngo acel pi lam m’awang’a; 82 nyathi diel acel pi lam mi dubo; 83 man pi lam mi kwiyocwiny ke dhieng’ ario, nyogi rombe abic, nyogi diegi abic, man nyithi nyogi rombe abic ma oro migi acel acel. Eno ubino girathiera p’Ahira wod Enan.

84 Eno ubino girathiera mi thiero pemlam ma judongo ma wijo mir Israel gimiyo i nindo ma juwire i iye: sani apar ario mi mola ma tar, tabu apar ario mi mola ma tar, kikombe apar ario mi mola ma kwar; 85 sani mi mola ma tarneman pekne ubino cekel dak acel ku pier adek man tabuneman pekne ubino cekel pier abiro, mola ma tar ceke mir ajenine pekne ubino cekel elufu ario ku dak ang’wen (2 400) nimakere ku cekel mi kabedo ma leng’; 86 kikombe mi mola ma kwar apar ario m’udok ma ng’wice ng’ar bik i igi pekneman ubino cekel apar nimakere ku cekel mi kabedo ma leng’, kikombe mi mola ma kwarne zoo pek migi ubino cekel dak acel ku pier ario. 87 Lim ceke ma pi lam m’awang’a ubino thwoni dhieng’ apar ario, nyogi rombe apar ario, nyithi nyogi rombe apar ario ma oro migi acel acel ku girathiera migi mi nying cam, man nyithi diegi apar ario pi lam mi dubo; 88 man wend lim ceke mi lam mi kwiyocwiny ubino thwoni dhieng’ pier ario wi ang’wen, nyogi rombe pier abusiel, nyogi diegi pier abusiel, man nyithi nyogi rombe pier abusiel ma oro migi acel acel. Eno ubino girathiera mi thiero pemlam i ng’ey ma juwire.

89 Saa ma ka Musa umondo i hema mi rombo pi niweco ku Mungu ci,* ewinjo dwal m’ubeweco kude niai kud iwi jam umo wi sanduku mi Lembatuca, kud i kind jukerubi ario; man Mungu ubed uweco kude.

8 Yehova uweco i bang’ Musa, ewacu kumae: 2 “Wec kud Arun man iyer ire kumae: ‘Kinde m’icwinyo thala, thala abirone bilero kaka ma n’i wang’ tiend thala.’” 3 E Arun utimo kumae: Ecwinyo thalanegi i kaka ma n’i wang’ tiend thala, tap calu ma Yehova ung’olo ni Musa. 4 Juyiko tiend thalane kumae: Juyike ku mola ma kwar ku jamtic mi fwodo cuma; juyike ku jamtic mi fwodo cuma niai i tiende mi diere nitundo i thiwene. Juyiko tiend thalane calku gin ma wok i wang’ ma Yehova unyutho ni Musa.

5 Yehova uweco kendo i bang’ Musa, ewacu kumae: 6 “Gam Julawi kud i kind Juisrael, man idwokgi leng’. 7 Ibidwokogi leng’ kumae: Kir pii mi dwokirileng’ ni dubo i kumgi, man gicikiri nilielo yir mi kumgi zoo ku riedi, nilwoko kendi migi, man nidwokiri gigi leng’. 8 I ng’eye, gibigamu nyathi thwon dhiang’ ku girathierane mi nying cam mi mogo ma yom ma jujebo ku mo, man ibigamu bende nyathi thwon dhiang’ mange pi lam mi dubo. 9 E ibikelo Julawi i wang’ hema mi rombo man ibicoko dhu cokiri ceke mi Juisrael. 10 Kinde m’ikelo Julawi i wang’ Yehova, Juisrael gibiketho cing’gi iwi Julawi. 11 Man Arun ucikere nithiero* Julawi i wang’ Yehova ni girathiera m’aleka kud i kind Juisrael, man gibitimo tic migi ni Yehova.

12 “E Julawi gibiketho cing’gi iwi thwoni dhieng’. I ng’eye, gibithiero acel ni lam mi dubo, ma kucelo ke ni lam m’awang’a ni Yehova pi nitimo adunya pi Julawi. 13 Man ibiketho Julawi gibicungo i wang’ Arun ku wote man ibithierogi* ni girathiera m’aleka ni Yehova. 14 Ibikoyo Julawi kud i kind Juisrael, man Julawi gibidoko para. 15 I ng’ey maeno, Julawi gibimondo pi nitimo i hema mi rombo. Eno tie kite m’ibidwoko kogi leng’ man kite m’ibithiero* kogi ni girathiera m’aleka. 16 Kum gitie ju ma jumiyo ira ni giramiya kud i kind Juisrael. Abiting’ogi ira kaka kayu ceke* mi Juisrael. 17 Kum kayu ceke m’i kind Juisrael gi para, mi dhanu ku mi lei kpo. Adwokogi leng’ ira i nindo m’agoyo kayu ceke i ng’om mi Misiri. 18 Abigamu Julawi kaka kayu ceke m’i kind Juisrael. 19 Abimiyo Julawi ni giramiya ni Arun man ni wote kud i kind Juisrael, kara gitim tic pi Juisrael i hema mi rombo man gitim adunya pi Juisrael, kara thong’om kud uwoki i kind Juisrael pilembe dhanu mir Israel gicoro ceng’ini ku kabedo ma leng’.”

20 Musa gikud Arun man cokiri ceke mi Juisrael gitimo kumeno pi Julawi. Calku lembe ceke ma Yehova ung’olo ni Musa pi Julawi, eno re ma tie gin ma Juisrael gitimo pigi. 21 Pieno, Julawi gidwokiri leng’ man gilwoko kendi migi, i ng’ey maeno Arun uthierogi* ni girathiera m’aleka i wang’ Yehova. I ng’eye, Arun utimo adunya pigi pi nidwokogi leng’. 22 Tokcenne, Julawi gimondo pi nitimo tic migi i hema mi rombo i wang’ Arun ku wote. Tap calu ma Yehova ung’olo ni Musa pi Julawi, e gitimo igi kumeca.

23 Yehova ugam uweco i bang’ Musa, eyero kumae: 24 “Lembe maeni tie pi Julawi: Ng’atu ma nico ma oro pare pier ario wi abic niidho malu bimondo i kind ungu mi ju ma timo tic i hema mi rombo. 25 Ento i ng’ey ma oro pare udoko pier abic, ebiwok kud i kind ungu mi tije man ebitimo ngo kendo tic. 26 Ecopo konyo umego pare m’ubetimo tic i hema mi rombo, ento kud etim tic keca. Eno lembe m’ibitimo pi Julawi man tic migi.”

9 Yehova uweco i bang’ Musa i langa mi Sinai i dwi ma kwong’a mi oro mir arionde i ng’ey ma giwok kud i ng’om mi Misiri, ewacu kumae: 2 “Juisrael gicikiri niyiko lam mi Kadhukuwijo i nindone ma juketho. 3 Wucikuru niyike i nindo ma juketho pire, i nindo apar ang’wen mi dwije saa ma piny ubegamere.* Wubiyike calku cikne ceke man calkud ayi ma juketho lembene wotho ko.”

4 Pieno Musa uyero ni Juisrael nia giyik lam mi Kadhukuwijo. 5 E giyiko lam mi Kadhukuwijo i dwi ma kwong’a, i nindo apar ang’wen mi dwije saa ma piny ubegamere,* i langa mi Sinai. Juisrael gitimo calku lembe ceke ma Yehova ung’olo ni Musa.

6 Ento nwang’u dhanu moko gicido pilembe gimulo kum avu,* uketho gibedo mbe ku copo mi yiko lam mi Kadhukuwijo cing’ nica. Pieno gibino i wang’ Musa gikud Arun cing’ nica 7 man giyero ire kumae: “Wacido pilembe wamulo kum avu.* Pirang’o jubecerowa nia kud wakel girathiera ni Yehova i nindone ma juketho i kind Juisraeli?” 8 E Musa udwoko igi kumae: “Wukekur kakeno, man wuwek akewinj lembe ma Yehova bing’olo piwu.”

9 Yehova ugam uyero ni Musa kumae: 10 “Yer ni Juisrael kumae: ‘Kadok ng’atu moko m’i kindwu kunoke m’i kind dhanu m’utuk mwu mi nindo m’ubino ucido pilembe emulo kum avu* kunoke pilembe ecidho i woth ma bor, ecikere asu niyiko lam mi Kadhukuwijo ni Yehova. 11 Gibiyike i dwi mir arionde, i nindo apar ang’wen saa ma piny ubegamere.* Gicikiri nicame ku mukathi ma thobi mbe i iye man uboko ma kec. 12 Kud giwek donge moko udong’ nitundo kugweno, man kud gitur cogone moko ci. Gicikiri niyike nimakere ku cik ceke m’ugwaku kum Kadhukuwijo. 13 Ento tek ng’atu moko tie leng’ man ecidho de ngo i woth, enre elund ekwero niyiko lam mi Kadhukuwijo, jucikiri nikabu* ng’atune* cen kud i kind juthugi, pilembe ekelo ngo girathiera pa Yehova i nindone ma juketho. Ng’atune bicungo i dhu dubo pare.

14 “‘Man tek umondo moko bedo i kindwu, en de ebiyiko lam mi Kadhukuwijo ni Yehova. Ecikere niyike nimakere ku cik mi Kadhukuwijo man nimakere kud ayi ma juketho lembene wotho ko. Cik bibedo ma rom piwu, dok ebed pir umondo kadi pir anyoli mi ng’ombe.’”

15 I nindo ma juguro iye hema mi thier, afuru uumo hema mi thierne, niwacu hema mi Lembatuca, ento kud uthieno piny moko ma ve mac ubedo iwi hema mi thierne nitundo kugweno. 16 Eni re ma lembe m’ubed utimere: Afuru ubed uumo wiye ku dieceng’, man uthieno ke piny moko ma ve mac. 17 Saa moko ci ma kan afurune uai kud iwi hema, Juisrael gitugo woth ndhu ndhu, man kaka m’afurune uwok ucungo i iye, Juisrael gigonjo keca. 18 Juisrael gibed gitugo woth tek Yehova ung’olo, man gibed gigonjo de tek Yehova ung’olo. Tek fodi afuru ubedo iwi hema mi thier ci, gigonjo keca. 19 Tek afuru ubedo iwi hema mi thier pi nindo dupa, Juisrael giworo Yehova man gitugo ngo woth. 20 Saa moko afuru ubed ubedo iwi hema mi thier pi nindo ma nyanok kende. Gibed gigonjo tek Yehova ung’olo, man gibed gitugo woth de tek Yehova ung’olo. 21 Saa moko afurune ubed ubedo niai dhug uthieno nitundo kugweno kende, man kan afurune uai kugweno, e gitugo woth. Dok ebed dieceng’ kadi uthieno, kan afuru uai ci, e gitugo woth. 22 Dok ebed bang’ ario, dwi acel kunoke nikadhu, tek fodi afuru ubedo iwi hema mi thier ci, Juisrael gigonjo man gitugo ngo woth. Ento tek eai, e gitugo woth. 23 Gibed gigonjo tek Yehova ung’olo, man gibed gitugo woth de tek Yehova ung’olo. Gibed giworo lembe m’ukwayu gitim ni Yehova calku lembe ma Yehova ung’olo nikadhu kud i bang’ Musa.

10 I ng’eye, Yehova uyero ni Musa kumae: 2 “Yik iri agwara ario; yikgi gibed mi mola ma tar ku jamtic mi fwodo cuma, man ibed itii kugi pi nilwong’o cokiri man pi niyaku kagonjo. 3 Pi nilwong’o cokiri ceke i beng’i i dhu kamondo mi hema mi rombo, jubikudho gin ario zoo. 4 Tek jukudho acel kende, judongo ma wijo kendgi ma gi jutelwic mi dhanu elufu mir Israel re ma gibicokiri i beng’i.

5 Tek wukudho agwara ma dwande wotho lokere aloka, e kagonjo mi ju ma ni yo nyangu bitugo woth. 6 Tek wukudho agwara ma dwande wotho lokere aloka wang’ mir arionde, e kagonjo mi dhanu ma ni yo piny bitugo woth. Jucikiri nikudho agwara i ayi maeno tekene unguman ubetugo woth.

7 “Tekene jubelwong’o cokiri karacelo, wubikudho agwara, ento dwandgi kud uwoth lokere aloka. 8 Wot Arun ma gi julam gibikudho agwaranegi, man tiyo kugi bibedo iwu ni cik ma nja i kind dhanu m’utuk mwu ceke.

9 “Tek ubekwayu wucidh i lwiny i ng’om mwu i dhu jukwor mwu m’ubesendowu, wucikuru nikudho agwara uwak dwal mi lwiny, e Yehova Mungu mwu bipoy piwu man ebibodhowu kud i cing’ jukwojwu.

10 “Bende i saa mwu mir anyong’a, i foc mwu man i acaki mi dwi mwu, wucikuru nikudho agwara iwi lam mwu m’awang’a man iwi lam mwu mi kwiyocwiny; gibibedo ni poyowic iwu i wang’ Mungu mwu. An a Yehova Mungu mwu.”

11 I dwi mir ario mi oro mir arionde, i nindo pier ario mi dwije, afuru ugam uai kud iwi hema mi thier mi Lembatuca. 12 Pieno, Juisrael gitugo woth kud i langa mi Sinai nimakere kud ayi ma jupangu nia gibibeai ko, man afuru uwok ucungo i langa mi Paran. 13 Eno ubino wang’ ma kwong’a ma gitugo woth ma gibelubo ko lembe ma Yehova ung’olo nikadhu kud i bang’ Musa.

14 E suru adek ma jupoko mi kagonjo mi wot Yuda ular utugo woth calkud ungu migi,* man Nacon ma wod Aminadab re m’ubino telo wi ungune. 15 Jatel wi ungu mi suru mi wot Isakar ubino Nethanel ma wod Zuar. 16 Jatel wi ungu mi suru mi wot Zebulon ubino Eliab ma wod Helon.

17 Kinde ma juyaku hema mi thier, wot Gercon man wot Merari ma gibed giyeyo hema mi thier gitugo woth.

18 I ng’eye, suru adek ma jupoko mi kagonjo pa Ruben gitugo woth calkud ungu migi,* man Elizur ma wod Cedheur re m’ubino telo wi ungune. 19 Jatel wi ungu mi suru mi wot Simeon ubino Celumiel ma wod Zuricadai. 20 Jatel wi ungu mi suru mi wot Gad ubino Eliasaf ma wod Deuel.

21 I ng’eye, Jukohath ma giyeyo jamb hema mi thier gitugo woth. Mito jular jugur hema mi thier i wang’ tundo migi.

22 I ng’eye, suru adek ma jupoko mi kagonjo mi wot Efraim gitugo woth calkud ungu migi,* man Elicama ma wod Amihud re m’ubino jatel wi ungune. 23 Jatel wi ungu mi suru mi wot Manase ubino Gamaliel ma wod Pedazur. 24 Jatel wi ungu mi suru mi wot Benjamin ubino Abidan ma wod Gideoni.

25 I ng’eye, suru adek ma jupoko mi kagonjo mi wot Dan gitugo woth calkud ungu migi,* gin re ma gibino udul mony ma bedong’ tokcen pi kagonjo ceke, man Ahiezer ma wod Amicadai re m’ubino jatel wi ungune. 26 Jatel wi ungu mi suru mi wot Acer ubino Pagiel ma wod Okran. 27 Jatel wi ungu mi suru mi wot Nafthali ubino Ahira ma wod Enan. 28 Eno ubino ayi ma jupangu ma Juisrael kud ungu migi* gibed gilubo kinde ma gibetugo woth.

29 I ng’eye, Musa uyero ni Hobab ma wod Reuel* ma Jamidian, ma jalwon Musa kumae: “Wabecidho i kabedo ma Yehova uyero pire kumae: ‘Abimiye iwu.’ Dong’ bin wacidhu man wabitimo iri bero, pilembe Yehova ung’olo lembe ma beco pir Israel.” 30 E elund edwoko ire kumae: “Acidho ngo. Ento abidok i ng’om ma thuwa man i bang’ wedi para.” 31 Musa udog uyero kumae: “Timba kud iwekwa, kum ing’eyo kaka m’ukwayu wagonj i iye i langa, man iromo bedo jatelwic mwa.* 32 Man tek wacidho kudwu, bero moko ci ma Yehova bitimo iwa, wabitime andha iri de.”

33 E gicaku woth niai i kum got pa Yehova pi woth mi bang’ adek, man sanduku mi lembariba pa Yehova uwotho i wang’gi pi bang’ adek pi nisayu igi kayom. 34 Man afuru pa Yehova ubino i wigi ku dieceng’ kinde ma giai kud i kagonjo.

35 Saa ma ka jubeting’o Sanduku ci, Musa uyero kumae: “Ai malu, E Yehova, man wek jukwoji ulal mba mba, man wek ju m’udegi uring kud i weng’i.” 36 Kinde ma ka Sandukune ubeyom, eyero kumae: “Dwogi, E Yehova, i bang’ elufu ma kwanere ngo* mir Israel.”

11 Man dhanu ucaku wagiri ku rac i wang’ Yehova. Kinde ma Yehova uwinjo wakne, ng’eicwiny pare uopo, man mac m’uai i bang’ Yehova ucaku liel i kumgi man uwang’u jumoko ma gin’i tung kagonjo. 2 Kinde ma dhanu ukayu wak i bang’ Musa, ekwayu Yehova, man mac ugam utho. 3 Pieno, jucaku nying’ kabedone Tabera,* pilembe mac m’uai i bang’ Yehova uliel i kumgi.

4 I ng’eye, ava ma rac umaku udul m’ujebere* i kindgi lee mandha man Juisrael de gicaku wagiri kendo ma gibeyero ko kumae: “Ng’a ma bimiyo iwa ring’o ma wacami? 5 Wabepoy pi kite ma wabed wacamu ko rec mi mananu i Misiri, man bende ukuju, pasthek,* pwaro, onyo, mange hay! 6 Ento kawoni wabejwer. Gin ma waromo neno anena de mbe, ndhu mana eni kende.”

7 Nwang’u manane ubino calu nying cam moko,* man ebed enen calu udok bedelium. 8 Dhanu ubed ulal mba mba pi nicoke, man gibed girege ku kidi rego kunoke giode i pany. I ng’eye, gitede i agulu kunoke giyike ni mukathi ma ngulu ngulu, man ebino lim lim calu mukathi ma jutedo ku mo. 9 Saa ma ka thoi ung’ier iwi kagonjo ku diewor, mana de podho i wiye.

10 Musa uwinjo dhanu ubewak, kubang’ otman ng’atuman ubewak i dhu kamondo mi hema pare. E ng’eicwiny uopo i Yehova lee, man Musa de lembene ton i iye lee. 11 E Musa ugam uyero ni Yehova kumae: “Pirang’o ibesendo jatic peri? Pirang’o anwang’u ngo bero i weng’i, uketho ijengo ter mi dhanu maeni zoo i wiya? 12 Nyo an re m’ayeyo ic mi dhanu maeni ceke? Nyo anyologi an m’uketho iyero ira nia, ‘ting’gi i kori tap calu ma japidi ting’o ko nyathin m’ubedhoth,’ nitundo i ng’om m’ikwong’o nia ibimiyo ni kwarugi? 13 Abinwang’u ring’o kani m’amii ni tho dhanu maeni zoo? Kum gibeweko ngo niwak i wang’a ma gibeyero ko kumae: ‘Mii iwa ring’o wacam!’ 14 Aromo yeyo ngo dhanu maeni zoo kenda; etie ter ma pek dit ira. 15 Tekene imito itima kumeni ci, timba nega de kawoni. Tek anwang’u bero i weng’i, kud iketh anen can kendo.”

16 Yehova udwoko ni Musa kumae: “Cok ira jumaco pier abiro kud i kind judongo mir Israel, jumaco m’ing’eyo nia gi judongo man gi jego mi dhanu. Kelgi i hema mi rombo, man keth gicung keca karacelo kudi. 17 Abiloro piny man abiweco kudi keca, abigamu kum tipo moko ma n’i wii man abikethe i wigi, e gibikonyi ku yeyo ter mi dhanu, kara kud iyeye kendi. 18 Yer ni dhanu kumae: ‘Wudwokuru leng’ pir urwo, kum wubicamu ring’o andha, pilembe wuwak i ith Yehova man wuyero kumae: “Ng’a ma bimiyo iwa ring’o ma wacami? Lembe ubino ber iwa magwei i Misiri.” Yehova bimiyo iwu ring’o andha man wubicamu. 19 Wubicame ngo pi nindo acel kende kadi pi nindo ario, kadi pi nindo abic, kadi pi nindo apar kunoke pi nindo pier ario, 20 ento pi dwi acel zoo, nitundo m’ebiwok kud i odi umwu man ebiduyo cwinywu; kum wukwero Yehova ma n’i kindwu man wuwak i wang’e ma wubeyero kumae: “Eni re wawok kud i Misiri pirang’o?”’”

