Quimafiyiñ ta Santiago, Jesús tañi peñi

 1. ¿Chem piafuiñ Santiago tañi familia mu?

SANTIAGO fei ta Jesús ñi peñi. Tañi familia poyequefui Jehová.⁠b Santiago tañi chau ca tañi ñuque, José engu María, rume piuqueyequefui Jehová ca com piuque mu cüdahuelquefingu. Ca tañi hunen peñi Mesías ngerpui. Rume cüme familia niequefui ta Santiago.

 2. Santiago, ¿chemu afmatulefui Jesús mu?

² Santiago fentren dungu mu afmatupelafui Jesús mu (Mat. 13:55). Por ejemplo, Jesús 12 tripantu nielu, cüme quimniefui Jehová ñi dungu. Feimu tati pu quimeltufe Jerusalén mu mülelu lelilehueingün fente tañi quimün Jesús (Luc. 2:46, 47). Cafei Santiago engu Jesús trür cüdauquepelafuingu chi. Femfule engu, Santiago cüme quimniepelafui tañi peñi ñi chumngen. Taiñ peñi Nathan Knorr feipiquefui: “Eimi cüdaulimi quiñe che engu, fentren cümeque dungu quimürpuafuimi quisu meu”.⁠c Cafei Santiago ngüneduampelafui chumngechi ñi tremcülerpun ca ñi quimchengerpun ta Jesús. Ca ngüneduampelafui Jesús ñi saquinieteu Chau Dios ca tati pu che (Luc. 2:52). Com feitachi dungu tañi peel Santiago, feimu Santiago, ¿Jesús tañi hunen discipulo piafuiñ? Femlai llemai.

 3. Jesús miyaupalu Mapu mu, ¿chumi Santiago?

³ Jesús miyaupalu Mapu mu, Santiago feyentuquelafui quisu meu (Juan 7:3-5). Santiago chi feipi ta Jesús tañi locon (Mar. 3:21). Cafei, María pemefilu ta Jesús tañi pültrülen ti orcon mamüll mu, feipingelai Santiago tañi mülen ta fei mu (Juan 19:25-27).

 4. ¿Chem epu dungu inaduamaiñ?

⁴ Rupachi antü mu, Santiago feyenturpui Jesús mu ca loncolerpui ti trahunche mu. Tüfachi troquiñ mu quimürpuaiñ epu dungu Santiago mu. 1) Taiñ ñom piuquengeal. 2) Taiñ cüme quimeltuchefengeal. Peafiyiñ.

 5. Peufaluhueteu Jesús, ¿chem eluhui ñi femal Santiago?

⁵ ¿Chumül am Santiago Jesús tañi discipulongerpui? Deu huiñomongetulu ta Jesús. Feichi mu Jesús “peufaluutufi ta Santiago, ca itrocom ti pu apostol” (1 Cor. 15:7). ¿Chem cümeque dungu llohui? Santiago mülerquefui tati pu apostol engün ñi llohual Chau Ngünechen ñi nehuen (Hech. 1:13, 14). Rupachi antü mu Santiago coneltui tati cuerpo gobernante mu (Hech. 15:6, 13-22; Gál. 2:9). Cafei, petu ñi puunon ti 62 tripantu, Jehová adniefi ta Santiago ñi huirintuculelafiel tati pu dullin cristiano. Famülque mu, itrocom iñchiñ quelluqueiñmu Santiago ñi carta (Sant. 1:1). Rupachi antü mu, Santiago lai. Ananías, Anás tañi fotüm, langümfaleyu. Santiago eluulu müten tañi serfiafiel Jehová, turpu püntütripalai quisu mu.

 6. Santiago ca tati pu loncolechi religioso, ¿chem dungu mu trürümfal-lafuingün?

⁶ Santiago ñom piuquengefui. Santiago femlai tañi femquefel pu loncolechi religioso. ¿Chumngelu feipiafuiñ? Santiago cüme quimlu Jesús Dios ñi Fotüm ngen, feyentui. Pu loncolechi religioso quimfuingün Jesús tañi huiñomongeltufiel ta Lázaro, huelu pilaingün ñi feyentual Jesús Dios tañi Fotüm ngen. Doi mai eluhuingün tañi langümafiel ta Jesús ca Lázaro (Juan 11:53; 12:9-11). Cafei huiñomongetulu ta Jesús, feitachi pu loncolechi religioso ayülafuingün ñi quimal ta caquelu ñi huiñomongetun (Mat. 28:11-15). Pu loncolechi religioso mallma piuquengefuingün, feimu famentufingün ta Jesús.

