“በእኔ ላይ ያለውን፣ ፍሬ የማያፈራውን ቅርንጫፍ ሁሉ [አባቴ] ቆርጦ ይጥለዋል፤ ፍሬ የሚያፈራውን ቅርንጫፍ ሁሉ ደግሞ ይበልጥ እንዲያፈራ ያጠራዋል። . . . ቅርንጫፉ ከወይኑ ተክል ጋር ተጣብቆ ካልኖረ በራሱ ፍሬ ማፍራት አይችልም፤ እናንተም ከእኔ ጋር ያላችሁን አንድነት ጠብቃችሁ ካልኖራችሁ ፍሬ ልታፈሩ አትችሉም። እኔ የወይኑ ተክል ነኝ፤ እናንተ ደግሞ ቅርንጫፎቹ ናችሁ።”—ዮሐንስ 15:2-5

ኢየሱስ “ማንኛውም ሰው ከእኔ ጋር ያለውን አንድነት ጠብቆ ከኖረና እኔም ከእሱ ጋር አንድ ሆኜ ከኖርኩ ብዙ ፍሬ ያፈራል፤ እናንተ ከእኔ ተለይታችሁ ምንም ነገር ልታደርጉ አትችሉምና” በማለት አብራራ። እነዚህ “ቅርንጫፎች” ማለትም የእሱ ታማኝ ተከታዮች የእሱን ባሕርያት በመምሰል፣ ለሌሎች ስለ አምላክ መንግሥት በቅንዓት በማወጅና ተጨማሪ ሰዎች ደቀ መዛሙርት እንዲሆኑ በመርዳት ብዙ ፍሬ ያፈራሉ። አንድ ሰው ከኢየሱስ ጋር ያለውን አንድነት ጠብቆ ባይኖርና ፍሬ ባያፈራስ? ኢየሱስ ‘አንድ ሰው ከእኔ ጋር ያለውን አንድነት ጠብቆ ካልኖረ ይጣላል’ አለ። በሌላ በኩል ደግሞ “ከእኔ ጋር ያላችሁን አንድነት ከጠበቃችሁና ቃሌ በልባችሁ ከኖረ የምትፈልጉትን ማንኛውንም ነገር ብትጠይቁ ይፈጸምላችኋል” በማለት ተናገረ።—ዮሐንስ 15:5-7