21 I ng’eye, Musa uyero kumae: “Dhanu m’an’i kindgi wendgi tie elufu dak abusiel (600 000), jumaco ma wotho ku tiendgi, ento asu ibeyero nia, ‘abimiyo igi ring’o, man gibicame ebiromogi pi dwi acel zoo’! 22 Kadok juthumo udul rombe ku dhieng’ zoo, nyo eno copo romogi andha? Kunoke tek jumaku rec m’i nam zoo, nyo de copo romogi andha?”

23 Yehova ugam uyero ni Musa kumae: “Nyo cing’ Yehova tie dungulu magwei? Kawoni ibineno ka nyo gin m’ayero bitimere iri kunoke ngo.”

24 Pieno, Musa uwok woko man eyero lembe ma Yehova uwacu ni dhanu. Bende ecoko jumaco pier abiro kud i kind judongo mi dhanu man eketho gicungo i ng’et hema tingili. 25 E Yehova uloro piny i afuru man eweco i bang’e, egamu kum tipo moko ma n’i wiye eketho iwi ng’atuman m’i kind judongo pier abiro. Saa ma tipone ubedo i wigi ci, gicaku timiri ve jubila,* ento gitimo ngo lembene kendo.

26 Nwang’u juario m’i kindgi ubedo asu i kagonjo. Nying’gi ubino Eldad giku Medad. Man tipo ucaku bedo i wigi, pilembe gibino i kind ju ma jukiewo nying’gi, ento nwang’u giwok ungo i bang’ hema. Pieno gicaku timiri ve jubila i kagonjo. 27 Man jalawobi moko uringo ucidh unyutho ni Musa kumae: “Eldad giku Medad gibetimiri ve jubila i kagonjo!” 28 E Yocuwa ma wod Nun, ma jatic pa Musa niai m’en aradu, udwoko kumae: “Rwoth para Musa, kwergi!” 29 Ento Musa udwoko ire kumae: “Kumira ubenegi en pira? Kudi, abemito nwang’u dhanu pa Yehova ceke ubed jubila man Yehova uketh tipo pare i wigi!” 30 I ng’eye, Musa udok i kagonjo karacelo ku judongo mir Israel.

31 Man yamu m’uai i bang’ Yehova utuk mbwang’ man ucaku leko aywer niai kud i nam eketho gipodho i ng’et kagonjo tingili; gipodho i ng’et kagonjo zoo i woth ma romo bang’ acel i thenge acel, man i woth mi bang’ acel i thenge ma kucelo man gipong’ kadhiri ma romo bot* ario niai kud iwi ng’om. 32 Pieno cing’ nica duu man diewor traka kud urwonde de duu dhanu ubedo nger man gicoko aywer. Ng’atu moko mbe m’ucoko i ther omer* apar, man giwotho moyogi igi gigi i ng’et kagonjo tingili. 33 Ento kinde ma ring’one fodi n’i kind lakgi man ma fodi ginyame de ngo ci, ng’eicwiny pa Yehova uopo i kum dhanu, man Yehova ucaku goyo dhanu ku nek ma lee dit.

34 Pieno gicaku nying’ kabedone Kibroth-hatava,* pilembe kakeca gikunyo dhanu ma juwanya. 35 Niai kud i Kibroth-hatava dhanu utugo woth pi nicidho i Hazeroth, man giwok gibedo i Hazeroth.

12 Man Miriam gikud Arun gicaku weco rac i kum Musa nikum dhaku ma Nyakuci m’egamu, pilembe egamu dhaku ma Nyakuci. 2 Giwacu kumae: “Nyo Yehova uweco nikadhu kud i bang’ Musa kende? Nyo eweco ngo bende nikadhu kud i bang’wa?” Man Yehova ubino winjo. 3 Ento nwang’u Musa ubino ng’atu ma mol lee nisagu dhanu ceke* m’i wang’ ng’om.

4 Yehova ugam uyero mbwang’ ni Musa gikud Arun man Miriam kumae: “Wuwok wun adek zoo i bang’ hema mi rombo.” E gin adek zoo giwok woko. 5 Yehova ugam uloro piny i mbegi mir afuru, ecungo i dhu kamondo mi hemane man elwong’o Arun giku Miriam. E gin ario zoo gicoro ceng’ini. 6 I ng’eye ewacu kumae: “Akwayuwu, wuwinj lembe para. Ka nwang’u jabila pa Yehova n’i kindwu, nwang’u anyuthara ire i gin ma wok i wang’ man nwang’u aweco i bang’e kud i wang’ lek. 7 Ento etie kumeno ngo ni jatic para ma Musa! Jumiyo ot para zoo* i cinge. 8 Aweco kude dhok ku dhok,* ngbeng’ ngbeng’, ku lembabola de ngo; man ayi Yehova re m’eneno. Pirang’o lworo weco rac i kum jatic para ma Musa unegowu ngo?”

9 Ng’eicwiny pa Yehova ugam uopo i kumgi, man eai kud i bang’gi. 10 Afuru uai kud iwi hema, man nen! jugoyo Miriam ku dhobu* ma tar calu pei. E Arun ulokere i bang’ Miriam, man eneno nia jugoye ku dhobu. 11 E wang’ acel Arun uyero ni Musa kumae: “Akweyi, rwoth para, timba kud iketh dubo maeni i wiwa! Lembe ma watimo e tie lembe mi ming’o. 12 Akweyi, timba kud iwek emedere nibedo calu nyathin ma junyolo ma dong’ etho, ma nusu mi ring’ kume moko uvuth i saa mi nyoliri!” 13 Man Musa ucaku wak i bang’ Yehova, eyero kumae: “E Mungu akweyi, timba key kume, akweyi!”

14 Yehova udwoko ni Musa kumae: “Ka nwang’u won ung’ulo law i wang’e, nyo nwang’u lewic ubenege ngo pi nindo abiro? Dong’ jukoye ebed kakende pi nindo abiro woko i ng’ey kagonjo, kan i ng’eye jucopo dwoge i kagonjo.” 15 Pieno jukoyo Miriam kakende woko i ng’ey kagonjo pi nindo abiro, man dhanu uting’o ngo kagonjo nitundo ma judwogo Miriam i kagonjo. 16 I ng’eye, dhanu utugo woth kud i Hazeroth man gicaku gonjo i langa mi Paran.

13 Yehova ugam uweco ku Musa, ewacu kumae: 2 “Or jumaco moko ucidh ulib ng’om mi Kanan m’abecimiyo ni Juisrael. Or ng’atu acel acel kud i suru pa kwarugi, ng’atuman m’i kindgi ubed jadit ma wijo.”

3 Pieno Musa uoro gicidho niai kud i langa mi Paran nimakere ku lembe ma Yehova ung’olo. Jumacone ceke gibino jutelwic mi Juisrael. 4 Nying’gi ni e: i suru pa Ruben ubino Camua ma wod Zakur; 5 i suru pa Simeon ubino Cafath ma wod Hori; 6 i suru pa Yuda ubino Kaleb ma wod Yefune; 7 i suru pa Isakar ubino Igal ma wod Yozefu; 8 i suru pa Efraim ubino Hoceya ma wod Nun; 9 i suru pa Benjamin ubino Palthi ma wod Rafu; 10 i suru pa Zebulon ubino Gadiel ma wod Sodi; 11 i suru pa Yozefu, niwacu i suru pa Manase ubino Gadi ma wod Susi; 12 i suru pa Dan ubino Amiel ma wod Gemali; 13 i suru p’Acer ubino Sethur ma wod Mikael; 14 i suru pa Nafthali ubino Nabi ma wod Vofsi; 15 man i suru pa Gad ubino Geuel ma wod Maki. 16 Eno ubino nying’ jumaco ma Musa uoro pi nilibo ng’ombe. Man Musa uloko nying’ Hoceya ma wod Nun udoko Yocuwa.*

17 Kinde ma Musa ubeorogi pi nilibo ng’om mi Kanan, eyero igi kumae: “Wuidhi malu kuca i Negeb, man i ng’eye wuidhi i ng’om gudi. 18 Ukwayu wunen ka nyo ng’ombene tie nenedi man ka nyo dhanu ma bedo i iye gi tek kunoke ngo, ka nyo wendgi nok kunoke lee, 19 tek nyo ng’ombe ber kunoke rac man ka nyo adhura ma gibedo i iye jugomo ku gang’kidi kunoke ngo. 20 Wunen bende ka nyo ng’ombe miyo kunoke e ng’om ngele man ka nyo yen utie i iye kadi ke umbe. Cwinywu ubed tek man wudwog ku nying yen moko m’i ng’ombe.” Nwang’u nindo maeca ubedo nindo mi landu wi mwoka mi nying ulok.

21 Pieno giidho malu man gilibo ng’ombe niai langa mi Zin nitundo i Rehob ceng’ini ku Lebo-hamath.* 22 Saa ma giidho i Negeb, gitundo i Hebron, kaka ma Ahiman, Cecai, man Thalmai ma gi Juanakim gibed gikwo i iye. Nwang’u jular jugomo Hebron oro abiro i wang’ nigomo Zoan mi Misiri. 23 Saa ma gitundo i Poga mir Eckol, giwok gituro jang yen acel ma nying ulok unur i kume, man gitade iwi uluth ma bor ma jumaco ario uyeyo, karacelo ku nying ulemo man nying ulam. 24 Gicaku nying’ kabedone Poga* mir Eckol* nikum jang ulok ma nyinge nur i kume ma Juisrael giwok gituro keca.

25 I ng’ey ma nindo pier ang’wen uthum, gidwogo kud i ng’om ma giai gilibo. 26 E gidwogo i bang’ Musa gikud Arun man i bang’ cokiri ceke mi Juisrael i langa mi Paran i Kadec. Gidwoko rapor ni cokiri ceke man ginyutho igi nying yen mi ng’ombe. 27 Gikoro ni Musa kumae: “Wamondo i ng’om m’iorowa i iye, man andha etie ng’om ma molo cak ku miyokic; nying yen m’i iye de ni e. 28 Ento dhanu ma bedo i ng’ombe gi tek man gitie kud adhura ma dongo dongo ma jutieko ku gang’kidi. Wawok waneno bende Juanakim kuca. 29 Juamalek gibedo i ng’om mi Negeb, Juhithi, Juyebusi ku Juamor gibedo i ng’om gudi, man Jukanan ke bedo i dhu nam ma n’i ng’et kulo Yordan.”

30 E Kaleb upimo nijuko dhanu m’ucungo i wang’ Musa m’ebeyero kumae: “Waidhu malu kuca ndhu ndhu eni, man cwinywa tek nia wawok maku ng’ombe, pilembe wacopo wok voye andha.” 31 Ento jumaco ma giidho karacelo gikugi giwacu kumae: “Wacopo idho ngo i dhu dhanu nica, pilembe gi tek nisaguwa.” 32 Man gimediri nimiyo rapor ma rac ni Juisrael pi ng’om ma giai gilibo, giwacu kumae: “Ng’om ma wawotho i iye pi nilibo utie ng’om ma mvoro dhanu ma bedo i iye, man dhanu ceke ma waneno i iye tie dhanu ma dongo i ayi ma tung’. 33 Man wawok waneno Junefili kuca ku wot Anak ma gi nyikway Junefili. I wang’wa kud i wang’gi zoo wanen pare ve usene.”

14 E cokiri ceke uting’o dwandgi man dhanu umediri nikok man niwak diewor nica traka. 2 Juisrael ceke gicaku ng’ur i kum Musa gikud Arun, man cokiri ceke uweco rac i kumgi ma giwacu kumae: “Timba nwang’u watho i ng’om mi Misiri, kunoke timba nwang’u watho i langa keni! 3 Pirang’o Yehova ubeterowa i ng’om maeni kara wapodh i lak palamularu? Mon kud awiya mwa bidoko ni jambayeki. Nyo e ber ungo iwa nia wadok i Misiri?” 4 Gibino yero kadok i kindgi kumae: “Wang’iyu iwa jatela man wadoku i Misiri!”

5 E Musa gikud Arun gipodho arieba wang’gi i ng’om i wang’ cokiri ceke mi Juisrael m’ucokiri. 6 Yocuwa ma wod Nun man Kaleb ma wod Yefune, ma gibino i kind ju m’ucidh ulibo ng’ombe gigam giyeco kendi migi, 7 man giyero ni cokiri ceke mi Juisrael kumae: “Ng’om ma wawotho i iye pi nilibo utie ng’om ma cuu, ma cuu mandha. 8 Tek anyong’a unego Yehova i kumwa, ebiterowa andha i ng’ombe man ebimiye iwa, en e ng’om ma molo cak ku miyokic. 9 Dong’ kud wujai ni Yehova, man kud wulwor dhanu m’i ng’ombe, kum gibirem arema i dhogwa.* Judaru kabu gwok migi kud i bang’gi, man Yehova ni kudwa. Kud wulworgi.”

10 Ento cokiri ceke uwacu ya jucanygi ku kidi. Dwong’ pa Yehova ulund uwok iwi hema mi rombo ni dhanu ceke mir Israel.

11 Yehova ugam uwacu ni Musa kumae: “Dhanu maeni bicaya nitundo awene? Man ku tho giranyutha ceke m’atimo i kindgi e, gibiyiya ngo nitundo awene? 12 Dong’ wek agoygi ku thong’om man akabgi cen, man wek aketh idok thek ma dit man ma tek nisagugi.”

13 Ento Musa udwoko ni Yehova kumae: “Jumisiri m’iwodho dhanu maeni kud i kindgi ku tego peri gibigam winjo pi lembene, 14 man gibikoro lembene ni dhanu mi ng’om maeni. Gin de giwinjo nia, in i Yehova, in’i kind dhanu maeni man iwok igi wang’ ku wang’. In i Yehova, man afuru peri ucungo i wigi, ibewotho i wang’gi i mbegi mir afuru ku dieceng’ man i mbegi mi mac ku diewor. 15 Tek inego dhanu maeni zoo wang’ acel,* thek m’uwinjo pi rwongi gibiwacu kumae: 16 ‘Lembe uvoyo Yehova avoya ka tero dhanu maeni i ng’om m’ekwong’o nia ebimiyo igi, uketho enegogi cen i langa.’ 17 Dong’ akweyi, Yehova, wek tego peri ubed dwong’ calu m’ing’olo kinde m’iyero kumae: 18 ‘Yehova tie yoo ni ng’eicwiny man epong’ ku mer ma lokere ngo,* eweko kosa man kier, ento ebiweko ngo nyanok de ng’atu m’udubo m’umbe matira, ekelo matira pi kosa mi wego iwi wot, iwi dhanu m’utuk mir adege man iwi dhanu m’utuk mir ang’wende.’ 19 Akweyi, timba wek kier mi dhanu maeni nimakere ku mer peri ma dwong’ ma lokere ngo, tap calu m’itimo kisa ni dhanu maeni niai i Misiri nitundo kawoni.”

20 E Yehova wacu kumae: “Aweko igi calku lembe m’iyero. 21 Ento re calu andha abedo kwo, ng’om ceke bipong’ ku dwong’ pa Yehova. 22 Enre dhanu m’uneno dwong’ para ku giranyutha para m’atimo i Misiri man i langa, ma gilund gimediri asu nimulo iya wang’ apar eni man ma giwinjo ngo dwanda, ng’atu acel de mbe m’i kindgi 23 ma bineno ng’om m’ang’olo pire ni kwarugi; mbe, ng’atu acel de mbe m’i kind ju m’ubecaya ma binene. 24 Ento calu Kaleb ma jatic para ubedo ku nen* m’ukoc man emedere nilubo toka ku cwinye ceke, abitere andha i ng’om m’ecidho i iye, man nyikwaye bimaku ng’ombe ni aba. 25 Calu Juamalek ku Jukanan gibedo i poga,* wucikuru nidok ku ng’eywu urwo, man wutug woth pi nicidho i langa kud i yo mi Nam ma kwar.”

26 I ng’eye, Yehova yero ni Musa gikud Arun kumae: 27 “Cokiri ma rac maeni bimedere ning’ur i kuma nitundo awene? Adaru winjo lembe ma Juisrael gibeng’ur ko i kuma. 28 Yer igi nia, Yehova wacu kumae: ‘“Calu andha abedo kwo, abitimo iwu de tap lembe m’awinjo wuyero! 29 Avujwu bipodho i langa maeni; eyo, dhanu ceke m’i kindwu ma jukiewo nying’gi, ma oro migi niai pier ario niidho malu, wun ceke ma wung’ur i kuma. 30 Ng’atu moko mbe m’i kindwu ma bimondo i ng’om m’akwong’o* nia wubibedo i iye, ndhu Kaleb ma wod Yefune man Yocuwa ma wod Nun.

31 “‘“Awiya mwu ma wuyero nia bidoko ni jambayeki re m’abitero gibimondo i iye, man gibing’eyo ng’om ma wukwero. 32 Ento wun, avujwu bipodho i langa maeni. 33 Wotwu bidoko jukwac i langa pi oro pier ang’wen, man gibicungo i dhu timo mi kosobedoleng’* mwu nitundo m’avuj ng’atu ma tokcen m’i kindwu bipodho ko i langa. 34 Nimakere ku wend nindo ma wulibo i iye ng’ombe, niwacu nindo pier ang’wen, nindo acel pi oro acel, nindo acel pi oro acel, wubicungo i dhu kier mwu pi oro pier ang’wen, e wubing’eyo nia matoke mi jai ira* utie ang’o.

35 “‘“An a Yehova, adaru weco. Eni tie gin m’abitimo i kum cokiri maeni ceke ma rac, dhanu ceke m’ucokiri karacelo i dhoga gibijik i langa maeni, man gibitho keni. 36 Jumaco ma Musa uoro ucidh ulib ng’om man ma giketho cokiri ceke ung’ur i kume kinde ma gidwogo ku rapor ma rac iwi ng’ombe, 37 eyo, co m’udwogo ku rapor ma rac pi ng’ombe, jubigoyogi cen man gibitho i wang’ Yehova. 38 Ento Yocuwa ma wod Nun man Kaleb ma wod Yefune ma gibino i kind ju m’ucidh uliewo ng’ombe, re ma gibidong’ kwo andha.”’”

39 Saa ma Musa uyero lembuno ni Juisrael ceke, can ma lee dit umaku dhanune. 40 Urwonde pir kugweno, gimito giidh i die wi got, ma gibewacu ko kumae: “Wayiyo nia wadubo. Ento watie ayika niidho i kabedo ma Yehova uweco pire.” 41 Ento Musa udwoko kumae: “Pirang’o wubemito wukadh ku wi lembe ma Yehova ung’olo? Lembuno birombo ngo. 42 Kud wuidhi, kum Yehova mbe kudwu, man jukwor mwu biwok loyowu. 43 Kum Juamalek ku Jukanan gin’i weng’wu, man wubipodho i lak palamularu. Calu ma wulokuru cen kud i kum lubo Yehova, Yehova bibedo mbe kudwu.”

44 Ento rikini migi uketho giidho asu i die wi got; enre sanduku mi lembariba pa Yehova man Musa uai ngo kud i die kagonjo. 45 E Juamalek man Jukanan ma gibedo i ng’om gudine giloro man gigoyogi, giriemogi nitundo bir i Horma.

15 Yehova uweco kendo i bang’ Musa, eyero kumae: 2 “Wec ku Juisrael, man iwac igi kumae: ‘Kinde ma wubin wumondo i ng’om m’abemiyo iwu nia wubed i iye, 3 man wubethiero dhiang’ kunoke urombo ni girathiera ma juwang’u ku mac ni Yehova, dok ebed lam m’awang’a kunoke lam mi pong’o lembang’ola moko ma segi, kadi ke girathiera ma ku berocwiny, kunoke girathiera m’i kind foc mi nindo ma juketho kara ubed ni piny ma ng’wice ng’ar* ni Yehova, 4 ng’atu m’ubekelo girathiera parene ucikere nikelo bende ni Yehova girathiera mi nying cam mi mogo ma yom, apaje mir efa* ma jujebo ku mo nusu pa nusu mi hin.* 5 Wucikuru nithiero bende pigulok nusu pa nusu mi hin ni girathiera mi pigulok karacelo ku lam m’awang’a, kunoke ku lam mi nyathi nyog uromboman. 6 Pi nyog urombo, wucikuru nithiero girathiera mi nying cam ku mogo ma yom thenge ario wi apar mir efa ma jujebo ku mo thenge acel wi adek mi hin. 7 Man wucikuru nikelo kum pigulok acel wi adek mi hin ni girathiera mi pigulok ma ng’wice ng’ar* ni Yehova.

