ኢየሱስ ከሞት ተነሳ

ኢየሱስ ከሞተ በኋላ ዮሴፍ የሚባል አንድ ሀብታም ሰው ወደ ጲላጦስ ሄዶ የኢየሱስን አስከሬን ከእንጨቱ ላይ አውርዶ ለመውሰድ ጠየቀ። ዮሴፍ አስከሬኑን ወስዶ በጨርቅ ከጠቀለለው በኋላ በአዲስ መቃብር ውስጥ አስቀመጠው። ከዚያም መቃብሩ በትልቅ ድንጋይ እንዲዘጋ አደረገ። የካህናት አለቆቹ ጲላጦስን ‘አንዳንድ የኢየሱስ ደቀ መዛሙርት መጥተው አስከሬኑን በመውሰድ ኢየሱስ ከሞት ተነስቷል ብለው ሊያስወሩ ይችላሉ’ አሉት። ስለዚህ ጲላጦስ ‘መቃብሩን አሽጉት፤ ከዚያም ጠባቂዎችን አቁሙ’ አላቸው።

ከሦስት ቀን በኋላ፣ አንዳንድ ሴቶች በጠዋት ወደ መቃብሩ ሲሄዱ ድንጋዩ ከመቃብሩ መግቢያ ላይ ተንከባሎ አገኙት። በዚያ የነበረ አንድ መልአክ ሴቶቹን እንዲህ አላቸው፦ ‘አትፍሩ። ኢየሱስ ተነስቷል። ሂዱና ለደቀ መዛሙርቱ ወደ ገሊላ ሄደው ኢየሱስን እንዲያገኙት ንገሯቸው።’

መግደላዊቷ ማርያም ጴጥሮስንና ዮሐንስን ለማግኘት ፈጥና ሄደች። ባገኘቻቸውም ጊዜ ‘የኢየሱስ አስከሬን ተወስዷል!’ ብላ ነገረቻቸው። ጴጥሮስና ዮሐንስ እየሮጡ ወደ መቃብሩ ሄዱ። ከዚያም መቃብሩ ባዶ መሆኑን ሲያዩ ወደ ቤታቸው ተመለሱ።

ማርያም ወደ መቃብሩ ስትመለስ በመቃብሩ ውስጥ ሁለት መላእክት አየች፤ እነሱንም ‘ጌታዬን ወዴት እንደወሰዱት አላውቅም’ አለቻቸው። ከዚያም አንድ ሰው አየች፤ ይህ ሰው አትክልተኛው ስለመሰላት ‘እባክህ ጌታዬን ወዴት እንደወሰድከው ንገረኝ’ አለችው። ሆኖም ሰውየው “ማርያም!” ብሎ ሲጠራት ኢየሱስ መሆኑን አወቀች። ከዚያም “መምህር!” ብላ ጮኸችና አቀፈችው። ኢየሱስም ‘ወደ ወንድሞቼ ሄደሽ እኔን እንዳየሽኝ ንገሪያቸው’ አላት። ማርያምም ወዲያውኑ ወደ ደቀ መዛሙርቱ ሄዳ ኢየሱስን እንዳየችው ነገረቻቸው።

በዚያው ቀን ሁለት ደቀ መዛሙርት ከኢየሩሳሌም ወደ ኤማሁስ እየተጓዙ ነበር። በመንገድ ላይ ሳሉ አንድ ሰው አብሯቸው መሄድ ጀመረ፤ ከዚያም ስለ ምን እያወሩ እንደሆነ ጠየቃቸው። እነሱም እንዲህ አሉት፦ ‘አልሰማህም እንዴ? ከሦስት ቀን በፊት የካህናት አለቆች ኢየሱስን አስገድለውት ነበር። አሁን ደግሞ አንዳንድ ሴቶች ኢየሱስ ተነስቷል እያሉ ነው!’ ሰውየውም ‘ነቢያት የተናገሩትን ነገር አታምኑም? ክርስቶስ እንደሚሞት ከዚያም እንደሚነሳ ተናግረዋል’ አላቸው። ከዚያም ቅዱሳን መጻሕፍት ምን እንደሚሉ አብራራላቸው። ደቀ መዛሙርቱ ኤማሁስ ሲደርሱ አብሯቸው እንዲያድር ጠየቁት። ራት ለመብላት ተቀምጠው ሳሉ ዳቦውን አንስቶ ሲጸልይ ደቀ መዛሙርቱ ይህ ሰው ኢየሱስ መሆኑን ተገነዘቡ። ከዚያም ኢየሱስ ተሰወረባቸው።

ሁለቱ ደቀ መዛሙርት በፍጥነት ወደ ኢየሩሳሌም ሄዱ፤ በዚያም ሐዋርያቱን አንድ ቤት ውስጥ ተሰብስበው አገኟቸውና ያጋጠማቸውን ነገር ነገሯቸው። ቤቱ ውስጥ እንዳሉ ኢየሱስ ለሁሉም ተገለጠላቸው። በመጀመሪያ ሐዋርያቱ ኢየሱስ መሆኑን አላመኑም ነበር። በኋላ ግን ኢየሱስ እንዲህ አላቸው፦ ‘እጆቼን ተመልከቱ፤ ዳስሳችሁ እዩ። ክርስቶስ ከሞት እንደሚነሳ አስቀድሞ ተጽፏል።’