Wechekeche, newentulemün ñi chaftuafiel ta Weküfü

1, 2. 1) Pu wecheke kristiano, ¿chumngechi wewtripamekey Weküfü ka pu wedake püllü mew? (Inaduamnge ti adentun ellaka mu mülelu). 2) ¿Chem inaduamaiñ tüfachi chillkatun mew?

APOSTOL Pablo nütrami taiñ felen weychafe reke. Feley, ¡weychamekefiyiñ rüfngeyechi kayñe! Welu tüfa engün pekan chengelay, weychamekefiyiñ ta Weküfü ka pu wedake püllü. Kom engün fentren warangka tripantu yeniey tañi weychafengen ka rumeñma pepili tañi weychayam. Feymu ramtuwafuiñ: “¿Tunte am ta pepilün iñche ñi wewafiel feychi pu newen-ngechi kayñe?”. Tüfa rakiduamfali, doyelchi may pu wechekeche mu. Welu, ¡fentren engün wewtripamekey! ¿Chumngechi? Jewba newentukueyew engün. Kafey kiñe weychafe reke adümuwkülelu, tukutuwkeyngün ‘kom ti weychawe mew Ngünechen tañi eluetew’, fey ñi pepikawküleal tati weychan mu (papeltunge Efesio 6:10-12).

² Entulu tüfachi nütram, Pablo rakiduampelafuy ti weychawe ñi niefel pu roma weychafe (Hecho 28:16). Tüfachi chillkatun mu, inaduamaiñ Pablo ñi nütram ka kiñeke wechekeche ñi feypin, pengelkelu chumngelu küdawngeafuy ñi tukutuwküleal kom tüfachi weychawe mew, welu chumngechi tüfa kümelkakeeyew engün.

3, 4. Ti rüf dungu Biblia mew mülelu, ¿chumngelu (chemu) trürümngeafuy tati weychafe ñi trariwe mew?

³ Biblia feypi: “Feymu, newentuwkülemün ka küme trarifimün reke tamün rongewe mew tati rüf dungu kiñe trariwe reke felelu, ka tukutuwaymün tati kuñiwtukukefilu ti piwke nor dungu mu” (Efesio 6:14, TNM). Pu roma weychafe ñi trariwe niefuy katrünke pañillwe, fey ñi ingkayafiel tati weychafe ñi rongewe ka ñi nengümnoal tati takun kuñiwtukukefilu ti piwke. Kiñeke trariwe ka nieyefuy küllpiwe ñi yengeal ti fütra kuchillu ka kiñe doy pichingelu. Fey küme pürokünungefule tañi trariwe, “pepikawkülen ñi weychayal” piafuy ti weychafe.

⁴ Feychi trariwe reke, ti rüf dungu taiñ kimürpukeel Biblia mew ingkakeeiñmew koylake kimeltun mu (Matew 24:24; Juan 8:31, 32). Ka doy piwkentukufiliyiñ ti rüf dungu Biblia mew mülelu, doy küdawtulayaiñ taiñ inayal Jewba tañi ngülam, tüfa tati takun kuñiwtukukefilu taiñ piwke (Salmo 111:7, 8; 1 Juan 5:3). Kafey doy küme adümliyiñ tati rüf dungu, doy küme pepikawküleaiñ ñi wiñoldunguafiel taiñ pu kayñe (1 Pedro 3:15).

 5. ¿Chumngelu newentuleaiñ taiñ rumel rüf dungual?

⁵ Falintukefilu am iñchiñ ti rüf dungu Biblia mew müleyelu, inakeiñ ñi feypin ka rumel rüf dungukeiñ. Weküfü doy ngünenkachekey fill koylake dungu mew. Kafey tati koyla dungu wedalkakefi tati koylatukelu ka tañi feyentukeetew (Juan 8:44). Feymu newentuleaiñ taiñ turpu koylatunoal, kulpafengeliyiñ rume (Efesio 4:25). Küdawngeafuy femal tüfa. Kiñe üllcha 18 tripantu nielu, Abigail pingelu, feypi: “Kiñeke mu ‘refalta rüf dunguken’ piafun, doy may duamfalngelu trokingele koylatual, fey ñi famtripayal kiñe weda dungu mu”. Welu Abigail newentukey ñi rumel rüf dungual, ka feypi chumngelu ñi femken: “Tañi rüf dunguken mu, küme rakiduam mu poyekefiñ ta Jewba. Ka tañi chaw, ñuke ka tañi pu weni manelfalngelu trokienew”. Kangelu lamngen 23 tripantu nielu, Victoria pingelu, feypi: “Rüf dunguliyiñ ka amuldunguliyiñ taiñ feyentun mu, kakelu ayentuafeiñmu. Welu fentren kümeke dungu entuafuiñ: fütra piwkengeaiñ, doy küme weniyenieafiyiñ ta Jewba, ka taiñ pu che ka pu weni yamnieaeiñmew”. ¿Ngüneduamimi ñi fente falin-ngen taiñ rumel trariluwal reke ti rüf dungu mu?

