ልጆቻችሁ በፈጣሪ ላይ የማይናወጥ እምነት እንዲያዳብሩ እርዷቸው

ፍጥረት የይሖዋን ክብር ይናገራል። (መዝ 19:1-4፤ 139:14) ሆኖም ዲያብሎስ የሚቆጣጠረው ዓለም የሕይወትን አመጣጥ በተመለከተ አምላክን የሚያቃልሉ ጽንሰ ሐሳቦችን ያስፋፋል። (ሮም 1:18-25) ታዲያ እንዲህ ያሉት ሐሳቦች በልጆቻችሁ አእምሮና ልብ ላይ ተጽዕኖ እንዳያሳድሩ መከላከል የምትችሉት እንዴት ነው? ከሕፃንነታቸው ጀምራችሁ ይሖዋ እንዳለና በግለሰብ ደረጃ እንደሚያስብላቸው እምነት እንዲያዳብሩ እርዷቸው። (2ቆሮ 10:4, 5፤ ኤፌ 6:16) በትምህርት ቤት ስለሚማሩት ነገር ምን አመለካከት እንዳላቸው ለማወቅ ሞክሩ፤ እንዲሁም የይሖዋ ድርጅት ያዘጋጃቸውን በርካታ መሣሪያዎች በመጠቀም ልባቸውን ለመንካት ጥረት አድርጉ።—ምሳሌ 20:5፤ ያዕ 1:19

እኩዮችህ ምን ይላሉ?—በአምላክ ማመን የተባለውን ቪዲዮ አጫውት፤ ከዚያም በሚከተሉት ጥያቄዎች ላይ ተወያዩ፦

• ብዙዎች በአምላክ ማመንን በተመለከተ ምን የተሳሳተ አመለካከት አላቸው?

• በትምህርት ቤታችሁ ስለዚህ ጉዳይ ምን ትምህርት ይሰጣል?

• ይሖዋ መኖሩን እንድታምኑ ያደረጋችሁ ምንድን ነው?

• አንድ ሰው፣ ሁሉንም ነገር የፈጠረው አምላክ እንደሆነ እንዲገነዘብ ልትረዱት የምትችሉት እንዴት ነው?