Pu loncolelu, inayentuafimün ta Pablo

1, 2. Pablo ñi femün, ¿chumngechi quelluafeyu pu loncolelu?

TATI apostol Pablo rume piuqueyequefui tañi pu peñi ca pu lamngen. Rume cüdauquefui ñi cuidayafiel engün (Hech. 20:31). Tañi femquen mu Pablo, com pu peñi ca pu lamngen piuqueyeyu engün. Quiñe rupa, pu loncolelu Éfeso huaria mu quimlu ñi pehuenoafiel ta Pablo, ngümaingün (Hech. 20:37). Famülque mu, Pablo reque, pu loncolelu rume piuqueyequefingün tañi pu peñi ca pu lamngen ca eluucüleingün tañi quelluafiel engün (Filip. 2:16, 17). Huelu quiñeque mu, tati pu loncolelu cüdautuafuingün ñi huechunentual com ti cüdau ñi nieel engün. ¿Chem quelluafeyu engün?

² Cümeafui pu loncolelu ñi raquiduamal Pablo tañi femün meu (1 Cor. 11:1). Pablo com pepiluhun-ngelafui, culpafengefui, cüdautuquefui ñi femal cümeque dungu (Rom. 7:18-20). Huesaque dungu rupalu rume ta Pablo, ayüucülequefui ca fentecünulai tañi quelluafiel pu peñi ca pu lamngen. Ti pu loncolelu inayentufile ta Pablo, ayühunquechi cüdahuelnieafingün ta Jehová rupan mu rume huesaque dungu mu. ¿Chumngechi femafuingün tüfa? Peafiyiñ.

 3. ¿Chem ngüneduamaiñ tüfachi troquiñ mu?

³ Pu loncolelu cüdautuafuingün ñi femal meli dungu. ¿Chem dungu? 1) Mülei ñi femal fillque cüdau trahunche mu, huelu ca mülei ñi amuldungual. 2) Mülei ñi elcünual tiempo ñi yafültucuafiel pu peñi ca pu lamngen. 3) Cüdautuafuingün ñi huesa duamnoal tañi culpanchengen mu. Ca 4) cüdautuafuingün ñi rulpacünual ñi huelulcahun pu peñi ca pu lamngen. Tüfachi troquiñ mu ngüneduamaiñ tüfachi meli dungu. Ca peaiñ chumi Pablo ñi huechunentual ñi cüdau ca chumngechi inayentuafeyu pu loncolelu.

 4. ¿Chumngelu cüdautuafui pu loncolelu ñi doyümafiel ti amuldungun cüdau?

⁴ ¿Chumngelu cüdaungei? Pu loncolelu re amuldunguquelaingün müten, ca falinque cüdau nieingün. Por ejemplo, quiñeque mülei ñi loncoleal ti trahun semana mu cam ñi adcünual ti Chillcatun Biblia. Ca mülei ñi hulal hueupin. ¿Ca chem cüdau femqueingün pu loncolelu? Adümelfingün tati pu quelluquelu ca yafültucuquefingün pu peñi ca pu lamngen trahunche mu (1 Ped. 5:2). Quiñeque loncolelu deumaqueingün Trahunhue Ruca cam caquelu ruca poyengeam ta Jehová. Ca femngechi cüdauqueingün ñi lifcüleal ca ñi adcüleal feitachi ruca. Huelu pu loncolelu mülei ñi loncontucual ñi doyümafiel ti amuldungun cüdau, chumngechi taiñ huercüeteu Jesús com iñchiñ (Mat. 28:19, 20).

 5. Pablo, ¿chumngechi pengeli ñi hunentucuquefiel ti amuldungun cüdau?

⁵ ¿Chumi Pablo? Pablo feipi chem quelluafeiñmu taiñ doyümal ti amuldungun cüdau, ‘doyümafimün ti doi falinque dungu’ pi (Filip. 1:10, TNM). Pablo inafi feitachi ngülam. Elfalcünungei ñi amuldungual, fei pengeli ñi rume falintuquefiel ti amuldungun cüdau. Pablo cheu rume miyahui che, amuldungulelquefi ca fill ruca püle (Hech. 20:20). Pablo fill semana ca chem hora rume amuldunguchequefui. Por ejemplo, Pablo petu üngümniefilu ta Silas ca Timoteo, amuldungulelfi quiñeque quim che, fei quiñeque engün feyentuingün (Hech. 17:16, 17, 34). Cafei, presulelu rume tañi ruca mu, Pablo amuldungufi tati pu soltau ca tañi pu pemequeteu (Hech. 28:16-24; Filip. 1:13, 14).

