4. ይሖዋ ትሑት መሆኑን የትኞቹ ጥቅሶች ያሳያሉ?

⁴ የሁሉም የበላይ፣ የጽንፈ ዓለሙ ሉዓላዊ ገዥና የዘላለም ንጉሥ የሆነው ይሖዋ አምላክ ትሑት ነው። (ዘፍጥረት 14:​22) ይህ ሊሆን የሚችል ነገር ነውን? አዎን፣ ንጉሥ ዳዊት በመዝሙር 18:​35 ላይ እንደ ተመዘገበው “የማዳን ጋሻህንም ትሰጠኛለህ፤ ቀኝ እጅህም ደግፎ ያቆመኛል፤ የአንተ የራስህ ትሕትናም ታላቅ ያደርገኛል” በማለት ተናግሯል። በግልጽ እንደሚታየው ንጉሥ ዳዊት ታላቅ እንዲሆን ያስቻለውን የይሖዋን ትሕትና አድንቋል። እንደገናም በመዝሙር 113:​6 ላይ እንደ አዲሲቱ ዓለም ትርጉም ይሖዋ “ሰማይንና ምድርን ለማየት ራሱን ዝቅ ያደርጋል” የሚል እናነባለን። ሌሎች ትርጉሞች ደግሞ ይህንን ጥቅስ “ጎንበስ ብሎ የሚመለከት”፣ (ኒው ኢንተርናሽናል ቨርሽን ) “ራሱን ዝቅ አድርጎ የሚመለከት” (ዘ ኒው ኢንግሊሽ ባይብል ) ብለው ተርጉመውታል።

 5. ይሖዋ ትሑት መሆኑን የትኞቹ ሁኔታዎች ይመሰክራሉ?

⁵ ይሖዋ ሰዶምንና ገሞራን ለማጥፋት መወሰኑ የጽድቅ ፍርድ ስለመሆኑ አብርሃም እንዲጠይቅ በመፍቀዱ ራሱን በአብርሃም ፊት ዝቅ አድርጓል።a (ዘፍጥረት 18:​23–32) ይሖዋ የእስራኤልን ሕዝብ አንድ ጊዜ ጣዖት በማምለካቸው ሌላ ጊዜ ደግሞ ዓመፀኛ በመሆናቸው ምክንያት ጠርጎ ሊያጠፋቸው መፈለጉን በተናገረ ጊዜ ሙሴ በሁለቱም ወቅቶች ተራ ከሆነ ሰው ጋር እንደሚነጋገር ከይሖዋ ጋር ተነጋግሯል። በሁለቱም ጊዜያት ይሖዋ ጥያቄውን ተቀብሎለታል። ይሖዋ ስለ ሕዝቡ ስለ እስራኤል ያቀረበውን ልመና ሰምቶ መፈጸሙ ትሑት መሆኑን ያሳያል። (ዘጸአት 32:​9–14፤ ዘኁልቁ 14:​11–20) ይሖዋ ከሰዎች ጋር አፍ ለአፍ በመነጋገር ትሕትና ያሳየባቸው ሌሎች ምሳሌዎች በመሳፍንት 6:​36–40 እና በዮናስ 4:​9–11 ላይ ተመዝግበው የሚገኙት በጌዴዎንና በዮናስ ላይ የደረሱት ሁኔታዎች ናቸው።