¿Pepikawkülepeymi may tami fautisawal?

 1. Tati ayünielu ñi dewmayal kiñe ruka, ¿chem mülefuy ñi femal?

KIÑE che ayüle ñi dewmayal kiñe ruka, ¿pürüm eluwafuy ñi ngillayal chem ñi duamnieel tañi rukayal? Femlayafuy llemay. Wünelu mew, rume duamfali ñi nentucuentayal tunten plata tripayay ñi ayünieelchi ruka. Femngechi kimtukuay ñi nieel kom ti duamnieelchi plata, fey ñi küme dewmayal tati ruka. Küme nentucuentale petu ñi rukanon, küme tripapelayafuy ñi dewmayal ti ruka.

 2. Ñi feypin Luka 14:⁠27-30, ¿chem rakiduamafuymi petu tami fautisawnon?

² Fente tami piwkeyefiel ta Jewba ka fente tami mañumkülen, ¿ayüniepeymi may tami fautisawal? Femngechi rakiduamkülelmi, feychi che ayünielu ñi dewmayal kiñe ruka reke feleymi. ¿Chumngelu femngechi feypiafuiñ? Ngüneduamaiñ chem ñi feypin Jesus Luka pingechi lifru mu (papeltunge Luka 14:⁠27-30). Jesus kimeltuy chem müley taiñ femal, fey taiñ inayafiel. Kiñeke mu, rupayafuiñ küdawngechi dungu ka duamfalngeafuy elkünual taiñ ayükeelchi dungu, fey taiñ inanieafiel ta Jesus (Luka 9:⁠23-26; 12:⁠51-53). Feymu petu tami fautisawnon, duamfali tami rakiduamal chem dungu rupayay fautisawülmi. Femngechi dew fautisawülmi, pepikawküleaymi tami poyenieafiel ta Chaw Ngünechen.

 3. ¿Chem ngüneduamaiñ tüfachi chillkatun mu?

³ Küdawngeafuy elkünual kiñeke wimtun ka kiñeke ayükeelchi dungu taiñ inanieafiel ta Jesus, welu tati fautisawün doy küme ayüwün-ngey. Fautisawün mu pu che, llowkey fentren kümeke dungu famülke mu ka küpalechi antü mew. Tüfachi chillkatun mu, ngüneduamaiñ falinke ramtun tati fautisawün dungu mu. Femngechi ngüneduamafuymi tami pepikawkülen tami fautisawal.

 4. 1) ¿Chumngechi wültukuafuymi tami mongen Jewba mu? 2) Ñi feypin Luka 9:⁠23, ¿chumngelu ‘müley tami elkünual itrokom tami ayütunieel’?

⁴ ¿Chumngechi wültukuafuymi tami mongen Jewba mu? Petu tami fautisawnon, müley tami wültukual tami mongen Jewba mu. ¿Chumngechi femafuymi tüfa? Rüf piwke mu ngillatuafimi ta Jewba, fey feypiafimi tami küdawelafiel kom tami mongen mu. Wültukulmi tami mongen Jewba mu, ‘müley tami elkünual itrokom tami ayütunieel’ (papeltunge Luka 9:⁠23). Femngechi femülmi, Jewba ngen-ngeay tami mongen mu (Rom. 14:⁠8, TNM). Wültukulmi tami mongen ta Jewba mu, feypimekefimi reke tami kidutu duamuwnoal, doy may doyümaymi tami küdawelafiel. Ngünechen dikümtukukelaeiñmu (obligakelaeiñmu) taiñ feypikünual tüfachi dungu. Welu femürpufiliyiñ, kidu ayüniey taiñ wechurpual taiñ feypin (Sal. 116:⁠12, 14).

 5. Wültukulmi tami mongen Jewba mu, ¿chumngelu trürkülelay ti fautisawün mu?

⁵ Wültukulmi tami mongen Jewba mu, ¿chumngelu trürkülelay ti fautisawün mu? Wültukual tami mongen Jewba mu, fey tüfa femafuymi kiñe llellipun Jewba engu müten. Welu tati fautisawün femngekey kakelu che ñi adkiñ mu tati fütrake trawün mew. Fautisawülmi, pengelelafimi kakelu che tami dew wültukuel tami mongen Jewba mu.⁠b Feymu tami fautisawün mu, kakelu che kimürpukey tami poyefiel ta Jewba kom tami piwke mu, kom tami mongen mu, kom tami rakiduam mu ka kom tami newen mew (Mar. 12:⁠30).

6, 7. Ñi feypin 1 Pedro 3:⁠21, 22, ¿chumngelu duamfalngey taiñ fautisawal?