 6. Pablo, ¿chumngechi pepicafi ta quiñeque peñi?

⁶ Pablo rume huimtulequei tañi compañaeteu amuldungual caquelu pu che. Por ejemplo, quiñe rupa Pablo feipifi ta Juan Marcos ñi compañaeteu amuldungual. Ca rupa, feipifi ta Timoteo ñi compañaeteu (Hech. 12:25; 16:1-4). Fei Pablo pepicafi engu tañi cüme adcünuafiel ti trahunche, ñi cüme cuidayafiel ti trahunche ca ñi cüme quimeltuchefengeal (1 Cor. 4:17).

 7. Pu loncolelu, ¿chumngechi inayafui ñi feipin Efesios 6:14, 15?

⁷ ¿Chem quimürpuafuingün pu loncolelu? Pu loncolelu inayentuafingün tati apostol Pablo, fei chem antü mu rume ca cheu rume amuldungucheaingün (papeltunge Efesios 6:14, 15). Por ejemplo, cüdau mu, negocio mu amuldungucheafuingün. Cafei, deumamequele engün quiñe Trahunhue Ruca, amuldunguafuingün tati pu vecino. Ca femngechi pu che fendequelu materiales ca amuldungungeafui. Cafei, Pablo reque, petu amuldungule engün, tati pu loncolelu pepicayafui caquelu peñi ca pu siervo ministerial.

 8. Quiñeque mu, ¿chem mülefui ñi femal pu loncolelu?

⁸ Pu loncolelu ngelai tañi rumel cüdauconcüleal ti trahunche mu, ca mülei ñi elcünual tiempo tañi femal ti doi falin-ngechi dungu. Tüfa chillcatuafiel Biblia tañi pu che engün, amuldungual ca pepicayafiel tañi pu yall ñi cüme amuldungual. Doi elungele cüdau, pu loncolelu hunelu mu mülei tañi cüme raquiduamal ca ngillatuafiel Jehová tañi famentunoafiel tati doi falin-ngechi dungu. Tañi cüme huechunentuafiel com ti cüdau ñi nieel engün, quiñeque mu mülei ñi famentuafiel doi cüdau trahunche mu. Cüdaungeafui tüfa, huelu femngechi femle engün, Jehová illculayai. Quisu quimniei pu loncolelu ayüi ñi huechunentuafiel com ti cüdau ñi nieel engün.

 9. ¿Chumngelu cüdaungeafui pu loncolelu ñi yafültucuafiel Jehová ñi pu che?

⁹ ¿Chumngelu cüdaungei? Rupalu iñchiñ huesaque dungu mu duamnieiñ taiñ yafültucungeal. Caquelu peñi ca lamngen, duamniei ñi quellungeal fei ñi connoal huesaque dungu mu (1 Tes. 5:14). Pu loncolelu com famentulayafui ti huesaque dungu taiñ rupaquen, huelu Jehová ayüquei tati pu loncolelu ñi yafültucuafiel ca cuidayafiel Jehová tañi pu che. Tati pu loncolelu rume cüdau niefule rume, ¿chumngechi nentuafui tiempo tañi quellucheal? Peafiyiñ.

10. Ñi feipin 1 Tesalonicenses 2:7, ¿chumquefui Pablo tañi pu peñi ca pu lamngen mu?

¹⁰ ¿Chumi Pablo? Pablo rumel saquiquefi ca yafültucuquefi tañi pu peñi ca pu lamngen. Famülque mu, pu loncolelu mülei ñi inayentuafiel ñi femün ta Pablo (papeltunge 1 Tesalonicenses 2:7). Cafei, Pablo feipifi tañi pu peñi ca pu lamngen ñi rume piuqueyefiel. Ca feipifi Jehová ñi rume piuqueyeteu engün (2 Cor. 2:4; Efes. 2:4, 5). Pablo hueni troquiquefi tañi pu peñi ca pu lamngen ca trahuluuquefui fei engün mu. Cafei, Pablo feipiquefi tañi pu peñi ca pu lamngen chem ñi fill raquiduamelnieteu ca tañi huelulcauquen, femngechi pengelelfi tañi maneluucülen fei engün mu (2 Cor. 7:5; 1 Tim. 1:15). Pablo raquiduamquelafui quisu tañi huesaque dungu mu müten, huelu mai eluucülequefui tañi quelluafiel tañi pu peñi ca pu lamngen.

11. ¿Chumngelu Pablo ngülamtuquefi tañi pu peñi ca pu lamngen?

