Pichiñma meu, Chau Jehová tañi Gobierno apümcayafi com huesaque dungu ñi mülen Mapu meu. Fente ñi cümen tüfachi dungu ñi rupayal, com che duamniei tañi allcütuafiel. Feimu Jesús ayüquefui tañi pu inaniequeteu ñi quimelelafiel com pu che tüfachi cümeque dungu (Mateo 28:19, 20). Fei pu Dunguquelu Ineingen Jehová, ¿chummequeingün ñi inanieal Jesús tañi huercüel?

1. ¿Chumngechi femtripamequei Mateo 24:14?

Jesús feipi: “Tati cümeque dungu Chau Dios ñi ngünenietual ta mapu amuldungungeai huall mapu püle” (Mateo 24:14). Iñchiñ pu Dunguquelu Ineingen Jehová rume ayühulqueiñmu coneltuleal tüfachi cüdau meu. Feimu quimelelfiyiñ tati pu che Ngünechen tañi cümeque dungu doi 1.000 quehun dungun meu. Tüfa quiñe fütra cüdau llemai, feimu duamfali ñi hulngeal fentren tiempo ca nehuen ñi adcünungeal. Quimnieiñ Jehová tañi nehuen meu müten cüme tripaquei tüfachi cüdau.

2. ¿Chumqueiñ taiñ amuldungucheal?

Iñchiñ amuldunguqueiñ cheu rume ñi mülen tati pu che. Pu hunenque cristiano reque, iñchiñ amuldunguqueiñ “fill ruca püle” (Hechos 5:42). Femngechi fill tripantu quimelelquefiyiñ ta fentren che Ngünechen tañi cümeque dungu. Quiñeque mu tati pu che mülequelai tañi ruca meu, feimu amuldunguqueiñ cheu ñi miyauquen fentren che. Fei femqueiñ chem dungu rume taiñ amuldungulelafiel tati pu che Jehová tañi cümeque dungu.

3. ¿Inei engün am mülei ñi amuldungual?

Com tati pu rüfngechi cristiano mülei ñi amuldungual. Iñchiñ rume nehuentuqueiñ taiñ amuldungulelafiel tati pu che Ngünechen tañi cümeque dungu, femngechi tañi montual engün (papeltuaimi 1 Timoteo 4:16). Iñchiñ cullingequelaiñ taiñ amuldunguchequen meu, doi mai inaniequeiñ Biblia ñi feipin: “Refalta llohuimün, feimu refalta hulaimün” (Mateo 10:7, 8). Taiñ amuldunguchequen meu püramyequefiyiñ ca ayühulquefiyiñ ta Jehová, feimu allcütunoeliyiñmu rume tati pu che, iñchiñ fentecünuquelaiñ taiñ amuldungucheal.

DOI QUIMAIMI

4. Com nehuen mu amuldunguquefiyiñ tati pu che

VIDEO: Amuldungukeiñ “tuntepu ñi mülen ta Mapu” (7:33)

• Pu Dunguquelu Ineingen Jehová tañi amuldunguchequen meu, ¿chem dungu doi afmatuleimu?

Papeltuaiñ Mateo 22:39 ca Romanos 10:13-15, fei ngüneduamaiñ tüfachi epu ramtun:

• Taiñ amuldunguchequen mu, ¿chumngelu (chemu) pengeli taiñ piuqueyefiel taiñ chafche?

• Jehová, ¿chumngechi troquiquefi tati pu che amuldunguchequelu? (Pefinge Romanos 10:15).

5. Quiñentrür cüdaucüleiñ Chau Ngünechen engu

Fentren dungu ñi rupaquen amuldungun meu pengeli Jehová ñi adniefiel tüfachi amuldungun cüdau. Peaiñ quiñe dungu ñi rupan Nueva Zelanda mapu meu. Quiñe peñi Paul pingelu amuldunguyaulu fill ruca püle, pei quiñe domo tañi allcütueteu. Tüfachi domo pulihuen meu ngillatumequefui ta Chau Jehová tañi pemengeal, “fei 3 hora rupalu müten iñche rupan quisu tañi ruca meu” pi taiñ peñi Paul.

Papeltuaiñ 1 Corintios 3:9, ca ngüneduamaiñ tüfachi ramtun:

• Ñi rupan Nueva Zelanda mu ca fill mapu püle, ¿chumngechi pengeli Jehová ñi adniefiel taiñ amuldungun cüdau?

Papeltuaiñ Hechos 1:8, ca ngüneduamaiñ tüfachi ramtun:

• ¿Chumngelu duamnieiñ Jehová taiñ quelluaeteu tüfachi fütra cüdau meu?

