Yamnieafimi “Ngünechen tañi trapümel”

1, 2. Taiñ inayal Ebrew 13:4, ¿chem müley taiñ femal?

KOM iñchiñ ayünieiñ taiñ yamnieafiel ta Jewba. Kidu feley tañi yamniengeal, ka feypikünuy ñi falintunieafiel kom tañi pu yamnieetew (1 Samuel 2:30; Proverbios 3:9; Apokalipsi 4:11). Kafey Jewba feypikeeiñmu taiñ yamnieafiel kakelu che, Biblia feypi taiñ yamnieafiel pu nielu awtoridad (Romanu 12:10; 13:7). Welu ka feypi taiñ yamnieafiel kangelu dungu: tati kurewen.

² Tati apostol Pablo wirintukuy: “Itrokom che yamniepe tati kureyewün dungu ka ñi yamniewael ta kurewen nor piwke mew” (Ebrew 13:4). Tüfachi dungu ñi feypiel ta Pablo, pekan ngülam no tati. Kom pu kristiano müley tañi yamnieafiel ka falintunieafiel ti kurewen dungu. ¿Eymi ka femngechi falintukeymi may ti kurewen? Ka nielmi tami afkadi, ¿falintukeymi may tamu niewün?

 3. Jesus, ¿chem falin dungu feypi tati kurewen dungu mew? (Inaduamnge ti adentun ellaka mu mülelu).

³ Falintuniefilmi ti kurewen dungu kümelkamekeymi tati. Inayentumekeymi ta Jesus, kidu müna falintuniefi ti kurewen dungu. Tati pu farisew ramtueyew engün tati wüdawün dungu mew, fey Jesus akordalelfi tañi chem pin Jewba trapümfilu ti wünen kurewen: ‘Feymew ta wentru wichuay tañi chaw mew ka tañi ñuke mew tañi wichu amayewael ñi domo engu, fey mür kiñe che reke ñi feleael engu’ pi ta Chaw Ngünechen. Fey Jesus ka feypifi pu farisew: “Ngelay [iney no rume] tañi wüdamentumekeafiel Ngünechen tañi trapümel” (papeltunge Marku 10:2-12; Génesis 2:24).

 4. Jewba trapümfilu Adan Eva engu, ¿chem ayüniefuy ñi femal engu?

⁴ Jesus küme kimniefuy Chaw Dios elkünuy ñi niewal ti pu che, ka feypikünuy tañi rumel kiñewküleal. Chaw Ngünechen feychi trapümfilu Adan Eva engu, ‘eymu wüdawafuymu’ pilafi. Doy may, kidu ayüniefuy tañi rumel kiñewküleal, fey turpu aflayafuy ñi kurewen-ngen engu.

 5. Feychi lankepilu ta che, ¿chumngechi kalerumetuy ti kurewen dungu?

⁵ Welu küme kimnieiñ, kulpalu ta Adan, kalerumetuy pu che tañi mongen. ¿Chumngechi? Lankepi ta che, feymu kaletuy tunteñma ñi niewafel pu kurewen. Pablo kimeltuy kiñe che lale tañi afkadi kurewen-ngewetulayngu, feymu pile tati lantulu elungekey tañi niewal kangelu che engu (Romanu 7:1-3).

 6. Chaw Dios, ¿chem rakiduamkey tati kurewen dungu mu? Ka ¿chumngechi tati Ley kimeltukeeiñmu tüfa?

⁶ Tati Ley Chaw Dios ñi elufiel pu israelche feypikünuy kakelu dungu tañi femafel pu kurewen. Petu tañi wülngenon tüfa, pu wentru doy kiñe domo niekefuy. Tati Ley elufi pu israel wentru ñi amuleal tañi femngechi femün. Welu ka kuñiwtukukefuy pu domo ka ñi pu pichikeche tañi wedalkangenoal engün. ¿Chumngechi? Feytachi Ley ñi elkünuel ta Jewba feypi kiñe israel wentru niewafuy kiñe esclava domo engu. Welu ka kiñe domo engu niewfule wüla, petu müley tañi elunieafiel ñi wünen domo kom tañi duamnieel. Chaw Ngünechen werkükefuy tüfachi wentru ñi kuñiwtukuafiel ka eluafiel ñi duamnieel tañi domo (Éxodo 21:9, 10). Famülke mu inakelafiyiñ tati Ley ñi elungeel ta Moyse, welu tüfa kimeltukeeiñmu chumngentukey Chaw Dios ti kurewen dungu, kidu müna falintuniefi. Feymu iñchiñ ka küpa yamniefiyiñ llemay.