¹¹ Quiñeque mu, Pablo mülefui ñi ngülamtuafiel tañi pu peñi ca pu lamngen. ¿Chumngelu femquefui? Pablo ngülamtuquelafi tañi pu peñi ca pu lamngen tañi illcutufiel mu. Huelu mai, fente tañi piuqueyefiel mu engün. Femngechi cuñiutucuquefi engün tañi connoal huesaque dungu mu. Ngülamtulu Pablo, ayüfui ñi adümfalngeal ti ngülam ca ñi cüme lloungeal. Por ejemplo, quiñe rupa Pablo huirintuculelfi quiñe carta ti pu corintoche, fei norümtufi engün, elufi ngülam. Rupan huirintuculu feitachi carta, Pablo ayüfui ñi quimal chumngechi ñi lloufiel ti ngülam tati pu corintoche. Femngechi huercüfi ta Tito ñi amual fei engün mu. Fei Pablo quimürpui tati pu corintoche cüme lloufingün ti ngülam. Rume ayüucülepelafui ta Pablo (2 Cor. 7:6, 7).

12. ¿Chumafui pu loncolelu ñi yafültucuafiel pu peñi ca pu lamngen?

¹² ¿Chem quimürpuafuingün pu loncolelu? Pu loncolelu cümeafui ñi inayentuafiel ñi femün tati apostol Pablo. Fei elcünuafuingün tiempo ñi nütramcayal tañi pu peñi ca pu lamngen engün. ¿Chumngechi femafuingün? Doi temprano puhuafuingün ta trahun mu, femngechi yafültucuafuingün tañi pu peñi ca pu lamngen. Quiñeque mu, quiñe pichi nütramcan mu pu loncolelu yafültucucheafui (Rom. 1:12; Efes. 5:16). Pu loncolelu, Pablo reque, Biblia mu yafültucuafingün tati pu peñi ca pu lamngen. Cafei quimfalcünulelfingün tañi rume piuqueyefiel engün, ca Jehová ñi rume piuqueyeteu engün. Ca femngechi pu loncolelu rumel nütramcaquefi pu peñi ca pu lamngen, ca saquiquefi engün. Cafei ngülamtule quiñe loncolelu, Biblia mu tripayai ñi ngülam. Adümfalngeai, huelu piuqueyenquechi hulai ti ngülam, femngechi ñi cüme lloungeal (Gál. 6:1).

13. ¿Chem mu huelulcahuafui ñi raquiduam pu loncolelu?

¹³ ¿Chumngelu cüdaungei? Pu loncolelu culpafengeingün (Rom. 3:23). Huelu quiñeque mu, pu loncolelu huelulcahuafui ñi raquiduam feitachi dungu mu. ¿Chumngelu? Quiñeque rume raquiduamtucuquefingün tañi huelulcauquen, feimu huesa duamqueingün. Caquelu quimlu rume ñi huelulcauquen engün, “duamfal-lai ñi cüme elcünutuafiel” piqueingün.

14. Ñi feipin Filipenses 4:13, ¿chem quellueyu ta Pablo ñi huesa duamnoal tañi culpanchengen mu?

¹⁴ ¿Chumi Pablo? Pablo ñom piuquengefui, feimu quimniefui Jehová ñi nehuen müten quelluafeyu ñi huesa duamnoal tañi culpanchengen mu. Por ejemplo, cuifi mu Pablo inantucuquefui pu cristiano. Huelu rupalu ta antü, Pablo quimtucui ñi huesa femün, fei eluhui ñi cüme elcünutual ñi chumngechi chengen ca tañi raquiduam (1 Tim. 1:12-16). Jehová ñi quellun mu, Pablo loncolerpui trahunche mu, rume piuqueyechequefui ca ñom piuquengequefui. Pablo quimlu rume ñi rume huelulcauquen, huelu rume raquiduamtuculafi. Doi mai, maneluhui Jehová ñi perdonayafeteu (Rom. 7:21-25). Cafei rume cüdahui ñi doi cüme cristianongeal ca maneluhui Jehová mu ñi quelluaeteu huechunentual ñi cüdau (1 Cor. 9:27; papeltunge Filipenses 4:13, TNM).

15. ¿Chem quelluafeyu pu loncolelu huesa duamcülenoal tañi huelulcauquen mu?

¹⁵ ¿Chem quimürpuafuingün pu loncolelu? Com pu loncolelu huelulcahuafui. Jehová ayülei pu loncolelu ñi quimtucual tañi huelulcauquen ca ayülei tañi doi cüme cristianongeal engün (Efes. 4:23, 24). Pu loncolelu chillcatulu Biblia engün mülefui ñi quisutu ngüneduamuhual, femngechi ñi quimal chumngechi doi cüme cristianongeafuingün. Femngechi femle engün, Jehová quelluaeyu tañi doi cüme loncoleal trahunche mu, fei ñi ayüucüleal (Sant. 1:25).

16. Pu loncolelu re raquiduamtucufile ñi huelulcauquen pu peñi ca pu lamngen, ¿chem rupayafui?

¹⁶ ¿Chumngelu cüdaungei? Pu loncolelu ñi rupaquen mu alün antü tati pu peñi ca pu lamngen engün, doi quimürpuafuingün chem dungu mu ñi huelulcauquen. Re raquiduamtucule engün ñi huelulcauquen pu peñi ca pu lamngen, pu loncolelu cuñillchelayafui ca illcunquechi dunguafui pu peñi ca pu lamngen. Pablo feipifi pu cristiano Satanás ñi ayülen femngechi dungu ñi rupayal (2 Cor. 2:10, 11).