6, 7. Jewba tañi norngechi ngülam ka tati takun kuñiwtukukefilu ti weychafe ñi piwke, ¿chumngelu trürümngey?

⁶ Tati takun kuñiwtukukefilu ti weychafe ñi piwke, dewmangepelay müchamkülechi katrünke pañillwe mew, fey ñi küme impolafiel ti weychafe ñi rüku. Ka niefuy katrünke trülke ka fillke küllpiwe ñi pürolafiel feychi katrünke pañillwe. Ka femngechi felefuy llangka foro mu. Feymu ti weychafe newe küme nengümlafuy. Kafey duamniefuy ñi rumel küme adkünual tati katrün pañillwe nielu ñi takun. Welu tüfa, kuñiwtukukeeyew ñi piwke ka kake falinke trokiñ tañi kuerpu mu, ñi allfülnoetew kiñe fütra kuchillu kam kiñe wayki.

⁷ Feychi takun reke kuñiwtukukefilu ti weychafe ñi piwke, ka femngechi Jewba tañi norngechi ngülam kuñiwtukukefi taiñ “piwke” kam taiñ rüf chumngechi chengen (Proverbios 4:23). Rakiduamnge, kiñe weychafe turpu famentulayafuy tañi takun küme pañillwe dewmangelu, ñi doyümafiel kangelu newe kümenolu. Ka femngechi iñchiñ turpu famentulayafuiñ Jewba tañi feypin chem ñi kümen ka kümenon, fey ñi doyümafiel taiñ rakiduamkeel. Iñchiñ kim kuñiwtukukelafiyiñ taiñ piwke (Proverbios 3:5, 6). Feymu rumel ngüneduamaiñ taiñ chumngentukefiel Jewba tañi ngülam, fey ñi küme kuñiwtukungeal taiñ piwke.

 8. ¿Chumngelu inayaiñ Jewba tañi werkün dungu?

⁸ Tami inafiel Jewba tañi ngülam, ¿rakiduamkepeymi kiñeke mu tami lifrelenon kam pepi femnon kom tami ayünieel? Inaduamnge ñi feypin Daniel, kiñe weche 21 tripantu nielu: “Tañi pu kimeltufe ka tañi pu kompañ ayentukefenew ñi inakefiel mu Biblia tañi ngülam. Feychi mu che trokiwkelafun ka weda duamnagkefun”. Welu, ¿chum duamküley fewla? Kidu feypi: “Amulechi antü mu, ngüneduamürpun fente ñi kümelkakeetew inayal Jewba tañi ngülam. Kiñeke tañi pu wenifaluwkeetew eluwingün ñi drogatual, kakelu kolegiotuwelay. Müna weñangkülenew pefiel ñi weda yenieel engün tañi mongen. Jewba ingkakeeiñmew llemay”. Ka ngüneduamfali ñi rupan kiñe üllcha nielu 15 tripantu, Madison pingelu. Kidu feypi: “Müna küdawtuken ñi inayafiel Jewba tañi ngülam ka inanoafiel kakelu wechekeche tañi ayünieel”. Fey, ¿chumkey Madison? “Longkontukun tañi yenieel Jewba tañi üy” pi. “Kafey rakiduamün: ‘Weküfü ayüniey tañi femngechi weda femal. Tüfa kiñe wayki reke feley küpalu kidu mu’. Fey wewtripalu iñche feychi weychan mew, ¡müna ayüwün!”.

9, 10. ¿Chem tukutuwkeiñ okota reke felelu?

⁹ Biblia feypi: “Ka tukutuwaymün reke tamün okota ñi pepikawküleal tamün amuldungual tati kümeke dungu küpalnielu tüngün” (Efesio 6:15, TNM). Kiñe roma weychafe turpu konlayafuy weychan mu tukutuwnofule ñi okota. Feychi mu tati okota külanchüke trülke tukungekefuy, feymu küme dewmangefuy ka müna kümelkaniefuy ti weychafe ñi namun. Fey ti weychafe küme trekakefuy ka trayafkelafuy.

¹⁰ Femngechi okota kellueyew ti weychafe ñi küme tripayal weychan mu, welu tati okota taiñ yenieel kellukeeiñmew taiñ “amuldungual tati kümeke dungu küpalnielu tüngün” (Isaías 52:7; Romanu 10:15). Welu kafey duamnieiñ taiñ fütra piwkekünuwal. Femngechi rupay kiñe weche 20 tripantu nielu, Roberto pingelua (inaduamnge ti kimal dungu). Fey feypi: “Llükalefun ñi amuldungual kolegio mu. Yewelenew tati. Welu ‘¿chumngelu femngechi duamkülefun?’, piwün. Famülke mew welu, müna ayüwülenew amuldungufiel tañi pu kompañ”.

