Pu longkolelu ka konakechi kellukelu: inayentuafimün ta Timotew

RUPACHI tripantu mu, fentren peñi wall Mapu mu longkolerpuy kam konakechi kellulerpuy trawünche mu. Femngechi femülmi, ayüwkülepelaymi tami elungen feychi falin küdaw tami doy küdawelafiel ta Jewba ka pu peñi ka lamngen.

Welu rume rakiduamküleafuymi chi, doy may fentren peñi ka femngechi duamkeyngün. Kiñe weche longkolelu, Jason pingey, feypi: “We longkolerpulu iñche, pepilnoafilu ti küdaw trokiwkülefun”. Rüfkünu may, Moyse ka Jeremia pepilnoafilu ti küdaw ñi eluetew Jewba trokiwkefuyngu (Éxodo 4:10; Jeremías 1:6). Eymi kay, ¿ka femngechi rakiduamkeymi? ¿Chem kelluafeymu tami femngechi rakiduamnoal, fey küme enturpual tami küdaw? Fentren kümeke dungu kimürpuafuymi Timotew mu (Hecho 16:1-3).

Timotew niekefulu 20 tripantu peno, eluwi ñi amuldunguyawal Pablo engu. Feymu Timotew mülefuy ñi kimeltuafiel ka ngülamtuafiel kakelu che, welu fente wechengelu am pepilnoafilu tüfachi küdaw trokiwkefuy chi (1 Timotew 4:11, 12; 2 Timotew 1:1, 2, 7). Femngefule rume, kidu eluwi ñi küme enturpual tañi küdaw. Fey rupalu mari tripantu Pablo feypifi pu filipoche: “Maneluwkülen ta Ñidol Jesus mew, ka ayülen pürüm tamün werküleluwafiel ta Timotew, [...] ngenolu am ta iney no rume ka femngechi rakiduam nielu” (Filipense 2:19, 20).

¿Chumngelu am fente inayentufali ta Timotew? Ngüneduamaiñ kayu dungu ñi longkolen mu.

1. Timotew rüf duamniekefuy ta che. Pablo feypifi pu kristiano mülelu Filipo waria mu Timotew ñi rüf duamnieetew engün (Filipense 2:20). Timotew ayüniefuy pu peñi ka lamngen ñi püntütripanoal Chaw Jewba mu, feymu ayüwünkechi wülkefuy tañi tiempo ka newen ñi kelluafiel engün.

Taiñ peñi William yeniey doy 20 tripantu tañi longkolen, fey kidu ngülamtukefi pu peñi we longkolerpulu: “Piwkeyeafimi pu peñi ka lamngen. Falin-ngey tami ngüneduamal ti küdaw trawünche mu, welu doyümnieafimi tami kelluafiel kom pu peñi ka lamngen”. Feymu pu longkolelu inayentulayafi feychi wentru amulkefilu ta mikro. Kidu re ayünieafuy pürüm puwal paradero mu, welu üngümkelafi pu che ñi pürayal ta mikro mu.

2. Timotew doyümniekefuy ñi küdawelafiel ta Jewba. Pablo feypi Timotew trürlay kakelu pu che mu, kidu engün re “kintukey kisuke müten tañi küme feleael, welu Jesucristo tañi küme dungu no” (Filipense 2:21). Pablo ngüneduami pu peñi ka lamngen mülelu Roma mu ñi falintukefiel engün ñi dungu müten, fey doyümniekelafuyngün ñi küdawelafiel ta Jewba. Welu Timotew femngechi femkelafuy. Doy may, feypingelu ñi doy küdawal Chaw Ngünechen ñi dungu mu, Isaia reke feypi: “¡Tüfa mu mülen! ¡Werküen llemay!” (Isaías 6:8).

Eymi kay, ¿chumafuymi tami küme adkünual eymi tami duam ka tami küdaw trawünche mu? Wüne, inayaymi Pablo ñi ngülam: “Kimaymün tamün dulliael tati doy kümechi dungu” (Filipense 1:10). Fey doyümnieafimi küdawelafiel ta Jewba. Epu, famentuafimi feyti müte falinochi dungu, re ürkülafeymu müten. Pablo feypifi ta Timotew: “Famtripange llemay tati wechekeche ñi illutukeelchi wesake dungu mew, fey lif mongen nieaymi, mupiltun ka piwkeyewün ka küme tüngün” (2 Timotew 2:22).

3. Timotew fütra küdawkefuy Jewba ñi dungu mu. Pablo küme dunguy ta Timotew mu: “Kimnieymün [...] tayu küdawken ta iñchiw tayu kimelafiel tati werken kimelün dungu, kisu kelluniekeenew ta iñche, tañi fotüm reke” (Filipense 2:22). Feley llemay, Timotew chofüngelafuy. Fey fütra küdawkefuy Pablo engu, feymu doy küme weniyewingu.