17. Pablo, ¿chem raquiduamquefui tañi pu peñi ca pu lamngen mu?

¹⁷ ¿Chumi Pablo? Quisu rumel cüme raquiduamquefui tañi pu peñi ca pu lamngen mu. Pablo fente cüme quimniefui tañi pu peñi cam pu lamngen ñi huelulcauquen. Quiñeque mu, huesa duamelqueyu tañi femquen engün. Huelu Pablo quimniefui quiñe peñi cam quiñe lamngen huelulcaufule rume, tüfa pengelquelai ñi huesa piuquengen. Pablo piuqueyequefi tañi pu peñi ca pu lamngen, ca re raquiduamquefui müten tañi cüme piuquengen engün. Pablo pefilu quiñe peñi cam quiñe lamngen ñi cüdautuquen ñi femal cümeque dungu, quisu raquiduamquefui: “Tüfachi peñi cam lamngen cüme piuquengei, ayüniefui ñi femal cümeque dungu, duamniei ñi quellungeal müten”.

18. Pablo ñi quellufiel ta Evodia ca Síntique, ¿chem quimeltueiñmu? (Filipenses 4:1-3).

¹⁸ Raquiduamaiñ chumngechi Pablo quellufi epu lamngen Filipos trahunche mu (papeltunge Filipenses 4:1-3). Evodia ca Síntique yafcahuingu, fei huenihuen-ngehuelaingu. Pablo illcutulafi engu, doi mai raquiduamtucui ñi cüme piuquengen engu. Tüfachi epu lamngen alün tripantu cüdahuelquefi Jehová. Ca Pablo quimniefui Jehová tañi piuqueyenieteu engu. Pablo cüme raquiduamquefui tüfachi epu lamngen mu, feimu yafültucufi ñi cümelcautual engu. Pablo cüme raquiduamlu am tañi pu peñi ca pu lamngen mu, feimu ayüucülequefui ca hueniyefi tati pu peñi ca pu lamngen Filipos trahunche mu.

19. 1) Pu loncolelu, ¿chem raquiduamafuingün pu peñi ca pu lamngen? 2) Pefinge ti adentun quiñe loncolelu liftucapefi ti Trahunhue Ruca. ¿Chem quimeltueimu ti adentun?

¹⁹ ¿Chem quimürpuafuingün pu loncolelu? Eimün pu loncolelu tunte huelulcaufule rume tamün pu peñi ca pu lamngen, raquiduamaimün ti cümeque dungu ñi femquen engün (Filip. 2:3). Quiñeque mu, müleafui chi tamün norümafiel quiñe peñi cam quiñe lamngen. Huelu inayentufimün ta Pablo, fei re raquiduamlayaimün müten ñi huesa femün mu ti che. Doi mai, raquiduamaimün feiti peñi cam ti lamngen piuqueyefi Jehová, püntütripaquelai quisu mu, ca doi cüme cristianongerpuafui. Pu loncolelu raquiduamle ñi cüme piuquengen tañi pu peñi ca pu lamngen, quelluaingün ñi cüme duamcüleal com ti trahunche.

20. Pu loncolelu, ¿chumafuingün ñi doi quimürpual Pablo ñi femün mu?

²⁰ Pu loncolelu doi ngüneduamfile Pablo ñi femün, rume quelluaeyu engün. ¿Cheu peafuingün doi quellu? Quintuafuingün tati Índice de las publicaciones Watch Tower. Fei mu quintuafuingün cheu ñi feipin “Pablo”. Ca amuafuingün cheu ñi feipin “ejemplo para los ancianos”. Petu ngüneduammequele feitachi fillque publicacion, ramtuhuafuingün: “Pablo ñi femün, ¿chumngechi quelluaeneu iñche ñi ayühunquechi loncoleal ti trahunche mu?”.

21. Jehová, ¿chem raquiduamquei pu loncolelu ñi cüdau mu?

²¹ Loncolelu, loncontucuaimün: Jehová feipiquelaeimu tamün turpu huelulcaunoal. Huelu mai feipiqueimu tamün cüme huechunentual tamün cüdau trahunche mu (1 Cor. 4:2). Jehová falintuñmafi ñi serfieteu Pablo com piuque mu. Jehová ca falintucuquefi eimün tamün cüdau. Quisu turpu “ngüyünentulayai eimün tamün femelchi dungu ca ti piuqueyehun tamün pengelelfiel femngechi tamün quellufiel meu tati feyentulechi pu peñi ca lamngen. Fei petu amulei tamün femngechi femal” (Heb. 6:10).