8 “‘Ento tek wubethiero thwon dhiang’ ni lam m’awang’a, kunoke lam pi nipong’o lembang’ola moko ma segi, kadi ke lam mi kwiyocwiny ni Yehova, 9 wucikuru nikelo bende girathiera mi nying cam, mogo ma yom thenge adek wi apar mir efa ma jujebo ku mo nusu hin, karacelo ku thwon dhiang’ne. 10 Wucikuru nikelo bende pigulok nusu hin ni girathiera mi pigulok, ni girathiera ma juwang’u ku mac, ma ng’wice ng’ar* ni Yehova. 11 Eno tie gin ma jubitimo pi thwon dhiang’man, kadi kubang’ nyog urombo, kadi ke kubang’ nyathi nyog urombo, kunoke dielman. 12 Kadok wend lim ma wubethierone rukani de, eno gin ma wucikuru nitimo pi limman nimakere ku wendgi. 13 Eno tie ayi m’anyoli ceke mir Israel ucikere nikelo ko girathiera ma juwang’u ku mac ni piny ma ng’wice ng’ar* ni Yehova.

14 “‘Tek umondo moko ma bedo kudwu kunoke m’udaru galu i kindwu i kind dhanu m’utuk mwu ma tung’ tung’ ubemito miyo bende girathiera ma juwang’u ku mac ni piny ma ng’wice ng’ar* ni Yehova, ecikere nitimo tap calu ma wun de wutimo. 15 Wu ju ma wun’i cokiri man umondo ma bedo kudwu, ceke wubibedo ku cik ma rom. Ebibedo ni cik ma nja pi dhanu m’utuk mwu ceke. Umondo bibedo rom kudwu i wang’ Yehova. 16 Jubitiyo ku cik ma rom man telowic de ma rom mi pokolembe, piwu man pir umondo ma bedo kudwu.’”

17 Yehova umedere niyero ni Musa kumae: 18 “Wec ku Juisrael man iyer igi kumae: ‘Saa ma wubimondo i ng’om m’abeterowu i iye 19 man wucamu mukathi* moko m’i ng’ombe, wucikuru nimiyo ajok ni Yehova. 20 Wucikuru nimiyo ajok mi landu wi mwoka mi nying cam mwu ma juyongo ngo; wutede ni mukathi ma ngulu ngulu. Wubitero ajokne i ayi ma wutero ko ajok m’uai i lela mi fwodo cam. 21 Wucikuru nimiyo kum landu wi mwoka mi nying cam mwu moko ma juyongo ngo ni ajok ni Yehova, i kind dhanu m’utuk mwu ceke.

22 “‘Tek wukier man wuworo ngo lembe maeno ceke ma Yehova ung’olo nikadhu kud i bang’ Musa, 23 niwacu lembe ceke ma Yehova ung’olo iwu nikadhu kud i bang’ Musa, niai i nindo ma Yehova ung’ologi i iye cil pi dhanu m’utuk mwu ceke; 24 man tek etimere aka ngo, ma cokiri de ung’eyo ngo pire, e cokiri ceke ucikere nithiero nyathi thwon dhiang’ acel ni lam m’awang’a ma ng’wice ng’ar* ni Yehova, karacelo ku girathierane mi nying cam man girathierane mi pigulok nimakere ku cik ma nja, man nyathi diel acel ni lam mi dubo. 25 Jalam bitimo adunya pi cokiri ceke mi Juisrael man jubiweko igi, pilembe gitime aka ngo, man gikelo girathiera migi ni girathiera ma juwang’u ku mac ni Yehova, man lam migi mi dubo i wang’ Yehova pi kier migi. 26 E jubiweko ni cokiri ceke mi Juisrael man umondo ma bedo i kindgi, pilembe dhanune ceke gitime aka ngo.

27 “‘Tek ng’atu* moko udubo aka ngo, ecikere nitero vong’ diel ma oro pare ukadhu ngo acel pi lam mi dubo. 28 Man jalam bitimo adunya pi ng’atu* m’udubo aka ngone i wang’ Yehova, pi nitimo adunya pi kierne, e jubiweko ire. 29 Pir anyoli mir Israel man pir umondo ma bedo i kindgi, jubitiyo ku cik ma rom piwu i lembe moko m’utimere aka ngo.

30 “‘Ento tek ng’atu* moko utimo lembe moko akakaka, dok ebed anyoli kadi umondo, eca nwang’u ebeyero lembacidi iwi Yehova, man jucikiri nikabe* cen kud i kind juthugi. 31 Calu ecayu lembe ma Yehova uyero man eturo lembang’ola pare, jucikiri nikabu ng’atune* andha. Kier pare n’i wiye.’”

32 Kinde ma Juisrael gibino i langa, ginwang’u jalwo moko ubemwodo yen i ceng’ Sabatu. 33 Ju m’uwok unwang’u ebemwodo yende gitere i bang’ Musa gikud Arun man cokiri ceke. 34 Jutwiyo bang’e pilembe nwang’u fodi gin m’ukwayu jutim i kume ung’eyere ngo cuu.

35 Yehova ugam uyero ni Musa kumae: “Jucikiri ninego ng’atune andha, man cokiri ceke ucikere nicanye ku kidi woko i ng’ey kagonjo.” 36 Pieno cokiri ceke uwodhe woko i ng’ey kagonjo, man gicanye ku kidi wang’ m’etho, tap calu ma Yehova ung’olo ni Musa.

37 Yehova udog uyero ni Musa kumae: 38 “Wec ku Juisrael man iyer igi nia, i kind dhanu m’utuk migi ceke, giyik dhu tiend kendi migi ubed yasa yasa, man giketh thol mi ble* i dhu tiend kendi ma giyiko yasa yasane. 39 ‘Wucikuru niyiko dhu tiend kendi mwu yasa yasa kumeno, kara wubed wunene man wupoy i kum lembang’ola ceke pa Yehova, man wuworgi. Kud wulub tok adundewu giwu kadi weng’wu m’ubeterowu i asara mi thenge mi tipo. 40 Eno bikonyowu kara wupoy i kum lembang’ola para ceke. E wubiworogi man wubibedo leng’ ni Mungu mwu. 41 An a Yehova Mungu mwu m’uwodhowu kud i ng’om mi Misiri, kara anyuthara gira nia an a Mungu mwu. An a Yehova Mungu mwu.’”

16 I ng’eye, Kora ma wod Izhar, ma wod Kohath, ma wod Lawi giai malu karacelo ku Dathan man Abiram ma wot Eliab, man On ma wod Peleth, ma gin ceke gi wot Ruben. 2 Giai i kum Musa karacelo ku jumaco dak ario pier abic ma gi Juisrael, ma gi judongo ma wijo mi cokiri, ju ma julondo kud i cokiri man jumaco ma pigi yik. 3 Pieno gicokiri karacelo i dhu Musa gikud Arun man giwacu igi kumae: “Wadaru ol kudwu! Cokiri e ceke tie leng’, gin pet, man Yehova n’i kindgi. Dong’ pirang’o ke wubedoduru giwu iwi cokiri pa Yehova?”

4 Saa ma Musa uwinjo lembuno, e wang’ acel epodho arieba wang’e i ng’om. 5 I ng’eye ewacu ni Kora ku dhanu m’ubecwake kumae: “Urwo kugweno, Yehova biketho jubing’eyo nia ng’a ma pare, ng’a m’utie leng’, man ng’a m’ucikere nicoro i vute. E ng’atu m’ebing’iyo re ma bicoro i vute. 6 Wutim gin ma e: Kora wuku dhanu ceke m’ubecweki, wuting’ tabu mi mac, 7 wuketh mac i igi man wuketh udok ma ng’wice ng’ar i wigi i wang’ Yehova urwo; man ng’atu ma Yehova bing’iyo nwang’u en re m’e leng’. Wu wot Lawi wudaru kadhu mupaka!”

8 I ng’eye Musa yero ni Kora kumae: “Akwayu wukewinji, wu wot Lawi. 9 Nyo wubeneno ni lembe ma nyanok magwei, ya Mungu mir Israel ukoyowu kud i kind cokiri mir Israel, man eweko wucor i vute pi nitimo tic i hema mi thier pa Yehova, man nicungo i wang’ cokiri pi nitimo igi, 10 man ekelowu ceng’ini kude karacelo kud umego mwu ceke ma gi wot Lawi? Nyo wumito wumay bende tic mi lamulami? 11 Pi thelembe maeno, in karacelo ku dhanu ceke m’ubecweki m’ucokiri karacelo, wun’i dhu Yehova. Arun ke tie ng’a ma nia wung’ur i kume?”

12 I ng’eye, Musa uoro jucidh julwong’ Dathan gikud Abiram ma gi wot Eliab, ento gidwoko kumae: “Wabino ngo! 13 Wodh m’iwodho kowa kud i ng’om ma molo cak ku miyokic pi nibino negowa i langa ubenen i weng’i ni gin ma nyanok magwei? Nyo kawoni ibemito ikethiri bende ni jabim i wiwa nikadhu mukero?* 14 M’umedo maeno, iterowa de ngo i ng’om moko ma molo cak ku miyokic, kadi giralaga mi podho man podho mir ulok de imiyo ngo iwa. Nyo imito iloy wang’ dhanu maeni? Wabino ngo!”

15 E ng’eicwiny umaku Musa lee mandha man eyero ni Yehova kumae: “Kud ilokiri pi nineno girathiera migi mi nying cam. Amayu ngo kana migi kadok acel de, kadi atima de atimo ngo ng’atu moko acel m’i kindgi rac.”

16 I ng’eye Musa uyero ni Kora kumae: “Bin urwo karacelo ku dhanu ceke m’ubecweki i wang’ Yehova, in, gin man Arun. 17 Ng’atuman ucikere niting’o tabu pare mi mac man niketho udok ma ng’wice ng’ar i wiye, man ng’atuman bibino ku tabu pare mi mac i wang’ Yehova, tabu dak ario pier abic mi mac, karacelo kudi man Arun, ng’atuman ku tabu pare mi mac.” 18 E ng’atuman m’i kindgi uting’o tabu pare mi mac, giketho mac kud udok ma ng’wice ng’ar i wigi, man gicungo i dhu kamondo mi hema mi rombo, karacelo ku Musa man Arun. 19 Saa ma Kora ucoko ju m’ubecwake i dhoggi, i dhu kamondo mi hema mi rombo, dwong’ pa Yehova unyuthere ni cokiri ceke.

20 Yehova ugam uyero ni Musa gikud Arun kumae: 21 “Wukoyuru cen kud i kind ungu maeni, kara anyothgi wang’ acel.” 22 E wang’ acel gipodho arieba wang’gi i ng’om, man giwacu kumae: “E Mungu, Mungu ma miyo kwo ni dhanu ceke,* nyo dubo pa ng’atu acel biketho ng’eicwiny bimeki i kum cokiri ceke?”

23 Yehova ugam uyero ni Musa kumae: 24 “Wec ku cokiri, man iwac igi kumae: ‘Wuai cen kud i ng’et hema pa Kora, Dathan, man Abiram!’”

25 I ng’eye Musa uai malu man ecidho i bang’ Dathan gikud Abiram, man judongo mir Israel de gicidho karacelo kude. 26 Ewacu ni cokiri kumae: “Akwayuwu, wucor cen kud i ng’et hema mi dhanu ma reco maeni, man kud wumul kum piny migi moko ci, jubimaru nyothowu i dubo migi ceke.” 27 E ndhu ndhu gicoro cen kud i kum hema pa Kora, Dathan, man Abiram, kud i ng’ete ceke. Man Dathan gikud Abiram giwok, gicungo i kamondo mi hema migi karacelo ku mon migi, wotgi, man awiya migi ma thindho.

28 E Musa uwacu kumae: “Nikum lembuni, wubing’eyo nia Yehova re m’uora nitimo gin maeni ceke, man nia etie lembe m’uai i adundena gira ngo:* 29 Tek dhanu maeni githo calu ma dhanu ceke tho ko, man tek matira migi rom ku matira mi dhanu ceke, nwang’u Yehova uora en ungo. 30 Ento tek Yehova utimo lembe moko mir udu kugi, man ng’om uyabu dhoge umwonyogi ku piny migi ceke man giloro ma kwo i Liel,* e wubing’eyo andha nia dhanu maeni giworo ngo Yehova.”

31 E ndhu ndhu kinde m’edaru wec maeno ceke, ng’om m’i thegi ukak dra. 32 Man ng’om uyabu dhoge, emwonyogi ku juruot migi ceke, man ju pa Kora ceke ku piny migi pet. 33 E gin karacelo ku dhanu migi ceke giloro ma kwo i Liel* man ng’om uumo wigi, e girwinyo kud i kind cokiri. 34 Juisrael ceke ma gibino i ng’etgi giringo kinde ma giwinjo nduru migi, ma gibewacu kumae: “Lworo ubenegowa nia ng’om bimwonyo wan bende!” 35 I ng’eye mac uai i bang’ Yehova man uwang’u ruk, jumaco dak ario pier abic ma gibino thiero udok ma ng’wice ng’ar.

36 Yehova ugam uyero ni Musa kumae: 37 “Yer ni Eleazar ma wod Arun ma jalam nia ecok tabu mi mac kud i mac, kum gitie piny ma leng’. Wac ire bende nia eoy mac m’i igi bor. 38 Jucikiri nifwodo tabu mi mac mi ju m’udubo, uketho kwo migi urwinyo,* udok ni ban ma dhoge rebe rebe mandha pi niumo kum pemlam, pilembe gikelogi i wang’ Yehova man tabune udoko leng’. Gibibedo ni giranyutha ni Juisrael.” 39 Pieno Eleazar ma jalam ucoko tabu mi mac mi mola, ma ju ma mac uwang’u gikelo, man efwodogi pi niumo kum pemlam, 40 tap calu ma Yehova uyero ire nikadhu kud i bang’ Musa. Ebino ni poyowic ni Juisrael nia ng’atu m’umbe ku rusa,* m’utie ngo nyakwar Arun ucikere ngo nicoro pi niwang’u udok ma ng’wice ng’ar i wang’ Yehova, man nia ng’atu moko kud udok ve Kora ku jucwak pare.

41 Urwonde ndhu ndhu, cokiri ceke mir Israel ucaku ng’ur i kum Musa gikud Arun, ma gibewacu ko kumae: “Wunego dhanu pa Yehova wun ario eni.” 42 Kinde ma cokiri ucokere karacelo i kum Musa gikud Arun, giloko wang’gi yor i bang’ hema mi rombo man gineno afuru uume, man dwong’ pa Yehova ucaku nen.

43 Musa gikud Arun gicidho i wang’ hema mi rombo, 44 man Yehova wacu ni Musa kumae: 45 “Wukoyuru cen kud i kind cokiri maeni kara anyothgi wang’ acel, e gipodho arieba wang’gi i ng’om. 46 I ng’eye Musa wacu ni Arun kumae: “Ting’ tabu mi mac, keth mac m’uai i pemlam i iye man iketh udok ma ng’wice ng’ar i wiye, e icidh pio i bang’ cokiri man itim adunya pigi, kum kwinyo uwok kud i bang’ Yehova man thong’om umaku benego dhanu!” 47 Arun uting’e wang’ acel tap calu ma Musa uyero, man eringo i kind cokiri, man nen! thong’om udaru caku i kind dhanu. E eketho udok ma ng’wice ng’ar iwi tabu mi mac man ecaku timo adunya pi dhanu. 48 Ecungo asu i kind avu ku ju ma kwo, e gocone gam ujik. 49 Ju ma gocone nego m’uweko ju m’utho pi lembe pa Kora ubino elufu apar ang’wen ku dak abiro (14 700). 50 Tokcenne saa m’Arun udwogo i bang’ Musa i dhu kamondo mi hema mi rombo, nwang’u dong’ gocone jik.

17 Yehova uyero ni Musa kumae: 2 “Wec ku Juisrael, man igam kud i bang’gi, uluth acel acel kud i thepacuman, kud i bang’ jadit ma wijo mi thepacuman, i zoo uluth apar ario. Kiew nying’ ng’atuman i kum uluth pare. 3 Kiew nying Arun i kum uluth pa Lawi, pilembe uluth utie acel kende pi jatelwic mi thepacuman. 4 Keth uluthnegi i hema mi rombo i wang’ Lembatuca, kaka m’abed anyuthara iri i iye thiri thiri. 5 Man uluth pa ng’atu m’abing’iyo biloth, e abijigo ng’ur ma Juisrael gibeng’ur ko i kuma, man ma gibeng’ur ko i kumwu bende.”

6 E Musa uweco ku Juisrael, man judongo ma wijo migi ceke gimiyo uluth i bang’e, uluth acel acel kubang’ jadit mi thepacuman, uluth apar ario; man uluth p’Arun de ubino i kind uluth migi. 7 I ng’eye Musa uketho uluthnegi i wang’ Yehova, i hema mi Lembatuca.

8 Urwonde saa ma Musa umondo i hema mi Lembatuca, nen! uluth p’Arun ma pi ot pa Lawi uloth, man ebino medere niloth, nithiwo, man nicego nying amand. 9 E Musa uwodho uluthne ceke kud i wang’ Yehova, man eterogi i bang’ dhanu ceke mir Israel. Ginenogi, man ng’atuman ugamu uluth pare.

10 I ng’eye Yehova uyero ni Musa kumae: “Dwok uluth p’Arun i wang’ Lembatuca ni piny ma jugwoko kara ebed ni giranyutha ni jujai, wek kara ng’ur ma gibeng’ur ko i kuma ujiki, man kara kud githo.” 11 E Musa utimo ndhu ndhu tap calu ma Yehova ung’olo ire, etimo tap kumeca.

12 E Juisrael giwacu ni Musa kumae: “Kawoni wabitho; jubinyothowa andha, wan ceke jubecinyothowa. 13 Ng’atu moko ci ma bicoro ceng’ini i vut hema mi thier pa Yehova bitho! Nyo umaku wan ceke watho ndhu i ayi maeno?”

18 Yehova ugam uwacu ni Arun kumae: “In, woti, man thepacu pewu, wubicungo i dhu kosa moko ci m’utimere i kum kabedo ma leng’, man in ku woti, wubicungo i dhu kosa moko ci m’utimere i kum tic mwu mi lamulam. 2 Kel bende umego peri mi suru pa Lawi, niwacu suru pa kwarumiri ceng’ini, kara gidikiri kudi man gitim iri man ni woti i wang’ hema mi Lembatuca. 3 Gicikiri nitimo tic migi iri man pi hema zoo, ento kud gicor ceng’ini i kum ajeni mi kabedo ma leng’ man pemlam, kara kud githo, kadi wun bende. 4 Gibidikiri kudi man gibitimo tic migi m’ugwaku kum hema mi rombo ku tic ceke mi hema, man ng’atu m’umbe ku rusa* copo coro ngo ceng’ini kudwu. 5 Wucikuru nitimo tic ma juketho i korwu pi kabedo ma leng’ man pemlam, kara ng’eicwiny mange kud uwok i kum dhanu mir Israel. 6 An gira ating’o umego mwu ma gi Julawi kud i kind Juisrael ni giramiya iwu. Jumiyogi ni Yehova kara gitim tic mi hema mi rombo. 7 Tic mwu mi lamulam m’ugwaku kum pemlam man piny ma n’i ng’ey ridho n’i kori man woti. Man wucikuru nitimo tije. Amiyo tic mi lamulam ni giramiya iwu, man ka ng’atu moko ci m’umbe ku rusa* ucoro ceng’ini, jucikiri ninege cen.”

8 Yehova uwacu bende ni Arun kumae: “An gira aketho inen wi ajok ma jujoko ira. Amiyo kum piny ceke ma leng’ ma Juisrael gijoko ubed iri man ni woti ni makapiny ma nja. 9 Piny ma e m’uai kud i girathiera ma leng’ m’usagu ma juwang’u ku mac bibedo peri: girathiera ceke ma gimiyo, m’uketho i iye girathiera migi mi nying cam, lam migi mi dubo, man girathiera migi mi kier ma gikelo ira. Etie piny ma leng’ m’usagu iri man ni woti. 10 Icikiri nicame i kabedo ma leng’ m’usagu; jumaco ceke copo came. Ebibedo piny ma leng’ iri. 11 Ma e bende bibedo iri: giramiya ma gijoko man girathiera m’aleka ceke mi Juisrael. Amiyogi iri, ni woti, man ni nyigi ni makapiny ma nja. Ng’atu moko ci ma leng’ m’i ot peri copo came.

12 “Mo ceke ma beco, pigulok ceke ma beco ma nyen, man nying cam, niwacu landu wi mwoka migi ma gikelo ni Yehova, amiyogi iri. 13 Landu wi mwoka mi nying cam moko ci m’uai i ng’om migi ma gikelo ni Yehova, bibedo peri. Ng’atu moko ci ma leng’ m’i ot peri copo came.

14 “Piny moko ci ma judaru thiero* i Israel bibedo peri.

