ምዕራፍ 05

መጽሐፍ ቅዱስ የአምላክ ቃል ነው

በወረቀት የሚታተመው

ይሖዋ ልዩ ስጦታ ሰጥቶናል፤ ይህ ስጦታ መጽሐፍ ቅዱስ ሲሆን በውስጡ 66 ትናንሽ መጻሕፍትን ይዟል። ሆኖም ‘መጽሐፍ ቅዱስ ወደ እኛ የደረሰው እንዴት ነው? የዚህ መጽሐፍ ባለቤት ማን ነው?’ ብለህ ትጠይቅ ይሆናል። በዚህ ምዕራፍ ውስጥ የእነዚህን ጥያቄዎች መልስ እንመለከታለን።

1. መጽሐፍ ቅዱስን የጻፉት ሰዎች ከሆኑ የአምላክ ቃል ነው ሊባል የሚችለው እንዴት ነው?

መጽሐፍ ቅዱስን የጻፉት 40 የሚሆኑ ሰዎች ናቸው፤ የተጻፈውም ከ1513 ዓ.ዓ. እስከ 98 ዓ.ም. ድረስ ባሉት 1,600 ዓመታት ገደማ ውስጥ ነው። ጸሐፊዎቹ የተለያየ አስተዳደግና የኑሮ ደረጃ ያላቸው ናቸው። ያም ቢሆን ሁሉም የመጽሐፍ ቅዱስ ክፍሎች እርስ በርስ ይስማማሉ። ይህ ሊሆን የቻለው እንዴት ነው? መጽሐፍ ቅዱስ የአምላክ ቃል ስለሆነ ነው። (1 ተሰሎንቄ 2:13⁠ን አንብብ።) ጸሐፊዎቹ የመዘገቡት የራሳቸውን ሐሳብ አይደለም። ከዚህ ይልቅ ‘ከአምላክ የተቀበሉትን በመንፈስ ቅዱስ ተገፋፍተው ተናግረዋል።’a (2 ጴጥሮስ 1:21) አምላክ ሰዎች የእሱን ሐሳብ እንዲጽፉ ለመምራት ወይም ለማነሳሳት መንፈስ ቅዱስን ተጠቅሟል።—2 ጢሞቴዎስ 3:16

2. መጽሐፍ ቅዱስን የማንበብ አጋጣሚ ያላቸው እነማን ናቸው?

“በምድር ላይ [የሚኖር] ብሔር፣ ነገድ፣ ቋንቋና ሕዝብ ሁሉ” በመጽሐፍ ቅዱስ ውስጥ የሚገኘውን ምሥራች የመስማት አጋጣሚ አለው። (ራእይ 14:6⁠ን አንብብ።) አምላክ መጽሐፍ ቅዱስ በታሪክ ዘመናት ውስጥ ከተዘጋጁት መጻሕፍት ሁሉ ይበልጥ በብዙ ቋንቋዎች እንዲገኝ አድርጓል። ሁሉም ሰው ማለት ይቻላል፣ መጽሐፍ ቅዱስን ማንበብ የሚችልበት አጋጣሚ አለው። ሰዎች የሚኖሩት የትም ይሁን የት ወይም የሚናገሩት ቋንቋ ምንም ይሁን ምን መጽሐፍ ቅዱስን ማግኘት ይችላሉ።

3. ይሖዋ መጽሐፍ ቅዱስ እስከ ዘመናችን ድረስ ተጠብቆ እንዲቆይ ያደረገው እንዴት ነው?

መጽሐፍ ቅዱስ የተጻፈው እንደ ቆዳና ፓፒረስ ባሉ በጊዜ ሂደት ሊበላሹ የሚችሉ ነገሮች ላይ ነው። ሆኖም ለመጽሐፍ ቅዱስ ጥልቅ ፍቅር ያላቸው ሰዎች መልእክቱን በእጃቸው በጥንቃቄ ይገለብጡ ነበር። ከፍተኛ ሥልጣን ያላቸው ሰዎች መጽሐፍ ቅዱስን ለማጥፋት ጥረት ቢያደርጉም አንዳንዶች ሕይወታቸውን ጭምር አደጋ ላይ በመጣል መጽሐፍ ቅዱስን ታድገዋል። ይሖዋ ምንም ነገር ወይም ማንኛውም አካል ሐሳቡን ለእኛ ከመግለጽ እንዲያግደው አልፈቀደም። መጽሐፍ ቅዱስ “የአምላካችን ቃል . . . ለዘላለም ጸንቶ ይኖራል” ይላል።—ኢሳይያስ 40:8

ጠለቅ ያለ ጥናት

አምላክ ሰዎች የእሱን ሐሳብ እንዲጽፉ፣ መጽሐፍ ቅዱስ ተጠብቆ እንዲቆይና ወደ ሰዎች እጅ እንዲደርስ ያደረገው እንዴት እንደሆነ እንመለከታለን።

4. መጽሐፍ ቅዱስን በማንበብ ስለ መጽሐፉ ባለቤት ማወቅ እንችላለን

ቪዲዮውን ተመልከቱ። ከዚያም 2 ጢሞቴዎስ 3:16⁠ን አንብቡና በሚከተሉት ጥያቄዎች ላይ ተወያዩ፦

ቪዲዮ፦ የመጽሐፍ ቅዱስ ባለቤት ማን ነው?—ተቀንጭቦ የተወሰደ (2:48)

መጽሐፍ ቅዱስን የጻፉት ሰዎች ከሆኑ የአምላክ ቃል ሊባል የሚችለው እንዴት ነው?
አምላክ መጽሐፍ ቅዱስን ለጻፉት ሰዎች ሐሳቡን አስተላልፏል ብሎ ማመን ምክንያታዊ ይመስልሃል?

አንድ አለቃ ለጸሐፊው መልእክቱን ሲነግረውና ጸሐፊው መልእክቱን ሲጽፍ — አንድ ጸሐፊ፣ አለቃው የነገረውን መልእክት ተቀብሎ ደብዳቤ ሊጽፍ ይችላል፤ ሆኖም የመልእክቱ ባለቤት ጸሐፊው ሳይሆን አለቃው ነው። በተመሳሳይም መጽሐፍ ቅዱስን የጻፉት፣ ሰዎች ቢሆኑም የመልእክቱ ምንጭ አምላክ ነው

5. መጽሐፍ ቅዱስ ብዙ መሰናክሎችን አልፏል

መጽሐፍ ቅዱስ የአምላክ ቃል ከሆነ አምላክ ተጠብቆ እንዲቆይ እንደሚያደርገው ግልጽ ነው። በታሪክ ዘመናት ሁሉ ከፍተኛ ሥልጣን ያላቸው ሰዎች መጽሐፍ ቅዱስን ለማጥፋት ጥረት ሲያደርጉ ቆይተዋል። የሃይማኖት መሪዎች መጽሐፍ ቅዱስ ወደ ሰዎች እጅ እንዳይገባ ለማድረግ ሞክረዋል። ሆኖም በርካታ ሰዎች ተቃውሞና የሞት ዛቻ ቢደርስባቸውም ሕይወታቸውን አደጋ ላይ ጥለው መጽሐፍ ቅዱስ ተጠብቆ እንዲቆይ አድርገዋል። እንዲህ ካደረጉ ሰዎች መካከል ስለ አንዱ ለማወቅ ቪዲዮውን ተመልከቱ፤ ከዚያም በሚከተሉት ጥያቄዎች ላይ ተወያዩ፦