Pu Dunguquelu Ineingen Jehová, ¿elupefingün mai pu domo ñi quimeltucheal?

Mai, feingei tati. Fentren domo coneltulei quiñe fütra troquiñ pu domo amuldunguquelu Chau Ngünechen tañi Gobierno. Tañi feipicünungeel mu Salmo 68:11, feimu Jehová feipi: “Quiñe fütra troquiñ hueichafe reque, fentren-ngei pu domo huldunguquelu cümeque dungu”.

Pu domo dunguquelu ineingen Jehová trürlai chumngechi ñi cüdauquen pu domo amuldunguquelu caquelu religion mu. ¿Chem meu trürlai?

Hune, caquerumei tañi pu allcütuqueteu. Caquelu religion mu, pu domo loncolequei ca coneltuquei tañi adcünual tañi iglesia meu. Feimu tañi pu allcütuqueteu coneltulei tañi iglesia mu, huelu pu domo dunguquelu ineingen Jehová amuldunguquefingün ta com che, coneltulenolu tañi trahunche mu, fill ruca mu mülechi pu che ca huall püle.

Caquelu dungu ñi trürnon quiñe domo dunguquelu ineingen Jehová ca quiñe testigongenolu, fei ta chumngechi cüdauqueingün trahunche mu. Feichi pu domo adcünuquei pu che mülelu tañi iglesia mu ca quimeltuquefi. Huelu Pu Dunguquelu Ineingen Jehová mülele quiñe huentru, pu domo turpu quimeltuquelai trahunche mu. Pu huentru loncolelu müten quimeltuchequei trahunche mu, fei engün elfalcünungei ñi quimeltucheal (1 Timoteo 3:2, Traducción del Nuevo Mundo [TNM]; Santiago 3:1).

Biblia pengeli tati pu huentru müten mülei ñi loncoleal trahunche mu. Femngechi pengeli chem ñi huirintucuel Pablo ta Tito: “Creta huapi mu elcünueyu tami norümtual tati huesalcalelu ca tami elfalcünual loncolelu fillque huaria mu, chumngechi deu feipicünueyu” (Tito 1:5, 6, TNM). Ca feipi quiñe loncolealu mülei ñi nieal lif mongen ca felei ñi nieal quiñe domo müten. Pablo ca huirintucufi tüfachi dungu ta Timoteo: “Tüfachi feipin manelfali: quiñe huentru yafüluule ñi loncoleal trahunche mu, müna cüme cüdau ayüniei. Feimu ti loncolelu mülei ñi cüme yenieal ñi mongen, femngechi dunguyengelayai. Mülei ñi nieal quiñe domo müten. Quim ngünenieupe. Mülei ñi cüme raquiduam nieal ca cüme adnieal tañi mongen. Poyechefengepe, adümuucülepe ñi quimeltucheal” (1 Timoteo 3:1, 2, TNM).

¿Chumngelu am tati pu huentru müten loncoleafui tati trahunche mu? Pablo feipi: “Eluquelafiñ ti domo ñi quimeltucheal, ngelai ñi ngünenieafiel tati huentru. Doi mai ñücüfcülepe. Ti huentru Adán hune deumangei, fei hula deumangei ti domo Eva” (1 Timoteo 2:12, 13, TNM). Jehová hune deumafi ta Adán, fei hula ta Eva. Tüfa pengeli Jehová elfalcünufi ta pu huentru ñi loncoleal ca quimeltucheal.

Com trahunche mu loncolei Jesús, feimu tati trahunche mülei ñi inayentuafiel engün. Lucas feipi: “Jesús fillque huaria ca fillque lof püle amuldunguyahui tati cümeque dungu Chau Ngünechen ñi ngünenietual ta mapu”. ¿Chumi tati pu discipulo Jesús tañi huercüeteu tañi amuldungual? “Feimu pu apostol fillque lof püle amuldunguingün Chau Dios ñi cümeque dungu” (Lucas 8:1; 9:2-6, TNM).

Famülque mu, Pu Dunguquelu Ineingen Jehová, huentru ca domongepe rume femqueingün ñi huechutripan Mateo 24:14. Jesús feipi: “Tüfachi cümeque dungu ñi Ngünenien mu, quimelngeai ta com Mapu meu, femngechi com troquiñque mapu ñi quimael engün; fei hula acuai ñi afael ta antü”.