⁶ ¿Duamfalngepey may ñi fautisawal? Ngüneduamaiñ chem ñi feypin Wünen Pedro. Biblia feypi: “Tüfachi pu wedake püllü feyentulayngün Noe ñi antü mew. Feychi mu, Chaw Ngünechen afeluwnon mu üngümkülefuy petu ñi dewmangen ti wampo ruka. Fey pura che müten montuyngün ti fütra mangin ko mew. Fey tüfa adentuley ti fautisawün tamün montulnieetew Jesukristo tañi wiñomongetun mew (fautisawün mu liftuñmangelay tamün cuerpo ñi podüñmaetew, welu may ngillatulelfimün küme rakiduam ta Chaw Ngünechen)” (1 Pedro 3:⁠21, 22, TNM). Tati wampo ruka pengelkefuy Noe ñi feyentukefel Ngünechen mu, ka femngechi tami fautisawün pengelkeeiñmu tami poyekefiel ta Chaw Ngünechen. Welu, ¿rüf duamfalngepey may tami fautisawal? Duamfalngey llemay. Pedro küme kimeltuy tati fautisawün montulafeiñmu. Welu, ¿chem müley taiñ femal? Feyentuaiñ Jesus ñi lan iñchiñ mu ka ñi müleputun Ngünechen ñi man püle wenu mapu mew (Ebrew 10:⁠10, 12).

⁷ Pedro ka feypi tati fautisawün elueiñmu “küme rakiduam”. Wültukun taiñ mongen Jewba mu ka fautisawün mew, eluwkeiñ taiñ doy fülmawküleal Ngünechen mu. Kafey küme rakiduamtukeiñ taiñ culpan mu ka feyentukeiñ Jesus tañi lan mew, feymu Chaw Ngünechen wiñoduamtukeeiñmu taiñ culpan. Feymu llemay nieafuiñ küme rakiduam Chaw Ngünechen tañi adkiñ mu.

 8. ¿Chem dungu yeafeymu tami fautisawal?

⁸ ¿Chem dungu yeafeymu tami fautisawal? Tami küme ngüneduamkefiel tati Biblia, doy kimürpuymi Jewba tañi chumngen ka tañi chumken. Tami kimürpun Jewba mew ayüwülmaeymu tami piwke, feymu rume piwkeyerpufimi tami Fütra Chaw. Fey tami fütra piwkeyeniefiel ta Jewba, eluwürpuafuymi tami fautisawal.

 9. ¿Chem küpa feypi Matew 28:⁠19, 20?

⁹ Ka femngechi feyenturpufimi tati rüf dungu Biblia mu mülelu, feymu eluwürpuafuymi tami fautisawal. Ngüneduamnge chem ñi feypifiel Jesus tañi pu inanieetew (papeltunge Matew 28:⁠19, 20). Kidu feypi pu ayünielu tañi fautisawal, müley ñi femal ‘Chaw tañi üy mew ka tañi Fotüm mew ka Ngünechen tañi newen mew’. ¿Chem küpa feypi chi? Müley tami feyentual chem ñi rüf kimeltukeel Biblia Jewba mu, Jesus mu ka Ngünechen tañi newen mew. Feychi falinke kimeltun puwafuy eymi tami piwke mu (Eb. 4:⁠12). Fewla ngüneduamaiñ kiñeke kimeltun.

10, 11. ¿Chem falinke dungu kimürpuymi Jewba mu?

¹⁰ Rakiduamnge chem tami kimürpun tami Fütra Chaw mu. Tati Biblia feypi ‘Jewba pingey tañi üy’ ka ‘alüpüraley itrokom Mapu mu’. Kafey kidu müten “tati rüfngechi Ngünechen” (Sal. 83:⁠18; Is. 37:⁠16). Biblia ka feypi Jewba taiñ dewmaetew ka kidu müten montulchekey (Sal. 3:⁠8; 36:⁠9). Kidu adkünuy chumngechi taiñ montulaetew ti culpan ka lan dungu mew. Kafey feypikünueiñmu taiñ rumel mongeleal (Juan 17:⁠3). Wültukulmi tami mongen Jewba mu ka fautisawülmi, pengelaymi tami poyekefiel ta Jewba (Is. 43:⁠10-12). Femngechi femülmi, koneltuleaymi kiñe fütra trokiñche wall Mapu mülelu, ayüwküleyngün ñi yenieel Ngünechen tañi üy. Kafey kimeltukefingün ta kakelu che tüfachi üy (Sal. 86:⁠12).

¹¹ Rume ayüwün-ngey kimürpual chem ñi kimeltukeel tati Biblia taiñ Wenu Chaw mew. Feyentufilmi tüfachi rüfngechi dungu, eluwafuymi tami wültukual tami mongen Jewba mu ka tami fautisawal.

12, 13. ¿Chem falinke dungu kimürpuymi Jesus mu?

