Jeremia fentekünulay tañi dungual Jewba mu

Dunguliyiñ kakelu che Jewba ñi dungu, kiñeke illkukeyngün (lladkükeyngün) ka ayentukeeiñmew. Feymu weñangnagkey taiñ piwke, ka rakiduamafuiñ chi: “Dunguwelayan Jewba mu”. Eymi kay ¿rupakeymi tüfachi dungu mu?... Biblia ta nütrameleiñmew kiñe wentru mu, Jeremia pingelu. Kidu piwkeyekefi ta Jewba, welu epe fentekünufuy tañi dungual Chaw Ngünechen mew. Fewla peaiñ chem ñi rupan tüfa.

Petu weche wentrungelu Jeremia, Jewba feypieyew ñi wülal kiñe falin (manelbalchi) werkün dungu. Mülefuy ñi feypiafiel ta che ñi femwenoal wedake dungu. Müna küdawngefuy tüfachi dungu, feymu Jeremia llükafuy. Ka feypifi ta Jewba: ‘Iñche weche wentrungen, feymu kimlan tañi chem pial’. Welu Jewba feypieyew: ‘Llükakilnge, iñche ta kelluaeyu’.

Fey Jeremia eluwi ñi feypiafiel tati che: ‘Amulele tamün weda femün, kutrankangeaymün’. Welu ¿mupitupey may tati pu che?... Femlay tati, kiñeke ayentueyew, ka kakelu rume illkuyngün (mütre lladküyngün). ¡Kiñeke küpa langümeyew! Feymu ¿chum duami Jeremia? ¿Chem pimi eymi?... Kidu rume (mütre) llükay, feymu feypi: ‘Iñche dunguwelayan Jewba mu’. ¿Mupipey may? ¿Fentekünupey may ñi dungual Jewba mu ta Jeremia?... Femlay tati. Jeremia rume (mütre) piwkeyefi ta Jewba, feymu fentekünulay ñi dungual ta kidu mu. Jeremia afeluwlay, feymu Jewba ingkanieeyew tañi pu kayñe mu.

Kiñe rupa mu, kiñeke wedake wentru ütrüftukufingün ta Jeremia kiñe llodkonkülechi (botrantulechi) fütra rüngan. Ka nielafuy ko ka iyael no rume. Tüfachi pu wentru ayüfuyngün Jeremia ñi layal. Welu ¿montuy tañi mongen Jeremia? May, femi. Jewba ñi kellun mew montulngey feychi rüngan mu.

¿Chem kimeltuafeymu Jeremia ñi inafalchi femün?... Kiñeke mu Jeremia llükafuy, welu fentekünulay ñi dungual Jewba mu. Ka femngechi, dungulmi eymi Jewba mew kakelu pu che, illkuafuyngün (lladküabuyngün) kam ayentuafeymu. Ka eymi yeweafuymi, ka llükayafuymi chi. Welu amulepe tami dungual Jewba mu. Tukulpange: Chaw Ngünechen kellufi ta Jeremia, ka femngechi rumel (molkechi) kelluaymu llemay.