15 “Kayu mi piny ceke ma kwo* ma gibikelo ni Yehova, dok ebed dhanu kadi lei bidoko peri. Ento icikiri niwaru kayu mi dhanu kokoro mandha, man kayu mi lei m’ucido de icikiri niwaru. 16 Icikiri niware i bei mi jamgony ka dwi pare ucaku niai i acel niidho malu, calku valer ma jung’olo mi cekel* abic mi mola ma tar, nimakere ku cekel mi kabedo ma leng’.* Etie gera* pier ario. 17 Kayu mi thwon dhiang’ kadi kayu mi nyog urombo kunoke kayu mi diel kende re ma kud iwar. Gitie piny ma leng’. Icikiri nikiro rimbgi iwi pemlam, man iwang’ miyo migi uduny ni girathiera ma juwang’u ku mac ni piny ma ng’wice ng’ar* ni Yehova. 18 Ring’gi bibedo peri. Calu dhu kor mi girathiera m’aleka man calu bamb ma yor acwic, ebibedo peri. 19 Amiyo ajok ma leng’ ceke ma Juisrael gijoko ni Yehova iri, ni woti, man ni nyigi ni makapiny ma nja. Etie lembariba ma nja mi kadu* i wang’ Yehova piri man pi nyikweyi.”

20 Yehova umedere niyero ni Arun kumae: “Ibibedo mbe ku giralaga i ng’om migi, man ibibedo mbe ku theng ng’om i kindgi. An re m’atie makapiny peri man giralaga peri i kind Juisrael.

21 “Nen, amiyo apaje ceke mir Israel ni wot Lawi, ni giralaga kawang’ tic ma gibetimo, niwacu tic mi hema mi rombo. 22 Dhanu mir Israel romo coro ngo dong’ kendo i kum hema mi rombo, gimaru dubo man gimaru tho. 23 Julawi gibitimo gin gigi tic mi hema mi rombo, man gin re ma gibicungo i dhu kier migi. Etie cik ma nja i kind dhanu m’utuk mwu ceke nia gibinwang’u ngo giralaga i kind Juisrael. 24 Kum amiyo apaje ma dhanu mir Israel gijoko ubed ni giralaga ni Julawi, apaje ma gibijoko ni Yehova. Eno re m’uketho ayero igi kumae: ‘Gibinwang’u ngo giralaga i kind Juisrael.’”

25 I ng’eye Yehova yero ni Musa kumae: 26 “Yer ni Julawi kumae: ‘Wubinwang’u niai kud i bang’ Juisrael, apaje m’amiyo iwu niai kud i bang’gi ni giralaga mwu. Man wucikuru nimiyo kud i kum apajene, apaje ni ajok ni Yehova. 27 E jubikwane ni ajok mwu calu nying cam m’uai kud i lela mi fwodo cam, kunoke piny ma bik m’uai i vur mi biyo pigulok, kadi i vur mi biyo mo. 28 I ayi maeno, wubimiyo bende ajok ni Yehova kud i kum apaje ceke ma wunwang’u niai kud i bang’ Juisrael. Man kud i kumgi eno re ma wubimiyo ajok pa Yehova i bang’ Arun ma jalam. 29 Wubimiyo kwond ajok ceke ni Yehova niai kud i giramiya mwu ma beco ceke ma jumiyo iwu ni piny ma leng’.’

30 “Man icikiri niyero igi kumae: ‘Tekene wujoko piny ma beco beconegi, Julawi gibinene ni piny ma beco m’uai i lela mi fwodo cam, man ni piny m’uai i vur mi biyo pigulok, kunoke i vur mi biyo mo. 31 Wun ku juruot mwu wuromo came kaka moko ci, pilembe etie cul mwu pi tic ma wubetimo i hema mi rombo. 32 Wubiyeyo ngo dubo i lembuni tek wubemeduru nimiyo ajok mi piny ma beco m’uai kud i bang’gi, man kud wucid piny ma leng’ mi Juisrael, wumaru tho.’”

19 Yehova uweco kendo i bang’ Musa gikud Arun, ewacu kumae: 2 “Maeni tie lembang’ola mi cik ma Yehova umiyo: ‘Yer ni Juisrael nia gicikiri nigamu iri dhiang’ acel mi rangi ma kwar ma mulima mbe i kume, man ma fodi juketho ngo mberembere i ng’ute. 3 Wubimiye i bang’ Eleazar ma jalam. Ebitere woko i ng’ey kagonjo man jubithume i wang’e. 4 I ng’eye, Eleazar ma jalam bigamu kum rimbe moko ku lwete, man ebikiro rimone wang’ abiro, atira yor i wang’ hema mi rombo. 5 Jubiwang’u dhiang’ne i wang’e. Jubiwang’u adilane, ringe, rimbe, karacelo ku weyne. 6 Man jalam bigamu yend tido, hizop, man wuzi ma kwar ngbo, man ebibologi i mac, kaka ma jubewang’u i iye dhiang’ne. 7 I ng’eye jalam bilwoko kendi pare man ebijom,* man yo ng’ey maeno eromo dwogo i kagonjo. Ento jalamne bibedo m’ecido nitundo uthieno.

8 “‘Ng’atu m’uwang’u dhiang’ne bilwoko kendi pare ku pii man ebijom, e ebibedo m’ecido nitundo uthieno.

9 “‘Ng’atu ma leng’ bicoko vuru dhiang’ne man ebikethogi woko i ng’ey kagonjo, i kabedo ma leng’. Man cokiri mir Israel bigwoko vurune pi niyiko pii ma jubitiyo ko pi dwokirileng’. Etie lam mi dubo. 10 Ng’atu m’ucoko vuru mi dhiang’ne bilwoko kendi pare man ebibedo m’ecido nitundo uthieno.

“‘Maeni bibedo cik ma nja ni Juisrael man ni umondo ma bedo i kindgi. 11 Ng’atu moko ci m’umulo kum avuj dhanu* bibedo m’ecido pi nindo abiro. 12 Ng’atune ucikere nidwokere leng’ ku pige i nindo mir adege, man i nindo mir abirone, ebidoko leng’. Ento tek edwokere ngo leng’ i nindo mir adege, e i nindo mir abirone ebibedo leng’ ungo. 13 Ng’atu moko ci m’umulo kum avuj dhanu* man m’udwokere ngo leng’, ucido hema mi thier pa Yehova, man jucikiri nikabu* ng’atune* cen kud i Israel. Calu ma jukiro ngo pii mi dwokirileng’ i kume, ebibedo asu m’ecido. Cilo pare bibedo asu i wiye.

14 “‘Maeni tie cik ma jubitiyo ko kinde ma ng’atu moko utho i hema: Ng’atu moko ci m’umondo i hemane man ng’atu moko ci ma nwang’u ubino i hemane bibedo m’ecido pi nindo abiro. 15 Jam ketho piny moko ci ma wiye thwolo, ma jutwiyo ngo wiye ku jam umo i wiye, utie gin m’ucido. 16 Ng’atu moko ci ma n’i lum m’umulo kum ng’atu ma junego ku palamularu, kunoke kum avu kadi cogo dhanu, kunoke liel, bibedo m’ecido pi nindo abiro. 17 Pi ng’atu m’ucidone, jubigamu kum vuru mi lam mi dubo ma juwang’u, man jubikonjo pii m’umol iwi vurune i agulu. 18 I ng’eye, ng’atu ma leng’ bigamu hizop, ebiroye i pige man ebikire i kum hema, i kum ajeni ceke, man i kum dhanu* m’ubino keca, man i kum ng’atu m’umulo kum cogo kunoke ng’atu ma junego, kadi ke avu kunoke liel. 19 Ng’atu ma leng’ne bikire i kum ng’atu m’ucido i nindo mir adege man i nindo mir abirone, e ebidwoke leng’ nikum dubo i nindo mir abirone. I ng’eye, ng’atu m’ucidone bilwoko kendi pare man ebijom; e ebidoko leng’ ku dhug uthieno.

20 “‘Ento tek ng’atu moko ucido man edwokere ngo leng’, jucikiri nikabu* ng’atune* cen kud i cokiri, pilembe ecido kabedo ma leng’ pa Yehova. Jukiro ngo pii mi dwokirileng’ i kume, pieno ecido.

21 “‘Maeni bibedo ni cik ma nja igi: Ng’atu m’ubekiro pii mi dwokirileng’ ucikere nilwoko kendi pare, man ng’atu m’umulo kum pii mi dwokirileng’ bibedo m’ecido nitundo uthieno. 22 Piny moko ci ma ng’atu m’ucido umulo kume bidoko ni gin m’ucido, man ng’atu* m’umulo kum pinje bibedo m’ecido nitundo uthieno.’”

20 I dwi ma kwong’a, cokiri ceke mi Juisrael utundo i langa mi Zin, man dhanune caku bedo i Kadec. Miriam uwok utho keca, man jukunye de keca.

2 Ento pii bino mbe ni cokirine, pieno gicokiri karacelo iwi Musa gikud Arun. 3 Dhanune gicaku dhaw iwi Musa ma gibewacu kumae: “Ka nwang’u watho cen saa m’umego mwa githo i wang’ Yehova ca de nwang’u ber! 4 Pirang’o wukelo cokiri pa Yehova i langa maeni, kara wan kud udul lim mwa wabin watho keni? 5 Man pirang’o wuwodhowa kud i Misiri pi nikelowa i kabedo ma rac maeni? Etie ngo kaka ma juromo pidho i iye kodhi, ulam, ulok, man ulemo, kadi pii m’amadha de mbe.” 6 E Musa gikud Arun gibino i wang’ cokiri i dhu kamondo mi hema mi rombo, man gipodho arieba wang’gi i ng’om, man dwong’ pa Yehova ucaku nyuthere igi.

7 I ng’eye Yehova uyero ni Musa kumae: 8 “Ting’ uluth, man ilwong’ cokiri ceke karacelo, in wukud Arun m’umeru, man wuwec ni cana i wang’gi kara ewodh pige, man ibiwodho igi pii kud i canane, man ibimiyo ni cokiri kud udul lim migi umadhi.”

9 Pieno Musa uting’o uluth kud i wang’ Yehova, tap calu m’eng’olo ire. 10 I ng’eye Musa gikud Arun gicoko dhu cokiri i wang’ cana, man ewacu igi kumae: “Wuwinji kawoni, wu jujai! Nyo ukwayu wawodh iwu pii kud i cana maeni?” 11 E Musa uting’o cinge malu man egoyo cana wang’ ario kud uluth pare. Man pii ucaku thwogere, e cokiri kud udul lim migi gikwong’o madhu.

12 I ng’ey kare, Yehova uyero ni Musa gikud Arun kumae: “Calu wuyiya ngo man wudwoka ngo leng’ i wang’ dhanu mir Israel, wubitero ngo cokiri maeni i ng’om m’abimiyo igi.” 13 Eno tie pii mi Meriba,* kaka ma Juisrael gidhaw i iye iwi Yehova, uketho edwokere leng’ i kindgi.

14 I ng’eye, Musa uoro jukwenda niai kud i Kadec gicidh giyer ni ubimo mir Edom kumae: “Maeni gin ma Israel m’umeru uyero: ‘Ing’eyo ma ber peko ceke ma wanwang’ara ko. 15 Kwaruwa gicidho i Misiri man wabedo i Misiri pi oro* dupa, man Jumisiri gisendowa ku kwaruwa bende. 16 Tokcenne, wawak i bang’ Yehova, man ewinjowa, e eoro malaika uwodhowa kud i Misiri, man kawoni wan’i Kadec ma tie adhura ma n’i dhu mupaka mi ng’om peri. 17 Dong’ wakweyi, wek wakadh kud i die ng’om peri. Wabikadhu ngo kud i die podho kadi podho mir ulok, man wabimadhu ngo pii mi kulo m’atong’a moko ci. Wabiwotho kud i Ndaki p’ubimo, m’umbe niwiro yor acwic kadi yor acam, nitundo ma wabikadhu ko kud i ng’om peri.’”

18 Ento Edom udwoko ire kumae: “Icopo kadhu ngo kud i die ng’om mwa. Tek itemo, abiwok i kumi ku palamularu.” 19 Juisrael gidwoko ire kumae: “Wabiidho kud i ndaki ma dit, man tek wan kud udul lim mwa wamadhu pii peri, wabiculo pire. Wamito ndhu wakadh akadha ku tiendwa, gin mange ngo.” 20 Re asu edwoko kumae: “Icopo kadhu ngo.” E Edom uwok woko pi nirombo kude, ku dhanu dupa man udul mony* ma tek. 21 Pieno Edom ukwero Israel kud ukadh kud i ng’om pare, e Israel ugam uloko kud i bang’e.

22 Dhanu mir Israel, niwacu cokiri ceke ugam utugo woth kud i Kadec, man gitundo i kum Got Hor. 23 I ng’eye, Yehova uyero ni Musa gikud Arun iwi Got Hor ma n’i yor i dhu kieu mi ng’om pa Edom kumae: 24 “Jubecicoko Arun karacelo ku dhanu pare.* Ebimondo ngo i ng’om m’abimiyo ni Juisrael, pilembe wun ario zoo wujai i kum lembe m’ang’olo pi pii mi Meriba. 25 Gam Arun ku wode ma Eleazar, man itergi iwi Got Hor. 26 Wodh kendi p’Arun, ironygi i kum Eleazar ma wode, man Arun bitho keca.”*

27 Pieno Musa utimo tap calu ma Yehova ung’olo, man giidho iwi Got Hor i wang’ cokiri ceke. 28 E Musa uwodho kendi p’Arun, man eronyogi i kum Eleazar ma wode. I ng’ey maeno, Arun utho keca i die wi got, man Musa gikud Eleazar giloro kud iwi got. 29 Saa ma cokiri uneno nia Arun utho, udi mir Israel pet uwagu Arun pi nindo pier adek.

21 Kinde m’ubimo mir Arad ma Jakanan m’ubed ubedo i Negeb uwinjo nia Israel ubino kud i yo mir Atharim, eloy iwi Israel man emaku jumoko m’i kindgi ni ng’eca. 2 E Israel ukwong’o kwong’ ni Yehova kumae: “Tek imiyo dhanu maeni i cinga, abinyotho adhura migi andha.” 3 Pieno Yehova uwinjo dwand Israel man emiyo Jukanan igi, e ginyothogi kud adhura migi zoo, uketho gicaku nying’ kabedone Horma.*

4 Kinde ma gibemediri ku woth migi niai kud i kum Got Hor kud i yo mi Nam ma kwar pi nidhoko ng’om mir Edom, dhanu* ugam uol ku wothne. 5 Man dhanu umediri niweco rac i kum Mungu man i kum Musa, ma gibeyero kumae: “Pirang’o wuwodhowa kud i Misiri kara wabin watho i langa? Cam ku pii de mbe, man mukathi ma rac maeni de udaru duyo cwinywa.”* 6 Pieno Yehova ucoro thwol ma jukwir* iwi dhanu, man gicaku tong’o dhanu, uketho Juisrael dupa githo.

7 Pieno dhanu ubino i bang’ Musa man giwacu kumae: “Wadaru dubo, kum waweco rac i kum Yehova man i kumi. Kway Yehova kara ekab thwol kud i bang’wa.” E Musa ukwayu pi dhanune. 8 Yehova ugam uwacu ni Musa kumae: “Yik ayi pa thwol ma jukwir* man dhoke i kum yen moko ma bor. E kinde ma thwol utong’o ng’atu moko, bikwayu enen bang’ thwolne kara ebed kwo.” 9 E wang’ acel Musa ugam uyiko thwol mi mola man edhoke i kum yen ma bor; saa ma ka thwol utong’o ng’atu moko man tek eneno bang’ thwol mi molane ci, e eboth.

10 I ng’ey maeno, Juisrael gitugo woth man giwok gigonjo i Oboth. 11 Gidog gitugo woth kud i Oboth man giwok gigonjo i Iye-abarim, i langa ma n’i wang’ Moab yo nyangu. 12 Ku keca gitugo woth man giwok gigonjo ceng’ini ku Poga* mi Zered. 13 Niai ku keca gitugo woth man giwok gigonjo i ng’om mir Arnon, ma tie i langa m’ubembo niai i mupaka mi Juamor, kum Arnon utie kieu mi Moab, i kind Moab ku Juamor. 14 Pi thelembe maeno re ma buku mi Lwiny pa Yehova uweco pi “Vaheb i Sufa man poga* mir Arnon, 15 man kaloro mi* poga* m’ubembo yor i bang’ pacu mi Ar man m’ucidho nitundo i kum kieu mi Moab.”

16 I ng’eye, gicidho nitundo i Ber. Eno tie pii m’atong’a ma Yehova uwacu pire ni Musa kumae: “Cok dhu dhanu kara amii igi pii.”

17 I saa maeno, Israel uwero wer ma e:

“Dhenyini, E pii m’atong’a!—Wugam dhoge!*

I ng’eye, giai kud i langa gicidho nitundo i Matana, 19 niai kud i Matana gicidho i Nahaliel, man niai kud i Nahaliel gicidho i Bamoth. 20 Giai kud i Bamoth gicidho i poga ma n’i ng’om* mi Moab i die wi Pisga m’ubeneno wi Yecimon.*

21 Israel ugam uoro jukwenda i bang’ Sihon m’ubimo mi Juamor, eyero kumae: 22 “Wek wakadh kud i die ng’om peri. Wabiwiro ngo i die podho kadi i die podho mir ulok. Man wabimadhu ngo pii mi kulo m’atong’a moko ci. Wabiwotho kud i Ndaki p’ubimo nitundo ma wabikadhu ko kud i ng’om peri.” 23 Ento Sihon uyiyo ngo Israel ukadh kud i ng’om pare. Elund ecoko dhanu pare ceke man ewok i dhu Israel i langa, ebino i Yahaz man ecaku kiedo i dhu Israel. 24 Ento Israel ugoye ku palamularu man emaku ng’om pare niai i Arnon nitundo i Yabok, ceng’ini ku Juamon, pilembe Yazer n’i kieu mi ng’om mi Juamon.

25 Pieno Israel umaku adhura maeno ceke, man gicaku bedo i adhura ceke mi Juamor, i Hecbon man i nyithindh adhura ceke m’i ng’ete. 26 Kum Hecbon ubino adhura pa Sihon m’ubimo mi Juamor, m’ugam ukiedo i dhug ubimo mi Moab man umayu ng’om pare ceke kud i bang’e nitundo bir i Arnon. 27 Eno re m’uwodho lembabola mir anywar ma e:

“Wubin i Hecbon.

Wek jugier adhura pa Sihon man ecung ma tek.

28 Kum mac uwok kud i Hecbon, lebmac uai kud i adhura pa Sihon.

Ewang’u Ar mi Moab, rwodhi mi kabedo ma malu mir Arnon.

29 Can i wii, Moab! Jubinyothi, E dhanu pa Kemoc!

Eketho wote udoko ni uring ng’wec man nyige ni ng’eca pa Sihon m’ubimo mi Juamor.

31 E Israel ucaku bedo i ng’om mi Juamor. 32 I ng’eye, Musa uoro jumaco moko ucidh ulib Yazer. Giwok gimaku nyithindh adhura m’i ng’ete man giriemo Juamor m’ubino keca. 33 I ng’eye giwiro man giidho kud i Yo mi Bacan. Man Og m’ubimo mi Bacan uwok ku dhanu pare ceke pi nirombo kugi i lwiny i Edrei. 34 E Yehova ugam uyero ni Musa kumae: “Lworo kud unegi i kume, pilembe abimiye i cingi ku dhanu pare ceke man ng’om pare; ibitimo i kume tap gin m’itimo i kum Sihon m’ubimo mi Juamor m’ubed ukwo i Hecbon.” 35 Pieno, gimediri nigoye karacelo ku wote man dhanu pare ceke, nitundo ma ng’atu acel de mbe m’udong’ kwo kud i kind dhanu pare, e gimaku ng’om pare.

22 I ng’eye, Juisrael gitugo woth man giwok gigonjo i pambu mi langa mi Moab, yo loka Yordan yor i wang’ Yeriko. 2 Nwang’u Balak ma wod Zipor uneno lembe ceke ma Israel utimo i kum Juamor, 3 man ndiri umaku Moab lee dit pi dhanune; pilembe wendgi ubino lee dit, eyo, Moab ucaku twoyo nikum lworo m’ubenege i kum Juisrael. 4 Pieno, Moab uyero ni judongo mi Midian kumae: “Kawoni cokiri maeni bimvoro piny ceke m’utiekowa, tap calu ma thwon dhiang’ mvoro ko lum mi thim.”

Balak ma wod Zipor re m’ubino ubimo mi Moab i rundi maeca. 5 E eoro jukwenda i bang’ Balam ma wod Beor i Pethor ma ni ceng’ini ku Kulo* mi ng’om thugi. Elwong’e m’ebeyero ire kumae: “Nen! dhanu moko uai i Misiri. Nen! giumo wang’ ng’om man gibedo dri i wang’a. 6 Dong’ akweyi, timba bin ilam ira dhanu maeni, kum gitek nisaga. Saa moko nyo aromo voyogi man ariemogi cen kud i ng’ombuni, kum ang’eyo ma ber nia mugisa kwanyu ng’atu m’imiyo ire mugisa man alam maku ng’atu m’ilamu.”

