Feichi mongelelu ta Jonás, pu Nínive che elungeingün tañi repentiutual. Jesús feipi pu femlu huesaque dungu ñi huiñomongetual tañi juiciantucungeal engün (Juan 5:29). Feimu feipiafuiñ quiñeque che mülelu Sodoma ca Gomorra mu, huiñomongetuafuingün. Fei quelluafuiñ ñi quimafiel Jehová ca Jesús engün. Jehová rumel inaduamüñmaquefi “pu che ñi piuque” ca ñi “ellcalechi raquiduam”. Ca ngüneduamai ñi femquen caque quiñeque che ñi dullial inei tañi huiñomongeltuafiel. Jehová ayüniei ñi pengelal tañi cutrantupiuqueyechen, huelu ngüneduamle quiñe che ñi huiñomongetunoal, eluhuai ñi huiñomongeltunoafiel. Feimu Biblia feipinole, iñchiñ feipilayaiñ quiñe che ñi huiñomongetunoal. w24.05 pag. 6 parr. 15, 16

Cuifi ca fantepu mu, Jehová tañi dungu quellufi tañi pu che ñi femal cüdaungechi dungu. Peafiyiñ ñi rupan ta Jeremías. Jehová huercüeyu ñi amuldungual, huelu Jeremías llicalefui. Fei feipi: “Quimlan cüme dungual, rume hueche huentrungen” (Jer. 1:6). ¿Chem quellueyu ñi nehuencünuhual? Jehová tañi dungu quellueyu llemai. Jeremías feipi: “Fei ñi huercün dungu ponhuitu tañi […] foro mu puhui chi cütral reque, fei cüdautun ñi nünieafiel, huelu ürcünagün” (Jer. 20:8, 9). Cüdaungeafui cheu ñi amuldunguquefel ta Jeremías, huelu ti huercün dungu ñi yenieel ta Jeremías nehuentucueyu entual tañi cüdau. Taiñ cristianongen ca nehuentucuqueiñmu Chau Dios tañi Dungu. Pablo feipi ti rüf quimün Jehová mu cüpalu quelluafeyu engün ñi ‘cüme miyahual chumngechi miyauquei Chau Jehová ñi pu che’ ca ñi ‘femal itrofill cümeque dungu’ (Col. 1:9, 10). w24.04 pag. 14, 15 parr. 2-4

Sadoc püntütripalai Jehová mu, huesa femlu rume ti lonco sacerdote Abiatar ñi quelluntucuafiel Adonías, David ñi fotüm, ñi lonco ülmen-ngeal. David cüme quimniefui ñi maneluhual Sadoc mu. Feipingelu ta David ñi chumal ta Adonías, feimu David feipifi ta Sadoc, Natán ca Benaya ñi loncocünuafiel ta Salomón (1 Rey. 1:32-34). Sadoc, ¿rume yafültucupelaeyu ñi femün caquelu serfiquefilu ta Jehová Natán reque? Fei engün püntütripalai Jehová mu ca quelluntucufingün ti lonco ülmen David. Loncocünungelu ta Salomón, elufi tati sacerdote Sadoc ti cüdau tañi niequefel ta Abiatar (1 Rey. 2:35). ¿Chumngechi inayentuafuimi ta Sadoc? Quiñe tami piuqueyenieelchi che püntütripale Jehová mu, pengelelafimi ta Jehová tami püntütripanoal quisu mu (Jos. 24:15). Jehová eluaimu ta nehuen tami duamnieel. Llellipunieafimi ta Jehová ca fülconcüleaimi Jehová tañi pu serfiqueteu. Jehová falintuai tami piuqueyefiel, fei cümelcayaimu (2 Sam. 22:26). w24.07 pag. 6, 7 parr. 16, 17