ኢየሱስ ምድር ላይ ሳለ ምን ነገሮችን አከናውኗል?

ብዙ ሰዎች ስለ ኢየሱስ ሲያስቡ ወደ አእምሯቸው የሚመጣው በእናቱ እቅፍ ያለ ሕፃን፣ ጥበበኛ ነቢይ ወይም ተሰቅሎ ሊሞት እያጣጣረ ያለ ሰው ነው። በምድር ላይ ስላሳለፈው ሕይወት ስንመረምር ግን ስለ እሱ ብዙ ነገሮችን እንማራለን። በዚህ ምዕራፍ ላይ፣ ኢየሱስ ያከናወናቸውን አንዳንድ አስፈላጊ ነገሮችና እነዚህ ነገሮች በአንተ ሕይወት ላይ ምን ለውጥ እንደሚያመጡ እንመለከታለን።

1. የኢየሱስ ዋነኛ ሥራ ምን ነበር?

የኢየሱስ ዋነኛ ሥራ “የአምላክን መንግሥት ምሥራች ማወጅ” ነበር። (ሉቃስ 4:43⁠ን አንብብ።) አምላክ የሰው ልጆችን ችግሮች በሙሉ የሚያስወግድ መንግሥት ወይም መስተዳድር እንደሚያቋቁም የሚገልጸውን ምሥራች ይሰብክ ነበር።a ኢየሱስ ደከመኝ ሰለቸኝ ሳይል ለሦስት ዓመት ተኩል ያህል ይህን አስደሳች መልእክት ለሰዎች ሰብኳል።—ማቴዎስ 9:35

2. ኢየሱስ ተአምር ይፈጽም የነበረው ለምንድን ነው?

መጽሐፍ ቅዱስ ‘አምላክ በኢየሱስ አማካኝነት ስለፈጸማቸው በርካታ ተአምራት፣ ድንቅ ነገሮችና ምልክቶች’ ይናገራል። (የሐዋርያት ሥራ 2:22) ኢየሱስ ከአምላክ ባገኘው ኃይል የአየሩን ሁኔታ መቆጣጠር፣ በሺዎች የሚቆጠሩ ሰዎችን መመገብ፣ የታመሙትን መፈወስ አልፎ ተርፎም የሞቱትን ማስነሳት ችሏል። (ማቴዎስ 8:23-27፤ 14:15-21፤ ማርቆስ 6:56፤ ሉቃስ 7:11-17) እነዚህ ተአምራት ኢየሱስ በአምላክ የተላከ መሆኑን ግልጽ አድርገዋል። በተጨማሪም ይሖዋ ችግሮቻችንን ሁሉ ለመፍታት የሚያስችል ኃይል እንዳለው አሳይተዋል።

3. ከኢየሱስ ሕይወት ምን እንማራለን?

ኢየሱስ በሁሉም ሁኔታዎች ሥር ይሖዋን ታዟል። (ዮሐንስ 8:29⁠ን አንብብ።) ተቃውሞ ቢያጋጥመውም በታማኝነት እስከ ሞት ድረስ አባቱ ያዘዘውን ነገር ፈጽሟል። የሰው ልጆች አስቸጋሪ ሁኔታ ቢያጋጥማቸውም እንኳ አምላክን በታማኝነት ማገልገል እንደሚችሉ አሳይቷል። በዚህ መንገድ ‘የእሱን ፈለግ በጥብቅ እንድንከተል አርዓያ ትቶልናል።’—1 ጴጥሮስ 2:21

5. ኢየሱስ በጣም አስፈላጊ ትምህርቶችን አስተምሯል

ኢየሱስ ስለ አምላክ መንግሥት የሚገልጸውን ምሥራች ከመስበክ በተጨማሪ ሌሎች አስፈላጊ ትምህርቶችንም አስተምሯል። በስፋት በሚታወቀው የተራራ ስብከቱ ላይ ያስተማራቸውን አንዳንድ ትምህርቶች እንደ ምሳሌ እንውሰድ። ማቴዎስ 6:14, 34⁠ን እንዲሁም 7:12⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

• በእነዚህ ጥቅሶች ላይ ኢየሱስ ምን ጠቃሚ ምክሮች ሰጥቷል?

• እነዚህ ምክሮች በዛሬው ጊዜም ጠቃሚ ይመስሉሃል?

6. ኢየሱስ ብዙ ተአምራት ፈጽሟል

ይሖዋ ለኢየሱስ ኃይል በመስጠት ብዙ ተአምራት እንዲፈጽም አስችሎታል። አንድ ምሳሌ ለማየት ማርቆስ 5:25-34⁠ን አንብቡ ወይም ቪዲዮውን ተመልከቱ። ከዚያም በሚከተሉት ጥያቄዎች ላይ ተወያዩ፦

ቪዲዮ፦ አንዲት የታመመች ሴት ተፈወሰች (5:10)

• በቪዲዮው ላይ የታየችው ሴት ስለ ምን ነገር እርግጠኛ ነበረች?

• ከዚህ ተአምር ጋር በተያያዘ አንተን የሚያስገርምህ ምንድን ነው?

ዮሐንስ 5:36⁠ን አንብቡ፤ ከዚያም በሚከተለው ጥያቄ ላይ ተወያዩ፦

• ኢየሱስ የፈጸማቸው ተአምራት ስለ እሱ ምን ‘ይመሠክራሉ’?

ማጠቃለያ

ኢየሱስ ስለ አምላክ መንግሥት ሰብኳል፤ ብዙ ተአምራትን ፈጽሟል፤ እንዲሁም በማንኛውም ሁኔታ ሥር ይሖዋን ታዟል።

ክለሳ

• ኢየሱስ ምድር ላይ በነበረበት ወቅት ዋነኛ ሥራው ምን ነበር?

• ኢየሱስ የፈጸማቸው ተአምራት ምን ያረጋግጣሉ?

• ኢየሱስ የትኞቹን ጠቃሚ ትምህርቶች አስተምሯል?

ምርምር አድርግ

ኢየሱስ በዋነኝነት ያስተማረው ስለ የትኛው ጉዳይ ነው?

“የአምላክ መንግሥት—ኢየሱስ ትልቅ ቦታ የሰጠው ለምንድን ነው?” (መጠበቂያ ግንብ ጥቅምት 1, 2014)

ኢየሱስ ተአምራቱን በእርግጥ ፈጽሟል ብለን እንድናምን የሚያደርጉን ምክንያቶች የትኞቹ ናቸው?

“ከኢየሱስ ተአምራት ምን ትምህርት ማግኘት ትችላለህ?” (መጠበቂያ ግንብ ሐምሌ 15, 2004)

ኢየሱስ ከራስ ወዳድነት ነፃ የሆነ ሕይወት በመምራት ረገድ የተወው ምሳሌ በአንድ ሰው ላይ ምን ተጽዕኖ አሳድሯል?

“ሕይወቴ በራሴ ላይ ብቻ ያተኮረ ነበር” (መጠበቂያ ግንብ ጥቅምት 1, 2014)

በጊዜ ቅደም ተከተል የተቀመጡትን የኢየሱስ አገልግሎት ዋና ዋና ገጽታዎች ተመልከት።

“የኢየሱስ ምድራዊ ሕይወት አበይት ክንውኖች” (አዲስ ዓለም ትርጉም መጽሐፍ ቅዱስ ተጨማሪ መረጃ ሀ7)