 7. Deuteronomio 24:1 ñi feypin mu, ¿chem feypi tati Ley ti wüdawün dungu mew? Ka ¿chumngelu?

⁷ Tati wüdawün dungu kay, ¿chem kimeltuy tati Ley? Jewba turpu pilay ñi wüdawal pu kurewen, welu tati Ley feypikefuy ti wentru ñi wüdayafel tañi domo, ¿chumngelu kay? Biblia feypi: “Kiñe wentru niewle kiñe domo engu, welu tüfa tutenoelieyew, peñmafilu am ñi femün norngenochi dungu. Fey kidu müley ñi eluafiel kiñe wirin dungu tañi wüdayafiel ñi domo, fey ‘tripayaymi tañi ruka mew’ piafi.” (Deuteronomio 24:1). Tati Ley feypilay chem dungu koneltulelu tati “norngenochi dungu” mu. Welu, pekan dungu no fel tati, yewen-ngepelay ka fütra dungu trokingepelay (Deuteronomio 23:14). Feychi mülepalu wüla Jesus, müna wedalkamekekey pu judiu, kidu engün wüdakefi ñi domo “chem dungu mew rume” (Matew 19:3). Rüfkünu llemay, iñchiñ turpu femngechi femlayaiñ.

 8. Jewba, ¿chumngentukefi ñi wüdawün pu kurewen?

⁸ Petu mongelelu ti pelon wentru Malakia, pu wentru wüdakefuy ñi domo, fey tañi nieafiel peno ka domo doy üllchalelu ka poyenofilu ta Jewba. Welu Chaw Ngünechen küme feypikünuy ñi chumngentukefiel ti wüdawün dungu, kidu feypi: “Üdeken ñi wüdawün pu kurewen” (Malaquías 2:14-16). Jewba ñi rakiduam kaletukelay, ellaka mu pengelkünuy ñi chumngentukefiel ti kurewen dungu, kidu feypi tati wentru ‘trawüay ñi domo engu, fey mür kiñe che reke müten ñi feleal’ (Génesis 2:24). Jesus ka femngechi yamniekefuy ti kurewen dungu, kidu feypi: “Ngelay iney rume ñi wüdamentuael Ngünechen ñi trapümel” (Matew 19:6).

 9. Jesus tañi feypin mülelu Marku 10:11, 12, ¿chem kimeltueiñmu ti wüdawün dungu mew?

⁹ Welu kiñe kristiano, ¿elungepeafuy may tañi wüdayafiel ñi afkadi fey ñi niewal ka che engu? Ngüneduamnge Jesus tañi feypin: ‘Tati wüdalu tañi domo fey ka domo kureyetule, ñiwaldomofengey ñi wüdafiel mew tañi wünen domo. Fey tati domo kay wüdakünutule tañi füta, fey fütayetufile kangelu wentru, ka femngechi ñiwafengey’ (Marku 10:11, 12; Luka 16:18). Kimfali tati, Jesus yamniefi ti kurewen dungu, ka ayüniey kom pu che ñi ka femngechi femal. Kiñe wentru wüdafule tañi domo, fey ñi kulpanon tüfachi domo, fey ti wentru ka domo engu niewle, ñiway tati. Ka femngechi feley kiñe domo wüdafule tañi füta, fey ñi kulpanon tüfachi wentru. Pekan wüdawle pu kurewen, petu kureyewküleyngu. ¿Chumngelu am? Jewba petu niewlu trokiniefi, petu “kiñe che reke” feleyngün. Jesus ka feypi kiñe wentru wüdakünufilu ñi kulpangenochi domo, feychi domo ñiwayafuy. ¿Chumngechi am? Feychi mu kiñe domo wüdawlu tañi wentru engu, “fütangenoli fillalean” piafuy chi. Fey ka fütangefule, ñiwafengeafuy.