11. ¿Chumafuiñ taiñ küme duamal amuldungucheken mu?

¹¹ Pepikawülmi tami amuldungual, doy küme duamaymi. Fentren wechekeche ngüneduamkey ñi rume kellukeetew tüfa. Eymi kay, ¿chumngechi pepikawafuymi? Kiñe üllcha nielu 16 tripantu, Julia pingelu, feypi: “Rumel nieken fillke papil tañi mochila mu, ka küme allkütuñmakefiñ tañi pu kompañ ñi feypin ka feyentun. Femngechi ngüneduamün chem kelluafeyew engün. Feymu pepikawkülelu kay, nütramkakefiñ feychi dungu tañi kelluaetew”. Kangelu lamngen 23 tripantu nielu, Maria pingelu, feypi: “Duamtufiliyiñ ta kakelu ka küme allkütufiliyiñ, küme kimüñmayafiyiñ chem ñi chaftukefiel engün. Kafey ñi pepikawküleal iñche, papeltuken fillke kellu pu wechekeche ngealu. Fey ñi kelluafiel engün, kimeltulelkefiñ tañi pu kompañ kümeke dungu ñi mülen Biblia kam jw.org mu”. Feley, küme pepikawkülelmi tami amuldungual, küme tukutuwküleaymi reke tami okota.

12, 13. ¿Chuchi am kiñeke “üykülechi wayki” Weküfü mu küpalu?

¹² Biblia feypi: “Doyelchi may, nüafimün tamün mupiltun kiñe fütra eskudo reke felelu, femngechi tamün chongümafiel tati üykülechi wayki küpalu Weküfü mew” (Efesio 6:16, TNM). Ti roma weychafe yeniekefuy kiñe fütra eskudo. Tüfa fantelefuy ñi takuafiel ti weychafe tañi llangka foro ka tañi luku kütu. Ka kuñiwtukukefeyew ñi allfülnoaetew fütra kuchillu ka wayki.

¹³ ¿Chem “üykülechi wayki” ütrüftukuafeymu ti Weküfü? Kidu rakiduamelafeymu koylake dungu Chaw Jewba mew, fey ayükey tami famngechi rakiduamal: “Jewba piwkeyelaenew ka duamtulaenew rume”. Tüfa ñi feypin kiñe üllcha nielu 19 tripantu, Aida pingelu: “Rakiduamken Jewba tañi püntülen iñche mew, ka ñi küpa weniyenoetew”. Fey ¿chumkey Aida femngechi duamkelu? “Amulu iñche trawün mu, tüfa kelluenew ñi doy mupiltual. Kuyfi re anülekefun ka entukelafun ñi feypin, rakiduamkefun iney no rume ñi duamfiel chem tañi feypin iñche. Welu fewla pepikakefiñ chem ñi ngüneduamngeal trawün mu, ka newentulen tañi koneltual epuchi kam külachi rupa. Küdawtulu rume, müna küme duamelenew ñi femken. Kafey pu lamngen müna yafültukuenew. Wiñotulu ruka mu, ‘piwkeyeenew Jewba’ piken”.

14. Aida ñi rupan, ¿chem kimeltueiñmu?

¹⁴ Kiñe weychafe ñi eskudo rumel felekey. Welu chumngechi ngüneduampeiñ Aida ñi rupan mu, taiñ mupiltun rumel felekelay. Iñchiñ küme mupiltuafuiñ kam newe mupiltulayafuiñ. Tüfa taiñ dulliel (Matew 14:31; Luka 17:5). Feymu taiñ ingkayaetew taiñ mupiltun kiñe eskudo reke felelu, ¡eluwaiñ ñi newentuafiel!

15, 16. Taiñ maneluwün, ¿chumngelu kiñe kasku reke feley?

¹⁵ Biblia feypi: “Kafey, llowaymün tati kasku tamün montulaetew, ka tati fütra kuchillu küpalu Chaw Ngünechen ñi newen mew, fey tüfa Ngünechen tañi Küme Dungu” (Efesio 6:17, TNM). Kiñe roma weychafe tukutuwkefuy kiñe kasku ñi kuñiwtukuafiel tañi longko, pel ka tañi ange. Kiñeke mu, feychi kasku niefuy nüwel, femngechi ñi yengeal kuwü mew.

