Pu papeltukelu ñi ramtukeel

Femlay tati, ti versiculo kimeltukelay feychi dungu. Doy may pengeli feychi pu che rupalu fentren wedake dungu mu, welu aguantalu.

Peafiyiñ ti versiculo nüwkülelu: “Püllekontulayafimi ti nor che tañi ruka tami wedalkayafiel, teyfükalayafimi chew tañi mülen. Tati nor chengelu tranafuy regle rupa, welu witratuay tati, welu ti weda che tranürpuay ñi kutrankawün mu. Tami kayñetuetew tranle, ayüwkülelayaymi. Kidu trayafle, ayüwkilpe tami piwke” (Prov. 24:⁠15-17).

Kiñeke che küme adümkelafi ti versiculo 16. Rakiduamkeyngün ‘tüfachi versiculo kimeltukey culpale ta che, welu repentiwtule, wiño kümelkaletuafuy Ngünechen engu’ feypikeyngün. “Feychi rakiduam kimeltungey kuyfi ka famülke mu” pingu epu longkolechi religioso. Tüfa engu ka feypingu: “Tüfachi kimeltun pengeli kiñe wentru fütra culpayafuy rume, welu piwkeyenieafuy ta Chaw Dios ka kümelkaletuafuy fey engu tañi repentiwtun mu”. Feychi pu allkütule tüfachi kimeltun allmalltuafuy. Tüfachi pu che tunte rupa culpafule rume, rakiduamafuy Chaw Ngünechen tañi perdonayaetew.

Welu ti versiculo 16 femngechi kimeltulay.

Ti versiculo 16 ka 17 feypi ñi tranün tati nor chengelu ka tati pu kayñe. Welu ebrew dungun mu ti palabra “tranün” ka pünengekey fillke dungu mu. Kiñe toro tranafuy rüpü mu, wente ruka mu trananagafuy kiñe che, ka kiñe kura tranapuafuy mapu mu (Deut. 22:⁠4, 8; Amós 9:⁠9). Ka femngechi tüfachi palabra adentuleafuy kakelu dungu. Inaduamnge ñi feypin Biblia: “Chaw Jewba ayüwmale ñi chumken kiñe wentru, pengelelafi ñi chumngechi yenieal tañi mongen. Tranfule rume, tranakünungelayay mapu mu. Chaw Jewba nünieñmaeyew ñi kuwü fey ñi witratual” (Sal. 37:⁠23, 24; Prov. 11:⁠5; 13:⁠17; 17:⁠20).

Ngüneduamnge ñi feypin kiñe adümuwün wentru Edward Plumptre pingelu. Feypi: “Ebrew kewün mu ti palabra ‘tranün’ turpu adentukelay ñi culpan kiñe che” pi. Feymu kangelu adümuwün wentru kimeltuy ñi chem pin Proverbios capitulo 24, versiculo 16: “Ngünam ñi wedalkangeafel Chaw Dios tañi pu che. Tüfa engün küme tripakey müten, welu pu wedake che femkelay”.

Feymu llemay taiñ ngüneduampeel, Proverbios capitulo 24, versiculo 16 nütramkalay ñi culpan ta che. Doy may nütramkay ñi rupaken wedake dungu fentren rupachi. Famülke mu, pu nor che kutranafuy ka rupayafuy kakelu wedake dungu mu. Ka femngechi pu nor che ñi poyefiel mu ta Chaw Dios inakakeeyew pu gobierno. Welu chem dungu rume rupafule, pu nor che maneluwafuy Jewba tañi kelluaetew tañi küme tripayal engün. Fentren rupa ngüneduamkepelaymi ñi küme tripaken Chaw Dios tañi pu che. ¿Chumngelu am? Maneluwküleiñ llemay “Chaw Jewba nüniefi kom pu epeke tranlu ka newentukukefi pu yafüngewenolu” (Sal. 41:⁠1-3; 145:⁠14-19).

Pu nor che ayüwkelay kakelu che ñi kutrankawün mu. Doy may yafüluwkeyngün kimnielu ñi küme miyawal pu yamniefilu ta Ngünechen (Job 31:⁠3-6; Sal. 27:⁠5, 6; Ecl. 8:⁠11-13).