7 Pieno judongo mi Moab ku judongo mi Midian giwotho ku cul mi lamu bila i cing’gi man gicidho i bang’ Balam, e giwok gikoro ire lembe ma Balak uyero. 8 Egam edwoko igi kumae: “Wuvut diewor kakeni, man abinyutho iwu lembe ceke ma Yehova biyero ira.” E judongo ma wijo mi Moab gibedo i bang’ Balam.

9 I ng’eye, Mungu ubino i bang’ Balam man epenje kumae: “Eni jukani ma gin’i beng’i e?” 10 Balam udwoko ni Mungu mandha kumae: “Balak ma wod Zipor m’ubimo mi Moab uoro ira kwenda, eyero kumae: 11 ‘Nen! dhanu m’uai i Misiri uumo wang’ ng’om. Dong’ bin ilamgi ira. Saa moko nyo aromo kiedo i dhoggi man ariemogi cen.’” 12 Ento Mungu uwacu ni Balam kumae: “Kud icidh kugi. Kud ilam dhanune, kum gi jumugisa.”

13 Balam uai kugweno man ewacu ni judongo ma wijo pa Balak kumae: “Wudok i ng’om thu, kum Yehova ukwero ira nia kud acidh kudwu.” 14 E judongo ma wijo mi Moab gitugo woth man gidok i bang’ Balak, giwacu kumae: “Balam ukwero nibino kudwa.”

15 Ento Balak uoro kendo judongo ma wijo ma wendgi lee man ma dito migi de lee nisagu mir ungu ma kwong’a. 16 Gibino i bang’ Balam man giwacu ire kumae: “Balak ma wod Zipor uyero nia, ‘akweyi, kud iwek gin moko uceri ku bino i bang’a, 17 kum abiyungi lee mandha man abitimo piny moko ci m’ibiyero atim. Dong’ bin timba, man ilam ira dhanu maeni.’” 18 Balam ulund udwoko ni jutic pa Balak kumae: “Kadok nwang’u Balak umiyo ira ot pare ma mola ma tar ku mola ma kwar bik i iye de, aromo timo ngo gin moko ci m’ukoc ku gin ma Yehova Mungu para ung’olo, nik’ebed ma nok kunoke ma dit. 19 Ento akwayuwu, wukevut keni diewor maeni bende kara ang’ey lembe mange ma Yehova biyero ira.”

20 I ng’eye, Mungu ubino i bang’ Balam ku diewor man ewacu ire kumae: “Tek dhanu maeni ubino nilwong’i, cidh karacelo kugi. Ento ibiwoyero kende kende lembe m’abiyero iri nia iyer.” 21 Pieno Balam uai malu kugweno man etwiyo kabedo iwi kana* pare, e gicidho karacelo ku judongo ma wijo mi Moab.

22 Ento ng’eicwiny pa Mungu uopo pilembe ebecidho, man malaika pa Yehova ucungo i gengi pi nicere. Nwang’u Balam uberingo ku kana pare, man jutic pare ario ubino karacelo kude. 23 Kinde ma kana uneno malaika pa Yehova ucungo i gengi ku palamularu i cinge, eii niweko gengi pi niwiro i lum. Ento Balam ucaku fwodo kanane pi nitiro wiye edok i gengi. 24 I ng’eye, malaika pa Yehova ucidh ucungo i gengi ma liki liki i kind podho mir ulok ario, ma kidi utieko ng’ete kun ku kun ni gang’. 25 Kinde ma kana uneno malaika pa Yehova, ecaku diyere i kum gang’, man erido tiend Balam i kum gang’ne, e Balam ucaku goye kendo.

26 Malaika pa Yehova ugam ukadhu kendo man ecidh ecungo i kaka ma liki liki ma yore mi wiro yor acwic kadi yor acam de mbe. 27 Kinde ma kanane uneno malaika pa Yehova, evuto piny i the Balam, e kwinyo umaku Balam man ecaku fwodo kanane kud uluth pare. 28 Kpe ci Yehova uketho kana uweco,* man uwacu ni Balam kumae: “Re atimo iri girang’o m’uketho igoya wang’ adek maeni zoo?” 29 Balam udwoko ni kana kumae: “Utie pilembe icaya. Ka nwang’u atie ku palamularu i cinga kae, nwang’u anegi cen!” 30 E kana udwoko ni Balam kumae: “Nyo an a kana peri ngo m’iringo ko i kwo peri zoo nitundo tini? Nyo adaru timi kumeni de i wang’e?” Edwoko kumae: “Ungo!” 31 Yehova ugam uyabu wang’ Balam, man eneno malaika pa Yehova ucungo i gengi ku palamularu i cinge. E ndhu ndhu nica ekulo kore piny man epodho arieba wang’e.

32 I ng’eye, malaika pa Yehova uyero ire kumae: “Pirang’o igoyo kana peri wang’ adek maeni zoo? Nen! an re m’awok pi niceri, pilembe yo peri ukoc ku yeny para. 33 Kana e unena man eii niura wang’ adek maeni zoo. Kepar nia ka nwang’u eura ngo! Eni nwang’u adaru negi man aweko kanane kwo.” 34 Balam uyero ni malaika pa Yehova kumae: “Adubo, pilembe nwang’u ang’eyo ngo nia karaman in re m’icungo i gengi pi nirombo kuda. Man kawoni tek lembene nen rac i weng’i, abidok.” 35 Malaika pa Yehova ulund uyero ni Balam kumae: “Cidhi karacelo ku dhanune, ento ibiwoyero kende kende lembe m’abiyero iri.” Pieno Balam umedere ku woth karacelo ku judongo ma wijo pa Balak.

36 Kinde ma Balak uwinjo nia Balam ubino, ewok ndhu ndhu pi nicirombo kude i adhura mi Moab ma n’i dhu kulo mir Arnon i kieu mi ng’ombe. 37 Balak uwok uyero ni Balam kumae: “Nyo aoro ngo jucidh julwong’i? Pirang’o ibino ngo i bang’a? Nyo iparu nia aromo yungi ngo lee?” 38 Balam udwoko ni Balak kumae: “Lembe moko mbe, adaru tundo eni. Re nyo jubiyiyo ira nia ayer lembe moko? Abiyero ndhu kende kende lembe ma Mungu biketho i dhoga.”

39 Pieno Balam ucidho karacelo ku Balak, man giwok gitundo i Kiriath-huzoth. 40 Balak ugam uthiero dhieng’ ku rombe man eoro moko ni Balam man ni judongo ma wijo m’ubino karacelo kude. 41 Urwonde kugweno, Balak uting’o Balam man etere malu i Bamoth-baal, kum ku keca eromo neno dhanune zoo.

23 E Balam uyero ni Balak kumae: “Gier pemlam abiro keni, man iyik ira thwoni dhieng’ abiro man nyogi rombe abiro.” 2 Ndhu ndhu nica, Balak utimo tap calu ma Balam uyero. Man Balak giku Balam githiero thwon dhiang’ ku nyog urombo acel acel iwi pemlamman. 3 I ng’eye, Balam uyero ni Balak kumae: “Dong’ keni i vut lam peri m’awang’a, man an abicidho. Saa moko nyo Yehova biweco kuda. Abidonyutho iri gin moko ci m’eyero ira.” Pieno eidho iwi ungulu got moko m’uthwo.

4 I ng’eye Mungu ucaku weco ku Balam, m’uwacu ire kumae: “Aguro pemlam abiro i leni, man athiero thwon dhiang’ ku nyog urombo acel acel iwi pemlamneman.” 5 Yehova uketho wec i dhu Balam man ewacu kumae: “Dok i bang’ Balak, man iyer ire lembuni.” 6 E edok man eneno Balak ku judongo ma wijo ceke mi Moab gicungo i vut lam m’awang’a pare. 7 E eyero lembabola ma e:

‘Bin ilam ira Yakobo.

Eyo, bin inywar Israel.’

 8 Aromo lamu nenedi ju ma Mungu ulamu ngo?

Man aromo nywaru nenedi ju ma Yehova unywaru ngo?

11 Balak ugam uwacu ni Balam kumae: “Itimo ang’o ira eni? Akeli kara ilam jukwor para, man gin m’itimo atima kae de mbe, ilund imiyo igi mugisa re.” 12 Edwoko kumae: “Nyo acikara ngo niyero lembe moko ci ma Yehova uketho i dhoga?”

13 Balak uyero ire kumae: “Akweyi, bin wacidh ku kaka mange, kaka m’iromo wonenogi i iye. Ibineno jumoko kende m’i kindgi, ibinenogi zoo ngo. Wok ilamgi ira ku keca.” 14 Pieno etere i podho pa Zofim i die wi Pisga, egiero pemlam abiro man ethiero thwon dhiang’ ku nyog urombo acel acel iwi pemlamneman. 15 E Balam uyero ni Balak kumae: “Dong’ keni i vut lam m’awang’a peri kinde m’abeweco kude ku kuca.” 16 Yehova ucaku weco ku Balam man eketho wec i dhoge, e eyero kumae: “Dok i bang’ Balak, man iyer ire lembuni.” 17 E edok i bang’e man ewok enwang’u ebekure i vut lam pare m’awang’a, man judongo ma wijo mi Moab ubino karacelo kude. Balak ugam upenje kumae: “Yehova uwacu ang’o?” 18 E eyero lembabola ma e:

“Ai malu Balak, man winji.

Winja, E wod Zipor.

Kan eyero lembe moko, nyo ebitime ngo?

Tek eweco, nyo ebipong’o ngo lembene?

22 Mungu ubewodhogi kud i Misiri.

Etie igi calu tung jobi.

Kawoni jucopo yero pi Yakobo man Israel kumae:

‘Kenen gin ma Mungu utimo.’

25 E Balak uwacu ni Balam kumae: “Tek icopo lamugi ngo nyanok de, mugisa de dong’ kud imii igi do.” 26 Balam udwoko ni Balak kumae: “Nyo ayero ngo iri nia, ‘abitimo lembe ceke ma Yehova uyero’?”

27 E Balak uwacu ni Balam kumae: “Akweyi, bin, man wek ateri kendo kaka mange. Saa moko nyo ebibedo ber i wang’ Mungu mandha nia ilamgi ira ku keca.” 28 Pieno Balak utero Balam i die wi Peor m’ubeneno yor i bang’ Yecimon.* 29 I ng’eye, Balam uyero ni Balak kumae: “Gier pemlam abiro keni, man iyik ira thwoni dhieng’ abiro man nyogi rombe abiro. 30 E Balak utimo tap calu ma Balam uyero, man ethiero thwon dhiang’ ku nyog urombo acel acel iwi pemlamneman.

24 Saa ma Balam uneno nia nimiyo mugisa ni Israel ubenyayu anyong’a* i Yehova, ecidho ngo kendo niyenyo kuroga, ento eloko wang’e yor i langa. 2 Kinde ma Balam uting’o wang’e man eneno Israel ugonjo calku suru migi, e tipo pa Mungu ugam ubino i wiye. 3 I ng’eye, eyero lembabola ma e:

10 Ng’eicwiny ugam umaku Balak i kum Balam. Balak upadu cinge ku ng’eicwiny man ewacu ni Balam kumae: “Alwong’i kara ibin ilam judegi para, re gin m’itimo atima de mbe, ilund imiyo igi mugisa wang’ adek maeni zoo. 11 Dong’ dok thu de eni eni. Nwang’u aketho nia abiyungi lee mandha, ento nen! Yehova uceri ku nwang’u yung’ne.”

12 Balam udwoko ni Balak kumae: “Nyo ayero ngo ni jukwenda m’ioro nia, 13 ‘kadok nwang’u Balak umiyo ira ot pare ma mola ma tar ku mola ma kwar bik i iye de, ku yeny para gira,* aromo timo ngo gin moko ci m’ukoc ku ma Yehova ung’olo, nik’ebed ma ber kunoke ma rac. Abiyero kende kende gin ma Yehova biwacu ira’. 14 Dong’ kawoni abedok i bang’ juthuwa. Bin man wek anyuth iri gin ma dhanu maeni bitimo i kum dhanu peri i nindo m’ubino.”* 15 I ng’eye, eyero lembabola ma e:

20 Kinde m’eneno Amalek, emedere ku lembabola pare kumae:

21 Kinde m’eneno Jukeni, emedere ku lembabola pare kumae:

“Kabedo peri utie agwoka, man pacu peri n’i wi cana.

22 Ento ng’atu moko biwang’u Kayin cen.

Edong’ nindo ma rukani nitundo m’Asiria bimeki ko ni ng’eca?”

23 Man emedere ku lembabola pare kumae:

“Can! Ng’a ma biboth kinde ma Mungu bitimo lembuni?

Ento en de ebinyothere buu.”

25 I ng’eye Balam uai malu ecidho man edok yo pare. Balak bende ucidho i yo pare.

25 Kinde ma nwang’u Israel bedo i Cithim, dhanu ucaku timo lembsasa mi tarwang’ ku nyi Moab. 2 Jumamon gilwong’o dhanu i bang’ lam mi mungu migi, e dhanu ucaku camu man ucaku kulo korgi ni mungu migi. 3 Pieno Israel udikere i thier pa Baal mi Peor, man ng’eicwiny pa Yehova uopo i kum Israel. 4 Yehova uwacu ni Musa kumae: “Gam jutela* ceke mi dhanu maeni man iliergi i wang’ Yehova i dieceng’,* kara ng’eicwiny pa Yehova uloki kud i kum Israel. 5 I ng’eye, Musa uwacu ni jupoklembe mir Israel kumae: “Ng’atuman ucikere ninego dhanu pare m’udikere i thier pa* Baal mi Peor.”

6 Ento saa nica Jaisrael acel ugam utundo ku Nyamidian moko m’ebecoro kude ceng’ini i vut umego pare i wang’ Musa man i wang’ cokiri ceke mi Juisrael, kinde ma gibino wak i dhu kamondo mi hema mi rombo. 7 Kinde ma Fineas ma wod Eleazar ma wod Arun ma jalam uneno lembuno, e ndhu ndhu eai malu kud i kind cokiri man eting’o tong’ i cinge. 8 Elubo tok Jaisraelne nitundo i hema man ewok ecobo gin ario zoo, Jaisraelne man dhakune i wathkum mi nyodo pare. E gocone ugam ujik kud i kum Juisrael. 9 Ju ma gocone unego wendgi ubino elufu pier ario wi ang’wen (24 000).

10 I ng’eye, Yehova uyero ni Musa kumae: 11 “Fineas ma wod Eleazar ma wod Arun ma jalam uloko kwinyo para kud i kum dhanu mir Israel, pilembe eyiyo ngo nyanok de nyeko yor i bang’a i kindgi. E adaru ngo Juisrael kadok nwang’u amito kwa nia jutim ira kende de. 12 Pieno, yer kumae: ‘Abemiyo ire lembariba para mi kwiyocwiny. 13 Man ebibedo ni lembariba ma nja pi tic mi lam ire man pi nyikwaye yor i ng’eye, pilembe eyiyo ngo nyanok de nyeko yor i bang’ Mungu pare man etimo adunya pi dhanu mir Israel.’”

14 Karaman nying’ Jaisrael ma junego karacelo ku Nyamidian ubino Zimri ma wod Salu ma jadit ma wijo mi thepacu mi suru pa Simeon. 15 Nying’ Nyamidian ma junegone ubino Kozbi ma nyaku pa Zur, m’ubino jatela mi thekwaru acel i Midian.

16 I ng’eye, Yehova uyero ni Musa kumae: 17 “Wuceg mac i kum Jumidian man wunyothgi cen, 18 pilembe gicego mac i kumwu kud abombi migi i lembe pa Peor man Kozbi ma nya jatela mi Midian, nyameggi ma junego i nindo mi goco m’uwok i lembe pa Peor.”

26 I ng’ey gocone, Yehova uyero ni Musa man ni Eleazar ma wod Arun ma jalam kumae: 2 “Wukwan cokiri ceke mi Juisrael, ju ma oro migi ucaku niai pier ario niidho malu, calku thepacu migi; wukwan ju ceke ma gicopo timo tic mi mony i Israel.” 3 E Musa gikud Eleazar ma jalam giweco kugi i pambu mi langa mi Moab ceng’ini ku Yordan yor i bang’ Yeriko, giyero kumae: 4 “Wukwan ju ma niai i oro pier ario niidho malu, tap calu ma Yehova ung’olo ni Musa.”

Nwang’u wot Israel ma giwok kud i ng’om mi Misiri ubino: 5 Ruben ma kayu pa Israel; maeni ubino wot Ruben: niai kud i bang’ Hanok, juruot mi ju pa Hanok; niai kud i bang’ Palu, juruot mi ju pa Palu; 6 niai kud i bang’ Hezron, juruot mi ju pa Hezron; niai kud i bang’ Karmi, juruot mi ju pa Karmi. 7 Eno ubino juruot mi suru pa Ruben, man ju migi ma jukiewo nying’gi wendgi ubino elufu pier ang’wen wi adek ku dak abiro pier adek (43 730).

8 Wod Palu ubino Eliab. 9 Man wot Eliab ubino Nemuel, Dathan, man Abiram. Dathan maeni gikud Abiram re ma gibino ju ma jung’iyo i kind cokiri m’ujai i dhu Musa gikud Arun karacelo kud ungu pa Kora kinde ma gijai i dhu Yehova.

10 I ng’eye, ng’om uyabu dhoge man umwonyogi. Ento Kora utho karacelo ku ju m’ubino cwake kinde ma mac uwang’u dhanu dak ario ku pier abic. Man gidoko ni lapor mi cimowang’. 11 Ento wot Kora ugam utho ngo.

12 Wot Simeon calku juruot migi ni e: niai kud i bang’ Nemuel, juruot mi ju pa Nemuel; niai kud i bang’ Yamin, juruot mi ju pa Yamin; niai kud i bang’ Yakin, juruot mi ju pa Yakin; 13 niai kud i bang’ Zera, juruot mi ju pa Zera; niai kud i bang’ Caul, juruot mi ju pa Caul. 14 Eno ubino juruot mi suru pa Simeon: elufu pier ario wi ario ku dak ario (22 200).

15 Wot Gad calku juruot migi ni e: niai kud i bang’ Zefon, juruot mi ju pa Zefon; niai kud i bang’ Hagi, juruot mi ju pa Hagi; niai kud i bang’ Cuni, juruot mi ju pa Cuni; 16 niai kud i bang’ Ozni, juruot mi ju pa Ozni, niai kud i bang’ Eri, juruot mi ju pa Eri; 17 niai kud i bang’ Arodi, juruot mi ju pa Arodi; niai kud i bang’ Areli, juruot mi ju pa Areli. 18 Eno ubino juruot mi wot Gad man ju migi ma jukiewo nying’gi ubino elufu pier ang’wen ku dak abic (40 500).

19 Wot Yuda ubino Er gikud Onan. Ento Er gikud Onan githo i ng’om mi Kanan. 20 Wot Yuda calku juruot migi ni e: niai kud i bang’ Cela, juruot mi ju pa Cela; niai kud i bang’ Perez, juruot mi ju pa Perez; niai kud i bang’ Zera, juruot mi ju pa Zera. 21 Man wot Perez ni e: niai kud i bang’ Hezron, juruot mi ju pa Hezron; niai kud i bang’ Hamul, juruot mi ju pa Hamul. 22 Eno ubino juruot pa Yuda, man ju migi ma jukiewo nying’gi ubino elufu pier abiro wi abusiel ku dak abic (76 500).

23 Wot Isakar calku juruot migi ni e: niai kud i bang’ Thola, juruot mi ju pa Thola; niai kud i bang’ Puva, juruot mi ju pa Puni; 24 niai kud i bang’ Yacub, juruot mi ju pa Yacub; niai kud i bang’ Cimron, juruot mi ju pa Cimron. 25 Eno ubino juruot pa Isakar, man ju migi ma jukiewo nying’gi ubino elufu pier abusiel wi ang’wen ku dak adek (64 300).

26 Wot Zebulon calku juruot migi ni e: niai kud i bang’ Sered, juruot mi ju pa Sered; niai kud i bang’ Elon, juruot mi ju pa Elon; niai kud i bang’ Yalel, juruot mi ju pa Yalel. 27 Eno ubino juruot mi ju pa Zebulon, man ju migi ma jukiewo nying’gi ubino elufu pier abusiel ku dak abic (60 500).

28 Wot Yozefu calku juruot migi ni e: Manase gikud Efraim. 29 Wot Manase ni e: niai kud i bang’ Makir, juruot mi ju pa Makir; man Makir unyolo Gilead; niai kud i bang’ Gilead, juruot mi ju pa Gilead. 30 Wot Gilead ni e: niai kud i bang’ Iezer, juruot mi ju pa Iezer; niai kud i bang’ Helek, juruot mi ju pa Helek; 31 niai kud i bang’ Asriel, juruot mi ju pa Asriel; niai kud i bang’ Cekem, juruot mi ju pa Cekem; 32 niai kud i bang’ Cemida, juruot mi ju pa Cemida; niai kud i bang’ Hefer, juruot mi ju pa Hefer. 33 Nwang’u Zelofehad ma wod Hefer ubino mbe kud awiya ma co, ento jumanyir kende; man nying’ jumanyir pa Zelofehad ubino Mala, Noa, Hogla, Milka, man Tirza. 34 Eno ubino juruot pa Manase, man ju migi ma jukiewo nying’gi ubino elufu pier abic wi ario ku dak abiro (52 700).