¹² Rakiduamnge chem kimürpuymi Jesus mu. Kidu inaley Chaw Ngünechen mu. Kafey Jesus wüli tañi mongen taiñ montulaetew. Fey taiñ femün mu pengelaiñ taiñ feyentuken Jesus tañi lan mu, femngechi wiñoduamtungeafuiñ taiñ culpan, küme weniyewafuiñ Chaw Ngünechen engu ka nierpuafuiñ rumel mongen (Juan 3:⁠16). Jesus Longko Sacerdoteley iñchiñ mu. Kidu kellukeeiñmu taiñ llowal kümeke dungu kidu tañi lan mu, ka femngechi kellukeeiñmu taiñ küme weniyeafiel ta Jewba (Eb. 7:⁠24-26). Kafey Jesus longko ülmenküley Ngünechen tañi Ngünenien mu, feymu Jewba adnieaeyew ñi püramyengeal tañi üy, ñi afal kom wedake dungu ka ñi küpalal fentren kümeke dungu ti we Mapu mu (Mat. 6:⁠9, 10; Apok. 11:⁠15). Jesus rume küme inayentufalngey (1 Ped. 2:⁠21). Jesus kom tañi mongen mu küdawelfi tañi Chaw, femngechi kimeltueiñmu taiñ ka femngechi femal iñchiñ (Juan 4:⁠34).

¹³ Feyenturpulmi chem ñi kimeltukeel Biblia Jesus mu, piwkeyerpuafimi Ngünechen tañi Fotüm. Femngechi eluwafuymi tami femal Ngünechen tañi ayükeel, chumngechi ñi femün ta Jesus. Fey wültukuafuymi tami mongen Jewba mew ka fautisawürpuafuymi.

14, 15. ¿Chem falinke dungu kimürpuymi Ngünechen tañi newen mu?

¹⁴ Ka rakiduamnge chem tami kimürpun Ngünechen tañi newen mew. Tüfa kiñe püllü no llemay, welu may Ngünechen tañi newen. Jewba elufi ñi newen ta kiñeke wentru ñi wirintukual tati Biblia. Kafey tüfachi newen kellukeeiñmu taiñ adümafiel ka inayafiel chem ñi feypin ti Wirin Chillka (Juan 14:⁠26; 2 Ped. 1:⁠21). Kafey Chaw Ngünechen elukeeiñmu ñi fütra newen, femngechi taiñ yafüluwküleal (2 Kor. 4:⁠7). Ngünechen tañi newen kellukeeiñmu taiñ amuldungual Ngünechen ñi kümeke dungu ka taiñ kon-noal wedake dungu mu. Ka femngechi kellukeeiñmu taiñ küme duamküleal ka taiñ chaftuafiel fillke wedake dungu. Kafey Ngünechen tañi newen kellukeeiñmu taiñ femal fentren kümeke dungu, femngechi taiñ inayal ñi femken pu “llowkelu Ngünechen ñi newen” (Gal. 5:⁠22, TNM). Maneluwliyiñ Jewba mu ka ngillatufiliyiñ tañi newen, kidu ayüwünkechi eluaeiñmew (Luka 11:⁠13).

¹⁵ Feley llemay, Jewba elukeeiñmu ñi newen, femngechi kellukeeiñmu taiñ poyenieafiel ta kidu. ¡Rume yafüluwün-ngey taiñ kimürpun tüfa! Feyenturpulmi chem tañi kimeltukeel Biblia Ngünechen tañi newen mu, wültukuafuymi tami mongen Jewba mew ka fautisawürpuafuymi.

16. ¿Chem ngüneduampeiñ fantepu mew?

¹⁶ Eluwülmi tami wültukual tami mongen Ngünechen mu ka tami fautisawal, fey tüfa kiñe rume falin dungu. Chumngechi taiñ dew ngüneduampeel, rupayafuiñ küdawngechi dungu ka duamfalngeafuy elkünual taiñ ayükeelchi dungu, fey taiñ inanieafiel ta Jesus. Welu chem dungu rume elkünuliyiñ, Jewba eluafeiñmu doy fentren kümeke dungu. Ti fautisawün montulafeymu, ka femngechi nierpuafuymi küme rakiduam Chaw Ngünechen mew. Müley tami fautisawal fente tami piwkeyeniefiel ta Jewba. Ka femngechi müley tami piwkentukunieal kom tami kimürpun Chaw Ngünechen mu, Jesus mu ka Ngünechen tañi newen mew. Dew taiñ ngüneduampeel kom tüfachi dungu, kümeafuy tami ramtuwal: “¿Pepikawkülepen may tañi fautisawal?”.

