ኢየሱስ ምን ባሕርያት አሉት?

ኢየሱስ ምድር ላይ ሳለ የተናገራቸውንም ሆነ ያደረጋቸውን ነገሮች ስንመረምር ወደ እሱም ሆነ ወደ አባቱ ወደ ይሖዋ እንድንቀርብ የሚያደርጉ ባሕርያት እንዳሉት እንገነዘባለን። ኢየሱስን እንድንወደው ከሚያደርጉን ባሕርያቱ መካከል አንዳንዶቹ የትኞቹ ናቸው? እኛስ የእሱን ምሳሌ መከተል የምንችለው እንዴት ነው?

1. ኢየሱስ አባቱን የሚመስለው በየትኞቹ መንገዶች ነው?

ኢየሱስ በቢሊዮኖች ለሚቆጠሩ ዓመታት በሰማይ ሲኖር አፍቃሪ የሆነውን አባቱን የማየትና ከእሱ የመማር አጋጣሚ አግኝቷል። በዚህም ምክንያት አስተሳሰቡ፣ ስሜቱና ድርጊቱ ልክ እንደ አባቱ ነው። (ዮሐንስ 5:19⁠ን አንብብ።) እንዲያውም ኢየሱስ የአባቱን ባሕርያት በሚገባ ከማንጸባረቁ የተነሳ “እኔን ያየ ሁሉ አብንም አይቷል” ብሎ ሊናገር ችሏል። (ዮሐንስ 14:9) ስለ ኢየሱስ ባሕርያት እየተማርክ በሄድክ መጠን ይሖዋን የበለጠ እያወቅከው ትሄዳለህ። ለምሳሌ ኢየሱስ ለሰዎች ያሳየው ርኅራኄ ይሖዋ ለአንተ ምን ያህል እንደሚያስብልህ ያሳያል።

2. ኢየሱስ ይሖዋን እንደሚወደው ያሳየው እንዴት ነው?

ኢየሱስ “እኔ አብን እንደምወድ ዓለም እንዲያውቅ አብ ባዘዘኝ መሠረት እየሠራሁ ነው” ብሏል። (ዮሐንስ 14:31) ኢየሱስ ምድር ላይ በነበረበት ወቅት በአስቸጋሪ ጊዜም ጭምር አባቱን በመታዘዝ ለእሱ ያለውን ጥልቅ ፍቅር አሳይቷል። በተጨማሪም ኢየሱስ ስለ አባቱ ማውራትና ሌሎች ከአባቱ ጋር ወዳጅነት እንዲመሠርቱ መርዳት ያስደስተው ነበር።—ዮሐንስ 14:23

3. ኢየሱስ ሰዎችን እንደሚወድ ያሳየው እንዴት ነው?

መጽሐፍ ቅዱስ ኢየሱስ ‘በተለይ በሰው ልጆች እጅግ እንደሚደሰት’ ይናገራል። (ምሳሌ 8:31) ሰዎችን በማበረታታትና ራሱን ሳይቆጥብ በመርዳት ፍቅሩን አሳይቷል። የፈጸማቸው ተአምራት ኃይሉን ብቻ ሳይሆን ርኅራኄውንም ያሳያሉ። (ማርቆስ 1:40-42) ለሰዎች ደግነት አሳይቷል፤ እንዲሁም ያለምንም አድልዎ ሁሉንም በእኩል ዓይን ያይ ነበር። የሚናገረው ነገር እሱን ለሚሰሙ ቅን ልብ ያላቸው ሰዎች ሁሉ መጽናኛና ተስፋ የሚሰጥ ነበር። ኢየሱስ ለሰው ልጆች ሁሉ ፍቅር ስላለው ለእነሱ ሲል ለመሠቃየትና ለመሞት ፈቃደኛ ሆኗል። የእሱን ትምህርቶች ለሚከተሉ ሰዎች ደግሞ የተለየ ፍቅር አለው።—ዮሐንስ 15:13, 14⁠ን አንብብ።

