Kelluafiyiñ pu che ñi inayafiel ta Jesus

1, 2. 1) Tañi feypilen Matew 28:⁠18-20, ¿chem doy falin küdaw elungey pu kristiano? 2) Tüfachi chillkatun mu, ¿chem ramtun ngüneduamaiñ?

DEW wiñomongetulu Jesus, kidu feypi kom tañi pu inanieetew ñi trawüluwal kiñe wingkul mu Galilea mapu mew. Trawüluwlu feyti mu, Jesus ñi pu inanieetew ayüwkülepelayngün chi (Mat. 28:⁠16). Feychi mu chi Jesus “pewfaluwtufi ta doy kechu pataka pu peñi” (1 Kor. 15:⁠6). Jesus, ¿chumngelu (chemu) adkünuy tüfachi trawün? Ñi werküafiel engün tüfachi falin küdaw: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün” (papeltunge Matew 28:⁠18-20).

² Pu allkütulu Jesus ñi feypin tüfachi dungu koneltuyngün tati wünen trawünche mew. Tüfa engün rume ayüniefuyngün doy che ñi inanierpuafiel ta Jesus.b Famülke mu, müley fentren rüfngechi kristiano wall Mapu püle koneltulelu fentren trawünche mew. Ka amuleyngün ñi femmeken tüfachi falin küdaw. Tüfachi chillkatun mu, ngüneduamaiñ meli ramtun: ¿Chumngelu fente falin-ngey kelluafiel pu che ñi disipulungerpual? Taiñ femal tüfachi falin küdaw, ¿chem fillke dungu müley taiñ femürpual? Kiduke pu kristiano, ¿kellupeafuy may Jesus ñi disipulungeal kiñe che? ¿Chumngelu ñom chengeaiñ taiñ femürpual tüfa?

 3. Tañi feypilen Juan 14:⁠6 ka 17:⁠3, ¿chumngelu fente falin-ngey kelluafiel pu che ñi disipulungerpual?

³ ¿Chumngelu fente falin-ngey kelluafiel pu che ñi disipulungerpual? Ñi weniyerpuafiel engün ta Chaw Ngünechen. Kafey pu inaniekefilu ta Jesus doy küme mongen nietukeyngün ka küpalechi antü mu nieafuyngün rumel mongen (papeltunge Juan 14:⁠6; 17:⁠3). Jesus elfalkünueiñmu kiñe falin küdaw, welu nieiñ kellu taiñ femürpual tüfa. Ti apostol Pablo feypi kidu ka kakelu kristiano “chaf küdawkeiñ Chaw Ngünechen engu” (1 Kor. 3:⁠9, Traducción del Nuevo Mundo [TNM]). Kulpafengeliyiñ rume, Jewba ka Jesus elfalkünueiñmu tüfachi falin küdaw, ¡müna küme dungu ürke!

 4. Ivan ka Matilde ñi rupan mu, ¿chum duamelkeeiñmu taiñ amuldungual?

⁴ Kellufiliyiñ pu che ñi inanierpuafiel ta Jesus, rume ayüwküleaiñ. Ngüneduamaiñ ñi rupan kiñe kurewen Colombia mapu tuwlu, Ivan ka Matilde pingeyngu. Amuldungulelfingu kiñe weche, Davier pingelu, fey tüfa feypi: “Ayüfun tañi küme elkünutual tañi mongen, welu küdawngey may”. Tüfachi weche adümuwkefuy boxeo ti kewan dungu, ka drogatukefuy ka rume putukefuy. Kafey trür mülekefuy tañi ayün domo engu, Erika pingelu, welu petu niewlafuyngu. Taiñ peñi Ivan feypi: “Davier fütra kamapu mülefuy, fey tayu pemeafiel, miyawkefuyu fentren ora cicleta mu, müna fotrangekefuy ti rüpü. Erika pefilu Davier ñi doy küme elkünutun ñi mongen, ka eluwi ñi chillkatual ta Biblia”. Rupalu chi antü, Davier drogatuwelay, ngolliwetulay ka elkünutufi ti boxeo. Kafey kureyewtuyngu Erika engu ley dungu mu. Taiñ lamngen Matilde feypi: “Davier engu Erika fawtisawi 2016 tripantu mu, fey femlu rakiduamiyu ñi feypikefel ta Davier: ‘Ayüfun tañi küme elkünutual tañi mongen, welu küdawngey may’. Fente tayu ayüwün mu, llangkünagi tayu külleñu”. Feley llemay, kellufiliyiñ pu che ñi inanierpuafiel ta Jesus, rume ayüwülaeiñmew.