17. Petu tami fautisawnon, ¿chem müley tami femal?

¹⁷ Pepikawkülelmi tami fautisawal, dew küme weniyepelafimi ta Jewba.⁠c Tami küme chillkatufiel ti Biblia, kimürpufimi ta Jewba ka tañi Fotüm Jesus. Kafey doy feyenturpuymi (Eb. 11:⁠6). Rüf maneluwürpuymi Jewba ñi feypikünuel Biblia mew mülelu, ka rüf maneluwkeymi Jesus tañi lan mu montulngeafuymi ti culpan ka lan dungu mew. Rüf weñangküymi tami kuyfike culpan mu, fey ngillatufimi ta Jewba tami wiñoduamtuaetew. Rüf küme elkünutufimi tami mongen ka kiñepülekünutufimi kom wedake wimtun, feymu fewla yenieymi tami mongen chumngechi ñi ayükeel ta Jewba (Hecho 3:⁠19). Rume ayülefuymi tami nütramkayafiel kakelu che Jewba tañi kümeke dungu. Feymu elungeymi tami amuldungual ti trawünche engu petu tami fautisawnon (Mat. 24:⁠14). Rüf ayüwülmafimi Jewba tañi piwke tami kümeke femün mew (Prov. 27:⁠11).

18. ¿Ka chem dungu duamnieymi femal tami fautisawal?

¹⁸ Welu petu tami fautisawnon, müley kiñeke dungu tami femürpuafel. Chumngechi taiñ ngüneduampeel, müley tami wültukual tami mongen Jewba mu. Rüf piwke mu ngillatuafuymi ta Jewba, fey feypiafuymi tami küdawelafiel kom tami mongen mu (1 Ped. 4:⁠2). Fey feypiafimi tami küpa fautisawün feychi peñi adkünukelu ti trokiñ longkolelu. Fey kidu feypiafi kiñeke longkolelu ñi trawüal eymi engün. Fillke dungu rakiduamkilnge chem tami ramtungeal. Feychi pu peñi dew kimnieeymu ka piwkeyenieeymu. Kidu engün ngüneduamay eymi mu kiñeke falin dungu tami kimürpun. Tüfachi pu peñi ngüneduamay tami küme adümfiel feychi rüf dungu Biblia mew mülelu. Ka femngechi ngüneduamayngün tami kimtukuniefiel fente ñi falin-ngen wülal tami mongen Jewba mu ka tami fautisawal. Tüfa engün ngüneduamle tami rüf pepikawkülen, kimeltungeaymi tami fautisawürpual küpalechi fütra trawün mew.

19, 20. 1) Dew fautisawülmi, ¿ka chem duamimi tami femal? 2) ¿Chumngechi femafuymi tüfa?

¹⁹ Dew fautisawülmi, ¿ka chem duamimi tami femal?⁠d Longkontukunge, eymi feypikünufimi ta Jewba tami poyeafiel kom tami mongen mu, feymu kidu ayüniey tami femürpual tami feypin. Dew fautisawülmi, müley tami adnieafiel tami mongen chumngechi ñi ayünieel Jewba. ¿Chumngechi femafuymi tüfa?

²⁰ Fülkülenge ti trawünche mu. Dew fautisawülmi, fewla koneltuleymi Jewba tañi trokiñche mew (1 Ped. 2:⁠17). Pu peñi ka pu lamngen mülelu ti trawünche mu, eymi tami pu che reke feleyngün. Rumel amulmi tati trawünche mu, doy weniyeafimi engün. Fill antü papeltunge ta Biblia ka eluwnge tami küme rakiduamal tami papeltukeel. Femngechi Biblia tañi feypin puway tami piwke mu (Sal. 1:⁠1, 2). Rumel ngillatuleaymi. Rüf piwke mu ngillatufilmi ta Jewba, doy fülmanieafimi (Mat. 26:⁠41). Doyümfinge Ngünechen tañi ayükeel (Mat. 6:⁠33). Tami femürpual tüfa, eluwnge tami rumel amuldungumekeal. Femngechi doy maneluwaymi Ngünechen mu, ka kelluafuymi kakelu che ñi ka llowal rumel mongen (1 Tim. 4:⁠16).

21. Tami fautisawün, ¿chem kümelkan llowafuymi?

²¹ Tati fautisawün ka wülal ti mongen Jewba mu, fey tati doy falin dungu ñi dulliafiel kiñe che. Küdawngeafuy adkünual taiñ mongen taiñ poyeafiel ta Jewba, welu tati fautisawün doy küme ayüwün-ngey. Chem weda dungu rume rupafuliyiñ famülke mu, pichiñmayay müten (2 Kor. 4:⁠17). Welu tati fautisawün kellukeeiñmu taiñ doy küme mongen nieal famülke mu ka taiñ llowal tati “rüfngechi mongen” küpalechi antü mew (1 Tim. 6:⁠19). Feymu llemay, küme ngüneduamuwnge ka ngillatuafimi ta Jewba, fey ramtuwafuymi: “¿Pepikawkülepen may tañi fautisawal?”.