¡Tüfei!

Taiñ trahun rangiñ semana meu ñi femngequeel, pepicangequeiñ chumngechi taiñ amuldungucheal. Eimi amupeimi chi tüfachi trahun, ¿chumngentuquefimi taiñ pepicangequen?

6. Inaniequeiñ Jehová ñi feipin, feimu amuldunguchequeiñ

Cuifi meu, quiñeque che ayüquefui pu hunenque cristiano ñi amuldunguhuenoal engün. Huelu pu hunenque cristiano pünefingün tati ley dungu, femngechi elungei tañi amuldungucheal Chau Dios ñi cümeque dungu (Filipenses 1:7). Ca femngechi femquei Jehová tañi pu che famülque mu.a

VIDEO: Ley dungu mu incaquefiyiñ taiñ amuldungun cüdau (2:28)

Papeltuaiñ Hechos 5:27-42, ca ngüneduamaiñ tüfachi ramtun:

• ¿Chumngelu fentecünulayaiñ taiñ amuldungual? (Pefinge Hechos 5:29, 38 ca 39).

TAMI QUIMEL

Jesús feipifi tañi pu inaniequeteu ñi amuldungual huall Mapu meu. Jehová quellumequefi tañi pu che ñi huechunenturpual tüfachi cüdau.

¿Chem piafuimi?

• ¿Chumngechi amuldungungequei tati cümeque dungu huall Mapu meu?

• Taiñ amuldunguchequen mu, ¿chumngechi pengelqueiñ taiñ piuqueyefiel taiñ chafche?

• Coneltulelmi amuldungun meu, ¿ayühulpeafeimu mai? ¿Chem pimi cai?

CA PEAFUIMI

Pefinge chumngechi pu Dunguquelu Ineingen Jehová amuldunguquefingün pu che fütraque huaria meu.

Amuldungungei cheu rupaquei fentren che París huaria meu (5:11)

Pu Dunguquelu Ineingen Jehová, ¿chumqueingün am ñi amuldungulelafiel pu lefmaulu ñi mapu meu?

Amuldungulelquefiyiñ pu che lefmaulu tañi mapu meu (5:59)

Cüme allcütufinge quiñe lamngen ñi feipin chumngechi fente ayühulqueyu tañi amuldunguchequen.

Rume ayüucülen femngechi cüdau tañi nieel (6:29)

Ngüneduamnge ñi dulliel quiñeque tribunal, fei tüfa quelluqueiñmu taiñ amuldungucheal.

“Jehová tañi pu che amuingün tribunal meu” (Chau Dios tañi Gobierno, ¡deu ngüneniemequei! quimeltun 13)

Jesús feipi: pu cristiano mülei tañi fautizahual (papeltuaimi Mateo 28:19, 20). Huelu, ¿chumngechi mülei ñi fautizangeal tati pu che? Ca, ¿chem mülei ñi femal tati pu che ñi fautizangerpual?

1. ¿Chumngechi mülei ñi fautizangeal tati pu che?

Griego quehun meu “fautizahun” feipi quiñe che ñi ñamüntucungen co meu. Jesús fautizangei Jordán leufü meu, fei fautizangelu hula Biblia feipi quisu ‘tripatui co mu’ (Marcos 1:9, 10). Ca femngechi pu rüfngechi cristiano ñi fautizangeal ñamüntucungequeingün co meu.

2. Quiñe che, ¿chem pengeli tañi fautizahun meu?

Fautizangelu quiñe che pengeli com tati pu che ñi adquiñ meu ñi hultucuel tañi mongen Jehová meu. Fei ¿chumi quiñe che hultuculu tañi mongen Jehová meu? Petu ñi fautizaunon com piuque mu ngillatufi ta Jehová ca feipicünufi ñi serfiafiel rumel meu. Feichi ngillatun meu feipicünufi ta Jehová ñi poyeafiel ta quisu müten ca ñi femal quisu tañi ayüqueel. Ca femngechi eluhui ñi illamuhual, fei inaniequefi Jesús tañi quimeltuqueel ca tañi femel (Mateo 16:24). Tati pu che ngillatufilu ta Jehová ñi hulcünual tañi mongen ca fautizaulu, doi cüme hueniyeafuingün ta Ngünechen ca tati pu che poyequefilu ta Jehová.

