¿Edén mu tuupei mai com pu che?

RAQUIDUAMNGE tüfachi dungu: eimi müleimi quiñe ayüfalchi mapu mu. Com tüngcülei, fill raquiduamcülelaimi chemu no rume. Chem cutrantulaimi rume. Afmatulehueimi fente ñi ayüfalngen feichi lelfün.

Com ñi mülen ayühulqueimu. Huilüfcülei ti antü. Rume cüme adcülei tati pichique rayen. Chi cürüf pimuquefi ti tapül anümca. Ülcantuyahui pichique üñüm. Müpüyauquei tati pu pichique abeja, quintuyauquei ñi iyael. Allcüngei ñi raracün ti huitrunco. ¿Cümenoafulu müleal femngechi mapu mu?

Fentren che huall Mapu mu raquiduamquei femngechi mapu mu mülequefui pu hunenque che. Pu judio, pu cristiano ca pu musulman rume fentren tripantu raquiduamniei tati hunen curehuen mülefui Edén lof mu. Chumngechi feipi Biblia, Adán engu Eva ayüucülefuingu, quiñeucülefuingu ca cüme yeucülefui pu culliñ engün. Cafei cüme hueniyefingu ta Chau Ngünechen. Fente tañi poyechefengen elueyu engu ñi rumel müleal feichi mapu mu (Génesis 2:15-24).

Pu hindu ca quimeltuchequeingün rume fütra cuifi ñi mülefel quiñe ayüfalchi mapu. Fentren budista feipiqueingün huefrumelu tañi pu loncolelu buda pingelu, cüme felen mülequei Mapu mu. Cafei fentren religion África mu tuulu nütramcaquei fillque nütram trürümfalngelu Adán engu Eva ñi rupan.

Rüfcünu mai rume fentren che huall Mapu mu mülelu feyentuquei ñi mülequefel quiñe ayüfalchi mapu. Quiñe quim huentru feipi: “Cuifi mu fill troquiñche feyentuquefui ñi mülefel femngechi mapu. Tüfa mu ngelafui huelulcan, lifrelefui che, mülefui tüngün, ayühun, cüme felen, ngelafui quehuan, hueichan ca yafcahun. Feimu fentren che hueñancütuquefi feichi ayüfalchi mapu ca ayüniei engün ñi huiño mületual”.

¿Chumngelu (chemu) fente quimniengei tüfachi nütram? ¿Com che ñi nieel quiñe tuhun müten pemai? ¿Rüf mülequefui Adán, Eva ca Edén lof?

Quiñeque che huedhued dungu troquiquefi tüfa. Doi amulei ti ciencia dungu, feimu fentren che epeu müten troquiquefi Edén lof. Doi mai quiñeque loncolechi religioso ca femngechi raquiduamqueingün, quiñe pengelün dungu müten tati piqueingün.

Rüfngei llemai, Biblia niei alün pengelün dungu. Doi quimniengei feichi pengelün dungu Jesús ñi feipifiel tañi pu inanieteu. Huelu Biblia meu epeu müten troquingequelai Edén lof. Doi mai pengeli ñi rüf mülequefel. Rüfngenofule, manelfalngelayafui Biblia. Feimu inaduamaiñ chumngelu quiñeque che feyentuquelai tüfa. Fei hula ngüneduamaiñ chumngelu falin-ngei taiñ cüme quimafiel.