ዮሐንስ ስለ ኢየሱስ ጥያቄ አቀረበ

መጥምቁ ዮሐንስ ወህኒ ከወረደ አንድ ዓመት ገደማ ሆኖታል። እዚያም ሆኖ ኢየሱስ ስላከናወናቸው ተአምራት ይሰማል። የዮሐንስ ደቀ መዛሙርት፣ ኢየሱስ በናይን የአንዲትን መበለት ልጅ ከሞት እንዳስነሳ ሲነግሩት ዮሐንስ ምን ተሰምቶት እንደሚሆን አስበው። ያም ቢሆን ዮሐንስ ይህ ምን ትርጉም እንዳለው በቀጥታ ከኢየሱስ መስማት ፈለገ። ስለዚህ ዮሐንስ ሁለት ደቀ መዛሙርቱን ጠራቸው። ምን እንዲያደርጉ ፈልጎ ይሆን? “ይመጣል የተባልከው አንተ ነህ ወይስ ሌላ እንጠብቅ?” ብለው ኢየሱስን እንዲጠይቁት ላካቸው።—ሉቃስ 7:19

ዮሐንስ እንዲህ ዓይነት ጥያቄ ማቅረቡ ይገርማል? ይህ ታማኝ ሰው ከሁለት ዓመት ገደማ በፊት ኢየሱስን ባጠመቀበት ጊዜ የአምላክ መንፈስ በኢየሱስ ላይ ሲወርድ የተመለከተ ከመሆኑም ሌላ አምላክ በኢየሱስ ደስ እንደሚሰኝ ሲናገር ሰምቷል። በመሆኑም የዮሐንስ እምነት እንደተዳከመ ለማሰብ የሚያበቃ ምክንያት የለንም። እምነቱ ተዳክሞ ቢሆን ኖሮ በዚህ ወቅት ኢየሱስ እሱን አድንቆ ባልተናገረ ነበር። ታዲያ ዮሐንስ ጥርጣሬ ካላደረበት ስለ ኢየሱስ ይህን ጥያቄ ያቀረበው ለምንድን ነው?

ዮሐንስ፣ ኢየሱስ መሲሕ ስለ መሆኑ ከራሱ ማረጋገጫ ማግኘት ፈልጎ ይሆናል። ይህ በእስር ቤት እየማቀቀ ያለውን ዮሐንስን በጣም ያበረታታዋል። ጥያቄው ሌላም ትርጉም ያለው ይመስላል። አምላክ የቀባው ሰው፣ ንጉሥና አዳኝ እንደሚሆን የሚገልጹትን የመጽሐፍ ቅዱስ ትንቢቶች ዮሐንስ ያውቃል። ይሁንና ኢየሱስ ከተጠመቀ ብዙ ወራት ቢያልፉም ዮሐንስ ከእስር አልተፈታም። በመሆኑም ዮሐንስ፣ መሲሑ እንደሚፈጽማቸው አስቀድሞ በትንቢት የተነገሩትን ነገሮች ሙሉ በሙሉ ለመፈጸም ኢየሱስን ተክቶ የሚመጣ ሌላ ሰው ይመጣ እንደሆነ መጠየቁ ነው።

ኢየሱስ ለዮሐንስ ደቀ መዛሙርት ‘ይመጣል የተባለውማ እኔ ነኝ’ ብሎ ከመመለስ ይልቅ በዚያኑ ሰዓት ብዙዎችን ከሕመምና ከከባድ በሽታ በመፈወስ ከአምላክ የተላከ መሆኑን የሚያረጋግጥ ማስረጃ ሰጣቸው። ከዚያም ደቀ መዛሙርቱን እንዲህ አላቸው፦ “ሄዳችሁ የምትሰሙትንና የምታዩትን ነገር ለዮሐንስ ንገሩት፤ ዓይነ ስውሮች እያዩ ነው፤ አንካሶች እየተራመዱ ነው፤ የሥጋ ደዌ የያዛቸው እየነጹ ነው፤ መስማት የተሳናቸው እየሰሙ ነው፤ ሙታን እየተነሱ ነው፤ ድሆችም ምሥራቹ እየተነገራቸው ነው።”—ማቴዎስ 11:4, 5

የዮሐንስ ጥያቄ፣ ኢየሱስ እያከናወነ ካለው ነገር በተጨማሪ ሌላ ነገር ያደርጋል ብሎ እንደሚጠብቅና ምናልባትም እሱን ከእስር ቤት እንደሚያስፈታው ያስብ እንደነበረ የሚያመለክት ሊሆን ይችላል። ኢየሱስ ግን እየፈጸመው ካለው ተአምራት ሌላ እንዳይጠብቅ ለዮሐንስ መንገሩ ነው።

የዮሐንስ ደቀ መዛሙርት ሲሄዱ ኢየሱስ፣ ዮሐንስ ከነቢያት እንደሚበልጥ ለሕዝቡ ነገራቸው። በሚልክያስ 3:1 ላይ አስቀድሞ የተነገረለት የይሖዋ “መልእክተኛ” እሱ ነው። በሚልክያስ 4:5, 6 ላይ ነቢዩ ኤልያስ ተብሎ የተገለጸውም እሱ ነው። ኢየሱስ እንዲህ አለ፦ “እውነት እላችኋለሁ፣ ከሴት ከተወለዱት መካከል ከመጥምቁ ዮሐንስ የሚበልጥ አልተነሳም፤ ሆኖም በመንግሥተ ሰማያት ዝቅተኛ የሆነው እንኳ ይበልጠዋል።”—ማቴዎስ 11:11

ኢየሱስ፣ በመንግሥተ ሰማያት ዝቅተኛ የሆነው ዮሐንስን እንደሚበልጠው መናገሩ ዮሐንስ ሰማያዊውን መንግሥት እንደማይወርስ ይጠቁማል። ዮሐንስ ለኢየሱስ መንገዱን ያዘጋጀ ቢሆንም የሞተው ወደ ሰማይ ለመግባት የሚያስችለውን መንገድ ክርስቶስ ከመክፈቱ በፊት ነው። (ዕብራውያን 10:19, 20) ያም ቢሆን ዮሐንስ ታማኝ የአምላክ ነቢይ በመሆኑ የአምላክ መንግሥት ሲገዛ በምድር ላይ ይኖራል።