Pablo engu Timoteo

Listra trahunche mu mülefui quiñe hueche huentru, Timoteo pingefui. Tañi chau Grecia chengei, tañi ñuque judio tuhun-ngei, Eunice pingei, ca tañi abuela Loida pingei. Timoteo petu pichicalu, Loida ca Eunice quimeltueyu Chau Jehová mu.

Ti epuchi rupa tripalu Pablo tañi misionerongen mu, huitranmafi Listra trahunche. Fei quimtucui Timoteo ñi piuqueyefiel pu peñi ca lamngen, eluucülefui ñi quelluafiel engün. Feimu Pablo feipifi ta Timoteo ñi compañaeteu tañi misionerongen mu. Pepicaniefi ta Timoteo ñi cüme quimeltucheal ca amuldungucheal Chau Dios ñi cümeque dungu.

Chau Jehová ñi nehuen adniefi Pablo engu Timoteo cheu rume tañi amun. Quiñe rupa Pablo pefi quiñe afmatun dungu pun meu. Pei quiñe huentru tañi feipieteu: “Quellumupaiñ Macedonia mu”. Feimu Pablo, Timoteo, Silas ca Lucas amuldungumeingün ca adcünuingün hueque trahunche.

Tesalónica huaria, Macedonia mapu mu, fentren huentru ca domo cristianongerpui. Huelu quiñeque judio ütrirfingün ta Pablo tañi pu compañ engün. Trahulfingün fentren huesaque che, fei huingüdyefingün pu peñi cheu ñi mülen pu gobernadorcülelu huaria mu. Pu judio huirarquefui: “¡Tüfachi pu huentru caiñetufi Roma ñi ley!”. Huesalcayafuingün chi ta Pablo ca Timoteo, feimu pun meu lefmahuingu ta Berea.

Pu Berea che rume ayüniefuingün ñi allcütual Chau Dios ñi cümeque dungu, fei fentren Grecia che ca judio feyentuingün. Huelu quiñeque judio cüpai Tesalónica mu ñi caiñetuafiel engün. Feimu Pablo amui ta Atenas. Timoteo engu Silas mülenagingu Berea mu tañi nehuentucuafiel pu peñi ca lamngen. Rupalu ta tiempo, rume caiñetungei ti Tesalónica trahunche. Fei Pablo ca huiño huercüfi ta Timoteo ñi quellumeafiel engün tañi nehuencüleal. Fei hula, Pablo huercüfi ta Timoteo ñi huitranmafiel ca quelluafiel fentren caquelu trahunche.

Pablo feipifi ta Timoteo: “Com pu ayünielu cüdahuelafiel Chau Jehová, caiñetungeaingün”. Timoteo caiñetungei ca presuntucungei tañi feyentuqueel mu. Huelu quimfalcünumequefui tañi piuqueyeniefiel Chau Dios, feimu ayüucülequefui.

Pablo feipifi ti Filipos trahunche: “Huercüleluhuaiñ ta Timoteo. Quimeltuaimünmeu tamün inayal ti rüfngechi rüpü ca chumngechi tamün amuldungucheal”. Pablo maneluuquefui Timoteo mu. Quiñentrür cüdahuelquefingu ta Chau Dios fei cüme hueniyehuingu.