 7. ¿Chemu cümefui taiñ mallmangenoal?

⁷ ¿Chem quimeltun entuafuiñ? Famentuafiyiñ taiñ mallma piuquengen ca eluhuaiñ taiñ enseñayaeteu ta Jehová. Raquiduamnge tüfa: nieliyiñ quiñe huesa cutran, huesalcañmayafeiñmu taiñ piuque. Ca femngechi mallma piuquengeliyiñ, müna huesalcayafeiñmu, fei feyentuhuelayafuiñ ta Jehová. Müna quimfalngefui Jesús ta Dios tañi Fotüm ngefel ca tañi elueteu tañi nehuen. Huelu fente tañi mallmangen feitachi loncolechi religioso, feyentulaingün Jesús mu (Juan 12:37-40). Tañi huesa piuquengen mu engün, elungelafuingün tañi rumel mongeleal (Mat. 23:13, 33). Eluucüleaiñ taiñ adnieaeteu Biblia ca Chau Dios tañi nehuen. ¿Taiñ chumal? Taiñ quelluaeteu taiñ cüme chengeal, cüme raquiduam nieal ca taiñ cüme dullial chem femal (Sant. 3:17). Santiago tañi ñom piuquengen mu, eluhui tañi quimeltuaeteu ta Jehová. Huelu ca femngechi tañi ñom piuquengen mu cüme quimeltuchefengerpui. Feula peafiyiñ tüfa.

 8. ¿Chem quelluafeiñmu taiñ cüme quimeltuchefengerpual?

⁸ Santiago müte nielafui educacion. Pu loncolechi religioso feipiquefuingün Pedro ca Juan ñi müte nienon educacion, feimu nehue falintuquelafuingün. Ca femngechi troquipelafingün ta Santiago (Hech. 4:13). Femfulu rume, Santiago cüme quimeltuchefengerpui. Famülque mu, Santiago reque iñchiñ müte nielaiñ chi ta educacion, huelu Chau Dios ñi nehuen mu ca tañi troquiñche mu cüme quimeltuchefengerpuafuiñ. Inaduamafiyiñ Santiago chumngechi ñi quimeltuchequen ca chem quimeltuafeiñmu iñchiñ tañi femün.

 9. ¿Chumngechi enseñachequefui Santiago?

⁹ Santiago feipiquelai quimfalnochi dungu, tañi quimeltuqueel adümfalngefui. Feimu, pu che tañi allcütueteu quimafuingün tañi femal engün. Peaiñ chumngechi pengeli Santiago rupaliyiñ huesaque dungu mu, lladcülcaulayaiñ. Feipi: ‘Fei iñchiñ quimnieiñ ñi rume ayüucülen ta tüfei engün tañi nehuentun meu yafüluulu ca cutrancaulu. Eimün allcüqueimün chumngechi ñi ngenoafeluhun cutrancahun meu ta Job ca quimnieimün ñi cümelcaeteu ta Jehová afpulu ñi cutrancahun, fei Jehová am rume cuñillchequelu ca cutranduamyechequelu’ (Sant. 5:11). ¿Ngüneduamimi? Santiago tañi quimeltuel Chau Dios ñi huirintucuel mu tuhui. Fei raquiduamelfi tati pu che rupan mu huesaque dungu mu, püntütripanole engün Jehová mu, quisu cümelcayaeyu Job reque. Tañi quimeltuel ta Santiago adümfalngefui, femngechi tañi püramyenoaeteu tati pu che, doi mai Jehová tañi püramyengeal.

10. Enseñacheliyiñ, ¿chumngechi inayentuafuiñ ta Santiago?

¹⁰ ¿Chem quimeltun entuafuiñ? Enseñacheliyiñ, quimfalngepe taiñ feipifiel ca Biblia mu tripape taiñ quimeltufiel. Quimeltucheliyiñ, pengel-layafiyiñ pu che fente taiñ quimün-ngen, doi mai pengelcünuaiñ Jehová tañi quimün-ngen ca fente taiñ duamnieteu (Rom. 11:33). Taiñ femal tüfa, com taiñ quimeltuchequen tripape Biblia mu. Por ejemplo, quiñe taiñ estudiante huesaque dungu rupafule, ramtuafeiñmu: “Eimi cai, ¿chumafuimi?”. Iñchiñ feipilayafiyiñ iñchiñ taiñ femafel, doi mai pengelcünuafuiñ ñi femün quiñeque che mülelu Biblia mu. Ca feipiafuiñ tañi chem raquiduamquen ta Jehová ca tañi chum duamquen. Femngechi femliyiñ, ti estudiante cüme raquiduamai ñi chumal, femngechi taiñ ayühulmanoaeteu iñchiñ taiñ piuque, doi mai ñi ayühulafiel ñi piuque ta Jehová.