10. Kiñe kristiano, ¿chumngelu elungeafuy ñi wüdayafiel ñi afkadi ka ñi niewal ka che engu?

¹⁰ Kiñe che ley dungu mu wüdayafuy ñi afkadi, tüfa ñiwañpeelieyew müten. Femngechi feypi Jesus: ‘Iñche ta feypiwayiñ tati wüdalu tañi domo fey tañi ñiwañpenoetew rume [kon-nolu rume pekan kudumuwün dungu mew, TNM], fey ka domo kureyetule, fey ta ñiwaldomofengey. Fey kureyefilu ti wüdakünuelchi domo, ka femngechi ñiwaldomofengey’ (Matew 19:9). Jesus wül-lu ñi wewpin ti fütra wingkul mew, küme kimfalkünuy tüfa (Matew 5:31, 32). Jesus feypilu tati pekan kudumuwün dungu, ¿chem pifel am? Fillke kulpan dungu, tüfa mu koneltuley ta ñiwaluwal, kulliafiel kiñe che ñi kudumafiel, ka epu che kurewen-ngenolu ñi kudumuwal, kafey chaf wentru kam chaf domo femuwkelu tüfachi dungu, ka nüntukayafiel kam malütuafiel kiñe kulliñ. Fey kiñe wentru kurengelu konle pekan kudumuwün mu, ¿chem dungu rupayafuy? Tañi domo dulliafuy ñi wüdawal kam femnoal. Kidu dullile ñi wüdayafiel tañi wentru, Jewba kurewen-ngelu trokiwelayafi.

11. Kiñe kristiano ñiwañpengele, ¿chumngelu dulliafuy tañi wüdanoafiel ñi afkadi?

¹¹ Jesus feypilay ñiwañpengele kiñe che müley ñi wüdayafiel tañi afkadi. Rakiduamnge tüfa: kiñe domo dulliafuy ñi mülekayal tañi wentru engu, kidu konlu rume pekan kudumuwün dungu mu. ¿Chumngelu? Kidu petu piwkeyeafuy chi tañi wentru, feymu eluwküleafuy tañi perdonayafiel, fey kiñentrür yafüluwafuyngu ñi doy küme kurewen-ngeal. Kafey kidu wüdafile ñi wentru ka wiño fütangetunole, wedake dungu mu rupapelayafuy. Rakiduamnge kiñeke dungu ñi rupayafel: kontuafeyew filla, duamnieafuy chi kudumuwün dungu ka kidulelu trokiwafuy. Kafey, tañi pu püñeñ weda tripayafuy ka kidu doy küdawtuafuy tañi kimeltuafiel engün ñi poyeafiel ta Jewba (1 Korintio 7:14). Rüfkünu may, tati afkadi kulpanolu dullifule ñi wüdawal ley dungu mu, rupayafuy wedake dungu.

12. ¿Chem rupay Osea tañi kurewen-ngen mu?

¹² Ti pelon wentru Osea ñi rupan kimeltukeeiñmu Jewba tañi chumngentukefiel ti kurewen dungu. Jewba feypifi ta Osea ñi niewal Gomer engu, ka feypikünufi tüfachi domo küriyawafuy ka nierpuafuy ta püñeñ tañi küriyawün mu. Wüne Gomer Osea engu nierpuy kiñe wentru püñeñ (Oseas 1:2, 3). Fey wüla Gomer nierpuy kiñe domo püñeñ ka wentru püñeñ, welu kangelu wentru püñeñelpelaeyew. Osea wüdakünulafi ta Gomer, tüfa mufüke ñiwañpeeyew rume. Rupalechi antü mu, Gomer püntüwi Osea mu, fey esclavangerpuy. Welu Osea ngillanentueyew, fey ñi wiño trawütual engu (Oseas 3:1, 2). Jewba feypikünufi ta Osea ñi femal tüfa, femngechi pengelkünuy kidu tañi femfiel pu israelche. Tüfa engün fentre kulpakelu rume ka poyekefilu rume koylake dios, Jewba fentren rupa wiñoduamtueyew engün. Ngüneduamliyiñ ñi rupan Osea tañi kurewen-ngen mu, ¿chem kimafuiñ?

13. 1) Osea, ¿chumngelu wiño trawütuy Gomer engu? 2) Tañi rupan, ¿chem kimeltukeeiñmu ti kurewen dungu mew?