35 Wot Efraim calku juruot migi ni e: niai kud i bang’ Cuthela, juruot mi ju pa Cuthela; niai kud i bang’ Beker, juruot mi ju pa Beker; niai kud i bang’ Tahan, juruot mi ju pa Tahan. 36 Man wot Cuthela ni e: niai kud i bang’ Eran, juruot mi ju pa Eran. 37 Eno ubino juruot mi wot Efraim, man ju migi ma jukiewo nying’gi ubino elufu pier adek wi ario ku dak abic (32 500). Eno ubino wot Yozefu calku juruot migi.

38 Wot Benjamin calku juruot migi ni e: niai kud i bang’ Bela, juruot mi ju pa Bela; niai kud i bang’ Acbel, juruot mi ju pa Acbel; niai kud i bang’ Ahiram, juruot mi ju pa Ahiram; 39 niai kud i bang’ Cefufam, juruot mi ju pa Cefufam; niai kud i bang’ Hufam, juruot mi ju pa Hufam. 40 Wot Bela ubino Ard giku Naaman: niai kud i bang’ Ard, juruot mi ju pa Ard; niai kud i bang’ Naaman, juruot mi ju pa Naaman. 41 Eno ubino wot Benjamin calku juruot migi, man ju migi ma jukiewo nying’gi ubino elufu pier ang’wen wi abic ku dak abusiel (45 600).

42 Wot Dan calku juruot migi ni e: niai kud i bang’ Cuham, juruot mi ju pa Cuham. Eno ubino juruot pa Dan calku juruot migi. 43 Juruot ceke mi ju pa Cuham ma jukiewo nying’gi ubino elufu pier abusiel wi ang’wen ku dak ang’wen (64 400).

44 Wot Acer calku juruot migi ni e: niai kud i bang’ Imna, juruot mi ju pa Imna; niai kud i bang’ Icvi, juruot mi ju pa Icvi; niai kud i bang’ Beria, juruot mi ju pa Beria; 45 wot Beria ni e: niai kud i bang’ Heber, juruot mi ju pa Heber; niai kud i bang’ Malkiel, juruot mi ju pa Malkiel. 46 Nying’ nyaku pa Acer ubino Sera. 47 Eno ubino juruot mi wot Acer, man ju migi ma jukiewo nying’gi ubino elufu pier abic wi adek ku dak ang’wen (53 400).

48 Wot Nafthali calku juruot migi ni e: niai kud i bang’ Yazel, juruot mi ju pa Yazel; niai kud i bang’ Guni, juruot mi ju pa Guni; 49 niai kud i bang’ Yezer, juruot mi ju pa Yezer; niai kud i bang’ Cilem, juruot mi ju pa Cilem. 50 Eno ubino juruot pa Nafthali calku juruot migi, man ju migi ma jukiewo nying’gi ubino elufu pier ang’wen wi abic ku dak ang’wen (45 400).

51 Maeni tie wend ju ceke ma jukiewo nying’gi kud i kind Juisrael: elufu dak abusiel kud acel ku dak abiro pier adek (601 730).

52 I ng’ey maeno, Yehova uyero ni Musa kumae: 53 “Jubipoko ng’om ni ju maeno ni giralaga calku nying’gi ma jurieyo. 54 Ibimedo giralaga ni ungu ma wendgi lee, man ni ungu ma wendgi nok ke ibijwigo giralagane. Giralaga mir unguman ucikere nibedo rom ku wend dhanu migi ma jukiewo. 55 Ento jucikiri nipoko ng’ombe ku gagi. Gibinwang’u giralaga migi calku nying’ suru pa weggi. 56 Jubigoyo gagi pi ninwang’u giralagaman man jubipoke calkud ungu ma wendgi lee man ma wendgi nok.”

57 Julawi ma jukiewo nying’gi calku juruot migi ni e: niai i bang’ Gercon, juruot mi ju pa Gercon; niai i bang’ Kohath, juruot mi ju pa Kohath; niai i bang’ Merari, juruot mi ju pa Merari. 58 Juruot pa Lawi ni e: juruot mi ju pa Libni, juruot mi ju pa Hebron, juruot mi ju pa Mahli, juruot mi ju pa Muci, juruot mi ju pa Kohath.

Kohath unyolo Amram. 59 Man nying’ dhaku pa Amram ubino Yokebed ma nyaku pa Lawi ma dhaku pare unyolo ire i Misiri. Man ni Amram enyolo Arun, Musa, man nyameggi ma Miriam. 60 I ng’eye, ju m’unyoliri ni Arun ubino Nadab, Abihu, Eleazar, man Ithamar. 61 Ento Nadab gikud Abihu githo pilembe gikelo mac m’uyiyere ngo i wang’ Yehova.

62 Jumaco ceke ma jukiewo nying’gi ma niai dwi acel niidho malu wendgi ubino elufu pier ario wi adek (23 000). Jukiewo ngo nying’gi i kind Juisrael, pilembe jumiyo ngo igi giralaga i kind Juisrael.

63 Eno ubino ju ma Musa gikud Eleazar ma jalam gikiewo nying’gi kinde ma gikiewo nying’ Juisrael i pambu mi langa mi Moab, ceng’ini ku Yordan yor i bang’ Yeriko. 64 Ento ng’atu acel de mbe kud i kindgi ma Musa gikud Arun ma jalam gigam gikiewo nyinge kinde ma jubekwanu Juisrael i langa mi Sinai. 65 Kum Yehova uyero pigi kumae: “Gibitho andhandha i langa.” Pieno ng’atu moko mbe m’udong’ i kindgi, ndhu Kaleb ma wod Yefune man Yocuwa ma wod Nun kendgi.

27 I ng’eye, jumanyir pa Zelofehad ma wod Hefer, ma wod Gilead ma wod Makir ma wod Manase, mi suru pa Manase ma wod Yozefu gicoro ceng’ini. Nying’ jumanyir parene ubino Mala, Noa, Hogla, Milka, man Tirza. 2 Gicungo i wang’ Musa, Eleazar ma jalam, judongo ma wijo, man i wang’ cokiri ceke i dhu kamondo mi hema mi rombo man giwacu kumae: 3 “Wegwa utho i langa, re ebino mbe i kind ungu m’udikiri karacelo i dhu Yehova, ma gi jucwak pa Kora, ento etho pi dubo pare gire man ebino mbe kud awiya ma co acel de. 4 Nyo ubekwayu nying’ wegwa uling’ i kind wat pare pilembe nia embe ku nyathin ma co? Mii iwa giralaga i kind umego pa wegwa.” 5 Musa ugam utero lembe migine i wang’ Yehova.

6 I ng’eye, Yehova uyero ni Musa kumae: 7 “Jumanyir pa Zelofehad giyero lemandha. Icikiri nimiyo igi aba ni giralaga kokoro i kind umego pa weggi, man nimiyo giralaga pa weggi igi. 8 Man yer ni Juisrael kumae: ‘Tek ng’atu moko ma co utho m’embe ku nyathin ma nico, e wucikuru nimiyo giralaga pare ni nyare. 9 Man tek nyare mbe, wubimiyo giralaga pare ni umego pare. 10 Man tek umego pare mbe, wubimiyo giralaga pare ni umin wego pare. 11 Man tek won umbe kud umego, wubimiyo giralaga pare ni wat pare ma ceng’ini ma gitie kude rimo acel, man abane bidong’ ire. Eni bibedo ni telowic mi pokolembe pi Juisrael, tap calu ma Yehova ung’olo ni Musa.’”

12 I ng’eye, Yehova uyero ni Musa kumae: “Idh malu iwi got maeni mir Abarim, man nen ng’om m’abimiyo ni Juisrael. 13 Kinde m’idaru nene, in de jubicoki karacelo ku dhanu peri* calu Arun m’umeru, 14 pilembe kinde ma cokiri udhaw kuda i langa mi Zin, wujai i kum lembe m’ang’olo man wudwoka ngo leng’ i wang’gi kinde m’amiyo pii. Eno tie pii mi Meriba i Kadec i langa mi Zin.”

15 E Musa ugam uyero ni Yehova kumae: 16 “Wek Yehova ma Mungu ma miyo kwo ni dhanu ceke* ung’ii ng’atu moko iwi cokiri, 17 ma bibewok woko man ma bibemondo i wang’gi, ma bibewodhogi man ma biberoyogi, kara cokiri pa Yehova kud udok calu rombe ma jakwac migi mbe.” 18 Pieno Yehova uyero ni Musa kumae: “Gam Yocuwa ma wod Nun, ma en e ng’atu ma tipo n’i iye man iketh cingi i wiye. 19 I ng’eye, keth ecungi i wang’ Eleazar ma jalam man i wang’ cokiri ceke, man icikiri nikethe ni jatela i wang’gi. 20 Man iketh kum dito* peri moko i wiye, kara cokiri ceke mi Juisrael uwinje. 21 Ebicungo i wang’ Eleazar ma jalam, ma bipenjo pire nikadhu kud i pokolembe mir Urim i wang’ Yehova. Nikum lembe m’eng’olo, gibiwok woko man nikum lembe m’eng’olo gibimondo, en ku Juisrael ceke ma ni kude man cokiri ceke.”

22 E Musa utimo tap calu ma Yehova ung’olo ire. Egamu Yocuwa man eketho ecungo i wang’ Eleazar ma jalam man i wang’ cokiri ceke, 23 eketho cinge i wiye man ekethe ni jatela, tap calu ma Yehova uyero nikadhu kud i bang’ Musa.

28 I ng’eye, Yehova uyero ni Musa kumae: 2 “Ng’ol ni Juisrael man iwac igi kumae: ‘Wucikuru nikelo ira girathiera para, mukathi para. Girathiera para ma juwang’u ku mac ma ng’wice ng’ar* ira jucikiri nithiero i saane.’

3 “Man yer igi kumae: ‘Maeni tie girathiera ma juwang’u ku mac ma wubikelo ni Yehova kubang’ ceng’: nyithi nyogi rombe ario ma mulima mbe i kumgi ma oro migi acel acel ni lam m’awang’a ma thiri thiri. 4 Wubithiero nyathi nyog urombo acel kugweno, man ma kucelo ke wubithiero saa ma piny ubegamere,* 5 karacelo kud apaje mir efa* mi mogo ma yom ma jujebo ku mo m’aoda nusu pa nusu mi hin* ni girathiera mi nying cam. 6 Etie lam m’awang’a ma thiri thiri ma jucaku there i kum Got Sinai ni piny ma ng’wice ng’ar,* girathiera ma juwang’u ku mac ni Yehova, 7 ku girathiera pare mi pigulok, nusu pa nusu mi hin pi nyathi nyog uromboman. Konj giramadha ma lake tek i kabedo ma leng’ ni girathiera mi pigulok ni Yehova. 8 Man ibithiero nyathi nyog urombo ma kucelo saa ma piny ubegamere.* Ibikele ni girathiera ma juwang’u ku mac, ni piny ma ng’wice ng’ar* ni Yehova, karacelo ku girathiera mi nying cam ma rom ma juthiero kugweno man ku girathiera mi pigulokne de ma rom.

9 “‘Ento i ceng’ Sabatu, jucikiri nithiero nyithi nyogi rombe ario ma oro migi acel acel, man mogo ma yom thenge ario wi apar mir efa ma jujebo ku mo ni girathiera mi nying cam karacelo ku girathierane mi pigulok. 10 Eno tie lam m’awang’a pi Sabatu karacelo ku lam m’awang’a ma thiri thiri man girathierane mi pigulok.

11 “‘I caku pa dwiman,* wubithiero nyithi thwoni dhieng’ ario, nyog urombo acel, man nyithi nyogi rombe abiro ma oro migi acel acel ma mulima mbe i kumgi ni lam m’awang’a ni Yehova, 12 man mukero adek wi apar mi mogo ma yom ma jujebo ku mo ni girathiera mi nying cam pi thwon dhiang’man, man mukero ario wi apar mi mogo ma yom ma jujebo ku mo ni girathiera mi nying cam pi nyog urombo, 13 man apaje mi mukero mi mogo ma yom ma jujebo ku mo ni girathiera mi nying cam pi nyog uromboman ni lam m’awang’a ma ng’wice ng’ar,* girathiera ma juwang’u ku mac ni Yehova. 14 Man girathiera migi mi pigulok ucikere nibedo pigulok nusu pa hin pi thwon dhiang’, man thenge acel wi adek mi hin pi nyog urombo, man thenge acel wi ang’wen mi hin pi nyathi nyog urombo. Eno tie lam m’awang’a ma kubang’ dwi, i dwi acel acel i kind oro. 15 Bende, jucikiri nithiero nyathi nyog diel acel ni lam mi dubo ni Yehova pi nimedo kum lam m’awang’a ma thiri thiri karacelo ku girathierane mi pigulok.

16 “‘I dwi ma kwong’a, i nindo apar ang’wen mi dwije, bibedo Kadhukuwijo pa Yehova. 17 Man i nindo apar abic mi dwije, foc bibedo tie. Jubicamu mukathi ma thobi mbe i iye pi nindo abiro. 18 Coko ma leng’ bibedo tie i nindo ma kwong’a. Kud wutim tic moko ci ma tek. 19 Man wubikelo nyithi thwoni dhieng’ ario, nyog urombo acel, man nyithi nyogi rombe abiro ma oro migi acel acel ni lam m’awang’a ma juwang’u ku mac ni Yehova. Wucikuru nithiero leya ma mulima mbe i kumgi. 20 Wucikuru nithierogi karacelo ku girathiera migi mi nying cam, mi mogo ma yom ma jujebo ku mo: mukero adek wi apar pi thwon dhiang’ man mukero ario wi apar pi nyog urombo. 21 Wubithiero mukero acel wi apar pi nyathi nyog urombo acel acel m’i kind nyithi nyogi rombe abirone, 22 man bende diel acel ni lam mi dubo pi nitimo adunya piwu. 23 M’uweko lam m’awang’a mi kugweno, ma pi lam m’awang’a ma thiri thiri, wubithiero bende piny maeno. 24 Wubithiero piny maeno i ayi ma rom kubang’ ceng’ pi nindo abiro ni cam,* girathiera ma juwang’u ku mac, ni piny ma ng’wice ng’ar* ni Yehova. Jucikiri nithiere karacelo ku lam m’awang’a ma thiri thiri man girathierane mi pigulok. 25 I nindo mir abirone, wucikuru nitimo coko ma leng’. Kud wutim tic moko ci ma tek.

26 “I nindo mi landu wi mwoka, kinde ma wubekelo girathiera mwu mi nying cam ma nyen ni Yehova, wucikuru nitimo coko ma leng’ i foc mwu mi yenga. Kud wutim tic moko ci ma tek. 27 Wubikelo nyithi thwoni dhieng’ ario, nyog urombo acel, nyithi nyog urombo abiro ma oro migi acel acel ni lam m’awang’a, ni piny ma ng’wice ng’ar* ni Yehova, 28 man pi girathiera migi mi nying cam mi mogo ma yom ma jujebo ku mo, mukero adek wi apar pi thwon dhiang’man, mukero ario wi apar pi nyog urombo, 29 mukero acel wi apar pi nyathi nyog urombo acel acel m’i kind nyithi nyogi rombe abirone; 30 man bende nyathi diel acel pi nitimo adunya piwu. 31 Wubithierogi pi nimedo lam m’awang’a ma thiri thiri man girathieranegi mi nying cam. Gicikiri nibedo leya ma mulima mbe i kumgi, karacelo ku girathiera migi mi pigulok.

29 “‘Man i dwi mir abirone, i nindo ma kwong’a mi dwije, wucikuru nitimo coko ma leng’. Kud wutim tic moko ci ma tek. Etie nindo ma wucikuru nikudho i iye agwara. 2 Wubithiero nyathi thwon dhiang’ acel, nyog urombo acel, man nyithi nyogi rombe abiro ma oro migi acel acel ma gin zoo mulima mbe i kumgi ni lam m’awang’a, ni piny ma ng’wice ng’ar* ni Yehova, 3 man girathiera migi mi nying cam bibedo mogo ma yom ma jujebo ku mo, thenge adek wi apar mir efa pi thwon dhiang’, thenge ario wi apar pi nyog urombo, 4 man mukero acel wi apar pi nyathi nyog urombo acel acel m’i kind nyithi nyogi rombe abirone, 5 man nyathi nyog diel acel pi lam mi dubo pi nitimo adunya piwu. 6 Eno umedo kum lam m’awang’a ma kubang’ dwi ku girathierane mi nying cam, man lam m’awang’a ma thiri thiri ku girathierane mi nying cam, karacelo ku girathiera migi mi pigulok; calkud ayi ma lembe timere ko nja pigi, ni piny ma ng’wice ng’ar,* girathiera ma juwang’u ku mac ni Yehova.

7 “‘Man i nindo apar mi dwi mir abiro eno, wucikuru nitimo coko ma leng’, man wucikuru ninyayu can i iwu giwu.* Kud wutim tic moko ci. 8 Wubikelo thwon dhiang’ acel, nyog urombo acel, man nyithi nyogi rombe abiro ma oro migi acel acel, ma gin zoo mulima mbe i kumgi ni lam m’awang’a ni Yehova, ni piny ma ng’wice ng’ar.* 9 Man pi girathiera migi mi nying cam mi mogo ma yom ma jujebo ku mo, mukero adek wi apar pi thwon dhiang’, mukero ario wi apar pi nyog urombo, 10 mukero acel wi apar pi nyathi nyog urombo acel acel m’i kind nyithi nyogi rombe abirone, 11 man bende nyathi diel acel ni lam mi dubo, m’uweko mi lam mi dubo mir adunya man lam m’awang’a ma thiri thiri ku girathierane mi nying cam, karacelo ku girathiera migi mi pigulok.

12 “‘Man i nindo mir apar abije mi dwi mir abirone, wucikuru nitimo coko ma leng’. Kud wutim tic moko ci ma tek, man wucikuru nitimo foc ni Yehova pi nindo abiro. 13 Man wubikelo nyithi thwoni dhieng’ apar adek, nyogi rombe ario, man nyithi nyogi rombe apar ang’wen ma oro migi acel acel, ma gin zoo mulima mbe i kumgi ni lam m’awang’a, girathiera ma juwang’u ku mac, ni piny ma ng’wice ng’ar* ni Yehova. 14 Man pi girathiera migi mi nying cam mi mogo ma yom ma jujebo ku mo, mukero adek iwi apar pi thwon dhiang’ acel acel m’i kind thwoni dhieng’ apar adek, mukero ario iwi apar pi nyog urombo acel acel m’i kind nyogi rombe ario, 15 man mukero acel iwi apar pi nyathi nyog urombo acel acel m’i kind nyithi nyogi rombe apar ang’wen, 16 man bende nyathi diel acel pi lam mi dubo, m’uweko lam m’awang’a ma thiri thiri, girathierane mi nying cam, man girathierane mi pigulok.

17 “‘Man i nindo mir arionde, nyithi thwoni dhieng’ apar ario, nyogi rombe ario, man nyithi nyogi rombe apar ang’wen ma oro migi acel acel, ma gin zoo mulima mbe i kumgi, 18 man girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi calkud ayi ma lembe timere ko nja, 19 man bende nyathi diel acel pi lam mi dubo, m’uweko lam m’awang’a ma thiri thiri ku girathierane mi nying cam karacelo ku girathiera migi mi pigulok.

