Curehuen-ngenole epu che, ¿huesangepei mai ñi conal fillque cudumuhun dungu meu?

Quiñe troquiñche centro pingelu huincadungun mu, mülelu Estados Unidos ramtunquepifi pu hueche nielu mari quechu ca puulu mari ailla tripantu. Epe rangiñ reque tati ramtucangelu feipi ñi sexo oralquen engün.a Quiñe lifru feipi tati pu hueche ñi raquiduamquen tati sexo oral huesa femün no. Trürümfalngelai tati pecan cudumuhual piqueingün (ti lifru Oral Sex Is the New Goodnight Kiss).

• Cüpalechi ramtun mu, ¿chem piafuimi?

• ¿Chuchi am tati rüfngechi dungu?

• ¿Chumngelu falin-ngei ñi quimngeal tüfachi huimtun ñi cümen cam ñi cümenon?

Huiñoldungunge mai cam femlai.

1. ¿Niepüñeñafui quiñe üllcha niele sexo oral?

   1. Mai

   2. Femlai

2. ¿Cutranafui quiñe che sexo oral femlu?

   1. Mai

   2. Femlai

3. ¿Trürümngeafui tati sexo oral tati cudumuhun mu?

   1. Mai

   2. Femlai

Trürümfinge tami huiñoldungun.

1. ¿Niepüñeñafui quiñe üllcha niele sexo oral?

   Huiñoldungun: Femlai. Feimu fentrenque che raquiduamquei tañi huesalcanon tati sexo oralquelu, huelu huelulcaucüleingün.

2. ¿Cutranafui quiñe che sexo oral femlu?

   Huiñoldungun: Mai. Tati sexo oralquelu contuafeyu fillque cutran: hepatitis A o B, gonorrea, herpes, sida ca sifilis.

3. ¿Trürümngeafui tati sexo oral tati cudumuhun mu?

   Huiñoldungun: Mai. Re malüñmangele rume tañi chem quiñe che, trürümngeafui quiñe cudumuhun mu.

Peaiñ chem pi ta Biblia tüfachi huimtun mu.

Biblia feipi: “Fei tüfa Chau Ngünechen ñi ayüqueel: [...] tamün connoal pecan cudumuhun dungu mu” (1 Tesalonicenses 4:3, TNM).

Tati Biblia feipilu pecan cudumuhun mu coneltulei chem malühun rume epu che curehuen-ngenolu. Tüfachi dungu femquelu huesalcai ñi huenihuen-ngen Jehová engu ca quisutu huesalcahuafui (1 Pedro 3:12).

Biblia feipi: “Tati femquelu fillque pecan cudumuhun eluñmaquenolu Ngünechen ñi ley üñfituquefi quisu ñi cuerpo” (1 Corintios 6:18, TNM).

Tati femquelu sexo oral cutranafui ca huesalcayafui tañi huenihuen-ngen Jehová mu. Ca femngechi huesa duamcüleafui ti che ñi mongen mu. Quiñe lifru feipi: “Tati pu che cudumuulu petu ñi curehuen-ngenon huesa duamcüleafui ñi mongen mu ca falintuulayafui. Ca femngechi rupayafui tati pu che conlu caquelu podngechi huimtun mu. Fillque pecan cudumuhun rume huesalcaquefi pu che” (ti lifru Cómo hablar de sexo con los adolescentes para que te escuchen).

Biblia feipi: “Iñche, ta Jehová, tami Ngünechen, Tami Quimeltuqueteu eimi tami cümelcaleal” (Isaías 48:17).

¿Chem pimi? Chau Dios ñi feipin cudumuhun dungu mu, ¿cümelcaqueimu cam catrütuqueimu tami femal tami ayüqueelchi dungu? Raquiduamnge: amuleimi quiñe rüpü mu cheu miyauquei fentren auto. Mülenquepi letrero feipilelu chumngechi tami amuleal ca chem mu tami cuñiutucuhual. ¿Chem pimi? Tüfachi letrero, ¿cümelcaqueimu cam huesalcaqueimu chumngechi tami amuleal ti rüpü mu? ¿Chem rupayafui eimi ca caquelu pu che inanofile tañi feipilen tüfachi letrero? Chumngechi rume amulele ti auto, cuñihun-ngeafui llemai.

Ca femngechi feyentunolmi Ngünechen ñi ngülam mu, cutrancahuaimi tami femquen mu (Gálatas 6:7). Cangelu lifru feipi: “Femülmi chem rume quimnien mu tami huesalcamequen, fei quisutu yamuulayaimi” (ti lifru Sex Smart). Huelu inaniefilmi Jehová tañi ngülam, pengelaimi tami quim huechengen. Doi mai nieaimi quiñe lif raquiduam (1 Pedro 3:16).