 5. Taiñ kelluafiel pu che ñi disipulungerpual, ¿chem müley taiñ wüne femal?

⁵ Wüne eluwaiñ taiñ kintuafiel kom pu ayülu ñi kimafiel ta Chaw Jewba (Mat. 10:⁠11). Amuldungulelafiyiñ Jewba ñi dungu itrokom che taiñ pekefiel, femngechi pengelaiñ taiñ Dungukelu Iney Ngen Jewba ngen. Femmekeliyiñ Jesus ñi werküetew taiñ amuldungual, pengelaiñ taiñ rüf kristiano ngen ta iñchiñ.

 6. Ñi küme tripayal taiñ amuldungun, ¿chem kelluaeiñmu?

⁶ Fentren che rume ayüniey ñi kimürpual Biblia ñi rüf dungu. Welu kiñeke che ellaka mu duamtukelayngün, feymu müley taiñ kelluafiel ñi doy küpa kimal ti rüf dungu. Ñi küme tripayal taiñ amuldungun, küme rakiduamaiñ chem taiñ feypial. Dulliaiñ kiñeke nütram ñi ayükeel tati pu che, fey pepikawaiñ chumngechi taiñ nütramkayafiel feychi dungu.

 7. 1) ¿Chem epu pengelün dungu nütramkalelafuiñ pu che? 2) ¿Chumngelu duamfali küme allkütuafiel ka yamnieafiel ñi chem pimeken pu che?

⁷ Amuldungun mew feypiafuiñ tüfachi dungu: “¿Chem rakiduamkeymi tüfachi dungu mu? Fantepu mew müley fentren wedake dungu kom Mapu mew. ¿Duamniepeiñ may kiñe gobierno ñi ngünenieafiel kom tati Mapu, femngechi taiñ küme feletual?”. Fey papeltulelafuiñ ka kimeltulelafuiñ chem ñi feypilen Daniel 2:⁠44. Kam feypiafuiñ: “Küpa ramtufeyu tüfachi dungu. ¿Chumngechi küme tremümafuiñ taiñ pichikeche?”. Fey papeltulelafuiñ ka kimeltulelafuiñ chem ñi feypilen Deuteronomio 6:⁠6, 7. Chem dulliliyiñ rume taiñ nütramkayafiel pu che, rakiduamtukuaiñ chem ñi duamnieel engün. Ka chumngechi kelluafeyew Biblia ñi kimeltukeel. Amuldungufiliyiñ pu che, müley taiñ küme allkütuafiel ka yamnieafiel tañi chem pimeken. Femngechi femliyiñ, doy küme kimaiñ chem ñi rakiduamkülen tati pu che, fey doy eluwküleay taiñ allkütuaetew.

 8. ¿Chumngelu fentekünulayaiñ taiñ wiñopemetuafiel pu che?

⁸ Petu ñi eluwnon tati che ñi chillkatual ta Biblia, duamfalngeafuy taiñ wiñopemetuafiel doy kiñe rupa chi. ¿Chumngelu? Wiñopemetufiliyiñ ti che, ngelayafuy chi tañi ruka mu kam pepi llowlayafeiñmu chi. Kafey kiñeke che eluwküleafuy ñi chillkatual ta Biblia, dew taiñ wiñopemetufiel mufüke rupa. Rakiduamaiñ kiñe pengelün dungu: fentren rupa müley taiñ wütrukoafiel kiñe anümka, fey tañi doy küme tremal. Ka femngechi, fentren rupa müley taiñ nütramkayafiel Chaw Ngünechen ñi dungu tati pu che, fey tañi doy piwkeyeafiel ta Jewba ka Jesus.

9, 10. Kom pu kristiano kellukonkeiñ ñi peafiel pu küme piwkengelu, ¿chumngelu feypiafuiñ tüfa?