20 “‘Man i nindo mir adege, thwoni dhieng’ apar acel, nyogi rombe ario, nyithi nyogi rombe apar ang’wen ma oro migi acel acel, ma gin zoo mulima mbe i kumgi, 21 man girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi, calkud ayi ma lembe timere ko nja, 22 man bende diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

23 “‘Man i nindo mir ang’wende, thwoni dhieng’ apar, nyogi rombe ario, man nyithi nyogi rombe apar ang’wen ma oro migi acel acel, ma gin zoo mulima mbe i kumgi, 24 girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi calkud ayi ma lembe timere ko nja, 25 man bende nyathi diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

26 “‘Man i nindo mir abije, thwoni dhieng’ abung’wen, nyogi rombe ario, man nyithi nyogi rombe apar ang’wem ma oro migi acel acel, ma gin zoo mulima mbe i kumgi, 27 man girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi, calkud ayi ma lembe timere ko nja, 28 man bende diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

29 “‘Man i nindo mir abusiende, thwoni dhieng’ abora, nyogi rombe ario, man nyithi nyogi rombe apar ang’wen ma oro migi acel acel, ma gin zoo mulima mbe i kumgi, 30 man girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi, calkud kud ayi ma lembe timere ko nja, 31 man bende diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

32 “‘Man i nindo mir abirone, thwoni dhieng’ abiro, nyogi rombe ario, man nyithi nyogi rombe apar ang’wen ma oro migi acel acel, ma gin zoo mulima mbe i kumgi, 33 man girathiera migi mi nying cam ku girathiera migi mi pigulok pi thwoni dhieng’, nyogi rombe, man nyithi nyogi rombe nimakere ku wendgi, calkud ayi ma lembe timere ko nja pigi, 34 man bende diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

35 “‘I nindo mir aborane, wucikuru nitimo coko ma dit. Kud wutim tic moko ci ma tek. 36 Man wubikelo thwon dhiang’ acel, nyog urombo acel, man nyithi nyogi rombe abiro ma oro migi acel acel, ma gin zoo mulima mbe i kumgi ni lam m’awang’a, girathiera ma juwang’u ku mac, ni piny ma ng’wice ng’ar* ni Yehova, 37 ku girathiera migi mi nying cam man girathiera migi mi pigulok pi thwon dhiang’, nyog urombo, man nyithi nyogi rombe nimakere ku wendgi, calkud ayi ma lembe timere ko nja, 38 man bende diel acel pi lam mi dubo, m’uweko lam m’awang’a ma thiri thiri ku girathierane mi nying cam man girathierane mi pigulok.

39 “‘Wubithiero piny maeno ni Yehova i foc mwu mi nindo ma juketho, pi nimedo girathiera mwu ma wung’olo ku kwong’ man girathiera mwu ma ku berocwiny ni lam mwu m’awang’a man girathiera mwu mi nying cam, girathiera mwu mi pigulok, man lam mwu mi kwiyocwiny.’” 40 Musa ugam uyero lembe ceke ma Yehova ung’olo ire ni Juisrael.

30 I ng’eye, Musa uweco ku jutelwic mi suru mir Israel, eyero kumae: “Maeni tie lembe ma Yehova ung’olo: 2 Tek nico moko ung’olo lembe ku kwong’ ni Yehova kunoke ecikere ku kwong’ nia ebitwonere ku lembe moko, ecikere ngo nikadhu kud iwi wec parene. Ecikere nitimo lembe ceke m’eng’olo ku kwong’ nia ebitimo.

3 “Tek nyaku moko ung’olo lembe ku kwong’ ni Yehova kunoke ecikere ku kwong’ nia ebitwonere ku lembe moko kinde ma fodi en aradu man ebekwo i ot pa won, 4 man won uwinjo lembe m’eng’olo ku kwong’ne kunoke lembe m’ecikere ku kwong’ nia ebitwonere ko man won ujai ungo, lembe ceke m’eng’olo ku kwong’ne bibedo ku bang’e, man lembe ceke m’ecikere ku kwong’ nia ebitwonere ko bibedo kubang’e. 5 Ento tek won ukwere kinde m’ewinjo pi lembe m’eng’olo ku kwong’ kunoke m’ecikere ku kwong’ nia ebitwonere ko, kwong’ne bibedo ngo kubang’e. Yehova biweko ire, pilembe won ukwere.

6 “Ento tek egiero nico moko kinde m’en’i the kwong’ pare kunoke fodi en’i the lembe m’eng’olo vur vur i wiye, 7 man cware uwinjo lembene re ejai ungo i nindo m’ewinjo iye lembene, e lembe pare m’eng’olo ku kwong’ kunoke macikara ma ku kwong’ m’eng’olo ko nia ebitwonere ku lembe moko bibedo kubang’e. 8 Ento tek cware ukwere i nindo m’ewinjo iye lembene, eromo ranyu kwong’ne kunoke lembe m’eng’olo vur vur i wiye, man Yehova biweko ire.

9 “Ento tek dhatho kunoke dhaku ma gamiri pare ulal utimo lembang’ola moko ma ku kwong’, e lembe ceke m’eketho i wiye bibedo kubang’e.

10 “Ento tek dhaku moko ung’olo lembe ku kwong’ kunoke etimo macikara moko ku kwong’ nia ebitwonere ku lembe moko kinde m’en’i ot pa cware, 11 man cware uwinjo pire ento ejai ungo kadi ekwero de ngo, e lembe ceke m’eng’olo ku kwong’ kunoke lembe moko ci m’ecikere ku kwong’ nia ebitwonere ko bibedo kubang’e. 12 Enre tek i nindo ma cware uwinjo pi lembe moko ci m’eng’olo ku kwong’ kadi lembe m’ecikere ku kwong’ nia ebitwonere ko man eranyugi ceke, e gibibedo ngo kubang’gi. Calu ma cware udaru ranyugi, Yehova biweko ire. 13 Lembe moko ci m’eng’olo ku kwong’ kunoke kwong’ moko ci m’uketho i iye macikara m’etimo nia ebitwonere gire ku piny moko,* cware re ma biketho ebibedo kubang’e kunoke cware re ma biranye. 14 Ento tek cware ujai ungo nyanok de kinde ma nindo ubekadhu, e nwang’u en bende eyiyo kwong’ pa dhakune ceke man macikara ceke m’etimo ku kwong’ nia ebitwonere ku piny moko. Eketho gitie kubang’gi pilembe ejai ungo i nindo m’ewinjo nia ekwong’o kwong’negi. 15 Ento tek eranyugi i ng’eye, saa moko i ng’ey m’ewinjo pigi, e ebiyeyo matoke mi kier pa dhakune.

16 “Eno tie cik ma Yehova ung’olo ni Musa pi nico ku dhaku pare, man pi wego ku nyare m’aradu m’ubekwo i ot pare.”

31 I ng’eye, Yehova uwacu ni Musa kumae: 2 “Cul kwor pi Juisrael i kum Jumidian. I ng’ey maeno, jubicoki karacelo ku dhanu peri.”*

3 Pieno Musa uweco i bang’ dhanu, ewacu kumae: “Wumii jamlwiny ni jumaco m’i kindwu pi nicikiedo lwiny* i dhu Midian, man pi niculo kwor pa Yehova i kum Midian. 4 Wubioro jumaco elufu acel (1 000) kubang’ suru mi suru ceke mir Israel i mony.” 5 Pieno kud i kind dhanu elufu mir Israel, jung’iyo jumaco elufu acel (1 000) kud i suruman, niwacu jumaco elufu apar ario (12 000) ma jumiyo igi jamlwiny pi nikiedo lwiny.*

6 E Musa uorogi, niyero jumaco elufu acel acel kubang’ suruman i mony. Fineas ma wod Eleazar ma jalam ucidho karacelo ku jurumonyne, man ebedo kud ajeni ma leng’ man agwara mi lwong’o i cinge. 7 E gikiedo lwiny i dhu Midian, tap calu ma Yehova ung’olo ni Musa, man ginego jumaco ceke. 8 Karacelo ku jumange ma junego, ginego bende jubim mi Midian, niwacu Evi, Rekem, Zur, Hur, man Reba, jubim abic mi Midian. Ginego bende Balam ma wod Beor ku palamularu. 9 Ento Juisrael gimaku jumamon kud awiya mi Midian ni ng’eca. Giyaku bende lei migi ceke mi pacu, udul lim migi ceke, man piny migi ceke. 10 Man giwang’u ku mac adhura migi ceke ma gibed gibedo i iye ku kagonjo* migi ceke. 11 Man gicoko piny ceke ma giyaku, dhanu ku lei ceke. 12 I ng’eye, gikelo ng’eca man jambayeki i bang’ Musa, Eleazar ma jalam, man i bang’ cokiri mi Juisrael i kagonjo i pambu mi langa mi Moab, ceng’ini ku Yordan yor i bang’ Yeriko.

13 E Musa gikud Eleazar ma jalam man judongo ma wijo ceke mi cokiri giwok pi nicirombo kugi woko i ng’ey kagonjo. 14 Ento ng’eicwiny umaku Musa i kum ju ma juketho utel wi udul mony, judongo mi dhanu elufu man judongo mi dhanu dak ma nwang’u ubedwogo kud i lwiny. 15 Musa uwacu igi kumae: “Wulund wuweko jumamon zoo kwo? 16 Nen! gin re ma nikum lembe pa Balam gibidho wang’ Juisrael uturo cik pa Yehova i lembe pa Peor, uketho thong’om upodho iwi cokiri pa Yehova. 17 Dong’ kawoni wuneg awiya ma co ceke, man wuneg jumamon ceke m’udaru timo ribiri ku co. 18 Ento wuwek awiya ma nyir ceke ma fodi utimo ngo ribiri ku co ubed kwo. 19 Man wucikuru nigonjo woko i ng’ey kagonjo pi nindo abiro. Ng’atu moko ci m’i kindwu m’unego dhanu* man ng’atu moko ci m’i kindwu m’umulo kum ng’atu ma junego ucikere nidwokere leng’ i nindo mir adege man i nindo mir abirone, wun ku ju ma wumaku. 20 Man kendi moko ci, piny moko ci ma juyiko kud adila, piny moko ci ma juyiko ku yuk diel, man piny moko ci ma juyiko ku yen, wucikuru nidwoko leng’.”

21 I ng’eye, Eleazar ma jalam uwacu ni jumaco mir udul askari m’ugam ucidho i lwiny kumae: “Maeni lembang’ola mi cik ma Yehova ung’olo ni Musa: 22 ‘Kende kende mola ma kwar, mola ma tar, mola, cuma, nyunyu ma tar ma lebelebe,* cuma ma pek, 23 piny moko ci ma copo wang’ ungo i mac, wucikuru niketho ekadh kud i mac, e ebidoko leng’. Ento jucikiri nilwoke bende ku pii pi nidwoke leng’. Gin moko ci ma copo wang’, wucikuru nilwoko ku pii. 24 Man wucikuru nilwoko kendi mwu i nindo mir abirone, e wubidoko leng’; i ng’eye wucopo mondo i kagonjo.’”

25 I ng’eye, Yehova uwacu ni Musa kumae: 26 “Tim kwan mi piny ma juyaku, kwan mi dhanu ma jumaku ni ng’eca man lei ma juyaku; tim lembuno karacelo kud Eleazar ma jalam man jutelwic mi thepacu mi cokiri. 27 Pok i piny ma juyakune ni ario; thenge acel ni Juaskari m’uai ukiedo lwiny, man thenge ma kucelo ni dong dhanu mange mi cokiri. 28 Man icikiri nigamu kud i bang’ juaskari m’ucidh ukiedo lwiny ng’eyong’ec* acel acel iwi dak abic; dok ebed mi dhanu, dhieng’, kana, man udul rombe ni ajok ni Yehova. 29 Ibigame iwi nusu migi man ibimiye i bang’ Eleazar ma jalam ni ajok pa Yehova. 30 Kud i kum nusu ma jumiyo ni Juisrael, gam acel acel iwi pier abic, dok ebed dhanu, dhieng’, kana, rombe, man mi lei moko ci mi pacu; man imiigi ni Julawi ma gitimo tic m’ugwaku kum hema mi thier pa Yehova.”

31 Pieno Musa gikud Eleazar ma jalam gitimo tap calu ma Yehova ung’olo ni Musa. 32 Wend jambayeki, dong piny ma dhanu m’ucidho i lwiny uwok uyaku ubino rombe elufu dak abusiel ku pier abiro wi abic (675 000), 33 dhieng’ elufu pier abiro wi ario (72 000), 34 man kana elufu pier abusiel wi acel (61 000). 35 Wend jumanyir ma fodi utimo ngo ribiri ku co ubino elufu pier adek wi ario (32 000). 36 Nusu ma jupoko ni ju m’ucidh ukiedo lwiny ubino rombe elufu dak adek pier adek wi abiro ku dak abic (337 500). 37 Wend rombe mir ajok pa Yehova ubino dak abusiel ku pier abiro wi abic. 38 Wend dhieng’ ubino elufu pier adek wi abusiel (36 000) man ma jujoko ni Yehova ubino pier abiro wi ario. 39 Wend kana ubino elufu pier adek ku dak abic (30 500), man ma jujoko ni Yehova ubino pier abusiel wi acel. 40 Wend dhanu* ubino elufu apar abusiel (16 000), man ma jujoko ni Yehova ubino dhanu pier adek wi ario. 41 E Musa umiyo ajokne ni ajok pa Yehova i bang’ Eleazar ma jalam, tap calu ma Yehova ung’olo ni Musa.

42 Kud i kum nusu mi Juisrael ma Musa upoko kud i kum thenge mi jumaco m’uai ukiedo lwiny, 43 nusu mi rombene ubino elufu dak adek pier adek wi abiro ku dak abic (337 500), 44 man mi dhieng’ elufu pier adek wi abusiel (36 000), 45 mi kana elufu pier adek ku dak abic (30 500), 46 man mi dhanu* elufu apar abusiel (16 000). 47 E Musa ugamu kud i kum nusune ma mi Juisrael acel wi pier abic mi dhanu man mi lei, man emiyogi ni Julawi ma gitimo tic mi hema mi thier pa Yehova, tap calu ma Yehova ung’olo ni Musa.

48 I ng’eye, jumaco ma juketho ma gibino i kind dhanu elufu mir udul askari, niwacu judongo mi dhanu elufu, man judongo mi dhanu dak gicoro i vut Musa, 49 man giwacu ni Musa kumae: “Jutic peri gidaru kwanu wend jumaco ma kiedo lwiny ma n’i the telowic mwa, man ng’atu moko acel de mbe m’urem i kindwa. 50 Dong’ wek ng’atuman m’i kindwa ukel gin m’enwang’u ni girathiera pa Yehova, piny mi mola ma kwar, gwang’ mi ng’udi tielo, mangil, lagith mi ketho ayi, lengethu, man jamruko mange pi nitimo adunya piwa* i wang’ Yehova.”

51 Pieno Musa gikud Eleazar ma jalam gijolo mola ma kwar kud i bang’gi, jamruko ceke. 52 Mola ma kwar ceke m’uai i bang’ judongo mi dhanu elufu man judongo mi dhanu dak ma gijoko ni Yehova ubino cekel* elufu apar abusiel ku dak abiro pier abic (16 750). 53 Nwang’u ng’atuman m’i kind udul askari uting’o ire jambayeki. 54 Musa gikud Eleazar ma jalam gijolo mola ma kwar kud i bang’ judongo mi dhanu elufu man mi dhanu dak, man gikele i hema mi rombo ni jampoy pi dhanu mir Israel i wang’ Yehova.

32 Nwang’u wot Ruben man wot Gad gibino kud udul lim lee mandha, man gineno nia ng’om mi Yazer ku Gilead tie kabedo ma cuu pir udul lim. 2 Pieno wot Gad man wot Ruben gicidho i bang’ Musa, Eleazar ma jalam, man judongo ma wijo mi cokiri man giwacu kumae: 3 “Atharoth, Dibon, Yazer, Nimra, Hecbon, Eleale, Sebam, Nebo, man Beon, 4 ng’om ma Yehova uvoyo i wang’ cokiri mir Israel tie ng’om ma ber pir udul lim, man jutic peri gitie kud udul lim lee.” 5 Gimedo kumae: “Tek wanwang’u bero i weng’i, wek jumii ng’om maeno ni aba ni jutic peri. Kud iketh wakadh loka Yordan.”

6 E Musa uwacu ni wot Gad man wot Ruben kumae: “Nyo ukwayu umego mwu gicidh i lwiny ma nwang’u wun ke wudong’ wubedo keni? 7 Pirang’o wumito wutur cwiny dhanu mir Israel ku kadhu loka i ng’om ma Yehova bimiyo igi kokoro? 8 Eno lembe ma wegwu gitimo saa m’aorogi kud i Kadec-barnea, nia gicidh ginen ng’om. 9 Saa ma giidho nitundo i Poga* mir Eckol man gineno ng’ombe, gituro cwiny dhanu mir Israel ku mondo i ng’om ma Yehova ubecimiyo igi. 10 E ng’eicwiny pa Yehova ugam uopo i kum ju maeca, uketho ekwong’o kumae: 11 ‘Ju m’uwok kud i Misiri ma oro migi caku niai pier ario niidho malu gibineno ngo ng’om m’akwong’o pire ni Abraham, Isak, man Yakobo, pilembe gilubo ngo toka ku cwinygi zoo, 12 ndhu Kaleb ma wod Yefune ma Jakenizi man Yocuwa ma wod Nun kendgi, pilembe gilubo tok Yehova ku cwinygi zoo.’ 13 Pieno ng’eicwiny pa Yehova uopo i kum Israel man eketho gitangatanga i langa pi oro pier ang’wen, nitundo ma dhanu m’utuk ceke m’ubino timo lembe ma rac i wang’ Yehova githum ko. 14 Man kawoni wutuk kaka wegwu calu udul judubo m’uopo lak kwinyo pa Yehova i kum Israel. 15 Tek wulokuru man wuweko lubo toke, ebiweko Israel kendo andha i langa, man wubikelo nyoth iwi dhanu maeni ceke.”

16 I ng’ey kare, gicidho i bang’e man giwacu kumae: “Wek wagier dwol mi kidi keni pir udul lim mwa man adhura pir awiya mwa. 17 Ento wabibedo asu ayika pi lwiny man wabitelo yo i wang’ Juisrael nitundo ma wabiterogi i kabedo migi, ma nwang’u awiya mwa udong’ i adhura ma tek ma jutieko kumgi ku gang’ man gitie agwoka ni dhanu ma bedo i ng’ombe. 18 Wabidok ungo i udi mwa nitundo ma ng’atuman m’i kind Juisrael bimaku ng’om pare ni giralaga. 19 Kum wabinwang’u ngo giralaga karacelo kugi yo loka Yordan man nikadhu, pilembe wadaru nwang’u giralaga mwa yo nyangu mi Yordan.”

20 Musa udwoko igi kumae: “Tek wubitimo lembe ma e: tek wuting’o jamlwiny mwu i wang’ Yehova pi lwiny; 21 man tek ng’atuman acel acel m’i kindwu uting’o jamlwiny pare, man ekadhu loka Yordan i wang’ Yehova kinde m’eberiemo cen judegi pare kud i wang’e 22 nitundo ma jubidwoko ng’ombe wor i wang’ Yehova, kan wucopo dwogo man wubibedo agonya ni kosa i wang’ Yehova man i wang’ Israel. I ng’eye, ka ng’om maeni bidoko ni aba mwu i wang’ Yehova. 23 Ento tek wutimo ngo lembuni, nwang’u wudubo ni Yehova. Ka kumeno, wung’ey nia wubivudhuru ngo kud i kum dubo mwu. 24 Pieno, wucopo giero adhura ni awiya mwu, man dwol pir udul lim mwu, ento wucikuru nitimo gin ma wung’olo.”

25 Wot Gad man wot Ruben gidwoko ni Musa kumae: “Jutic peri bitimo tap calu ma rwoth para ubeng’olo.” 26 Awiya mwa, mon mwa, udul lim mwa, man leya mwa ceke mi pacu bidong’ i adhura mi Gilead, 27 ento jutic peri bikadhu loka, jumaco ceke m’utie ku jamlwiny pi nicikiedo lwiny i wang’ Yehova, tap calu ma rwoth para ubeyero.”

28 Pieno Musa umiyo lembang’ola pigi ni Eleazar ma jalam, ni Yocuwa ma wod Nun, man ni jutelwic mi thepacu mi suru mir Israel. 29 Musa uyero igi kumae: “Tek wot Gad man wot Ruben gikadhu loka Yordan karacelo kudwu, jumaco ceke m’utie ku jamlwiny pi nikiedo lwiny i wang’ Yehova, man tek ng’ombe udoko wor i weng’wu, e wubimiyo igi ng’om mi Gilead ni aba. 30 Ento tek giting’o ngo jamlwiny man gikadhu ngo kudwu loka, e gibibedo i kindwu i ng’om mi Kanan.”

31 Wot Gad man wot Ruben gigam gidwoko kumae: “Wabitimo gin ma Yehova uyero ni jutic peri. 32 Wabiting’o jamlwiny man wabikadhu loka i ng’om mi Kanan i wang’ Yehova, ento aba ma wabilagu bibedo i thenge maeni mi Yordan.” 33 Pieno Musa umiyo igi, niwacu wot Gad, wot Ruben, man nusu suru pa Manase ma wod Yozefu ker pa Sihon m’ubimo mi Juamor man ker pa Og m’ubimo mi Bacan; niyero ng’om mir adhurane ma n’i theng ng’om maeno, man adhura ma tung’ tung’ m’utieko ng’et ng’ombe.

34 Man wot Gad gigiero* Dibon, Atharoth, Aroer, 35 Athroth-cofan, Yazer, Yogbeha, 36 Beth-nimra, man Beth-haran ma gin adhura ma tek ma jutieko kumgi ku gang’kidi, man gigiero bende dwol pir udul lim. 37 Man wot Ruben gigiero Hecbon, Eleale, Kiriathaim, 38 Nebo, Baal-meon ma nying’gi judog juwilo, man Sibma; e gikwong’o caku nying’ mange i kum adhura ceke ma gidog gigiero.

