ምዕራፍ 15

ኢየሱስ ማን ነው?

በወረቀት የሚታተመው

ኢየሱስ በታሪክ ውስጥ እጅግ ታዋቂ ከሆኑ ሰዎች መካከል አንዱ ነው። ያም ሆኖ ግን ብዙዎች ከስሙ በቀር ስለ እሱ እምብዛም አያውቁም፤ ሰዎች ስለ እሱ ማንነት ያላቸው አመለካከትም የተለያየ ነው። መጽሐፍ ቅዱስ ስለ ኢየሱስ ምን ይላል?

1. ኢየሱስ ማን ነው?

ኢየሱስ በሰማይ የሚኖር ኃያል መንፈሳዊ ፍጡር ነው። ይሖዋ አምላክ ከሌሎች ነገሮች ሁሉ በፊት አስቀድሞ የፈጠረው እሱን ነው። በዚህም ምክንያት “የፍጥረት ሁሉ በኩር” ተብሎ ተጠርቷል። (ቆላስይስ 1:15) መጽሐፍ ቅዱስ ኢየሱስ የአምላክ ‘አንድያ ልጅ’ እንደሆነ ይናገራል፤ ምክንያቱም ይሖዋ በቀጥታ የፈጠረው ኢየሱስን ብቻ ነው። (ዮሐንስ 3:16) ኢየሱስ የአባቱ የይሖዋ የቅርብ ረዳት በመሆን፣ ሌሎች ነገሮችን ሁሉ ሲፈጥር አብሮት ሠርቷል። (ምሳሌ 8:30⁠ን አንብብ።) ኢየሱስ ከዚያ በኋላም ቢሆን ከይሖዋ ጋር ያለውን የቅርብ ዝምድና ይዞ ቀጥሏል። “ቃል” ማለትም የአምላክ ቃል አቀባይ በመሆን የእሱን መልእክቶችና መመሪያዎች በታማኝነት አስተላልፏል።—ዮሐንስ 1:14

2. ኢየሱስ ወደ ምድር የመጣው ለምንድን ነው?

ከ2,000 ዓመታት ገደማ በፊት ይሖዋ በሰማይ የነበረውን የኢየሱስን ሕይወት ማርያም ወደተባለች ድንግል ማሕፀን አዛውሯል፤ ይህን ተአምር የፈጸመው በቅዱስ መንፈሱ ተጠቅሞ ነው። ኢየሱስ ሰው ሆኖ የተወለደው በዚህ መንገድ ነው። (ሉቃስ 1:34, 35⁠ን አንብብ።) ኢየሱስ ወደ ምድር የመጣው በትንቢት የተነገረለት መሲሕ ወይም ክርስቶስ በመሆን የሰው ልጆችን ለማዳን ነው።a ስለ መሲሑ የተነገሩት የመጽሐፍ ቅዱስ ትንቢቶች በሙሉ በእሱ ላይ ተፈጽመዋል። ይህም ሰዎች ኢየሱስ ተራ ሰው ሳይሆን “ክርስቶስ፣ የሕያው አምላክ ልጅ” መሆኑን እንዲያውቁ አስችሏቸዋል።—ማቴዎስ 16:16

3. ኢየሱስ አሁን በምን ሁኔታ ላይ ይገኛል?

ኢየሱስ ሰው ሆኖ በምድር ላይ ያሳለፈውን ሕይወት ካጠናቀቀ በኋላ መንፈስ ሆኖ ከሞት በመነሳት ወደ ሰማይ ተመልሷል። በዚያም “አምላክ የላቀ ቦታ በመስጠት ከፍ ከፍ አደረገው።” (ፊልጵስዩስ 2:9) በአሁኑ ጊዜ ኢየሱስ ከይሖዋ ቀጥሎ ያለውን ከፍተኛ ሥልጣን ይዟል።

ጠለቅ ያለ ጥናት

ኢየሱስ በእርግጥ ማን እንደሆነና ስለ እሱ ማወቅ አስፈላጊ የሆነው ለምን እንደሆነ በስፋት እንመለከታለን።

መጥምቁ ዮሐንስ ኢየሱስን ካጠመቀው በኋላ ሁለቱም ውኃው ውስጥ ቆመው ከሰማያት ድምፅ ሲሰሙ

4. ኢየሱስ ሁሉን ቻይ አምላክ አይደለም

ኢየሱስ በሰማይ ያለ ኃያል መንፈሳዊ ፍጡር ቢሆንም አምላኩና አባቱ ለሆነው ለይሖዋ እንደሚገዛ መጽሐፍ ቅዱስ ያስተምራል። እንዲህ የምንለው ለምንድን ነው? ኢየሱስ ሁሉን ቻይ ከሆነው አምላክ አንጻር ስላለው ቦታ መጽሐፍ ቅዱስ ምን እንደሚያስተምር ለማየት ቪዲዮውን ተመልከቱ።

ቪዲዮ፦ ኢየሱስ ክርስቶስ አምላክ ነው? (3:22)

የሚከተሉት ጥቅሶች ይሖዋና ኢየሱስ ስላላቸው ቦታ ለማወቅ ይረዱናል። እያንዳንዱን ጥቅስ አንብቡ፤ ከዚያም በጥያቄዎቹ ላይ ተወያዩ።

ሉቃስ 1:30-32⁠ን አንብቡ።

መልአኩ በኢየሱስና ‘በልዑሉ አምላክ’ በይሖዋ መካከል ያለውን ዝምድና የገለጸው እንዴት ነው?

ማቴዎስ 3:16, 17⁠ን አንብቡ።

ኢየሱስ በተጠመቀበት ወቅት ከሰማያት ምን የሚል ድምፅ ተሰማ?
ይህ ድምፅ የማን ይመስልሃል?

ዮሐንስ 14:28⁠ን አንብቡ።

ከአባትና ከልጅ በዕድሜም ሆነ በሥልጣን የሚበልጠው ማን ነው?
ኢየሱስ ይሖዋን “አብ” ወይም አባት ብሎ መጥራቱ ምን ያመለክታል?

ዮሐንስ 12:49⁠ን አንብቡ።

ኢየሱስ እሱና አባቱ እኩል እንደሆኑ ያስባል? አንተስ ስለዚህ ጉዳይ ምን ይሰማሃል?

5. ኢየሱስ መሲሕ እንደሆነ እንዴት እናውቃለን?

መጽሐፍ ቅዱስ መሲሑን ማለትም በአምላክ የተመረጠውን የሰው ዘር አዳኝ ለይቶ ለማወቅ የሚያስችሉ በርካታ ትንቢቶችን ይዟል። ኢየሱስ ወደ ምድር በመጣበት ወቅት በእሱ ላይ ፍጻሜያቸውን ያገኙ አንዳንድ ትንቢቶችን ለማየት ቪዲዮውን ተመልከቱ።