ጠለቅ ያለ ጥናት

4. ኢየሱስ አባቱን ይወዳል

ኢየሱስ የተወው ምሳሌ አምላክን እንደምንወደው ማሳየት የምንችለው እንዴት እንደሆነ ይጠቁመናል። ሉቃስ 6:12⁠ን እንዲሁም ዮሐንስ 15:10⁠ን እና 17:26⁠ን አንብቡ። እያንዳንዱን ጥቅስ አንብባችሁ በሚከተለው ጥያቄ ላይ ተወያዩ፦

• የኢየሱስን ምሳሌ በመከተል ይሖዋን እንደምንወደው ማሳየት የምንችለው እንዴት ነው?

6. ኢየሱስ ለጋስ ነው

ኢየሱስ ብዙ ገንዘብ ባይኖረውም ለሌሎች በልግስና ይሰጥ ነበር፤ እኛንም ለጋስ እንድንሆን አበረታቶናል። የሐዋርያት ሥራ 20:35⁠ን አንብቡ፤ ከዚያም በሚከተለው ጥያቄ ላይ ተወያዩ፦

• ኢየሱስ በተናገረው መሠረት ደስተኛ ለመሆን ምን ማድረግ አለብን?

ቪዲዮውን ተመልከቱ፤ ከዚያም በሚከተለው ጥያቄ ላይ ተወያዩ፦

ቪዲዮ፦ “መስጠት የበለጠ ደስታ ያስገኛል”—ተቀንጭቦ የተወሰደ (4:00)

• ብዙ ገንዘብ ባይኖረንም እንኳ ለሌሎች መስጠት የምንችልባቸው አንዳንድ መንገዶች የትኞቹ ናቸው?

ይህን ታውቅ ነበር?

መጽሐፍ ቅዱስ በኢየሱስ ስም ወደ ይሖዋ እንድንጸልይ ያስተምረናል። (ዮሐንስ 16:23, 24⁠ን አንብብ።) በዚህ መንገድ ስንጸልይ ኢየሱስ የይሖዋ ወዳጆች እንድንሆን ለተጫወተው ሚና አድናቆት እንዳለን እናሳያለን።

ማጠቃለያ

ኢየሱስ ይሖዋንና ሰዎችን ይወዳል። ኢየሱስ የአባቱን ባሕርይ ስለሚያንጸባርቅ ስለ እሱ እያወቅክ በሄድክ መጠን ይሖዋን ይበልጥ እያወቅከው ትሄዳለህ።

ክለሳ

• የኢየሱስን ምሳሌ በመከተል ይሖዋን እንደምንወደው ማሳየት የምንችለው እንዴት ነው?

• የኢየሱስን ምሳሌ በመከተል ሰዎችን እንደምንወድ ማሳየት የምንችለው እንዴት ነው?

• ከኢየሱስ ባሕርያት መካከል አንተን ይበልጥ የሚማርክህ የትኛው ነው?

ምርምር አድርግ

ኢየሱስን ለመምሰል የሚያስችሉንን አንዳንድ ባሕርያት ተመልከት።

“ኢየሱስን ለመምሰል የሚያስችሉ ባሕርያት” (ኢየሱስ—መንገድ፣ እውነት፣ ሕይወት ገጽ 317)

በኢየሱስ ስም መጸለይ አስፈላጊ የሆነው ለምንድን ነው?

“በኢየሱስ ስም መጸለይ ያለብን ለምንድን ነው?” (መጠበቂያ ግንብ የካቲት 1, 2008)

መጽሐፍ ቅዱስ ኢየሱስ ምን ይመስል እንደነበር የሚጠቁም ፍንጭ ይሰጣል?

“ኢየሱስ ምን ይመስል ነበር?” (ድረ ገጻችን ላይ የወጣ ርዕስ)

ኢየሱስ ለሴቶች ካሳየው ደግነት ምን ትምህርት እናገኛለን?

“አምላክ ሴቶችን በአክብሮትና በአሳቢነት ይይዛቸዋል” (መጠበቂያ ግንብ መስከረም 1, 2012)