Famülke mu fentren küdaw müley Jewba ñi trokiñche mu. Tüfachi küdaw rume ayüwülaeymu ka kelluaeymu tami doy weniyeafiel pu peñi ka lamngen. Feymu may eluwaymi inayafiel Biblia ñi feypin: “Kake antü doy küme küdawküleaymün [...] Ñidol ñi dungu mew” (1 Korintio 15:58).

4. Timotew inaniekefuy tañi kimürpuel. Pablo wirintukulelfi ta Timotew: ‘Eymi ta küme inaniefimi iñche tañi kimeltun, ka chumngechi mongen ñi nieel ta iñche, ka ñi ayütukeelchi dungu ñi femael tañi mupiltun mew, ka tañi ñochi duampiwkengen, ka ñi piwkeyechen ka iñche ñi yafüluwün’ (2 Timotew 3:10). Feley, Timotew inaniekefuy tañi kimürpuel, feymu elungey doy küdaw (1 Korintio 4:17).

Kümeafuy tami weniyeafiel ka inayentuafiel kiñe longkolelu doy adümuwün-ngelu. Taiñ peñi Tom yenielu fentren tripantu ñi longkolen, feypi: “Kiñe longkolelu doy adümuwün-ngelu duamnieenew ka kimeltukefenew. Iñche feypikefuiñ ñi ngülamtuaetew, fey inaniekefun ñi feypin. Feymu rakiduamwelan ñi pepilnoafiel ti küdaw”.

5. Timotew eluwkefuy tañi doy pepiluwal. Pablo ngülamtufi ta Timotew: “Newentuwkülenge tami maneluwküleael ta Ngünechen mew” (1 Timotew 4:7). Rakiduamnge tüfa, kiñe weche wentru amulu rume kolegio mu tañi kimeltungeal, ka duamniey tañi newentual ñi doy pepiluwal. Fey Pablo ka feypifi ta Timotew: “Newentulenge tami chillkatuafiel ti trawün che mew tati Wirin Chillka, tami yafültukuafiel ka tami kimeltuafiel tati pu peñi ka lamngen engün. [...] Fente küme kom ngüneduamfinge tüfachi dungu, femngechi tañi kom peael engün chumngechi tami doy küme adümniefiel tati dungu” (1 Timotew 4:13-15).

Eymi ka newentuafuymi tami doy pepiluwal. Feymu küme chillkatuafimi Biblia, ka eluwküleaymi tami kimal ka inanieal kom ñi feypikeel Jewba ñi adkünuelchi trokiñche. Kafey rume kidutu maneluwlayaymi, kuñiwün-ngey tüfa. Feymu rakiduamlayaymi tami adümkeel fentren dungu, fey “duamfalngelay ñi chillkatual chem ñi chumal fewla” pilayaymi. Doy may Timotew reke, “küme kuñiwtuwnge ka tami kimeltun mew tami elukefiel ta kakelu” (1 Timotew 4:16).

6. Timotew maneluwkefuy Ngünechen ñi newen mu. Pablo ngülamtufi ta Timotew ñi küme femürpual ñi küdaw, fey feypifi: ‘Ngünechen ñi newen mülelu iñchiñ mew, fey ñi kellun mew, küme adniefinge Ngünechen tami maneletewchi dungu’ (2 Timotew 1:14). Rüfkünu may, Timotew duamniefuy ñi adnieaetew Chaw Dios ñi newen.

Taiñ peñi Donald yeniey fentren tripantu ñi longkolen, fey feypi: “Pu longkolelu ka konakechi kellukelu falintunieay ñi weniyekefiel ta Jewba. Femngechi femle, doy newenkülerpuayngün. Fey ngillatufile ta Jewba ñi eluaetew ñi newen ka eluwle ñi adnieaetew ñi chumken, rüf kümelkayafi pu peñi ka lamngen” (Salmo 84:7; 1 Pedro 4:11).

Fentren we longkolelu ka konakechi kellukelu eluwküley ñi doy küdawelafiel ta Jewba, eymi reke, rume ayüwün-ngey tüfa. Taiñ peñi Jason taiñ nütramkapeel nga, feypi: “Tañi longkolen mu kimürpun fentren dungu, fey pepilnoalu trokiw-welan. ¡Rüf ayüwmakeenew tañi küdaw, fey müna falintukefiñ!”.

Eymi kay, ¿eluwaymi tami doy küdawelafiel ta Jewba? Inayentufilmi ta Timotew, eymi ka kümelkayafimi kom tami pu peñi ka lamngen.