¿Rüfngepei mai ti Huecüfü?

Felei, Huecüfü ta rüfngei, quiñe cüme püllü em, huelu quisu huecüfühurpui ñi caiñetuafiel ta Chau Dios. Huecüfü ngüneniefi ta mapu (Juan 14:30; Efesios 6:11, 12). Biblia mu caque rume üi niei tati Huecüfü, fei caque quiñeque üi pengelqueiñmu tañi femquen. Inaduamaiñ quiñeque tüfa:

• Satanás. Tüfachi üi pengelquei tañi chaftuquefiel ta Chau Dios (Job 1:6).

• Huecüfü. Tüfachi üi pengelquei ñi huesa dunguyechefe ngen (Apocalipsis 12:9).

• Filu. Biblia mu tüfachi üi pengelquei ñi ngünencachequen (2 Corintios 11:3, TNM).

• Quintucaduamchequelu (Mateo 4:3, TNM).

• Coilatufe (Juan 8:44).

Ti Huecüfü rüfngei, adentulelai huesaque dungu ca huesaque raquiduam

Quiñeque che feipiquei Huecüfü adentulei huesaque dungu mu, ca femngechi adentulei huesaque dungu ñi mülen pu che ñi raquiduam mu, ca Chau Dios tañi raquiduam mu cütu piqueingün. Huelu feingelai, Biblia ta quimeltuquei Huecüfü ñi rüfngen, adentulelai ti huesaque dungu. Por ejemplo, Biblia feipi quiñe rupa Chau Dios nütramcai tati Huecüfü engu. Chau Dios culpan-ngelai tañi piuque mu, lifngei com tañi raquiduam. Feimu Chau Ngünechen epu rume che no, rüf felei ñi nütramcan cangelu püllü engu, tüfa tati Huecüfü (Deuteronomio 32:4; Job 2:1-6). Ca femngechi Jesús, nienolu quiñe culpan no rume, quintucaduameyu ti Huecüfü (Mateo 4:8-10; 1 Juan 3:5).

Fentren che raquiduamquei ñi rüfngenon tati Huecüfü. ¿Chumngelu? Biblia feipi ti Huecüfü caque rume dungu femquei ñi ngünencacheal, femngechi ñi femtripayal tañi ayüqueel (2 Tesalonicenses 2:9, 10). Fei tati Huecüfü raquiduamelquefi pu che ñi rüfngenon, fei rume cüme tripai tañi ngünencafiel ta pu che (2 Corintios 4:4).

Quiñeque che feipiquei: Lucifer pingequei ta Huecüfü.

Ti rüf dungu: Hebreo quehun mu, ti palabra rulpadungungelu “Lucifer”, ca feipiafui “huilüfquei” (Isaías 14:12). Tüfachi palabra tripai quiñe profecia mu. Ngüneduamliyiñ com ti profecia, quimürpuaiñ ñi femngechi feipingequen ta fillque lonco ülmen Babilonia huaria mu. Chau Dios yehuelcaeyu tañi mallmahun mu engün (Isaías 14:4, 13-20). Fei hueungelu Babilonia “huilüfcüleimi” pingei ayentun mu.

Quiñeque che feipiquei: Huecüfü cüdahuelquefi ta Chau Dios.

Ti rüf dungu: Huecüfü cüdahuelquelafi ta Chau Dios, doi mai caiñengei. Huecüfü caiñetuquefi pu cüdahuelquefilu ta Chau Dios, feimu inantucuquefi ca coilaque dungu mu dalluntucuquefi (1 Pedro 5:8; Apocalipsis 12:10).