¹⁶ Ti weychafe niefuy tati kasku ñi kuñiwtukuaetew ti longko, ka femngechi ti maneluwün taiñ montulngeal kuñiwtukukeeiñmew taiñ rakiduam (Proverbios 3:21; 1 Tesalonisense 5:8). Ti maneluwün kellukeeiñmew taiñ longkontukual Chaw Dios ñi feypikünun, ka ngañwadnoal weda dunguñmaliyiñ (Hecho 24:15; Romanu 15:13; Ebrew 13:6). Ti weychafe re yelayafuy ti kasku tañi kuwü mew, welu may tañi longko mu tukutuwafuy. Ka femngechi taiñ kuñiwtukuaetew ti maneluwün, rüfngelu trokiafiyiñ, longkontukuafiyiñ llemay.

17. Weküfü, ¿chumngechi küpa welulkaeiñmew taiñ tukuwenoal ti kasku?

¹⁷ Weküfü, ¿chumngechi küpa welulkaeiñmew taiñ tukuwenoal ti kasku? Rakiduamnge chumngechi küpa welulkafi ta Jesus. Weküfü kimniefuy ta Jesus ñi Longko Ülmenküleal kom Mapu mew. Welu wüne kutrankangeafuy ka langümngeafuy. Fey wüla, üngümafuy Jewba ñi medin antü tañi longkokünuaetew. Feymu Weküfü feypifi ta Jesus ‘kiñe rupa müten poyeeli, pürüm eluaeyu tami ngünenieafiel kom Mapu’ (Luka 4:5-7). Ka femngechi, Weküfü kimniey Jewba taiñ eluaetew afmatufalchi kümeke dungu ti we Mapu mew. Welu petu üngümküleiñ kam rupamekeiñ chi wedake dungu mew. Feymu Weküfü feypikakeeiñmew reke taiñ küme rupaleal fewla. Kidu ayükey taiñ doyümafiel taiñ küme felen ta Chaw Ngünechen ñi Ngünenien mu (Matew 6:31-33).

18. ¿Chumngechi pengelaiñ taiñ ngünenkanoetew Weküfü?

¹⁸ Fentren wecheke kristiano ngünenkalaeyew Weküfü. Kiñe üllcha 20 tripantu nielu, Karina pingelu, feypi: “Küme kimnien Chaw Dios ñi Ngünenien müten tañi norümtual kom ti wedake dungu”. Tañi maneluwün, ¿chumngechi kellueyew ñi küme rakiduamal ka küme femal? Tüfa kellueyew ñi rakiduamtukual tañi apümkangeal ti müleyechi dungu Mapu mu. Feymu Karina doyümkelay ñi nieal küme educacion kam küme küdaw, doy may wülkey tañi tiempo ka newen ñi küdawülafiel ta Jewba.

19, 20. ¿Chumafuiñ taiñ doy adümafiel ti Biblia?

¹⁹ Pu roma weychafe niekefuy kiñe fütra kuchillu epu suke puwlu peno. Feychi pu weychafe fill antü adümkantukefuy, feymu rumeñma pepilkefuy tañi fütra kuchillu ñi weychayam.

²⁰ Apostol Pablo feypi kiñe fütra kuchillu reke ñi felen Ngünechen ñi Küme Dungu. Jewba elueiñmew tüfa, welu iñchiñ müley taiñ adümafiel, femngechi küme elkünutual taiñ rakiduam kam küme kimeltual taiñ feyentuken ramtungeliyiñ (2 Korintio 10:4, 5; 2 Timotew 2:15). ¿Chumngechi doy adümuwafuymi? Sebastian, 21 tripantu nielu feypi: “Kake kiñeke kapitulo ñi papeltuel, dulliken kiñe versikulo tañi wirintukuafiel. Femngechi ngülümniekefiñ ñi doy ayünieelchi texto”. Tüfa kellueyew ñi doy küme kimafiel Jewba ñi rakiduam. Daniel ka feypi: “Petu papeltufilu ta Biblia, dulliken kiñeke versikulo ñi kelluafiel pu che amuldungun mu. Ngüneduamün pu che tañi küme llowetew, pefilu engün am iñche ñi piwkeyefiel Biblia ka tañi eluwkülen ñi kelluafiel engün”.

21. ¿Chumngelu llükalayafiyiñ ta Weküfü ka pu wedake püllü?

²¹ Iñchiñ ngüneduampelu kay kiñeke wechekeche ñi rupan, ngelay taiñ llükayafiel ta Weküfü ka pu wedake püllü. Rüfngey ñi newen-ngen, welu Jewba doy newen-ngey. Ka rumel mongelelayayngün. Püresuntukungeayngün ka wedalkachelayayngün warangka tripantu ngüneniele Kristo, fey wüla apümkangeayngün (Apokalipsi 20:1-3, 7-10). Kimfiyiñ taiñ kayñe, tañi ngünen ka chem ñi küpa femün. Jewba ñi kellun mew, ¡newentuleaiñ ñi chaftuafiel taiñ kayñe!