11. ¿Chem huesaque dungu femquefui quiñeque cristiano? Santiago, ¿chem ngülamtueyu engün? (Santiago 5:13-15).

¹¹ Santiago cüme quimniefui ñi ruparupangen tañi pu peñi ca pu lamngen. Feimu ngülamtufi tañi chumal engün. Quiñeque cristiano cüdautuquefui ñi inayafiel Chau Dios ñi dungu (Sant. 1:22). Caquelu dullintuquefui tati pu cüme felen che, nielu ta plata (Sant. 2:1-3). Ca quiñeque cristiano müte ngüneuquelafui tañi quehun engün (Sant. 3:8-10). Femfulu rume engün feitachi huesaque dungu, huelu Santiago maneluucülefui tañi femhuenoal engün. Santiago piuqueyenquechi ngülamtufi engün huelu ca feipifi ñi huesa femmequen engün. Santiago ca yafültucufi pu nehue maneluucülenolu Jehová mu, femngechi tañi feipiafiel engün pu loncolelu tañi quelluaeteu (papeltunge Santiago 5:13-15).

12. Cüme raquiduamaniefiliyiñ taiñ pu estudiante, ¿chumaiñ?

¹² ¿Chem quimeltun entuafuiñ? Quimtucuaiñ ñi rupamequen pu estudiante ca cüme raquiduamanieafiyiñ. Alünque estudiante cüdautuquei ñi inayafiel ñi chem pin ta Biblia (Sant. 4:1-4). Alüñmayafui tañi elcünual tañi huesaque huimtun tañi niequefel engün ca cüdautuafuingün tañi inayafiel ñi chumngen ta Jesús. Iñchiñ ca nehuencünuhuafuiñ, Santiago reque, taiñ feipiafiel pu papeltuquelu Biblia ñi cüme elcünutual ñi mongen engün. Cafei maneluucüleaiñ Jehová müten cüpalafi com pu ñom piuquengechi che ca eluafi nehuen tañi cüme elcünutual ñi mongen (Sant. 4:10).

13. ¿Chem quimfalcünui Santiago? (Santiago 3:2).

¹³ Santiago quimfalcünui tañi culpanchengen. Santiago feipilai: “Iñche ta Jesús ñi peñi, loncolen trahunche mu, feimu doi mülefui tañi falintungeal” pilai. Santiago doicülelu troquiuquelai tañi caque pu peñi mu, feimu feipifi engün: “Iñche ñi saquin pu peñi ca lamngen” (Sant. 1:16, 19; 2:5). Santiago raquiduamel-lafi ta caquelu tañi huelulcauquenofel, doi mai feipi ‘com iñchiñ ta rume culpaqueiñ’ (papeltunge Santiago 3:2).

14. ¿Chumngelu cümei taiñ feipial taiñ culpanchengen?

¹⁴ ¿Chem quimeltun entuafuiñ? Loncontucuaiñ, com iñchiñ huelulcauqueiñ. Raquiduamlayaiñ taiñ doicülen taiñ pu estudiante mu. Raquiduamelfiliyiñ taiñ turpu huelulcauquenon, huesa duamafuingün. Feipiafuingün: “Iñche turpu poyelayafun ta Jehová” piafuingün. ¿Chumngechi quelluafuiñ engün ñi femngechi raquiduamnoal? Feipiafuiñ taiñ estudiante iñchiñ quiñeque mu ca cüdautuqueiñ taiñ inayal Biblia ñi ngülam. Ca feipiafuiñ chumngechi Jehová taiñ quellueteu taiñ cüme elcünutual taiñ mongen. Femngechi quellufiliyiñ engün, “iñche ca serfiafun Jehová” piaingün tañi raquiduam mu.

