12. Raquiduamnge quiñe meta mu

Quiñe meta quiñe peuma müten no tati, ca quiñe raquiduam müten no. Doi mai taiñ diturpual quiñe meta, mülei taiñ cüme raquiduamal, yafültucuhual ca cüme pepicacünual taiñ chumal.

Quiñeque meta diturpuafuiñ quiñeque antü mu chi, quiñeque cüyen cam quiñeque tripantu mu chi. Pichique dungu femürpuafuiñ ñi diturpual fütraque dungu.

Diturpulmi tami meta, doi maneluhuaimi ta eimi mu, doi hueniyerpuafimi pu che ca doi ayüucüleaimi.

Doi maneluhuaimi ta eimi mu. Diturpufilmi quiñe pichi meta, maneluhuaimi doi fütraque dungu tami diturpual. Ca femngechi doi yafültucuhuaimi tami chaftuafiel huesaque dungu ñi rupalen. Ca femlayaimi huesaque dungu pu che tami feipieteu.

Doi hueniyerpuafimi pu che. Pu che cüme quimnielu ñi chumal ca yafüluulu ñi diturpual, doi nierpuquei hueni. Epu che quiñentrür cüdaule ñi diturpual quiñe meta, doi hueniyehuafuingu.

Doi ayüucüleaimi. Diturpulmi tami meta, cüme duamcüleaimi.

Christopher feipi: “Nien mu meta, nien cüdau ca nien duam, feimu cüme duamquen. Diturpufiel mu quiñe meta, raquiduamquen fente tañi cüdahun, fei rume ayüucülequen”.

BIBLIA ÑI NGÜLAM: “Tati ngüneduamquefilu ti cürüf nganlayai, ca tati adquintuquefilu ti tromü cosechalayai” (Eclesiastés 11:4).

Tami diturpual tami meta, inange tüfachi ngülam.

Dullinge fillque meta tami diturpual. Fei adcünuafimi chuchi tami hune femal.

Adcünuaimi tami chumcünuafiel ti meta. Tami diturpual chem meta rume, femaimi tüfa:

• Raquiduamnge quiñe antü tami deumayafiel tami meta.

• Huirintucunge chumngechi tami diturpuafiel.

• Raquiduamnge chem catrütuafeimu tami femnoal tami cüdau, fei chumngechi chaftuafuimi.

Cüdaunge tami huechutripayal tami meta. Raquiduamlayaimi com tami pepicanieafiel tami amulafiel chi cüdau. Loncontucunienge chem tami hune femal, fei femfinge müten. Deu femürpulmi quiñeque dungu, ngüneduamnge ñi chum amulen tami cüdau.

BIBLIA ÑI NGÜLAM: “Chem ñi adcünuel tati cüme cüdauquelu, cüme tripayai llemai” (Proverbios 21:5).