3. Tami fautizahual, ¿chem mülei tami femal?

Ayülmi tami fautizahual mülei tami quimafiel ta Jehová ca maneluucüleal quisu meu (papeltuaimi Hebreos 11:6). Amulele tami quimfiel ta Ngünechen, doi maneluucüleaimi quisu meu ca doi piuqueyerpuafimi. Fei fente tami piuqueyeniefiel ta Jehová, eluhuaimi tami amuldungucheal ca inanieal tañi feipin (2 Timoteo 4:2; 1 Juan 5:3). Fei yenielmi tami mongen “chumngechi miyauquei Chau Jehová ñi pu che”, eluhuafuimi tami hulcünual tami mongen Jehová meu ca fautizahual (Colosenses 1:9, 10).a

DOI QUIMAIMI

4. ¿Chem quimeltueiñmu Jesús tañi fautizahun?

Taiñ doi quimal Jesús tañi fautizahun meu, papeltuaiñ Mateo 3:13-17. Fei hula, ngüneduamaiñ tüfachi epu ramtun:

• Fautizaulu Jesús, ¿quiñe pichichengepefui mai?

• ¿Chumngechi fautizangei Jesús? ¿Pichi hutrucongepei mai tañi lonco meu?

Jesús fautizaulu eluhui ñi femal ti cüdau ñi elfalcünuleteu tañi Chau. Papeltuaiñ Lucas 3:21-23 ca Juan 6:38, fei ngüneduamaiñ tüfachi ramtun:

• Deu fautizaulu Jesús, ¿chem cüdau doyümi tañi mongen meu?

5. Fautizahuafuimi llemai

Llicaleafuimi chi tami hultucual tami mongen Jehová meu ca tami fautizahual, huelu eimi ñochiquechi eluhurpuafuimi tami fautizahual. Tami quimürpual chumingün quiñeque che tañi fautizahual, peaiñ ti VIDEO.

VIDEO: ¿Chumafuimi tami hueniyeafiel ta Jehová? (1:11)

Papeltuaiñ Juan 17:3 ca Santiago 1:5, fei ngüneduamaiñ tüfachi ramtun:

• Quiñe che ayüle ñi fautizahual, ¿chem quelluafeyu ñi pepicaucüleal?

1. Iñchiñ ngillatufiyiñ ta Jehová ca feipicünufiyiñ taiñ poyeafiel rumel meu, femngechi hultucuiñ taiñ mongen quisu meu.

2. Fautizaulu iñchiñ, pengeliyiñ com pu che ñi adquiñ meu taiñ hulcünuel taiñ mongen Jehová meu.

6. Fautizauliyiñ, conafuiñ Jehová tañi troquiñche meu

Chem femfuliyiñ rume cam chem tuhun niefuliyiñ rume, fautizaulu iñchiñ coniyiñ Jehová tañi troquiñche meu, feimu com quiñeucüleiñ quiñe fütra familia reque. ¡Felei llemai! Com quiñeucüleiñ taiñ feyentun meu ca inaniequeiñ Biblia tañi feipin. Papeltuaiñ Salmo 25:14 ca 1 Pedro 2:17, fei ngüneduamaiñ tüfachi ramtun:

• Fautizauliyiñ, ¿chem llohuaiñ Jehová meu? Ca ¿chum yeucüleaiñ taiñ pu peñi ca lamngen iñchiñ?

TAMI QUIMEL

Jesús feipi: pu cristiano mülei tañi fautizahual. Petu taiñ fautizaunon mülei taiñ cüme hueniyeafiel ta Jehová, inanieal tañi ngülam ca hultucual taiñ mongen Jehová mu.

¿Chem piafuimi?

• ¿Chumngechi mülei ñi fautizangeal tati pu che? Ca ¿chumngelu fente falin-ngei ñi fautizangeal pu che?

• Hultucual taiñ mongen Jehová meu ca fautizahual, ¿trürngepei mai?

• Quiñe che, ¿chem mülei ñi femal petu ñi hultucunon tañi mongen Jehová meu ca fautizaunon?

CA PEAFUIMI

Ngüneduamnge chem am tati fautizahun ca quiñeque dungu ñi quimeltungequeel tati fautizahun meu.

“¿Chem am tati fautizahun?” (Troquiñ internet mu)

Quimürpunge quiñeque ngülam tami quelluaeteu tami fautizahual.

“Piwkeyefilmi ta Jewba, fautisawürpuafuymi” (Ti Huerquen marzo, 2020)

Papeltunge chem quellueyu quiñe huentru ñi fautizahual.

“Ayülefuingün iñche tañi quimürpual ti rüf dungu” (Ti Huerquen 1 febrero, 2013)

Ngüneduamnge chumngelu fente cümei tami fautizahual ca chem quelluafeimu cüme pepicaucüleal.

“¿Mülepei mai tañi fautizahual?” (Falinque ngülam pu huechequeche ñi ramtuqueel [2], quimeltun 37)