15. Santiago feipilu quiñe adentun, ¿adümfalngepei mai? (Santiago 3:2-6, 10-12).

¹⁵ Santiago feipilu quiñe adentun, adümfali ca puhui pu che ñi piuque mu. ¿Chem quellueyu tañi femngechi enseñacheal? Chau Dios tañi nehuen. Ca quimürpupelai Jesús tañi adentun mu. Ti fillque adentun ñi huirintucuel Santiago tañi carta mu, adümfali (papeltunge Santiago 3:2-6, 10-12).

16. Quimeltuliyiñ, ¿chumngelu am feipiafuiñ cümeque adentun?

¹⁶ ¿Chem quimeltun entuafuiñ? Cüme adentucünuaiñ taiñ quimeltuqueel. Feipiliyiñ cümeque adentun, quelluafiyiñ tati pu che ñi penieafiel reque tañi quimeltungeel, femngechi tañi piuquentucunieafiel. Jesús rumel cüme adentucünuquefui tañi quimeltuquefiel pu che. Tañi peñi Santiago ca femngechi inaqueyu tañi femün. Cüpalechi parrafo mu, peaiñ quiñe adentun ñi feipin Santiago. Ca peaiñ chumngelu am müna cümei ti adentun.

17. Ti adentun ñi feipin Santiago, ¿chumngelu rume cümei? (Santiago 1:22-25).

¹⁷ (Papeltunge Santiago 1:22-25). Rume cümefui tati adentuncülechi espejo ñi feipin ta Santiago. ¿Chumngelu? Hune, Santiago cüme quimniefui tañi quimeltual. Epu, Santiago pengeli quiñe adentun pu che cüdautulai tañi quimal engün. Raquiduamnge: quiñe che lelihui espejo mu, tünai loncolei huelu chumlai rume tañi cüme adcünutual tañi lonco. ¿Cümepeafui mai tañi femün? Femlayafui. Ca femngechi iñchiñ papeltuliyiñ Biblia, ngüneduamafuiñ taiñ huesalcamequen. Huelu chumnoliyiñ rume taiñ cüme elcünutuafiel, cümelai. Fei tüfa tañi cüpa quimeltuel Santiago: re papeltulayaiñ Biblia, mülei taiñ inayafiel ñi feipin.

18. Petu taiñ feipinon quiñe adentun, ¿chem cüla dungu mülei taiñ femal?

¹⁸ Cüla dungu meu inayentuafuiñ ñi femün ta Santiago, femngechi taiñ feipial cümeque adentun. ¿Chem dungu chi? Quiñe, cüme dulliaiñ quiñe adentun nüucülelu taiñ quimeltuel. Epu, dulliaiñ quiñe adentun pu che cüdautulayai ñi adümafiel. Ca cüla, quimfalcünuaiñ taiñ quimeltuel. Quimnoliyiñ chem adentun taiñ feipial, quintuafuiñ tati Índice de las publicaciones Watch Tower. Feita mu, cheu ñi feipin “Ejemplos” peafuiñ fillque adentun taiñ feipial. Loncontucuaiñ: quimeltuliyiñ, feipiaiñ adentun taiñ quimfalcünual ti doi falinque dungu müten. Com iñchiñ ayüqueiñ taiñ cüme quimeltuchefengeal, huelu taiñ saquiaeteu pu che no, doi mai taiñ quelluafiel engün coneltual Jehová ñi troquiñche mu.

19. ¿Chumngechi pengelelafuiñ taiñ pu peñi ca pu lamngen taiñ piuqueyeniefiel?

¹⁹ Santiago niequefui quiñe peñi culpafengenolu, fentren cümeque dungu quimürpui quisu mu. Famülque mu, iñchiñ nieiñ fentren peñi ca fentren lamngen culpanchengeingün rume, huelu fentren cümeque dungu quimürpuafuiñ fei engün mu. Ca femngechi iñchiñ pengelelafuiñ engün taiñ piuqueyeniefiel. ¿Chumngechi? Trahuhuaiñ taiñ cüme rupayal, inayentuafiyiñ tañi cüme femquen engün ca quiñentrür cüdaucüleaiñ taiñ quimeltucheal. Inayentuafiyiñ Santiago tañi chumngen, tañi chumquen ca tañi chumngechi quimeltuchequen. Femliyiñ, püramyeafiyiñ Jehová ca quelluafiyiñ tati pu che ñi fülconpayal Jehová mu.