⁹ Kom pu kristiano kellukonkeiñ ñi peafiel pu küme piwkengelu. Taiñ küdaw trürümngeafuy ta kintual kiñe pichi wentru ñamlu. ¿Chumngechi? Nütramkayaiñ kiñe rupan dungu. Kiñe trokiñ mapu mu, ñami kiñe pichi wentru küla tripantu nielu. Fey doy 500 che kellukoni tañi kintuafiel. Rupalu 20 ora peno, kiñe wentru petufi ti pichi wentru kiñe lelfün mew. Welu tüfachi wentru mallmawlay kidu ñi pefiel, doy may feypi: “Kom iñchiñ kellukoniyiñ ñi petuafiel ti pichi wentru”.

¹⁰ Ka femngechi fentren che ñamkiyawkey reke ñi mongen mu. Nielayngün chem maneluwün no rume, feymu duamnieyngün ñi kellungeal (Efes. 2:⁠12). Doy 8 millon pu Dungukelu Iney Ngen Jewba kintumekeyngün feychi pu che ñamkiyawlu reke. Kiñeke iñchiñ pelayafuiñ chi iney no rume küpa chillkatulu ti Biblia, welu kakelu peñi ka lamngen peafuyngün feychi pu che chew taiñ amuldungukeel. Kiñe peñi kam lamngen kellufile kiñe che ñi inanieafiel ta Jesus, kom ayüwtripakeiñ.

11. Penofiliyiñ kiñe che taiñ chillkatulelafiel Biblia, ¿chumngechi kelluntukuafuiñ?

¹¹ Welu penofiliyiñ kiñe che taiñ chillkatulelafiel Biblia, kom iñchiñ kelluafuiñ pu che ñi disipulungerpual. ¿Chumngechi? Küme llowafiyiñ we küpalu taiñ trawün mu, fey taiñ küme duamelafiel. Femngechi femliyiñ, pengelelafiyiñ engün iñchiñ taiñ rüf piwkeyewün, fey kimürpuayngün taiñ rüf kristiano ngen (Juan 13:⁠34, 35). Kafey tati trawün mu wiñoldunguliyiñ, pichin rewall, pu we küpalu kimürpuayngün chumngechi ñi wiñoldungual trawün mu, fey ñi feypial tañi feyentukeel yamün mew. Kafey amuldunguafuiñ kiñe we amuldungukelu iñchiñ ka kimeltuafuiñ chumngechi adümafiel tati Biblia, fey ñi küme kimeltulelafiel pu che. Femngechi femliyiñ, kelluafiyiñ engün ñi inayentuafiel ta Jesus (Luka 10:⁠25-28).

12. Taiñ kelluafiel pu che ñi inayafiel ta Jesus, ¿duamfalpey may nieal fentren adümuwün? Feypinge kiñe rupan dungu.

¹² Taiñ kelluafiel pu che ñi inayafiel ta Jesus, duamfal-lay nieal fentren adümuwün. ¿Chumngelu am? Ngüneduamaiñ ñi rupan kiñe lamngen Bolivia mapu tuwlu, Faustina pingey. Kidu we kimfilu pu Dungukelu Iney Ngen Jewba, kim papeltukelafuy, welu pichin kimürpuy. Fewla fawtisaley ka müna ayükey kimeltulelafiel Biblia ta kakelu che. Fill semana Faustina kimeltulelkefi Biblia ta kechu che. Kidu newe kim papeltukelafuy chumngechi ñi femken epe kom che ñi kimeltulelfiel, welu kellufi kayu che ñi fawtisawal engün (Luka 10:⁠21).

13. Fentren duam nieliyiñ rume kellufiliyiñ pu che ñi disipulungerpual, ¿chem kümeke dungu nierpuaiñ?

¹³ Fentren kristiano fentren duam niekeyngün. Welu ka elantükünukeyngün ñi kimeltulelafiel Biblia ta kiñeke che, fey tüfa rume ayüwülkeeyew engün. Nütramkayaiñ ñi rupan kiñe lamngen Melanie pingelu. Melanie kidu tremümkefi tañi domo püñeñ pura tripantu nielu. Fey kom antü küdawkefuy, ka kellu dapikefuy tañi chaw cancer kutran nielu. Melanie fütra kamapuley Alaska mapu mu, üye mu ngelafuy kakelu Dungukelu Iney Ngen Jewba, kidu müten. Melanie rume ayüniefuy ñi peafiel iney tañi kimeltulelafiel Biblia, feymu müchayke ngillatukefuy ta Jewba ñi newentukuaetew, fey ñi amuldungual wütrengelu rume. Fey kiñe antü kimürpufi kiñe domo Sara pingelu, kidu afmatulewey kimfilu Chaw Dios ñi nien kiñe üy. Rupalu ta antü, Sara eluwi ñi chillkatual ta Biblia. Taiñ lamngen Melanie feypi: “Fill viernes nagantü, rume ürkülekefun. Welu tañi püñeñ iñchiw pemekefiyu ta Sara, fey tayu kimeltulelafiel Biblia. Tüfa rume yafültukukeeyumu. Mülefuy tayu ngüneduamal chumngechi wiñoldungual tañi ramtukeel ta Sara, rume ayükefiyu tüfa. Kafey rume ayüwiyu pefilu Sara ñi weniyerpufiel ta Jewba”. Sara kayñetungelu rume, newen piwkekünuwi, elkünutufi tañi iglesia ka fawtisawi.