39 Wot Makir ma wod Manase gikiedo i dhu Gilead man gimake; giriemo bende Juamor ma nwang’u bedo i iye. 40 Pieno Musa umiyo Gilead ni Makir ma wod Manase, man ecaku bedo i iye. 41 Man Yair ma wod Manase ukiedo i dhoggi man emaku kagonjo migi, man ecaku nying’gi Havoth-yair.* 42 Noba de ukiedo man emaku Kenath ku nyithindh adhura m’i ng’ete, man ecaku nying’ adhurane Noba calku nyinge.

33 Maeni ubino kaka ma dhanu mir Israel giwotho gonjo i iye saa ma giwok kud i ng’om mi Misiri calkud udul migi i the telowic pa Musa gikud Arun. 2 Musa ubed ugoro kaka ma gibed gitugo iye woth nimakere ku kaka ma gibed gigonjo i iye i woth migi calku lembe ma Yehova ung’olo, man maeni tie ka ma gibed gitugo woth kud i iye niai i kabedo acel pi nicidho i kabedo mucelo: 3 Gitugo woth niai kud i Ramses i dwi ma kwong’a, i nindo apar abic mi dwije. Tap i nindo m’i ng’ey Kadhukuwijo, Juisrael giwok ma cwinygi tek* i wang’ Jumisiri ceke. 4 I saa ma rom eno, Jumisiri gibino kunyo kayu migi ceke ma Yehova unego i kindgi, kum Yehova ukelo pokolembe iwi mungu migi.

5 E Juisrael gitugo woth kud i Ramses man giwok gigonjo i Sukoth. 6 Gidog gitugo woth kud i Sukoth man giwok gigonjo i Etham ma n’i dhu langa. 7 I ng’eye gitugo woth kud i Etham man gidok ku ng’eygi yor i Pihahiroth m’ubeneno Baal-zefon man giwok gigonjo i wang’ Migdol. 8 I ng’ey maeno, gitugo woth kud i Pihahiroth man gikadhu kud i die nam gicidho nitundo i langa; giwotho woth mi bang’ adek i langa mir Etham man giwok gigonjo i Mara.

9 Gilund giai kud i Mara man gitundo i Elim. Nwang’u kulo apar ario man tiend ngasi pier abiro ni i Elim keca, e giwok gigonjo keca. 10 I ng’eye gitugo woth kud i Elim man giwok gigonjo i dhu Nam ma kwar. 11 I ng’ey maeno gitugo woth kud i dhu Nam ma kwar man giwok gigonjo i langa mi Sin. 12 Gidog gitugo woth kud i langa mi Sin man giwok gigonjo i Dofka. 13 I ng’ey kare gitugo woth kud i Dofka man giwok gigonjo i Aluc. 14 Gidog gitugo woth kud i Aluc man giwok gigonjo i Refidim, kaka ma pii ubino mbe i iye ma dhanune giromo madhu. 15 I ng’ey maeno gitugo woth kud i Refidim man giwok gigonjo i langa mi Sinai.

16 Gitugo woth kud i langa mi Sinai man giwok gigonjo i Kibroth-hatava. 17 Gidog gitugo woth kud i Kibroth-hatava man giwok gigonjo i Hazeroth. 18 I ng’ey maeno gitugo woth kud i Hazeroth man giwok gigonjo i Rithma. 19 I ng’eye, gitugo woth kud i Rithma man giwok gigonjo i Rimon-perez. 20 Gidog gitugo woth kud i Rimon-perez man giwok gigonjo i Libna. 21 Gitugo woth kud i Libna man giwok gigonjo i Risa. 22 I ng’eye gitugo woth kud i Risa man giwok gigonjo i Kehelatha. 23 Gidog gitugo woth kud i Kehelatha man giwok gigonjo i kum Got Cefer.

24 I ng’ey maeno, gitugo woth kud i kum Got Cefer man giwok gigonjo i Harada. 25 Gidog gitugo woth kud i Harada man giwok gigonjo i Makeloth. 26 I ng’eye gitugo woth kud i Makeloth man giwok gigonjo i Tahath. 27 I ng’ey maeno, gitugo woth kud i Tahath man giwok gigonjo i Tera. 28 Gidog gitugo woth kud i Tera man giwok gigonjo i Mithka. 29 I ng’ey kare, gitugo woth kud i Mithka man giwok gigonjo i Hacmona. 30 I ng’eye, gitugo woth kud i Hacmona man giwok gigonjo i Moseroth. 31 Gidog gitugo woth kud i Moseroth man giwok gigonjo i Bene-yakan. 32 Man gitugo woth kud i Bene-yakan giwok gigonjo i Hor-hagidgad. 33 I ng’eye gitugo woth kud i Hor-hagidgad man giwok gigonjo i Yotbatha. 34 I ng’ey kare gitugo woth kud i Yotbatha man giwok gigonjo i Abrona. 35 Gidog gitugo woth kud i Abrona man giwok gigonjo i Ezion-geber. 36 I ng’ey maeno, gitugo woth kud i Ezion-geber man giwok gigonjo i langa mi Zin, niwacu Kadec.

37 I ng’ey kare, gitugo woth kud i Kadec man giwok gigonjo i kum Got Hor, i kieu mi ng’om mir Edom. 38 Man Arun ma jalam uidho iwi Got Hor calku lembe ma Yehova ung’olo man etho keca i oro mi pier ang’wende i ng’ey ma Juisrael giweko ng’om mi Misiri, i dwi mir abije, i nindo ma kwong’a mi dwije. 39 Arun ubino ku oro dak acel ku pier ario wi adek saa m’etho iwi Got Hor.

40 Nwang’u ubimo mir Arad ma Jakanan ma bedo i Negeb i ng’om mi Kanan uwinjo nia Juisrael gibebino.

41 I ng’ey kare, gitugo woth kud i kum Got Hor man giwok gigonjo i Zalmona. 42 I ng’ey maeno gitugo woth kud i Zalmona man giwok gigonjo i Punon. 43 I ng’eye gitugo woth kud i Punon man giwok gigonjo i Oboth. 44 Gidog gitugo woth kud i Oboth man giwok gigonjo i Iye-abarim, i mupaka mi Moab. 45 I ng’ey kare gitugo woth kud i Iyim man giwok gigonjo i Dibon-gad. 46 I ng’ey maeno gitugo woth kud i Dibon-gad man giwok gigonjo i Almon-diblathaim. 47 I ng’eye gitugo woth kud i Almon-diblathaim man giwok gigonjo iwi gudi mir Abarim i wang’ Nebo. 48 Tokcenne gitugo woth kud i kum gudi mir Abarim man giwok gigonjo i pambu mi langa mi Moab, ceng’ini ku Yordan yor i bang’ Yeriko. 49 Gigonjo asu i dhu Yordan niai i Beth-yecimoth nitundo bir i Abel-cithim, i pambu mi langa mi Moab.

50 Yehova uweco i bang’ Musa i langa mi pambu mi Moab i dhu Yordan yor i bang’ Yeriko, eyero kumae: 51 “Wec ku Juisrael man iwac igi kumae: ‘Wubekadhu loka Yordan pi nimondo i ng’om mi Kanan. 52 Wucikuru niriemo dhanu ceke m’i ng’ombe kud i weng’wu, ninyotho kidi migi ceke m’ang’ika kud ayi gin m’acwiya migi ceke mi cuma, man wucikuru nirwombo kaka ma malu migi ceke mi thier. 53 Wubimaku ng’ombe ni aba man wubibedo i iye, pilembe abimiyo ng’ombe andha iwu ni aba. 54 Wubipoko ng’om ku gagi ni aba i kind juruot mwu. Wubimedo giralaga ni ungu ma wendgi lee, man ni ungu ma wendgi nok ke wubijwigo giralaga migi. Ng’atuman binwang’u giralaga kaka ma gagi pare bipodho i iye. Wubinwang’u ng’om mwune ni giralaga calku suru pa wegwu.

55 “‘Ento tek wuriemo ngo dhanu mi ng’ombe cen kud i weng’wu, ju ma wuweko udong’ bibedo calu piny ma cobojo i weng’wu man ukudho i ng’etwu, man gibisendowu i ng’om ma wubibedo i iye. 56 E gin ma nwang’u akeco nia abitimo i kumgi, re m’abitimo i kumwu.’”

34 Man Yehova uweco kendo i bang’ Musa, eyero kumae: 2 “Mii telowic ma e ni Juisrael: ‘Kinde ma wumondo i ng’om mi Kanan, maeni utie ng’om ma jubipoko iwu ni giralaga, ng’om mi Kanan calku kieunegi:

3 “‘Mupaka mwu ma yo piny bicaku niai i langa mi Zin nikadhu kud i ng’et Edom, man kieu mwu ma yo piny ku yo nyangu biai i tung Nam kadu.* 4 Kieu mwu biwiro bidok yo piny yor i bang’ kaidho mir Akrabim man ebimedere nitundo i Zin, man ajikine bibedo yo piny mi Kadec-barnea. Ebicidho nitundo i Hazar-adar man ebimedere nitundo i Azmon. 5 Kieune biwiro kud i Azmon ebidok yor i Ndaba* mi Misiri man ebicijik i Nam.*

6 “‘Kieu mwu ma yo reto bibedo Nam ma dit* man dhu watne. Eno bidoko ni kieu mwu ma yo reto.

7 “‘Maeni bibedo kieu mwu ma yo malu: Niai i Nam ma dit, wubiriedo kieu mwu nitundo i kum Got Hor. 8 Niai kud i kum Got Hor wubiworiedo kieu mwu bicidho yor i Lebo-hamath,* man kieune bicijik i Zedad. 9 Kieune bicidho nitundo i Zifron, man ebicijik i Hazar-enan. Eno re ma bidoko ni kieu mwu ma yo malu.

10 “‘I ng’eye, wubiriedo kieu mwu ma yo nyangu niai i Hazar-enan nitundo i Cefam. 11 Kieune biai niai i Cefam nitundo i Ribla yo nyangu mir Ain, man mupakane biloro yo piny man bikadhu i lung’ ma yo nyangu mi Nam Kinereth.* 12 Kieune bicidho nitundo i Yordan, man ebicijik i Nam kadu. Eno re ma bibedo ng’om mwu man mupaka m’udhoke.’”

13 Man Musa umiyo telowic ni Juisrael, ewacu kumae: “Eno bibedo ng’om ma wubipoko ni aba mwu ku gagi, tap calu ma Yehova ung’olo nia jumii ni suru abung’wen ku nusu. 14 Pilembe suru pa Ruben calku thepacu migi, suru pa Gad calku thepacu migi, man nusu mi suru pa Manase gidaru nwang’u giralaga migi. 15 Suru ario ku nusu udaru nwang’u giralaga migi yo nyangu mi ng’om mi Yordan yor i Yeriko, yo ka ma ceng’ wok kud i iye.”

16 Yehova uweco kendo i bang’ Musa, eyero kumae: 17 “Maeni tie nying’ jumaco ma bipoko iwu ng’om ni aba: Eleazar ma jalam, man Yocuwa ma wod Nun. 18 Man ibigamu jadit ma wijo acel acel kubang’ suruman pi nipoko ng’om ni giralaga mwu. 19 Maeni nying’ jumacone: niai kud i suru pa Yuda, Kaleb ma wod Yefune; 20 niai kud i suru mi wot Simeon, Cemuel ma wod Amihud; 21 niai kud i suru pa Benjamin, Elidad ma wod Kislon; 22 niai kud i suru mi wot Dan, jadit ma wijo acel, Buki ma wod Yogli; 23 kud i kind wot Yozefu niai kud i suru mi wot Manase, jadit ma wijo acel, Haniel ma wod Efod; 24 niai kud i suru mi wot Efraim, jadit ma wijo acel, Kemuel ma wod Ciftan; 25 niai kud i suru mi wot Zebulon, jadit ma wijo acel, Elizafan ma wod Parnak; 26 niai kud i suru mi wot Isakar, jadit ma wijo acel, Palthiel ma wod Azan; 27 niai kud i suru mi wot Acer, jadit ma wijo acel, Ahihud ma wod Celomi; 28 niai kud i suru mi wot Nafthali, jadit ma wijo acel, Pedahel ma wod Amihud.” 29 Eno tie ju ma Yehova ung’olo nia upok ng’om ni Juisrael i ng’om mi Kanan.

35 Yehova umedere niweco i bang’ Musa i pambu mi langa mi Moab i dhu Yordan yor i bang’ Yeriko, eyero kumae: 2 “Ng’ol ni Juisrael nia gimii adhura ni Julawi ni kabedo kud i kum giralaga ma gibinwang’u ni aba, man gicikiri nimiyo luba ni Julawi i ng’et adhuranegi tingili. 3 Gibibebedo i adhuranegi man luba bibedo pir udul lim migi, piny migi, man pi lei migi mange ceke. 4 Luba mir adhura ma tung’ tung’ ma wubimiyo ni Julawi bibedo bot* elufu acel (1 000) niai i kum gang’kidi m’utieko adhurane ceke tingili. 5 Wubipimo bot elufu ario (2 000) i ng’ey adhura i ng’ete ma yo nyangu, bot elufu ario i ng’ete ma yo piny, bot elufu ario i ng’ete ma yo reto, man bot elufu ario i ng’ete ma yo malu, man adhura bibedo i dierene. Eno bibedo luba mir adhuranegi.

6 “Adhura ma tung’ tung’ ma wubimiyo ni Julawi bibedo adhura abusiel mi karingo ma wubimiyo, kara ng’atu m’unego nek uringi i iye, man bende adhura mange pier ang’wen wi ario. 7 Adhura ceke ma wubimiyo ni Julawi bibedo pier ang’wen wi abora karacelo ku lubanegi. 8 Adhura ma tung’ tung’ ma wubimiyo igi biai kud i kum aba mi Juisrael. I bang’ ungu ma wendgi lee wubigamu dupa, man i bang’ ungu ma wendgi nok wubigamu nyanok. Unguman bimiyo kum adhura pare ni Julawi nimakere ku giralaga m’enwang’u.”

9 Yehova umedere niweco i bang’ Musa, ewacu kumae: 10 “Wec ku Juisrael man iwac igi kumae: ‘Wubekadhu loka Yordan pi nimondo i ng’om mi Kanan. 11 Wubiwong’iyo iwu adhura ma tundo i igi yot pi nibedo ni adhura mi karingo, kaka ma ng’atu m’unego dhanu* akakaka ngo romo ringo i iye. 12 Adhuranegi bibedo kaka ma wubiberingo i iye jaculkwor mi rimo, kara ng’atu m’unego nek kud utho nitundo m’ecung i pokolembe i wang’ cokiri. 13 Adhura abusiel mi karingo ma wubimiyo bikonyo pi lembe maeno. 14 Wubimiyo adhura adek i theng Yordan ma yo kuni man adhura adek i ng’om mi Kanan kara ubed ni adhura mi karingo. 15 Adhura abusiel maeno bibedo ni karingo pi Juisrael, pir umondo, man pi jabedo ma n’i kindgi, kara ng’atu moko ci m’unego dhanu* akakaka ngo uring kuca.

16 “‘Ento tek egoye kud umbu mi cuma man etho, e nwang’u e janek. Janekne jucikiri ninege andha. 17 Tek egoye ku kidi ma romo nege man etho, e nwang’u e janek. Janekne jucikiri ninege andha. 18 Tek egoye kud umbu mi yen ma romo nege man etho, e nwang’u e janek. Janekne jucikiri ninege andha.

19 “‘Jaculkwor mi rimo re ma tie ng’atu ma binego janekne. Tek erombo kude, en re m’ebinege. 20 Tekene thone uwok pilembe ecwale nikum adegi kunoke ecanye ku piny moko ku paru ma rac,* 21 kunoke egoye ku cinge nikum adegi m’edage ko man etho, jubinego ng’atu m’ugoyene andha. Etie janek. Jaculkwor mi rimo binego janekne saa m’ebirombo kude.

22 “‘Ento tek ecwale ngo mir akakaka kadi nikum adegi m’edage ko, kunoke ecanye ku piny moko ci ma nwang’u embe ku paru ma rac,* 23 kunoke eketho kidi upodho i wiye kinde m’ebenene ngo, man ma nwang’u edage de ngo kunoke ebeyenyo de ngo etime rac, man ng’atune utho, 24 e cokiri ucikiri nipoko lembe i kind ng’atu m’ugoye ku jaculkwor mi rimo nimakere ku pokolembe maeni. 25 Cokiri bibodho ng’atu m’unego nekne kud i cing’ jaculkwor mi rimo man bidwoke i adhura pare mi karingo ma nwang’u eringo i iye, man ecikere nibedo kuca nitundo ma jalam ma dit ma juwiro ku mo ma leng’ bitho.

26 “‘Ento tek ng’atu m’unego nekne ukadhu kieu mir adhura pare mi karingo ma nwang’u eringo i iye, 27 man jaculkwor mi rimo uwok unwang’e woko i ng’ey kieu mir adhura pare mi karingo man unege, rimbe bibedo mbe i wiye. 28 Kum ecikere nibedo i adhura pare mi karingo nitundo ma jalam ma dit bitho. Ento i ng’ey tho pa jalam ma dit, ng’atu m’unego nekne romo dwogo i dhu ng’om pare. 29 Lembe maeno bibedo iwu ni cik mi pokolembe i kind dhanu m’utuk mwu ceke i kabedo mwu zoo.

30 “‘Ng’atu ma tek unego dhanu* jucikiri ninege calu janek nikum lembatuca mi* jumulembe; ento jubinego ngo ng’atu* moko nikum lembatuca pa jamulembe acel kende. 31 Kud wuyii jamgony pi kwo pa janek m’uromo ku tho, kum jucikiri ninege andha. 32 Man kud wuyii jamgony pi ng’atu m’uringo i adhura pare mi karingo, ma nia wuweke edwog ko i ng’om pare ma fodi jalam ma dit utho ngo.

33 “‘Kud wucid ng’om ma wukwo i iye, kum rimo cido ng’om, man juromo timo ngo adunya pi rimo m’ucwir i ng’ombe, ndhu ku rimb ng’atu m’ucwiro rimone. 34 Kud wucid ng’om ma wubedo i iye, ma an de abedo i iye, kum an a Yehova, abedo i kind dhanu mir Israel.’”

36 Jutelwic mi udi mi nyikway Gilead ma wod Makir ma wod Manase mi suru mi wot Yozefu ubino man uweco i wang’ Musa ku judongo ma wijo ma gi jutelwic mi udi mi Juisrael. 2 Giwacu kumae: “Yehova ung’olo ni rwoth para nia epok ng’om ku gagi ni giralaga ni Juisrael; man Yehova ung’olo ni rwoth para nia emii giralaga p’umegwa ma Zelofehad ni jumanyir pare. 3 Tek gigiero jumaco mi suru mange mi Juisrael, e jubiwodho bende giralaga mi jumamonne kud i kum giralaga pa wegwa man jubimede i kum giralaga mi suru ma gibidobedo i iye, e jubiwodho giralaga mwa ma jumiyo ku gagi. 4 Man tek kare mi Jibile biromo pi dhanu mir Israel, e jubiwodho giralaga mi jumamonne bende i suru ma gibidobedo i iye, pieno jubiwodho giralaga migi kud i kum giralaga mi suru pa wegwa.”

5 E Musa uyero ni Juisrael calku lembe ma Yehova ung’olo kumae: “Lembe ma suru mi wot Yozefu gibeyero utie lemandha. 6 Maeni tie lembe ma Yehova ung’olo pi jumanyir pa Zelofehad: ‘Giromo giero ng’atu moko ci ma gifoyo. Re, gicikiri nigiero ng’atu m’i kind wat mi suru pa weggi. 7 Giralaga mi Juisrael ucikere ngo nidak i kind suru ma tung’ tung’, kum Juisrael gicikiri nimoko i kum giralaga mi suru pa kwarugi. 8 Man nyaku moko ci m’utie ku giralaga i kind suru mir Israel ucikere nidoko dhaku pa nyakwar ng’atu acel mi suru pa won, kara Juisrael gigwok aba mi giralaga pa kwarugi. 9 Giralaga ucikere ngo niai i suru acel pi nidok i suru ma kucelo, kum suru mir Israel ucikere nimoko i kum giralaga migi.’”

10 Jumanyir pa Zelofehad gitimo tap calu ma Yehova ung’olo ni Musa. 11 E Mala, Tirza, Hogla, Milka, man Noa, ma gi jumanyir pa Zelofehad gigiero wot umego pa weggi. 12 Gigiero jumaco mi wat pa Manase ma wod Yozefu, kara giralaga migi ubed i suru mi wat pa weggi.

13 Maeno tie lembang’ola man cik mi pokolembe ma Yehova umiyo ni Juisrael nikadhu kud i bang’ Musa i pambu mi langa mi Moab i dhu Yordan yor i bang’ Yeriko.