ወንድሞቹ የጠነሰሱለትን ሴራ ያልጠረጠረው ዮሴፍ በሰላም እንደሚቀበሉት በማሰብ ወደ እነሱ መጣ። ወንድሞቹ ግን ጥቃት ሰነዘሩበት! የለበሰውን ልዩ ልብስ ከገፈፉት በኋላ ወደ አንድ ደረቅ የውኃ ጉድጓድ እየጎተቱ ወስደው እዚያ ውስጥ ጣሉት! ዮሴፍ ድንጋጤው ሲለቀው እንደምንም ተንገዳግዶ በእግሩ ቆመ፤ ይሁን እንጂ የሚረዳው ሰው ሳይኖር ከጉድጓዱ መውጣት የማይቻል ነገር ነው። ወደ ላይ ሲመለከት ከሰማዩ ሌላ የሚታይ ነገር የለም፤ የወንድሞቹም ድምፅ እየራቀው ሄደ። እየጮኸ ቢማጸናቸውም እንዳልሰሙ ሆነው ጥለውት ሄዱ። ለዮሴፍ ልመና ጆሮ ዳባ በማለት ጨክነው በጉድጓዱ አቅራቢያ ምግባቸውን በሉ። ሮቤል በሌለበት ሰዓት ወንድሞቹ ዮሴፍን ሊገድሉት እንደገና አስበው ነበር፤ ይሁዳ ግን በመግደል ፋንታ በዚያ ለሚያልፉ ነጋዴዎች እንዲሸጡት አግባባቸው። ዶታይን የሚገኘው ወደ ግብፅ በሚወስደው የንግድ መንገድ አቅራቢያ ስለነበረ ብዙም ሳይቆይ እስማኤላውያንና ምድያማውያን ተጓዥ ነጋዴዎች ብቅ አሉ። ሮቤል ከሄደበት ከመመለሱ በፊት ጉዳዩ ተጠናቀቀ። ወንድማቸውን በ20 ሰቅል ለባርነት ሸጡት።b—ዘፍጥረት 37:23-28፤ 42:21