14. 1) Tañi femkeel kiñe challwafe, ¿chumngechi trürümngey taiñ femkeel mu? 2) Ñi feypin Pablo 2 Timotew 4:⁠1, 2 mu, ¿chem rakiduameleymu tami femal?

¹⁴ Petu penoliyiñ iney no rume ayünielu inayafiel ta Jesus, amulepe taiñ kintukefiel feychi che. Jesus trürümfi tüfachi küdaw tañi femkeel kiñe challwafe. Kiñeke mu pu challwafe fentren ora küdawkey, welu entukelayngün kiñe challwa no rume. Kafey puliwen mu ka pun mew küdawkeyngün, ka kiñeke mu fentreñma miyawkeyngün farku mu (Luka 5:⁠5). Ka femngechi fentren peñi ka lamngen fentren ora küdawkey ñi kintuafiel pu küme piwkengelu fill püle. Femkeyngün tüfa tañi amuldungulelafiel doy fentren che. Fentren rupa tüfachi pu peñi ka lamngen pekey che ayülu tañi allkütuaetew. Feymu rakiduamaiñ chem ora müley pu che tañi ruka mu ka chew püle miyawkey engün, fey tripayaiñ taiñ amuldungulelafiel (papeltunge 2 Timotew 4:⁠1, 2).

15. ¿Chumngelu ñom chengeaiñ taiñ kimeltulelafiel Biblia tati pu che?

¹⁵ Taiñ kimeltulelafiel Biblia tati pu che, ¿chumngelu ñom chengeaiñ? Müley taiñ kelluafiel pu chillkatukelu ñi kimafiel ka piwkeyeafiel Biblia ñi kimeltukeel. Kafey müley taiñ kelluafiel engün ñi kimafiel ka piwkeyeafiel ta Jewba. Ka femngechi kimeltulelafiyiñ pu chillkatukelu chem ayükey Jesus ñi femal tañi pu inanieetew, ka chumngechi inayafuyngün tüfachi werkün dungu tañi mongen mew. Ka kidukünulayafiyiñ engün petu eluwlu ñi küme elkünutual tañi mongen. Kiñeke chillkatukelu duamniey mufüke küyen müten ñi nietual doy küme rakiduam ka doy kümeke wimtun, welu kakelu chillkatukelu doy alüñmakey ñi femürpual tüfa.

16. ¿Chem pengelkeeiñmu Raul ñi rupan dungu?

¹⁶ Ngüneduamaiñ ñi rupan kiñe peñi werküngelu Peru mapu mew tañi amuldungual. Tañi nütram pengeli chem kümeke dungu rupayafuy ñom chengeliyiñ. Kidu feypi: “Kiñe wentru Raul pingelu epu lifru chillkatufuy, welu küme yeniekelafuy tañi mongen. Küme yewkelafuy tañi domo engu, pekanka dungukefuy ka tañi pu pichikeche yamkelafeyew rume. Welu küpakefuy trawün mu, feymu fentekünulan ñi pemeafiel kidu tañi pu che engün. Doy küla tripantu rupalu tañi kimfiel, kidu pepikawkülerpuy ñi fawtisawal”.

17. ¿Chem ngüneduamaiñ küpalechi chillkatun mu?

¹⁷ Jesus feypi: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün”. Taiñ femngechi femal, kiñeke mu amuldungulelkefiyiñ pu che ka feyentun nielu. Küpalechi chillkatun mu, ngüneduamaiñ chumngechi amuldungulelafuiñ pu che inakenolu chem feyentun no rume ka pu feyentukenolu ñi mülen ta Chaw Ngünechen.