¹³ Kiñe kristiano ñiwañpengele dulliay chem ñi chumal. Jesus feypi tati pu ñiwañpengelu elungekey tañi wüdayafiel ñi afkadi, fey ka che engu tañi niewtual. Welu tati ñiwañpengelu dullile tañi perdonayafiel ñi afkadi, wedalkalayay. Osea wiño trawütuy Gomer engu. Feychi wiñomelu Gomer kidu tañi ruka mu, Osea feypifi: ‘Kudumuwlayaymi kangelu wentru engu’. Osea ka kudumwelafi ta Gomer (Oseas 3:3, kimal dungu gringudungun mu). Welu rupalechi antü mu, eluwpelay tañi ka kiñe kudumuwal ñi domo engu. Tüfa adentuley tañi femün Chaw Ngünechen, kidu perdonafi tati pu israelche ka tañi pu che trokiniefi (Oseas 1:11; 3:3-5). Tüfa, ¿chem kimeltukeeiñmu ti kurewen dungu mu? Tati kulpanolu eluwle tañi ka kiñe kudumuwal ñi afkadi engu ñiwañpelu, pengelkünuay tañi perdonafiel (1 Korintio 7:3, 5, TNM). Fey wüla elungekelay tañi wüdayafiel ñi afkadi. Rupale tüfa, tati wentru ka ti domo yafüluwayngu ka kelluwayngu tañi yamnieafiel ti kurewen dungu, Chaw Ngünechen reke.

14. Chumngechi feypi 1 Korintio 7:10, 11, ¿chem rupayafuy kiñe kurewen?

¹⁴ Pu kristiano müley ñi yamnieafiel ti kurewen dungu, chumngechi ñi femken Jewba ka Jesus. Welu kiñeke mu, mufüke kristiano chi femlay, kulpafengelu am (Romanu 7:18-23). Feymu afmatukelaiñ papeltufiel mu chem ñi rupan kiñeke kristiano wünen siglo mu, Biblia feypi ñi kurewen-ngen mu engün rume wedake dungu rupamekefuy. Pablo wirintukuy ti pu kristiana “ngelay ñi püntüal tañi wentru mu”. Welu kiñeke kristiana inalay Pablo ñi ngülam. Biblia feypi: “Eymün pu niewlu, feypikünuwayiñ Ñidol tañi dungu, iñche ñi dungu no, domo ngelay ñi püntüal tañi wentru mu. Welu püntüle, ngelay tañi wiño fütangetual, püntünole kümelkawtupe tañi wentru engu. Kafey wentru ngelay ñi püntüal tañi domo mu” (1 Korintio 7:10, 11, TNM).

15. Kiñe kurewen rupamekele wedake dungu, ¿chem eluwküleayngu ñi femal? ¿Chumngelu?

¹⁵ Pablo feypilay chumngelu ñi püntüwün kiñeke kurewen. Welu kimiyiñ ti wentru ñiwañpelafi ñi domo. ¿Chumngelu? Femfule, tañi domo elungeafuy tañi wüdayaetew ka ñi niewal kangelu wentru engu. Pablo feypi kiñe domo püntüle tañi wentru mu “ngelay tañi wiño fütangetual, püntünole kümelkawtupe tañi wentru engu”. Feymu Chaw Ngünechen petu niewlu trokiniefi feychi kurewen, püntüwkülelu rume. Pablo feypi chem ñi chumal pu kurewen ñiwawnolu, chem weda dungu mu rupale rume engün, eluwlayay ñi püntüwal. Doy may eluway ñi kümelkawtual, tüfa tañi küme elkünutual ñi dungu ka kiñewküleal. Feymu “kellumuyu” piafuyngu tati pu longkolelu. Fey pu longkolelu pengelelafi Biblia tañi ngülam, welu doy ingkañpelayafi kiñekentu tati kurewen.

16. Pu kristiano niewkülelu kiñe che engu poyekenofilu ta Jewba, ¿chem müley ñi femal?

¹⁶ Welu kiñe kristiano niewkülele kiñe che engu poyenofilu ta Chaw Ngünechen, ¿chem rupayafuy? Weda rupale tüfachi kristiano tañi kurewen-ngen engu, ¿elungepeafuy may ñi püntüal tañi afkadi mu? Chumngechi taiñ ngüneduampeel, Biblia feypi re mülen mu pekan kudumuwün dungu wüdawafuy kiñe kurewen ley dungu mu. Welu Biblia feypilay chumngelu kiñe kurewen püntüwafuy. Pablo wirintukuy: “Kiñe feyentulechi domo kureyewle kiñe feyentulenochi wentru engu, fey ti wentru ayülele ñi müleael ta kisu engu, ngelay ñi wüdakünuafiel [elkünuafiel, TNM] feytichi wentru” (1 Korintio 7:12, 13). Tüfa ka femngechi feley famülke mu.

17, 18. Kiñeke kristiano weda rupamekelu tañi kurewen-ngen engu, ¿chumngelu dullingün ñi püntüwnoal engu?

¹⁷ Welu kiñeke “feyentulenochi” wentru tañi femün mu pengelkünuy kidu ‘ayülelay ñi müleael’ tañi domo engu. Awükakefi chi tañi pu che, feymu kuñiwün-ngechi dungu mu rupaleafuy tañi afkadi, latripayafuy kütu. Pikelay chi tañi eluafiel tañi duamnieel engün kam eluwkey ñi katrütuafiel tañi afkadi ñi poyewenoafiel ta Chaw Ngünechen. Femngechi rupale, tati kristiana rakiduamafuy “tañi wentru ayünolu tayu mür müleal trokikefiñ, ka dungu feypifule rume”, feymu kidu dulliafuy tañi püntüal tañi wentru mu. Welu kakelu kristiana ka femngechi rupalu dullingün ñi trür mülekayal tañi afkadi engu. Afeluwkelayngün ka yafüluwkeyngün tañi doy küme amuleal ñi kurewen-ngen. ¿Chumngelu chi?

¹⁸ Pu kurewen kimniey püntüwle engu, petu niewlu trokinieaeyew Jewba, fey kontuafeyew ti wedake dungu taiñ nütramkapeel, feymu dulli tañi püntüwnoal engu. Pablo feypi ka dungu ñi püntüwnoal pu kurewen, feypi: “Fey ti wentru feyentulenolu Ñidol mew lif mongen nietukey Ngünechen mew tañi kiñewkülen mew tati feyentulechi domo engu. Ka femngechi tati feyentulenochi domo, lif mongen nietukey tañi kiñewkülen mew tati feyentulechi wentru engu. Fey famngechi felenofule, tamün pichikeche ünunngechi wesake chengeafuy engün, welu rüf dungu mew, koneltuley engün Ngünechen ñi trokiñche mew” (1 Korintio 7:14). Fentren kristiano dullingün ñi mür mülekayal tañi feyentulenochi afkadi engu, wedake dungu rupamekelu rume. Kiñeke engün “müna kümey tañi afeluwnon” pikey ayüwkülen mu, tañi afkadi poyerpufilu am ta Jewba (papeltunge 1 Korintio 7:16; 1 Pedro 3:1, 2).

19. ¿Chumngelu fentren kristiano küme yeniey tañi kurewen-ngen engün?

¹⁹ Jesus wüli kümeke ngülam tati wüdawün dungu mew ka ti apostol Pablo tati püntüwün dungu mu. Mür ayüniefuyngu kom pu kristiano ñi yamnieafiel ti kurewen dungu. Famülke mu, wall Mapu püle müley fentren kristiano küme yenielu tañi kurewen-ngen. Eymi tami trawünche mu mülepelay fentren kümeke kurewen. Fentren wentru nor piwkeyefilu am ñi domo, poyefingün, fey tüfachi domo yamnieeyew engün fente tañi piwkeyeetew. Tañi femün mu engün kom tüfachi kristiano pengelkey pu niewlu yamnieafuy ti kürewen dungu. Rume fentren wentru ka domo pengelkey ñi rüfngen Chaw Dios tañi feypikünuel: ‘Feymew ta, wentru wichuay tañi chaw ka ñi ñuke mew, femngechi ñi wichu amayewael tañi domo engu, fey mür kiñe che reke müten ñi feleael’ (Efesio 5:31, 33). ¡Müna ayüwülmakeeiñmu tüfa!